Judha 1:1-25
1 Eni Judha, githumi gya Jesu Kristo, nyi gu ndriye wa Jakobe, nyi ngu loveya vale va ranidwego va haladzwago khu Nungungulu, Papayi; va sayisidwego gasi gu ya manega ni Jesu Kristo.
2 Simamani gu manega ni wuhindzi, ni gurula, ni lihaladzo.
3 Sigodwa sangu, ambari olu nyi giridego satshavbo si kodzegidego gasi gu mi loveyani maningano ni guvbulugiswa hi gu nago, nyi si wonide na si vbwetega gu nyi mi loveya gasi gu mi gengedza, mu kodza gu tsarama, mu dwaneya gukhodwa ogu va nya guaga va nga gu mana gumogo basi.
4 Nyo mi loveya esi kholu vbakari gwanu gu bede vathu nyo khaguri ava gu vbindrago tepo nyo laphe Milowo na yi ganede khu gulamudwa gwawe; avo vathu nya guvivbedwe khu myonyo va thumisago wuwadi nya wukhongolo wa Nungungulu wathu gasi gu dzi emeleya va manega ni mavbanyelo nya dzitshoni* va bwe va si tumbegi ga mune wathu wa moyo a gu Pfhumu yathu Jesu Kristo.
5 Ambari olu mu ma tigo gwadi mahungu yaya, nyo vbweta gu mi dundrugisa gu kheni Jehovha vbulugiside vathu tigoni ga Egipto, ganiolu hwane nya isoso a fuviside vale va nga mba khodwa gwaye.
6 Dzingilozi dzile dzi nga diga thumo wadzo ndzadzini, dzi bwe dzi diga wulanga dzi giredwego gu khala avbo, a dzi hungide khu dzikorenti kala gupindruga gidemani nya gikhongolo, dzi vireya litshigu nya likhongolo nya gulamudwe.
7 Khu ndziya nyo fane, Sodhoma ni Ghomora ni madhoropa ma nga ba ma ma randrede ma dzi ningede ga wubhayi nyo thise ma bwe ma landriseya gudogoreya nya nyama gu sirigo ga tumbunugo; ayo gigengedzo gwathu kholu ma tsayisidwe khu nilo nya gupindruge.
8 Ambari ulolo, vathu vava tepo yatshavbo va gu dundrugeya* khu silo nyo vivbe, va nyenyezisa givili, va kanyisa wufumu va bwe va ganeya guvivba khu vale va ningwago wuzundzo khu Nungungulu.
9 Ganiolu, tepo Migeli, a gu ngilozi nya yikhongolo, a nga ganedzisana ni Dhiyabhulosi na va gu dwaneyana girumbi gya Mosi, uye kha mu lamula khu gu mu vala, ganiolu a di khuye: “Jehovha a na gu kawuke.”
10 Khu lisine, vathu vava va gu ganeya guvivba khu satshavbo va si si pwisisigo. Mavbanyelo yawe ma gu fana ni sirengo si gu mba pheya khu gu pimisa gasi gu gira silo, nigu satshavbo va girago sa gu va yisa gufuviswani.
11 Libango gwawe, kholu va landrede ndziya ya Kayimi, va gira silo nya guvivbe nga Bhalahama khu gufeya gu hakhiswa nigu va fuvisidwe khu gu ganeya guvivba khu vathu va va thangeyago nga Kora.
12 Omu nya dzifesta mu girago gasi gu yeyedzana gu khenu mu ngu haladzana, vama vava vomo navo nga khatshi siwindri si sihadego matini na va gu hodza gumogo nanu; avo vahavisi nya mba na dzitshoni, va dzi garadzeyago gu khura avo basi; avo mapfhi nya mba na mati ma legalegiswago khu phuvbo; nigu misimbo yi gu mba theya mihandro khu nango yakona, iyo yi fude khu guvbeleya nigu yi kudwe.
13 Avo mavimbi nya linene ma vbenyavbenyago, ma dusago liguvi nya dzitshoni dzawe; avo dzinyeledzi dzi si gutigo omu dzi hongolago, edzi khu guhegisa dzi na rinywago gidemani nya gikhongolo.
14 Enoki a nga ba ari wa wu 7 avba nya livelego la Adhamu, anuye profetide maningano navo, tepo a nga khuye: “Jehovha dzude ni makhulukhulu nya dzingilozi dzaye nya tshivba
15 gasi gu ta lamula vatshavbo, ni gu tsayisa vatshavbo va nya guvivba khu kotani nya mithumo yawe nya guvivbe va giridego khu ndziya nyo vivbe ni satshavbo silo nyo thise esi sighohi si ganedego khuye.”
16 Vathu vava va gu ngurangura kholu kha va tsakiswi khesi va gu naso, va landreya gudogoreya gwawe, nigu magana yawe ma gu dzi zundza khu silo nya sikhongolo tepo va zundzago vambe khu gu feya gu wuyedwa.
17 Gasi enu sigodwa sangu, dundrugani esi si ganedwego gupheyani khu vapostoli va Pfhumu yathu Jesu Kristo,
18 va nga khavo: “Matshigoni nya guhegise gu na manega va nya gu mi poyileya, va na girago silo guya khu gudogoreya gwawe nya silo nyo vivbe.”
19 Avo vathu va vegago guhambana, va vbanyago nga khatshi sirengo, va si gimbidziswigo khu liphuvbo la Nungungulu.
20 Ganiolu, enu sigodwa sangu, tiyisanani gukhodwani gwanu gu agidego mu bwe mu gombeya na mu thangedwa khu liphuvbo nya guage;
21 gasi mu simama lihaladzoni la Nungungulu na mu vireya wuhindzi wa Pfhumu yathu Jesu Kristo gasi gu mana womi nya gupindruge.
22 Simamani gu gireya wuhindzi vale va kanakanago,
23 mu va vbulugisa khu gu va dusa niloni. Ga vambe simamani gu va gireya wuhindzi, ganiolu khu githawo, mu nyenya vale va gu na ni mavbanyelo ma tsundzisidwego khu gighoho.*
24 Ga wule a gu na ni makodzelo nyo mi vhikeye gasi mu si tshunganiswi, wule a si kodzago gu mi vhikeya gasi mu si thegeyi gighohoni a bwe a mi phasa gu simama na mi agide nya mba na gighoho, wule a mi giridego mu ema mbeli nya wudhumo waye na mi tsakide ngudzu,
25 ga Nungungulu wa moyo, muvbulugisi wathu khu gu thumisa Jesu Kristo Pfhumu yathu, a na khusedzwe, a ningwa wuzundzo, tshivba ni wufumu gukhugeya gale, olu ni kala gupindruga. Amen.
Mitshamuselo ya vbavbatshi
^ Mwendro: “va gira silo nya mba na dzitshoni.” Khu Gigreki asélgeia. Wona mitshamuselo nya malito nya Bhibhiliya.
^ Khu gukongoma: “lora.”
^ Khu gukongoma: “mu nyenya sombo si tsundzisidwego khu nyama.”
