Mithumo 5:1-42
5 Mwama moyo nyo pwani khu Ananiya ni mwangadzi waye Safira, va di rengisa gipeto gyawe.
2 A di vbungula dzimbe dzitsapawu a tshala nadzo, na si tidwa khu mwangadzi wakone, a dzega edzi dzimbe a dzi ningeya ga vapostoli.
3 Ganiolu, Pedro a di mu wudzisa, khuye: “Ananiya, khu ginani u nga dzumeleya Sathane a gu senga gasi u lipheya liphuvbo nya guage, u siha dzimbe dzitsapawu nya gipeto?
4 Gipeto gi diri gyago, khandridzo? Hwane nya gu ba u gi rengiside dzitsapawu dzakone kha dza nga ba dziri dzago? Khu ginani u giridego silo nya guvivbe nya nga esi? Khandri u di lipheya vathu, ganiolu u di lipheya Nungungulu.”
5 Tepo Ananiya a ngapwa isoso, a di thega afa. Vatshavbo va ngati esi si nga girega va di thava ngudzu.
6 Khavbovbo, ma di khuga madzaha ma mu fumbeya khu mwendra, ma duga naye ma ya mu dzinga.
7 Hwane nya dziora dziraru, a di beya nuye mwangadzi wakone, na si siti esi si nga girega.
8 Pedro a di mu wudzisa, khuye: “Nga nyi embeya, khuwo tengo wowu mu nga rengisa khuwo gipeto?” Uye a di khuye: “Ina, khuwo.”
9 Khavbovbo, Pedro a di mu wudzisa, khuye: “Khu ginani mu nga hunga gu kanganyisa liphuvbo la Jehovha? Vale va nga dzinga mwama wago vomo vbamwanyatunu, va na gu rwala nuwe va duga nago.”
10 Safira a di dzegeya gu thega mbeli ga Pedro, afa. Tepo madzaha yale ma nga beya, ma di ta mu mana na fude, ma dzegeya gu mu dzega ma duga naye, ma ya mu dzinga bambe ga mwama waye.
11 Libandla latshavbo ni vatshavbo va ngapwa isoso va di thava ngudzu.
12 Vapostoli va di gu simama gu gira siwoniso ni silewugiso nya singi vbakari nya vathu nigu vatshavbo va di gu tshangana avba nya Koredhori* ya Solomoni.
13 Khu lisine, mwalo a nga ba a tiya gu dzi pata navo, ganiolu gitshungu gi di gu ganeya gwadi khavo.
14 Vbavbandze nya isoso, tengo nya vama ni vanyamayi va nga ba va khodwa ga Pfhumu wu di guya wu engedzeya ngudzu.
15 Vathu va di gu duga ni vadwali va ya va ladzisa dziruwani vbatshani nya sikamana ni madahu gasi a gu vbindra Pedro vambe vakone va kuhwa khu mwedzi waye.
16 Va di guta vathu nya vangi khu madhoropani ya vbafuvbi ni Jerusalema, va resa vadwali ni ava va nga ba va mbakidwe khu maphuvbo nya guvivbe. Vatshavbo va di gu hawulugiswa.
17 Ganiolu, muprista nya khongolo ngudzu ni vatshavbo a nga ba ari navo va nga ba va lumba tsawa nya Vasadhusi, va di tala khu lidiwo.
18 Khavbovbo, va di mola vapostoli va va khotheya pasoni.
19 Ganiolu, ni wutshigu, ngilozi ya Jehovha yi di tula malimba nya lipaso, yi va dusa vbavbandze, khiyo:
20 “Indrani tempeleni, mu ya simama gu hevbudza vathu maningano ni womi nyo pindruge.”
21 Hwane nya gupwe silo sesi, va di beya tempeleni na gu hongola gugyani, va ya pheya gu hevbudza.
Tepo muprista nya khongolo ngudzu ni ava a nga ba ari navo va nga vboha, va di tshanganisa ava va nga ba va wumba Tribhunali nya Yikhongolo nya Gijudha ni madhota yatshavbo ya na Israyeli, va rumisa gu khavo gu ya dzegwa vapostoli va nga ba va khothedwe.
22 Ganiolu, tepo dzigwardha nya tempele dzi nga vboha pasoni, kha dza ya mana muthu. Dzi di wuya dzi ta khidzo:
23 “Hi di ya mana lipaso na li khothidwe gwadi, dzigwardha na dzi emide vbamwanya, ganiolu tepo hi nga tula gu diri mwalo muthu.”
