Mithumo 17:1-34
17 Va di vbindra khu Anfipoli ni Apoloniya, va vboha Tesalonika, gu nga ba guri ni sinagoga nya Vajudha.
2 Kha nga giolovedzo gyaye, Pawulo a di beya sinagogani a ya bhula navo khu Milowo. Uye giride isoso khu dzisabhadho dziraru.
3 A di gu tshamuseya ni gu va yeyedza guya khesi si lovidwego gu khuye si di gu vbwetega gu Kristo a tshaniseka a bwe a wuswa khu ga vafudego, a di gu va embeya, khuye: “Jesu yoyu nyi ganeyago khuye gwanu khuye Kristo.”
4 Khu kotani nya isoso, vambe vbakari gwawe va di khodwa va dzi pata ni Pawulo ni Silasi nigu Vagreki nya vangi va nga ba va khozeya Nungungulu va di gira sasimweso, gumogo ni vanyamayi nya vangyana nyo thavisege.
5 Ganiolu, Vajudha va dipwa lidiwo, khu kharato, va di tshanganisa vama nyo khaguri va nga ba va vivbedwe khu monyo, va nga ba va legalega merkadhu, va wumba tsawa, va wusa pfilupfilu dhoropani. Va ya dhumeya ndranga ya Jasoni na va gu vbweta Pawulo ni Silasi gasi gu va dusa vbavbandze va ta va nigeya ga gitshungu.
6 Kha nga olu va nga ya va hamuga, va di ndrindra-ndrindra Jasoni, va hongola naye ga dzipfhumu nya lidhoropa, na va ganeya khu lito nyo khugege, khavo: “Vama vale va wusago pfilupfilu mafuni gwatshavbo, va vbohide ni omu gwathu
7 nigu Jasoni va hakhide gaya gwaye. Vama vava vatshavbo kha va landrisi milayo ya Sezari kholu vari khavo yomo yimbe pfhumu a gu Jesu.”
8 Tepo gitshungu ni dzipfhumu nya lidhoropa va ngapwa isoso, va di dzuwega mapimo;
9 va di livbisa multa Jasoni ni ava a nga ba ari navo, va va diga va hongola.
10 Tepo li nga pfola, vandruyi va di rumeya Pawulo ni Silasi va hongola Bhereya. Tepo va nga vboha iyoyo, va di beya sinagogani nya Vajudha.
11 Vathu va Bhereya va di gu dzi emisede gu hevbula guvbindra vathu va Tesalonika, kholu avo va di hakha khu monyo wawe watshavbo mahungu ya Nungungulu nigu va di gu gevisisa gwadi Milowo tshigu ni tshigu gasi gu wona gu khavo satshavbo esi va nga sipwa lisine gani.
12 Khu kharato, vathu nya vangi va di khodwa, gupata ni vanyamayi nya vangyana nyo thavisege nya Vagreki ni vama nyo khaguri.
13 Ganiolu, tepo Vajudha va Tesalonika va ngati gu khavo Pawulo a di gu tshumayela mahungu nya yadi Bhereya, va di hongola iyoyo gasi gu ya kutsedzeya gitshungu gu wusa pfilupfilu.
14 Khavbovbo, vandruye va di embeya Pawulo gu khavo a hongola siwoni khu guvbiredza, ganiolu Silasi ni Thimoti va di tshala.
15 Avo va nga ba va vbwegedza Pawulo, va di hongola naye kala Atena, khavbovbo va di wuya ni mwangu nya gu te embeye Silasi ni Thimoti, gasi va ya manana ni Pawulo khu guvbiredza.
16 Tepo Pawulo a nga ba a va vireya dhoropani ga Atena, a di goroga ngudzu khu gu wona gu khuye lidhoropa lile li di tade khu sifananiso.
17 Khavbovbo, a di pheya gu bhula ni Vajudha sinagogani ni vambe vathu va nga ba va khozeya Nungungulu nigu tshigu ni tshigu a di gu bhula ni vathu a nga ba a va mana merkadhu.
