1 Pedro 3:1-22
3 Khu gu fana, enu vanyamayi, dzi vegeni vbavbatshi ga vama vanu gasi abari gu vama vanu kha va engisi lito va ndrindrwa khu mavbanyelo yanu, si si lombi gu va embeya gilo,
2 kholu va na ba va wonide mavbanyelo yanu nya yadi ni githawo gyanu nya gikhongolo.
3 Mu nga dzi mburiseyi khu vbavbandze basi, khu gu luga mindzudzu, ni gu ambala dzioru ni sombo nyo dhure,
4 ganiolu mburiseyani gambe muthu wanu, a gu edzi mu gu idzo khu monyoni, mu khala vathu nyo rule mu bwe mu dzi vbevbugisa a gu gudzimburisa gu si wonegigo ogu gu gu ga lisima ngudzu ga Nungungulu.
5 Kholu khidzo va nga ba va dzi mburiseya khidzo vanyamayi nya guage va gale va nga ba va tumba Nungungulu; va di gu dzi vega vbavbatshi ga vama vawe,
6 gu fana ni Sara a nga ba a engisa Abrahama, a mu rana gu khuye pfhumu. Enu mu na ba muri sanana saye mwa gu simama gu gira silo nya sadi ni gu bwe mu si dzumeyi gu padwa khu hwanga.
7 Anenu vama, pharani gwadi* vagadzi vanu mu va ninga githawo kholu avo va gu fana ni sombo nya wukheta, gasi gu milombelo yanu yi si segedwi kholu anavo va na mana womi ni enu.
8 Khu guhegisa, mwatshavbo gu vbwetega mu hengeya mapimo ya mamowo, mu dzi vega wulangani ga mumbe, mu manega ni lihaladzo nya wundruye, mu pweyana wusiwana mu bwe mu dzi nogisa.
9 Mu nga bweledzeyini guvivba khu guvivba mwendro guvala khu guvala. Ganiolu, bweledzeyani khu makategwa, kholu khiso mu nga ranedwa iso gasi mu ta mana makategwa.
10 Kholu “oyu a golago womi ni gu bwe a vbweta gu vbanya khu gutsaka yede gu woneleya lidimi laye gasi li si ganeyi wuvivbi ni gu bwe a woneleya likana laye gasi li si liphi.
11 Nigu gambe a na dige wuvivbi a gira silo nya sadi; a na vbwetedzeye gurula a bwe a vbanya khugo.
12 Kholu maho ya Jehovha ma gu khedziseya va nyo lulama nigu dzindzeve dzaye dza gu engisa milombelo yawe, ganiolu Jehovha a gu pfhurareya avo va girago silo nyo vivbe.”
13 Khu lisine, mwa gu ba mu dzi garadzeya gu gira silo nya sadi, khu mani a na mi gireyago wuvivbi?
14 Tsakani ambari mwa gu tshaniswa khu kotani nya gululame. Ganiolu, mi nga thavi esi va si thavago* nigu mu nga garadzegi.
15 Rungudzani Kristo myonyoni gwanu kholu uye Pfhumu yanu nigu khalani na mu dongide gu hlamula oyu a na vbwetago guti gighelo nya gutumba mu gu nago, ganiolu girani isoso khu gurula ni githawo nya gikhongolo.
16 Simamani ni livhalo nya ladi gasi gu tepo yatshavbo vathu va ganeyago guvivba khenu va khala dzitshoni khu kotani nya mavbanyelo yanu nya yadi nga valandreyi va Kristo.
17 Tshukwana gu tshaniseka khu kotani nyo gire silo nya sadi abari gu isoso gugola ga Nungungulu, guvbindra gu tshaniseka khu gu ba u gira silo nyo vivbe.
18 Ambari Kristo, muthu nyo lulame, fude gumogo basi a feya sighoho sa vathu nya mba lulama; giride isoso gasi a mi yisa ga Nungungulu. Songidwe nari muthu nya nyama, ganiolu a wuswa nari liphuvbo.
19 Nigu nari khu givili nya liphuvbo a di ya tshumayela dzingilozi dzi nga ba dzi khothedwe,
20 edzi dzi nga mba engisa teponi eyi Nungungulu a nga ba a vireya khu gulaphisa-monyo matshigoni ya Nowa na gu ngo vbahwa litaro, eli li nga vbulugisa 8 vathu* basi matini.
21 Gubhabhatiswa gu ngu gimbileyana ni silo sesi nigu anugo gu ngu mi vbulugisa (nasiri khu gu dusa ndzilo givilini, ganiolu khu gu gombeya ga Nungungulu gasi a mi ninga livhalo nya ladi), khu gu wuswa ga Jesu Kristo.
22 Uye womo nyamudye ga Nungungulu kholu hongode ndzadzini nigu ningidwe gu fumeya dzingilozi, wufumu ni dzitshivba.
Mitshamuselo ya vbavbatshi
^ Mwendro: “pwisisani.”
^ Mwendro adzina: “mu nga thavi mwa gu thusedzedwa khavo.”
^ Mwendro: “8 mihefemulo.”
