Marko 12:1-44
-
Gipimaniso nya valimi va gu sighevenga (1-12)
-
Nungungulu ni Sezari (13-17)
-
Giwudziso maningano ni guwuswa ga vale va fudego (18-27)
-
Milayo mivili nya yikhongolo (28-34)
-
Ina Kristo gyanana gya Dhavhidhe? (35-37a)
-
Gigengedzo maningano ni valovi (37b-40)
-
Singerengere sivili sa noni nya gisiwana (41-44)
12 Khu kharato, uye a di pheya gu ganeya navo khu gu thumisa sipimaniso, khuye: “Mwama moyo a di yala miuvha omu nya lithembwe laye, a li bhiya, a gira wulanga nya gu sugeye avbo dziuvha gasi gu gira vhinyu a bwe a vbaha nyumba nya gu laphe.* Khavbovbo, a tshiyedza lithembwe lile ga valimi, a endra a hongola limbe litigo.
2 Khu tepo yakona, a di rumeya gimwegyo nya sithumi saye ga valimi vale gasi gu ya hakha mihandro yaye.
3 Ganiolu, avo va di gi mola, va gi veta va bwe va gi tutumisa nya mba na gilo.
4 A di rumeya gimbe githumi, avo va di ya gi veta, va gi bayisa hungoni va bwe va gi poyila.
5 Khavbovbo, a di rumeya gimbe, avo va di ya gi songa. A rumeya simbe nya singi, simbe va si veta, simbe va si songa.
6 Uye a diri ni moyo gambe, gi nga ba giri gyanana gyaye nya gu gi haladze. A di gi rumeya gwawe, na gu khuye: ‘Va na ya ninga githawo gyanana gyangu.’
7 Ganiolu, valimi vale va di bhula khu gyawe, khavo: ‘Khuye oyu a na tshalago ni thomba, hongoleni hi mu songa gasi hi tshala ni thomba yaye.’
8 Khu kharato, avo va di gi mola va gi songa, va gi rinya vbavbandze nya lithembwe nya miuvha.
9 Ginani egi a na ta girago mune nya lithembwe? A na ta songa valimi vale, a ningeya lithembwe ga vambe.
10 Ina mu si gu leri omu nya milowo gu pwani: ‘Giwindri* gi nga nyenywa khu vavbahi khigyo gi khadego giwindri nya litshina gya vbakhonatunu.
11 Esi sa guta khiyo ga Jehovha nigu si lulamide mahoni gwathu’?”
12 Avo va di gu vbweta gu mu mola khu kotani nya isoso kholu va di gu dziti gu khavo a di gu thula avo tepo a nga ganeya gipimaniso gile. Khu kharato va di mu diga va hongola.
13 Khavbovbo, va di mu rumeleya Vafarisi nyo khaguri ni tsawa wa na Herodhi, gasi va ya mu mola khu malito yaye.
14 Tepo va nga vboha, va di mu embeya, khavo: “Muhevbudzi, hi ngu dziti gu khethu u na ni lisine ni gu khu dwaneyi gu tsakedwa khu vathu kholu khu khedzi guya khu khovbe, ganiolu wa gu hevbudza ndziya ya Nungungulu guya khu lisine. Ina si ngu khala gu livba khupo ga Sezari mwendro ne?
15 Hi yede gu livba mwendro ne?” Tepo a nga tugula mano yawe, a di va wudzisa, khuye: “Khu ginani mu nyi lingago?” Nyi reseyeni dhenaryo* mweyo gasi nyi yi wona.”
16 Va di mu reseya dhenaryo mweyo, a va wudzisa, khuye: “Githombe gegi ni lina leli khya mani?” Va di mu hlamula, khavo: “Khya Sezari.”
17 Khavbovbo, Jesu a di va embeya, khuye: “Livbani ga Sezari esi si gu sa Sezari, ganiolu ga Nungungulu esi si gu sa Nungungulu.” Avo va di hlamadziswa ngudzu khuye.
18 Khu kharato, Vasadhusi va gu khavo gu mwalo guwuswa ga vale va fudego, va di mu hidzimeleya va mu wudzisa, khavo:
19 “Muhevbudzi, Mosi lovide gu khuye a gufa mwama nya mba tshiya sanana, ndriyaye yede gu dzegana ni noni yile gasi a velegeya sanana ndriyaye.
20 Gu diri ni 7 vama va nga ba vari va na ndriye ni ndriye. Oyu nyo pheye a di tshadha ganiolu afa nya mba tshiya sanana.
21 Oyu nya wuvili a di tshala a tshadha ni noni yile, ganiolu anuye a difa nya mba tshiya sanana. Sasimweso si di giregeya oyu nya wuraru.
22 Ga vatshavbo nya 7, mwalo a nga tshiya sanana. Khu gu hegisa, nyamayi wule nuye a difa.
23 Guwuswani ga vale va fudego, nyamayi yoyu a na khala mwangadzi wa mani ga ava nya 7? Kholu khade mwangadzi wa vatshavbo.”
24 Jesu a di va embeya, khuye: “Ina khandri mwa gu dzi pemba khu gu mba tini Milowo ni tshivba ya Nungungulu?
25 Kholu guwuswani ga vale va fudego, vama kha va na nga dzega, ne vanyamayi navo kha va na nga dzegwa, avo va na fana ni dzingilozi ndzadzini.
