Liphuvbo nya guage tshivba eyi Nungungulu a yi thumisago. (Mikeya 3:8; Luka 1:35) Nungungulu a gu thumisa liphuvbo nya guage khu gu rumeya tshivba yaye ga wevbini wulanga gasi gugola gwaye gu girega yaye. — Ndzimo 104:30; 139:7.

 Umo nya Bhibhiliya lito li gu khilo “liphuvbo” lo duga khavba nya lito nya Gihebheru li gu khilo ruach ni eli nya Gigreki li gu khilo pneuma. Gutala nya dzitepo malito yaya, ma gu thula tshivba ya Nungungulu mwendro liphuvbo nya gu age. (Genesi 1:2) Ambari ulolo Bhibhiliya yi ngu thumisa lito leli ga simbe silo nya nga:

•   Hefemulo. — Habhakuka 2:19; Gutuledwa 13:15.

•   Liphuvbo. — Genesi 8:1; Johane 3:8.

•   Tshivba yi girago muthu a vbanya. — Joba 34:14, 15.

•   Gudogoreya nyo gire gilo nyo khaguri. — Mitengo 14:24.

•   Vathu hi gu mba kodza gu va wona, nya nga Nungungulu ni dzingilozi. — 1 Dzipfhumu 22:21; Johane 4:24.

 Malito yaya yatshavbo mo yeyedza silo hi si kodzigo gu si wona, anilo liphuvbo nya guage “la gu fana ni phuvbo hi si kodzigo gu li wona nigu li gu nani tshivba.” — Dicionário Expositivo de Palavras do Novo Testamento ya William Vine.

 Bhibhiliya ya gu fananisa liphuvbo nya guage la Nungungulu ni “mandza” mwendro “dzinyala.” (Ndzimo 8:3; 19:1; Luka 11:20; fananisa ni Matewu 12:28.) Gufana ni muvati a thumisago mandza ni dzinyala dzaye gasi gu gira thumo waye, Nungungulu a ngu thumisa liphuvbo laye nya gu age gasi gu gira:

•   Mafu ni ndzadzi. — Ndzimo 33:6; Isaya 66:1, 2.

•   Bhibhiliya. — 2 Pedro 1:20, 21.

•   Mithumo nyo hlamadzise yi giridwego khu sithumi nyo tumbege sa Nungungulu ni thumo nya gu tshumayele. — Luka 4:18; Mithumo 1:8; 1 Vakorinto 12:4-11.

•   Makhalelo nya yadi ma yeyedzwago khava va engisago Nungungulu. — Vagalatiya 5:22, 23.

Liphuvbo nya guage khandri muthu

 Tepo Bhibhiliya yi fananisago liphuvbo nya guage la Nungungulu ni “mandza”, “dzinyala” mwendro “hefemulo” yo yeyedza gu khiyo liphuvbo nya gu age khandri muthu. (Ekisodha 15:8, 10) Mandza nya muvati kha ma thumi nya mba na givili ni mapimo. Khu ndziya nya gu fane, liphuvbo nya guage la Nungungulu kha li thumi basi a gu li ruma. (Luka 11:13) Bhibhiliya yo bwe yi fananisa liphuvbo nya guage ni mati, gukhodwa ni guti. Isoso so yeyedza gu khiso liphuvbo nya guage khandri gilo gi vbanyago. — Isaya 44:3; Mithumo 6:5; 2 Vakorinto 6:6.

 Bhibhiliya yo ganeya gu khiyo Nungungulu khu Jehovha, gyanana gya Nungungulu khu Jesu Kristu, ganiolu kha li ganeyi khu lina nya liphuvbo nya guage. (Isaya 42:8; Luka 1:31) Tepo Sitefane a nga wona giwoniso nyo hlamadzise ndzadzini, uye a di wona vathu vavili nasiri vararu. Bhibhiliya yari khiyo: “Sitefane na tade khu liphuvbo nya guage a di khedza ndzadzini, a wona wudhumo wa Nungungulu a bwe a wona gambe Jesu na emide khu nyamudye ga Nungungulu.” (Mithumo 7:55) Sitefane a di phaswa khu liphuvbo nya guage gasi a wona esi si nga girega.

