Filemoni 1:1-25
1 Eni Pawulo, gibotshwa khu kotani ya Kristo Jesu, ni ndriyathu Thimoti, nyi ngu gu loveya uwe Filemoni, ndriyathu nya gigodwa, githumi gikhwathu
2 ni ndriyathu Afiya, ni Arikipo a thumago khu gudzigaradza nga lisotshwa gumogo ni ethu, ni ga libandla li tshanganago ndrangani gwago, kheni:
3 Hi ngu mi suveya wuwadi nya wukhongolo ngudzu ni gurula si tago khiyo ga Nungungulu, Papayi wathu, ni ga Pfhumu Jesu Kristo.
4 Tepo yatshavbo nyi ngu bonga Nungungulu wangu tepo nyi gu khumbugago omu nya milombelo yangu,
5 kholu nyi ngu simama gupwa maningano ni gukhodwa gwago ni lihaladzo u gu nalo khu Pfhumu Jesu ni vatshavbo va nya guaga.
6 Nyi ngu gombeya gasi gukhodwa ogu uwe ni ethu hi gu nago gu gu kutsa guti silo satshavbo nya sadi esi hi gu naso khu kotani ya Kristo.
7 Kholu nyi tsakide nigu nyi thaveledwe tepo nyi ngapwa na gu ganedwa khu lihaladzo lago, kholu ndriyangu, u tangadziside myonyo ya va nya guaga.
8 Ambari olu nyi gu na ni fanelo kheyi ga Kristo nyo gu rume gu gira esi si gu sadi,
9 nyo wona nari tshukwana gu gu lomba khu kotani nya lihaladzo u gu nalo, kholu eni Pawulo olu nyi gumbide, nigu nyi womo pasoni khu kotani ya Kristo Jesu.
10 Nyi ngu gu lomba khu kotani ya gyanana gyangu Onesimo, oyu nyi khadego papayi waye na nyiri pasoni.
11 Gale a di si phasi gilo gwago, ganiolu olu a ngu phasa gwago ni ga eni.
12 Nyi ngu mu bweledza gwago. Ina! Uye kamo, nyi mu golago ngudzu.
13 Nyi di gu dzina gu kheni a simama eno ni eni gasi a nyi thumeya nga edzi u nga hadzi nyi thumeya khidzo olu nyi khothedwego khu kotani nya mahungu nya yadi,
14 ganiolu kha nyi vbweti gu gira gilo nya mba dzumeledwa khuwe gasi u si giri wuwadi wago khu gu gurumedzwa, ganiolu u wu gira khu gugola gwago.
15 Adzina khiso si giridego a gu tutuma khu tepo nyo khaguri gasi a wuya u ta khala naye tepo yatshavbo,
16 nasiri kha nga gumbi, ganiolu kha nga ndriyago nyo golege, nyi mu golago ngudzu, ngudzu-ngudzu uwe a gu ndriyago khu nyamani ni Pfhumuni.
17 Nya gu ba nyiri pari yago, mu hakhe gwadi nga edzi u nga hadzi nyi hakha khidzo.
18 Ganiolu, a gu ba a gu ghohede mwendro a gu ba a gu dhevha gilogyo, nyi na gu livba.
19 Eni Pawulo nyi ngu gu loveya khu mandza yangu gu kheni: Nyi na gu livba. Kha si lombi kala nyi gu embeya gu kheni u ngu nyi dhevha ngudzu.*
20 Ina wandruye, nyo vbweta gu kheni u nyi phasa kha nga mulandreyi wa Pfhumu; tangadzisa monyo wangu khu kotani ya Kristo.
21 Nyi ngu tumba gu kheni u na dzumeya gilombo gyangu, khu kharato nyo gu loveya kholu nyi ngu dziti kheni u na gira silo nyo vbindre esi nyi gu lombago.
22 Nigu dongiseya wulanga gasi nyi ta khala avbo kholu nyi na ni gutumba nyo kheni khu kotani nya milombelo yanu nyi na tshudwa nyi wuya gambe gwanu.
23 U ngu losedzedwa khu Epafrasi nyi khothedwego naye pasoni khu kotani ya Kristo Jesu.
24 U ngu losedzedwa gambe khu sithumi-khwathu Marko, ni Arisitariko, ni Dhemasi ni Luka.
25 Wuwadi nya wukhongolo wa Pfhumu Jesu Kristo wu na manege ni liphuvbo mu li yeyedzago.
Mitshamuselo ya vbavbatshi
^ Khu gukongoma: “u ngu nyi dhevha womi wago.”
