Dzipeskiza nyo khaguri, dzo ganeya gu khidzo vaphya nya vangi va America va ngu gombeya, Ganiolu, vadugwana gwawe va si kodzago gu gombeya matshigu yatshavbo. Kha si kanakanisi go ba vambe vbakari gwawe na va gu dzi wudzisa gu khawo: ‘Ina nombelo gilo egi gi hi girago hi dzipwa gwadi mwendro gilo nya gu vbindre isoso?’

•  Ginani nombelo?

•  Ina kamo Nungungulu a ngu engiseya?

•  Nyi nga ganeya khu ginani omu nya milombelo yangu?

•  Esi vambe vaphya va ganeyago

 Nombelo ndziya nya gu ganeye ni oyu nya gu khugege ngudzu. Nga dundrugeya khesi Bhibhiliya yi ganeyago! Jehovha khugegide gu vbindra sivangwa ni vathu vatshavbo, Ganiolu, “uye womo vbafuvbi ga moyo ni moyo wathu.” (Mithumo 17:27) Khu lisine, Bhibhiliya yi ngu hi gireya konvhite nyo tsakise: “Hidzimeyani ga Nungungulu, uye a na hidzimeya gwanu.” — Jakobe 4:8.

 Hi nga hidzimeya kharini ga Nungungulu?

•   Mweyo nya dzindziya khu gu gombeya — tepo u gombeyago wo ganeya ni Nungungulu.

•   Yimbe nya dzindziya gu leri Bhibhiliya — tepo u lerigo Bhibhiliya Nungungulu o ganeya “nago.”

 Mabhulo yaya — gu gira nombelo ni gu leri Bhibhiliya — ma nga gu phasa gu manega ni wupari nyo tiye nyi Nungungulu.

 “Lithomo nya likhongolo ngudzu gu bhula ni Jehovha — oyu a khugegidego.” — Jeremiya

 “Gu bhuleya Jehovha edzi nyi dzipwago khidzo sa gu nyi gira nyi dzipwa na nyiri vbafuvbi gwaye.” — Miranda

 Ambari na wu gu khodwa ga Nungungulu — u bwe u gira nombelo — si nga gu garadzeya gu dzumeya gu uye a ngu gu engiseya. Ganiolu, Bhibhiliya yo ganeya gu khiyo “Uwe u yingisago milombelo.” (Ndzimo 65:2) Iyo gambe yi ngu gu kutsa gu “rinya gwaye sigaradzo sago.” Khu ginani? “Khugu uye a ngu gu khataleya”  — 1 Pedro 5:7.

 Nga dundrugeya khesi: U ngu dzi ninga tepo gasi u ganeya ni pari yago? U nga gira sasimweso khu Nungungulu. Bhula naye matshigu yatshavbo, thumisa lina laye Jehovha, omu nya milombelo yago. (Ndzimo 86:5-7; 88:9) Bhibhiliya yi ngu gu kutsa gu “gombeya tepo yatshavbo.” — 1 Vatesalonika 5:17.

 “Nombelo mabhulo nyi manegago nawo ni papayi wangu wa ndzadzini, avbo nyi nga mu bhuleyago satshavbo si gu romo monyoni gwangu.” — Moises.

 “Eni nyi ngu bhuleya satshavbo Jehovha, gu fana ni edzi ni bhulago khidzo ni mamayi wangu mwendro pari yangu nya yikhongolo.” — Karen.

 Bhibhiliya yo ganeya gu khiyo: “Mu nga garadzegi khu gilo, wulangani nya isoso, tepo yatshavbo gombeyani ga Nungungulu mu mu lomba gu khenu a mi thangeya ga satshavbo mu girago, nigu mu bongeni tepo yatshavbo.” —  Vafilipi 4:6.

 Ina hi nga ganeya khu sigaradzo sathu tepo hi gombeyago? Ina! Khu lisine, Bhibhiliya yo ganeya gu khiyo: “Vega womi wago ga PFHUMU Nungungulu, uye a na gu sayisa; gima kha na dzumedzisa muthu nya gululame gu a thega vbavbatshi.” — Ndzimo 55:22.

 Lisine gu, tepo hi gombeyago kha hi yeli gu ganeya basi khu sigaradzo sathu. “Nyamahegyane moyo nyo pwani khu Chantelle o ganeya gu khuye, wu di hadzi gu mba khala wupari nya wadi nari khatshi nyo khaleya basi gu lomba silo Jehovha. “Nyo pimisa gu kheni, gu na ni lisima gu pheya khu gu bonga nigu nyi na ni silo nya singi gasi gu mu bonga Jehovha.”

 Ga dundrugeya khesi: Gu na ni silo si gu girago u vbweta gu bonga Jehovha? U ngu dundruga silo siraru si nga gu girago u bonga Jehovha muhuno?

 “Ambari silo nya sidugwana nya nga gu wona gifilori nyo mbure si nga gu gira u vbweta gu bonga Jehovha.” — Anita.

 “Ga dundrugeya khu givangwa mwendro livhesi nyo khaguri nya Bhibhiliya li gu tsakisago u bonga khu isoso.” — Brian.