“Wa gu ba u gombeya, u nga phindra-phindri malito ya mamowo.” — Matewu 6:7.

Jehovha kha vbweti gu engiseya milombelo yi vegidwego hungoni ambari eyi yi lovidwego omu nya mabhuku nya milombelo. Uye o vbweta gu khuye milombelo yathu yi khugeya monyoni. Nga dundrugeya khedzi u nga hadzi gu dzipwa khidzo na ri khatshi tepo yatshavbo u ganeyago ni pari yago iyo yo khaleya gu gu embeya silo sasimweso. U di hadzi goroga khandridzo? Dzipari nya dzade dzo ganeya ni ethu khu monyo watshavbo ni gu ganeya lisine. Ha gu gombeya ga Papayi wathu wa ndzadzini khu gu thumisa malito yathu, ha gu yeyedza gu khethu Hi ngu mu wona nga pari yathu nya lisine.

“Ambari mwa gu lomba, kha mu ningwi kholu mwa gu lomba na muri ni makungo nyo vivbe.” — Jakobe 4:3.

Kha hi yeli gu vireya gu khethu Nungungulu a hlamula milombelo yathu yi si gimbeleyanigo ni gu gola gwaye. Uye si vegide guagane gu khuye kha hi yeli gu manega ni wodogodogo ni gu khodwa ga silo si gu siri lisine, nya ga soriti. Khu giyeyedzo, ina Jehovha a di hadzi hlamula nombelo wa muthu a gombeyago Gwaye gasi a lomba gu Mu phasa gu ghanya gilo nyo khaguri gi na mu ningago dzitsapawu nya dzingi? (Isaya 65:11; Luka 12:15) Khu lisine, kha hi yeli gu vireya gu khethu Nungungulu a hlamula milombelo nya nga eyi. Ha gu vbweta gu khethu Nungungulu a hlamula milombelo yathu hi yede gu tiyisega gu khethu milombelo yoyo yi ngu gimbeleyana ni esi Uye a hi embeyago khu gu thumisa Bhibhiliya.

 “Uye a dzi girago givbwiri a si vbweti gu yingisa nayo, nombelo waye nuwo, wu na nyenyeziswa.” — Mavingu 28:9.

Ga dziteponi nya gulowe nya Bhibhiliya Nungungulu kha nga ba a hlamula milombelo ya vathu va nga ba va si engisi milayo Yaye. (Isaya 1:15, 16) Nungungulu kha vbindrugedza. (Malakiya 3:6) Ha gu vbweta gu khethu Nungungulu a engiseya ni gu hlamula milombelo yathu, hi yede gu engisa milayo Yaye ni gu vbanya maningano khedzi a si vbwetago khidzo. Ganiolu, ahati ho ba hi giride silo nya singi nyo vivbe gale, ina Nungungulu kha na nga engiseya milombelo yathu? Ahihi! Ha gu yeyedza gu khethu hi ngu dzi laya khu lisine hi bwe hi gira satshavbo hi si kodzago gasi gu tsakisa Nungungulu, Uye a na hi divaleya. — Mithumo 3:19.