24 Tepo muthangeyi nya vawoneleyi nya tempele ni vaprista nya vakhongolo va ngapwa isoso, va di dzuwega mapimo kholu va di si giti egi gi nga hadzi landreya.
25 Khavbovbo, gu di vboha muthu nyo khaguri a ta khuye: “Vama mu nga ba mu va khothede pasoni, vomo tempeleni olu va hevbudza vathu.”
26 Muthangeyi nya vawoneleyi nya tempele ni dzigwardha dzaye, va di ya va dzega, ganiolu kha va va dwanisa kholu va di gu thava gu pfarwa khu siwindri khu vathu.
27 Tepo va nga wuya navo, va di ta va emisa mbeli nya Tribhunali nya Yikhongolo nya Gijudha. Khavbovbo, muprista nya khongolo ngudzu, a di va gira siwudziso,
28 khuye: “Gasi kha ha mi himbedzeya gu hevbudza khu lina leli? Gasi khu ginani mu tadzidego Jerusalema khu sihevbudzo sanu? Khu ginani mu vbwetago gu hi rwega nandru nya novba wa mwama yoyu?”
29 Pedro ni vambe vapostoli, va di hlamula, khavo: “Hi yede gu engisa Nungungulu kha nga mufumeli, guvbindra vathu.
30 Nungungulu wa vakokwe vathu wuside Jesu khu ga vafudego, uye enu mu nga mu songa mu mu khokhotheya* vbasimbotunu.
31 Nungungulu mu khusedzide nyamudye gwaye kha nga Pfhumu yi ningago guvbanya ni Muvbulugisi, gasi gu Israyeli a dzi laya ni gu divaledwa sighoho saye.
32 Ethu hi dzifakazi nya silo sesi nigu liphuvbo nya guage eli Nungugulu a ningago vale va mu engisago kha nga pfhumu anilo i fakazi.”
33 Tepo va ngapwa isoso, va di goroga va vbweta gu va songa.
34 Ganiolu, Mufarisi moyo nyo pwani khu Ghamaliyeli, a nga ba ari muhevbudzi nya nayo, a nga ba a ningwa ngudzu githawo khu vathu, a di khuga a ema, a ruma gu khuye vapostoli vale va duswa vbavbandze khu gitepwana.
35 Khavbovbo, khuye: “Vama va Israyeli, dziwoneyeni khesi mu vbwetago gu gira vama vava.
36 Khu giyeyedzo, matshigwana hwane, gu dugelede Teyodhasi a nga ba a dzi embeya gu khuye muthu nya lisima nigu gipimo nya 400 vama va dzi patide naye, ganiolu uye a di songwa nigu vatshavbo va nga ba va mu landreya va di phalalega, gu si tshali muthu.
37 Hwane gwaye, khu matshigoni nya giloveya, gu di dugeleya Judha wa Galileya. Anuye a di landredwa khu vathu nya vangi, mwama yoyo nuye a difa nigu vatshavbo va nga ba va mu landreya va di phalalega.
38 Khu kharato, nyi ngu mi embeya gu kheni: Mu nga dzi bedzedzeyi ni vama vava, va digeni. Abari gu esi va girago khya vathu kha si na nga pfoledwa khu lidambo.
39 Ganiolu, abari gu khya Nungungulu, kha mu na nga va digisa. Dzi woneyeni kholu mu nga tshuka nari mo dwana ni Nungungulu.”
40 Avo va di engisa wusingalagadzi waye, va ranisa vapostoli, va va kwamula, va va himbedzeya gu ganeya khu lina la Jesu va bwe va va diga va hongola.
41 Vapostoli va di duga khu Tribhunali na va tsakide, khu kotani nya olu Nungungulu a nga dzumeleya gu khuye avo va tshaniseka khu kotani nya olu va nga ganeya khu lina la Jesu.
42 Nigu tshigu ni tshigu, va di gu simama gu hevbudza ni gu tshumayela mahungu nya yadi maningano ni Kristo Jesu khu ndranga ni ndranga ni tempeleni.
Mitshamuselo ya vbavbatshi
^ Koredhori yi nga ba yiri ni dzipilari nya dzingi khu mudzibambe.
^ Khu gukongoma: “gu vbayega.”
