Bhibhiliya yari khiyo Nungungulu khandruye a nga vanga Dhiyabhulosi. Wulangani nya isoso, a di vanga ngilozi yi nga vbindrugedza yi khala Dhiyabhulosi. Na yi gu ganeya khu Nungungulu, Bhibhiliya yari khiyo: “Thumo waye wu vbelede, kholu dzindzila dzaye dzatshavbo dzi lulamide! Nungungulu tumbegide, avbo gwaye gu mwalo gukanganyisa; Uye khwa lisine ni gululama.” (Dhewuteronome 32:3-5) Khu guya khu malito yaya, hi nga vboheya mahegiso nyo khethu Sathane Dhiyabhulosi a diri mweyo nya dzingilozi nyo vbeleye ni gululama ya Nungungulu.

 Ga Johane 8:44, Jesu ganede khuye Dhiyabhulosi ‘kha simama gu ema lisineni’, si thulago gu khiso Sathane a diri givangwa nyo tumbege nya mba na gihoso.

 Ganiolu, kha nga esi sivangwa nyo gengeye sa Jehovha, ngilozi yi nga vbindrugedza yi khala Sathane yi di tshulegide gu dzi hatheya yabune esi nya sadi ni esi nyo vivbe. Khu gu ba ngilozi yeyi yi hathide gu wugeya Nungungulu ni gu bwe yi sengedzeya patwa nyo pheye nya vathu gu wugeya navo Nungungulu, ngilozi yeyi yi khala Sathane, si thulago “Muwugeyi.” — Genesi 3:1-5; Gutuledwa 12:9.