“Mwa gu lomba ni gevbini gilo ga Papayi khu lina langu, uye a na mi ninga.”  — Johane 16:23.

Malito ya Jesu ma gu yeyedza gu khayo Jehovha a gu vbweta gu khuye hi gombeya gwaye khu lina la Jesu, na siri khu sifananiso, va nyo aga, dzingilozi mwendro vakokwe wathu. Tepo hi gombeyago ga Nungungulu khu lina la Jesu, ha gu dzumeya gu khethu Uye a ngu engiseya milombelo yathu khu kotani nya esi Jesu a hi giredego. Jesu wari, khuye: “Mwalo a hongolago ga Papayi nasiri khavbo gwangu.” — Johane 14:6.

‘Mu embeledzeleni mabala ya monyoni gwanu.’ — Ndzimo 62:8.

Tepo hi gombeyago ga Jehovha, hi yede gu ganeya naye kha nga edzi gyanana gi ganeyago khidzo ni papayi wagyo nya lihaladzo. Vbavbandze nya gu phindra-phindre malito mwendro gu leri libhuku nyo khaguri nya milombelo, ethu hi yede gu gombeya ga Nungungulu khu monyo wathu watshavbo ni githawo.

“Ni gevbini hi lombago gi gimbileyanago ni gugola ga Nungungulu, uye a ngu hipwa.” — 1 Johane 5:14.

Khu gu thumisa Bhibhiliya, Jehovha a gu hi embeya esi a na hi gireyago ni esi a vbwetago gu khuye hi mu gireya. Ha gu vbweta gu khethu milombelo yathu yi hakwa khu Nungungulu, hi yede gu gombeya ‘guya khu gugola gwaye’. Gasi gu hi kodza gu gira isoso, hi yede gu hevbula Bhibhiliya gasi hi kodza gu muti gwadi Nungungulu. Ha gu gira isoso, Uye a na engiseya milombelo yathu.

Gombeya u lomba esi u si vbwetago. Ethu hi nga gombeya ga Nungungulu hi mu lomba gasi hi mana gilo nyo hodze, gilo nyo ambale ni wulanga nyo khale. Hi nga gombeya gambe hi lomba guti gasi hi hunga makungo nya yadi, ni tshivba gasi hi kodza gu timiseya silingo. Hi nga gombeya hi lomba gu engedzedwa gukhodwa, gudivaledwa khu Nungungulu ni giphaso Gyaye. — Luka 11:3, 4, 13; Jakobe 1:5, 17.

Gombeleya vambe. Papayi nya lihaladzo a ngu tsaka tepo a wonago sanana saye na si gu pwana si bwe si golana. Jehovha nuye a gu vbweta gu khuye sanana saye si gu romo mafuni si khataleyana. Ethu hi nga gombeleya ndranga yathu, mwama mwendro mwangadzi wathu, sanana sathu ni dzipari. Jakobe lovide gu khuye: “Mu gombeleyana khu gyanu.” — Jakobe 5:16.

Gombeya u bonga esi u gu naso. Bhibhiliya ya gu ganeya esi khu Muvangi wathu: “Uye giride silo nya sadi gasi gu mi yeyedza gu khuye khade kharini, khu gu mi ninga ndzadzi a bwe a mi gira mu fuma ngudzu, a mi ninga guhodza nya gungi, a mi ninga gutsaka nya gukhongolo.” (Mithumo 14:17) Ha gu dundrugeya khu satshavbo esi Nungungulu a hi giredego, si na hi kutsa gu mu bonga khu nombelo. Lisine gu anethu hi yede gu yeyedza gu bonga gwathu khu gu mu engisa. — Vakolosi 3:15.

Dzimbe dzitepo, u nga vbeya tshivba khu gu mba hlamudwa milombelo yago khu gu vbiredza. Ina isoso so thula gu khiso Nungungulu kha khathali khuwe? Ne vbadugwana! Wona esi vathu nyo khaguri va ganeyago, si yeyedzago gu khiso dzimbe dzitepo esi hi si vbwetago gu simama gu gombeya.

Steve hi ganedego khuye gupheyani wari, khuye: “Nari khatshi khandri nombelo, na nya sa si kodza gu tsaka gambe.” Ginani egi Steve a giridego gasi gu vbindrugedza mawonelo yaye khu nombelo? Uye a di pheya gu hevbula Bhibhiliya nigu hevbude lisima nya gu gombeye ni gu mba tshukuwa gu gombeya. Uye wari, khuye: “Nyi ngu gombeya ga Nungungulu nyi mu bonga khu giphaso nyi gi manidego ga dzipari dzangu nyo golege. Muhuno, nyi ngu dzipwa na nyi tsakide kamo ngudzu.”

Jenny, a nga ba a pimisa gu khuye kha nga ba a yela gu engisedwa khu Nungungulu, wa ri khuye: “Tepo nyi nga ba nyi dzipwa na nyi si phasi gilo, nyi di gu lombeleya Nungungulu gasi a nyi phasa gu pwisisa gu kheni khu ginani nyi nga ba nyi dzipwa khu ndziya yile.” Ginani gi mu phasidego? Uye wari, khuye: “Gu gombeya ga Nungungulu si nyi phaside gu manega ni mawonelo nya yadi kheni mune; nyi wonide gu kheni ambari monyo wangu wa gu nyi ninga nandru, Jehovha kha na nga na gira isoso. Gu gombeya gu nyi phaside gu mba tshukuwa.” Khu wevbini handro wakona? Uye o ganeya gu khuye: “Nombelo wu nyi phaside gu wona Jehovha kha nga Papayi, Nungungulu nya lihalandzo ni pari nya lisine yi khathalago kheni. Nya gu simama gu dzi garadza gasi gu mu tsakisa Uye a na nyi seketeya ni gu nyi phasa.”

Wona gambe giyeyedzo gya Isabel. Tepo a nga mana mimba, vadhogodheya va di mu embeya gu khavo gyanana gyaye gi na ba gi haside. Uye a di garadzega ngudzu. Vambe vathu va di mu embeya gasi a pola mimba. Isabel wari, khuye: “Nyi di gu pimisa gu kheni nyi nafa khu kotani nya olu nyi nga ba nyi garadzega.” Ginani egi a giridego? Uye wari, khuye: “Nyi gombede ngudzu nyi lomba giphaso gya Nungungulu.” Khu gu gimbiya nya tepo a di hefemula gyanana nyo pwani khu Gerard. Khu lisine igyo gi velegidwe na gi haside. Ina Isabel pimiside gu khuye Nungungulu hlamude milombelo yaye? Nya mba kanakana! Khu ndziya muni? Uye wari, khuye: “Tepo nyi wonago gyanana gyangu, olu gi gu na ni 14 myaga, na gi gu tsaka ambari olu gi hasidego, nyo dzegeya gu wona gu kheni igyo hlamulo nya milombelo yangu, makategwa aya Jehovha a nyi ningidego.”

Gupwa mabhulo nya nga aya si ngu hi gira hi dundrugeya malito nya ndzimo yeye: “Pfhumu Nungungulu, yingisa nombelo wa gisiwana, va tiyise myonyo yawe, u va hakhe.” (Ndzimo 10:17) Khu lisine hi na ni sighelo nya singi gasi hi simama gu gombeya!

Omu nya Bhibhiliya hi nga mana milombelo nya yingi yi giridwego khu Jesu. Owu wu tidwago ngudzu, nombelo owu a hevbudzidego vapizane vaye. Ginani hi nga gi hevbulago avba nya nombelo wowo? Hongoleni hi si wona.