 Malipha: Guya khu 1 Johane 5:7, 8 nya Bhibhiliya ya Rei Jaime liphuvbo nya guage muthu nigu lo gira girandre nya Vararu Moyo.

 Lisine: Ga 1 Johane 5:7, 8 nya Bhibhiliya ya Rei Jaime yo ganeya gu khiyo “ndzadzini, Papayi, Lito ni liphuvbo nya guage gilo gimwegyo. Nigu sa siraru so ningeya wufakazi mafuni.” Ganiolu vagevisisi vo ganeya gu khavo kha ma lova khu mupostoli Johani, kha ma nga ba ma yede gu manega omu nya Bhibhiliya. Muhevbudzi wa univhersidhadhe Bruce M. a lovide gu khuye: “Malito yaya khandri lisine nigu kha ma nga ba ma yede gu manega omu nya Testamenta nya Yiphya.” — Comentário Textual sobre o Novo Testamento Grego.

 Malipha: Liphuvbo nya guage muthu kholu Bhibhiliya yo ganeya khiyo khu ndziya nyo fane yo ba yi ganeya khu muthu.

 Lisine: Milowo yo ganeya khu liphuvbo nya guage nga khatshi muthu, ganiolu isoso kha si thuli gu khiso liphuvbo nya guage muthu. Bhibhiliya yi ngu ganeya khu ndziya nyo fane yo ba yi ganeya khu wugengeyi, lufo ni gighoho. (Mavingu 1:20; Varoma 5:17, 21) Khu giyeyedzo, Bhibhiliya yo ganeya gu khiyo wugengeyi wu nani “mithumo” ni “sanana” yo bwe yi ganeya gu khiyo gighoho gi ngu songa gi bwe gi hi gira hi manega ni gudogoreya nya gu vivbe. — Matewu 11:19; Luka 7:35; Varoma 7:8, 11.

 Khu ndziya nyo fane, tepo mupostoli Johani a nga phindra malito aya Jesu a ma ganedego a di ganeya khu liphuvbo nya guage nga “muphasedzeyi” a na ningeyago wufakazi, a hi thangeya, a ganeya, a engisa, a huweleya, a dhumisa a bwe a hi hakha. O ba ganeya khu lito li gu khilo “muphasedzeyi” a di gu thumisa lito nya Gigreki li gu khilo “uye.” (Johane 16:7-15) Guya khu nayo nya maganelelo nya Gigreki la gu thumiswa go ba gu ganedwa khu mwama. Tepo mupostoli Johani a nga ganeya khu liphuvbo nya guage a thumiside lito “wona” li gu mba yeyedza gu khilo mwama mwendro nyamayi. — Johane 14:16, 17.

 Malipha: Olu vathu va bhabhatiswago khu lina nya liphuvbo nya guage so yeyedza gu khiso liphuvbo nya guage muthu.

 Lisine: Dzimbe dzitepo Bhibhiliya ya gu thumisa lito li gu khilo “lina” gasi gu emeya wuthangeyi mwendro tshivba. (Dhewuteronome 18:5, 19-22; Esiteri 8:10) Si ngu fana ni gu ba u thumisa malito ma gu khayo “khu lina nya nayo” aya ma gu mba yeyedza gu khayo nayo muthu. Khu gu ba muthu a bhabhatiswa khu “lina nya” liphuvbo nya guage so thula gu khiso a ngu dzumeya gu khuye Nungungulu a gu thumisa liphuvbo nya guage gasi gu gira gugola gwaye. — Matewu 28:19.

 Malipha: Vapostoli va Jesu ni Makristo nya gupheye va di gu khavo liphuvbo nya guage li diri muthu

 Lisine: Bhibhiliya ni mambe matimu kha ma ganeyi isoso. Enciclopédia Britânica yo ganeya gu khiyo: Sihevbudzo si ganeyago gu khiso liphuvbo nya guage muthu wa ndzadzini si khugede avba nya tsawa nyo khaguri wa Constantinopla khu mwaga nya 381. Isoso si giregide hwane nya 250 myaga vapostoli vatshavbo na va fude.