Khandri gighoho gu seya wadwa khu gu pimeledza. Bhibhiliya yari khiyo vhinyu giningwa gi tago khu ga Nungungulu, gi girago womi wu engedzeya gu tsakisa. (Ndzimo 104:14, 15; Muhevbudzi 3:​13; 9:7) Bhibhiliya yi ngu dzumeya gambe gu khiyo vhinyu yi ngu phasa gu manega ni womi nya wadi. ​— 1 Thimoti 5:​23.

 Tepo Jesu a nga ba ari mafuni, sede vhinyu. (Matewu 26:29; Luka 7:​34) Ga gilewugio gyaye nyo tidwe ngudzu, uye patide ni gu vbindrugedza mati ma khala vhinyu avba nya festa nya kazameto. ​— Johane 2:​1-​10.

Sigaradzo si vangwago khu gu seya ngudzu wadwa

 Ambari olu Bhibhiliya yi gu mba himbedzeya gu seya wadwa, iyo yi ngu himbedzeya gu seya ngudzu ni gu leva. Khu kharato, Mukristo a hungago gu seya wadwa gu vbwetega a seya khu gu pimeledza. (1 Thimoti 3:8; Tito 2:​2, 3) Bhibhiliya yi ngu ninga sighelo nya singi nya gu hi si seyi guvbindra pimo.

•   Gu seya ngudzu wadwa si nga tandregisa muthu gu pimisa silo nya sadi si bwe si mu gira a si manegi ni gupima nya gwadi. (Mavingu 23:29-​35) Muthu o ba a levide kha engisi nayo wowu nya Bhibhiliya nya gu dzi ‘ningeye wurumba waye a khale mhamba nya guvbanye, nya gukatege, nya gunengedzise Nungungulu.” ​— Varoma 12:1.

•   Gu seya ngudzu si nga hi dusa hwanga ni gu hi “songa mapimo”​ mwendro godogoreya nyo gire silo nya sadi. — Hoseya 4:​11; Vaefeso 5:​18.

•   Gu seya ngudzu wadwa si nga hi vangeya wusiwana ni madwali.​ — Mavingu 23:21, 31, 32.

•   Gu seya ngudzu wadwa ni gu leva kha si tsakisi Nungungulu.​ — Mavingu 23:20; Vagalatiya 5:​19-​21.

So thula ginani gu seya ngudzu wadwa?

 Muthu a sede ngudzu wadwa a gu ba a vega womi waye mwendro wa vambe mhangoni. Khu guya khu Bhibhiliya, gu leva kha si thuli basi gu muthu a thega vbavbatshi, ganiolu so pata gu a si dzi kodzi ni gu dzi kodza, a ganeleya silo nya mba pwala ni gu dhedherekeya. (Joba 12:25; Ndzimo 107:27; Mavingu 23:29, 30, 33) Ambari vale va gu mba vboha omu nyo leve, va nga tshuka va pfhala khu gu seya ngudzu, khu hwane va thegeya sigaradzoni.​ — Luka 21:34, 35.

Siemo si lombago gu diga gu seya

 Bhibhiliya yi ngu ganeya gambe khu siemo esi Makristo ma yedego gu gira khu gu diga gu seya wadwa:

•   Abari gu ho seya wadwa womo li tshunganeyago livhalo laye.​ — Varoma 14:21.

•   Abari gu ho seya wadwa ho ndranga nayo nya litigo.​ — Varoma 13:1.

•   Abari gu kha hi ngu kodza gu seya khu gu pimeledza. Ava va gu sivilelo mwendro vamaleveni gu vbwetega sigula gigaradzo gyogyo khu khamba wakone. ​— Matewu 5:​29, 30.