“Eni nyi di nga zama gu leri Bhibhiliya, Ganiolu, nya gu wona edzi yi gu yi khongolo khidzo nya gu vbeya tshivba!” — Briana.

 Ina anuwe wa gu dzipwa kharato? Ndrima yeyi yi na gu phasa!

•  Khu ginani nyi yedego gu leri Bhibhiliya?

•  Nyi nga leri kharini Bhibhiliya?

•  Esi vambe vaphya va ganeyago

 Ina u ngu vbeya tshivba wa gu dundrugeya khu gu leri Bhibhiliya? O bari gu ina, u nga garadzegi si ngu pwisisega. Khu lisine Bhibhiliya libhuku li gu na ni tanga nya 1000 dzipajina ni gu vbindra li tadego khu dziletra nya dzidugwana nigu nya mba na Dzifotu — khu kharato kha si fani ni gu sixitiri omu nya televhizori mwendro gu wona dzivhidhiyu omu nya interneti!

 Nga pimisa khu ndziya yeyi: Wa gu mana khofri nya gu tiye ya gale, ina na wu si garadzegi khu gu vbweta guti esi si gu romo ndrani gwayo?

 Bhibhiliya yi ngu fana ni khofri yeyi, iyo yi na ni dzithomba nya lisima dzi nga gu phasago gu

•   Hunga makungo nya yadi

•   Gu manega ni wupari nya wadi ni vavelegi vago

•   Gu mana dzipari nya dzadi

•   Ni gu emisana ni gu garadzega

 Sa gu kodzega kharini gu libhuku la gale li hi phasa muhuno wa tshigu? Khu gu “Milowo yatshavbo yi lovidwe na yi gu thangedwa khu liphuvbo la Nungungulu.” (2 Thimoti 3:16) Isoso sa gu thula gu khiso wusingalagadzi nya Bhibhiliya wa guta khiyo ga Nungungulu.

 Gu pheya: leri Bhibhiliya gu khugeya ga pajina nya gu pheye kala ga pajina nya gu hegise. Isoso si na gu phasa gu pwisisa satshavbo esi Bhibhiliya yi ganeyago. Gu na ni dzindziya nya dzingi u nga dzi thumisago gasi u leri Bhibhiliya yatshavbo. Olu hi na bhula khu siyeyedzo sivili:

•    U nga leri mabhuku yatshavbo nya 66 ma gomogo omu nya Bhibhiliya khu sasamedzo wakona, gu khugeya khu Genesisi kala Gutuledwa.

•    U nga leri Bhibhiliya guya khu ndziya eyi silo si nga girega khidzo.

 Mawonelo: Apêndice A7 nya Tradução do Novo Mundo yo ganeya khu sasamedzo nya silo si nga dugeleya Jesu tepo a nga ba a romo omu mafuni.

 Nya wuvili: Hatha Mahungu ma yelanago ni gigaradzo u emisanago nagyo. Khu giyeyedzo:

•   Ina u ngu tsakeya gu manega ni dzipari nya lisine? Leri matimo ya Jonatane ni Dhavhidhe. (1 Samuweli, sipimo18 - 20) Khu gu landreya thumisa gihungwana nya mahungu gi gu khigyo Como encontrar amigos leais” gasi u wona esi u na si hevbulago ga matimo yaya.

•   Ina u ngu tsakeya gu mana tshivba gasi u si kodza gu pala silingo? Leri matimu ya Josefa u wona edzi uye a nga pala khidzo gilingo. ( Genesi gipimo 39) khu gu landreya thumisa gihungwana nya mahungu gi gu khigyo “Como resistir à tentação...Josè — parte 1” ni “Falsamente acusado! Josè — parte 2” gasi u wona esi u na si hevbulago khu matimo yaya.

•   Ina u ngu tsakeya guti edzi nombelo wu nga gu phasago khidzo? Leri matimu ya Nehemiya. (Nehemiya, gipimo 2) Khu gu landreya thumisa gihungwana nya mahungu gi gu khigyo “Deus respondeu à sua oração” gasi u wona esi u na si hevbulago ga matimo yaya.

 Mawonelo: Tepo u lerigo Bhibhiliya zama gu khala ga wulanga nya gu rule gasi u si kodza gu vega gu pima.

 Nya wuraru: Hatha mahungu mwendro ndzimo u leri, khu gu landreya u wona edzi u nga ma thumisago khidzo womini gwago. Hwane nya gu ba u leride dzi gire siwudziso sesi:

•    Khu ginani Jehovha a nga lova mahungu yaya omu nya Bhibhiliya?

•    Mahungu yaya mo nyi embeya ginani khu makhalelo ya Jehovha ni magirelo yaye nya silo?

•    Nyi nga ma thumisa kharini womini gwangu?

 Mawonelo: Thumisa ndrima nya gihevbulo nya Tradução do Novo Mundo gasi u tshisa dzivhidhiyu, dzi mapa ni simbe silo si na gu phasago gasi u wuyedwa khu gu hevbula gwago nya Bhibhiliya.