26 Maningano ni guwuswa ga vale va fudego, kha mwa leri omu nya libhuku la Mosi, omu nya matimo ma ganeyago khu gipopwana gi nga ba gi khondra, avba Nungungulu a nga embeya Mosi, khuye: ‘Eni nyi Nungungulu wa Abrahama, Nungungulu wa Isaki ni Nungungulu wa Jakobe’?
27 Uye khandri Nungungulu wa vale va fudego, ganiolu Nungungulu wa ava va vbanyago. Enu mu dzi pembide ngudzu.”
28 Moyo nya valovi a nga ba a romo vbale, a nga vapwa na va ganedzisana, tepo a nga wona gu khuye Jesu a mu hlamude gwadi, a di mu wudzisa, khuye: “Khu wevbi nayo nya gupheye* ga yatshavbo?”
29 Jesu a di hlamula, khuye: “Owu nya gu pheye khowu: ‘Gupwa Israyeli, Jehovha Nungungulu wathu, Jehovha moyo basi.
30 Haladza Jehovha Nungungulu wago khu monyo wago watshavbo, khu hefemulo* wago watshavbo ni mapimo yago yatshavbo ni tshivba yago yatshavbo.’
31 Nya wuvili khowu: ‘Haladza muthu-kwanu nga edzi u dzi haladzago khidzo.’ Wu mwalo wumbe nayo nya wukhongolo guvbindra eyi.”
32 Mulovi wule a di mu embeya, khuye: “Muhevbudzi, u ganede lisine: ‘Nungungulu moyo basi nigu mwalo mumbe vbavbandze gwaye’;
33 nigu gu mu haladza khu monyo watshavbo, mapimo yatshavbo ni tshivba yatshavbo ni gu haladza muthu-kwanu nga edzi u dzi haladzago khidzo, si na ni lisima guvbindra miphaso yatshavbo nya guvbiswe.”
34 Khu kharato, tepo Jesu a nga wona gu khuye mulovi wule hlamude khu ndziya nya guti, a di mu embeya, khuye: “U mwalo hwindzo ni Mufumo wa Nungungulu.” Ganiolu, mwalo gambe a nga tiya gu mu gira simbe siwudziso.
35 Tepo Jesu a nga ba a simama gu hevbudza tempeleni, a di khuye: “So kodzega kharini gu valovi va ganeya gu khavo Kristo gyanana gya Dhavhidhe?
36 Uye abune Dhavhidhe na gu thumiswa khu liphuvbo nya guage ganede, khuye: ‘Jehovha a di embeya Pfhumu yangu, khuye: “Khala khu nyamudye gwangu kala nyi vega valala vago vbavbatshi nya migondro yago.”’
37 Dhavhidhe abune a gu mu rana Pfhumu, khu kharato sa gu kodzega kharini gu bwe a khala gyanana gyaye?”
Gitshungu gi di gu mu engiseya na gi tsakide.
38 Nigu a di gu va hevbudza, khuye: “Dzi woneyeni ni valovi va golago gu gimbiya na va ambade sombo nya gu laphe ni gu loswa omu gu tadego vathu,*
39 ni gu khaleya dzikadera nya gupheye dzisinagogani ni gu khala malangani nya lisima omu nya dzifesta.
40 Avo va gu phanga dzindranga nya dzinoni* va bwe va gira milombelo nya gu laphe gasi va dzi yeyedza. Avo va na lamudwa khu ndziya nya gulemeye ngudzu.”
41 Uye a di khala vbafuvbi ni dzikaxa nya miningelo, a pheya gu wona edzi gitshungu gi nga ba gi theya khidzo dzitsapawu omu dzikaxa nya miningelo; sighanyi si di gu theya singerengere nya singi.
42 Khavbovbo, gu dita noni nya gisiwana, yi ta theya singerengere sivili nya tengo wa vbavbatshi ngudzu.*
43 Khu kharato, uye a di rana vapizane vaye a va embeya, khuye: “Khu lisine nyi ngu mi embeya gu kheni: Noni yeyi nya gisiwana, yi thede omu nya kaxa nya miningelo dzitsapawu nya dzingi guvbindra vathu vatshavbo.
44 Kholu vatshavbo va di theya esi si nga va tshaleya, ganiolu uye wusiwanani gwaye, a di theya satshavbo a nga ba ari naso gasi gu dzi vbanyisa khiso.”
Mitshamuselo ya vbavbatshi
^ Gu diri wulanga va nga ba va lita va ghadha lithembwe gasi li si beledwi khu dzimbafa mwendro sirengo.
^ Giwindri gi nga ba gi thedwa vbakhonatunu, avba gu tshanganago dziparedhi dzimbili gasi gu dzi tiyisa.
^ Gingerengere nya prata gya Roma. Wona mitshamuselo nya malito nya Bhibhiliya.
^ Mwendro: “nya lisima.”
^ Wona mitshamuselo nya malito nya Bhibhiliya.
^ Mwendro: “dzimerkadho.”
^ Mwendro: “gu va dzegeya dzithomba dzawe.”
^ Khu gukongoma: “dzilepton dzimbili.” Wona mitshamuselo nya malito nya Bhibhiliya.
