Ina, kholu giphaso nya gyadi gya guta khiyo ga “Nungungulu, oyu a thaveleyago ava va vbedego tshivba.”​ — 2 Vakorinto 7:6.

•   Tshivba. Nungungulu a ngu gu ‘thaveleya ni gu ninga tshivba’, na si giri khu gu gu duseya sigaradzo sago satshavbo, ganiolu khu gu hlamula milombelo yago tepo u gombeyago gwaye u lomba tshivba nyo emisane ni sigaradzo. (Vafilipi 4:13) Tiyisega gu khuwe uye dongise gu gu engiseya, kholu Bhibhiliya yari khiyo: ‘Jehovha womo vbafuvbi ga vale myonyo yawe yi vbisegago, a vbanyisa avo mihefemulo yawe yi khuvekidego.” (Ndzimo 34:18) Khu lisine, Nungungulu a ngapwa gu guliya gwago nyo vbwete gu phaswa ambari wo ba u tandrega gu ganeya edzi u dzi pwago khidzo khu malito.​ — Varoma 8:26, 27.

•   Siyeyedzo sa vambe. Mulovi nyo khaguri nya Bhibhiliya gombede ga Nungungulu khuye: “Khu guetani nya nondrwa nya sigaradzo, nyi ngu lila gwago.” Egi gi phasidego muembi yoyu nya dzindzimo gu dwana ni gugaradzega gwaye, gu dundruga gu khuye Nungungulu kha hi rwegi nandru. Ganiolu, a di khuye ga Nungungulu: “Nari pwani wa gu pima khu siwono sathu, khu mani a nga hadza gu dugelela Pfhumu? Aholu avbo gwago u ngu kodza gu divalela avo va gu ningago githawo.” ​— Ndzimo 130:1, 3, 4.

•   Gutumba. Vbavbandze nyo hi thaveleye ga tepo yeyi basi, Nungungulu a ngu tumbisa gu dusa satshavbo si hi vangeyago gugaradzega. Tepo a na tadzisago gitumbiso gegi, ‘silo sa gale [gupata ni gugaradzega nya mapimo] kha hi na nga si dundruga, ambari gu si alakanyela gambe.”​ — Isaya 65:17.

 Wona esi: Ambari olu Dzifakazi dza Jehovha dzi khodwago gu khidzo Nungungulu a ngu hi phasa, dzi ngu dzumeya gambe gu thumwa madwali xipitali, nya nga gugaradzega nya mapimo (depressão). (Marko 2:17) Ambari ulolo, kha hi ningi mawonelo nya mathumelo nya madwali nyo khaguri nyo kongome; muthu ni muthu gu vbwetega a dzi hungeya abune esi a na girago.