18 Ganiolu, vafilosofo nyo khaguri va Epikuru ni va Estoyiku va di pheya gu ganedzisana naye, vambe va di gu khavo: “Ginani a ganeyago nya libwabwa yoyu?” Vambe khavo: “Khatshi mutshumayeli nya vanungungulu nya mambe mayigo.” Avo va di gu ganeya isoso kholu a di gu tshumayela mahungu nya yadi maningano ni Jesu ni guwuswa ga ava vafudego.
19 Khavbovbo, va di mu dzega va hongola naye Areyopagu* va ya khavo: “Nga hi tshamuseya sihevbudzo sesi nya siphya,
20 kholu wo ganeya khu silo hi gu mba siti kholu ho vbweta guti gukhethu so thula ginani.”
21 Vathu vatshavbo va Atena ni vathu nya mambe mayigo va nga ba va vbanya iyoyo va di gu thumisa tepo va nga ba va si thumi gilo gasi gu ganeya ni gu engiseya mahungu nya maphya.
22 Khavbovbo, Pawulo a di khuga a ema vbakari nya Areyopagu a ganeya, khuye:
“Vathu va Atena, nyi ngu si wona gu kheni enu mu ngu ninga ngudzu githawo vanungungulu gu vbindra vambe vathu.
23 Khu giyeyedzo, tepo nyi nga ba nyi gimbiya nyi khedza gwadi vanungungulu mu va khozeyago, nyi wonide alitari yi nga ba yi lovidwe gu pwani: ‘Ga Nungungulu hi gu mba muti.’ Nungungulu yoyu mu gu mba muti khuye nyi mi hevbudzago khuye muhuno.
24 Nungungulu a nga gira mafu ni satshavbo si gomogo mafuni, Pfhumu ya ndzadzini ni mafuni, uye kha vbanyi omu nya dzitempele dzi giridwego khu mandza nya vathu,
25 ne kha si lombi gu a thumedwa khu mandza nya vathu nga khatshi somo si mu keneleyago kholu khuye a ningago womi vatshavbo, liphuvbo va hefemulago ni silo satshavbo.
26 Khu gu thumisa muthu moyo basi, tumbulugiside mafumbo yatshavbo nya vathu, gasi va vbanya mafuni gwatshavbo, a vegisa dzinango a bwe a vega mivbingano nya guvbahe umo vathu,
27 gasi va vbwetedzeya Nungungulu ambari khu gu mu phuphuteya va mu mana ambari olu a gu mwalo hwindzo ga moyo ni moyo wathu.
28 Khu kotani yaye hi na ni womi nigu hi ngu gimbiya, hi ngu vbanya, kha nga si ganedwego khu vambe nya valovi vanu, khavo: ‘Kholu anethu hi sanana* saye.’
29 “Khu kharato, kha nga olu hi gu sanana sa Nungungulu, kha hi yeli gu pimisa gu khethu Nungungulu a ngu fana ni oru ni prata mwendro giwindri. Kha hi yeli gambe gu pimisa gu khethu a ngu fana ni gilo gi vatidwego khu wugengeyi nya muthu.
30 Lisine gu Nungungulu kha theya kota khu dzitepo dzodzo va nga ba va siti gilo, ganiolu olu a ngu embeya vatshavbo, malangani yatshavbo gu khuye va yede gu dzi laya.
31 Kholu, uye vegiside litshigu a na lamulago mafu yatshavbo khu gululama, khu gu thumisa oyu a mu hathidego; uye ningide vathu vatshavbo gitiyisegiso nya isoso khu gu mu wusa khu ga vafudego.”
32 Tepo va nga mupwa na gu ganeya khu guwuswa ga ava vafudego, vambe va di mu hega, vambe va ganeya, khavo: “Hi na ta gu engiseya limbe litshigu na wu ganeya khu mahungu yaya.”
33 Khavbovbo, Pawulo a di khuga a hongola,
34 ganiolu vambe va di dzi pata naye va khodwa. Vbakari gwawe a di gu romo Dhiyonizyo a nga ba ari mulamuli wa tribhunali ya Areyopagu ni nyamayi moyo nyo pwani khu Dhamarisa ni vambe.
