Muphya moyo nyo pwani khu Will o ganeya gu khuye “gu leri Bhibhiliya kha si tsakise”, khu lisine isoso so girega “wa gu ba u si yiti ndziya nya yadi nya gu leri Bhibhiliya.”

 Ina u ngu dzina guti sihalo gasi o gola gu leri Bhibhiliya? Ndrima yeyi yi na gu phasa.

•  Ninga womi esi u si lerigo

•  Gira wugevisisi!

•  Esi vambe vaphya va ganeyago

 Dzipwi na wu gu patega avba nya mahungu u lerigo. Edzi u nga girago khidzo:

1.   Hatha mahungu nyo khaguri omu nya Bhibhiliya u ma tsakeyago gu leri. Hatha gambe mahungu ma ganeyago khu dziivhangeli mwendro u leri mabhuku ma ganeyago khesi Jesu a nga gira tepo a nga ba a romo mafuni, u nga hatha gambe gu engiseya gu lerwi nya Bhibhiliya kha nga drama omu nya jw.org.

2.   Leri mahungu u ma hathidego. U nga leri nuri wenga khu lito nya gu khugege mwendro nuri nyi dzipari ni valongo vago. Moyo gwanu a nga khala narrador vambe va khala dzi personagem dzakone.

3.   Wona edzi u nga phasegago khidzo khu dzipontu dzi landreyago:

   •   Gira dzidhezenho nyo khaguri dzi yeyedzago esi u si lerigo u bwe u gira sasamedzo nya esi u nga si dhezenhar gasi u si pwisisa gwadi.

   •   Gira dzigrafico mwendro dzi dhiyagrama. Khu giyeyedzo, tepo u lerigo matimu ya muthu nya gu tumbege, yeyedza gu makhalelo ni esi a nga si gira si mu phaside kharini gasi a si kodza gu kategiswa khu Jehovha.

   •   Bhula ni vambe vathu gasi uti esi va si pimisago, gira siwudziso vathu va pategago ga mahungu yoyo.

   •   Dundrugeya khu silo nyo hambane. Pimisa khu muthu a hungidego makungo nya mba yadi, dundrugeya esi si ga hadzi girega nari gu khatsi uye giride silo khu ndziya nya gu hambane. Pimisa khu tepo eyi Pedro a nga bomba Jesu. (Marko 14:66-72) Ginani egi Pedro a ba yede gu gira na si gu bombi Jesu?

   •   Zama gu lova esi u si pimisago ga esi u si hevbulago, khu mahungu nya esi si nga dugeleya vathu va gale ni esi u nga si hevbulago ga mahungu yoyo.

 Wa gu zama gu pwisisa satshavbo esi u si hevbulago, u na mana silo nya gu hlamadzisi nya gu gima u di nga si si mani. Adzina saye isoso si nga vbindrugedza esi u si pimisago mayelano khu mahungu u ma hevbudego.

 Khu giyeyedzo fananisa Matewu 28:7 ni Marko 16:7.

•    Khu ginani Marko a nga ganeya gu khuye nya mba hweya Jesu a na wonega ga vapostoli vaye ni ga Pedro?

•  Mawonelo: Marko a diri mwalo tepo silo sesi si nga girega, si nga gira nari a di tshamusedwa mahungu yaya khu Pedro.

•  Dzithomba nya lisima dzi sihidwego: Jesu a di gu si vbweta ngudzu gu wona gambe Pedro. Khu ginani isoso si nga mu tsakisa ngudzu Pedro? (Marko 14:66-72) Jesu a mu yeyedzide kharini Pedro gu khuye a diri pari nya lisine? U nga gira kharini gasi u khala pari nya lisine nga Jesu?

 Wa gu dzipwa na wu gu patega omu nya mahungu u lerigo u bwe u gira dzipeskiza si na gu phasa ngudzu kholu gu leri gwago nya Bhibhiliya gu na tsakisa!