“Uwe u yingisago milombelo, vathu vatshavbo va nata avbo gwago.” — Ndzimo 65:2.

Vathu nyo khaguri va ngu gombeya, ambari olu va si khodwigo gu khavo womo muthu a va engiseyago. Avo va gu pimisa gu khavo va gu ganeya edzi va dzipwago khidzo omu nya nombelo, si na va phasa gu va dzipwa gwadi. Ganiolu, makungu nya nombelo khandri basi gu hi dzipwa gwadi gasi gu emisana ni sigaradzo sathu. Bhibhiliya yi ngu hi tiyisegisa gu khiyo “Pfhumu Nungungulu a womo vbafuvbi ni vatshavbo va mu ranago, ni ga vatshavbo va mu lumbago khu lisine. . . . A ngu va yingisa va gu mu lomba giphaso.” — Ndzimo 145:18, 19.

Khu kharato, hi nga tiyisega gu khethu Jehovha Nungungulu a ngu engiseya milombelo nya sithumi saye. Khu lihaladzo, Uye a gu hi tiyisegisa gu khuye: “Mwa gu nyi rana ni gu nyi khozela, eni nyi nami yingisa.” — Jeremiya 29:12.

“Mu nga digi gu gombeya.” — Varoma 12:12.

Bhibhiliya yi ngu hi kutsa “gu gombeya tepo yatshavbo” ni ‘siloni satshavbo.’ Somo guagani gu khiso Jehovha o vbweta gu khuye vathu va gombeya gwaye. — Matewu 26:41; Vaefeso 6:18.

Khu ginani Nungungulu a vbwetago gu khuye hi gombeya gwaye? Nga dundrugeya khesi: Papayi a ngu tsaka tepo gyanana gyaye gi mu lombago giphaso, khandridzo? Lisine gu gutala nya dzitepo, papayi a ngu giti egi gyanana gyaye gi gi vbwetago, ganiolu tepo uye a pwago gyanana gyaye na gi gu mu lomba giphaso, uye a ngu tsaka khu gu wona gu khuye gyanana gyaye gi ngu mu tumba. Khu ndziya nyo fane, tepo hi gombeyago ga Jehovha Nungungulu ha gu yeyedza gu khethu hi ngu mu tumba nigu hi ngu dzina gu khala dzipari dzaye. — Mavingu 15:8; Jakobe 4:8.

“Rinyani iyo gwaye gugaradzega gwanu gwatshavbo kholu uye a ngu mi khathaleya.” — 1 Pedro 5:7.

Nungungulu a gu vbweta gu khuye hi gombeya gwaye, kholu a ngu hi haladza nigu a ngu khathala khu moyo ni moyo wathu. Uye a ngu khathala khu sigaradzo sathu ni gudzipwa gwathu ni gu a ngu dzina gu hi phasa.

Dhavhidhe womini waye watshavbo a gombede ga Jehovha a mu lomba giphaso, uye gambe ganede ni Nungungulu khesi a nga ba a si pimisa ni edzi a nga ba a dzipwa khidzo. (Ndzimo 23:1-6) Nungungulu a di gu dzipwa kharini khu Dhavhidhe? Uye a di gu mu haladza nigu a di gu engiseya milombelo yaye. (Mithumo 13:22) Khu ndziya nyo fane, Nungungulu a ngu engiseya milombelo yathu, kholu a ngu khathala khu moyo ni moyo wathu.

Khiso esi mulovi nya dzindzimo a lovidego omu nya Bhibhiliya. Malito yaya ma gu yeyedza gu khayo, uye a di gu tiyisega gu khuye Nungungulu a di gu engiseya milombelo yaye ni gu isoso si mu phaside ngudzu. Uye a di gu dzipwa na ri vbafuvbi ni Nungungulu, nigu a diri ni tshivba a nga ba a yi vbweta gasi gu emisana ni sigaradzo nya womi. — Ndzimo 116:1-9.

Tepo hi tiyisegago gu khethu Nungungulu a ngu engiseya milombelo yathu, hi na simama gu gombeya. Wona giyeyedzo gya Pedro a vbanyago norte ga Espanha. Uye fedwe khu gyanana gyaye nya 19 myaga ga mhango nyo khaguri. Pedro garadzegide ngudzu, khu dzitepo nya dzingi gombede ga Jehovha khu monyo waye watshavbo, a lomba giphaso ni gu thaveledwa. Ginani gi giregidego khu gu landreya? Uye wari, khuye: “Jehovha hlamude milombelo yangu khu gu nyi thaveleya ni giphaso egi eni ni mwangadzi wangu hi gi manidego ga vandriyathu gukhodwani.”

Lisine gu gyanana gyawe kha gya wuga gi vbanya kholu va nga ba va gira milombelo, ganiolu milombelo yi va phaside ngudzu. Mwangadzi waye María Carmen a gu ganeya gu khuye: “Nombelo wu nyi phaside gutimiseya gigaradzo gyangu, eni nyi di gu dziti gu kheni Jehovha Nungungulu a di gu nyi pwisisa, kholu tepo nyi nga ba nyi gombeya nyi di gu dzipwa na nyi rude.”

Vbavbandze nya Bhibhiliya, siemo nya nga esi si ngu hi tiyisegisa gu khiso Nungungulu a ngu engiseya milombelo yathu. Somo guagani gu khiso Nungungulu kha hlamuli milombelo yatshavbo. Khu ginani Nungungulu a hlamulago milombelo nyo khaguri ganiolu a si hlamuli yimbe?