Vathu nyo khaguri va gu wu wona kharini nombelo?
“Tepo nyi gombeyago, nya gu dzipwa nga khatshi Nungungulu womo bambe gwangu na pharide libogo langu ni gu nyi hethedza tepo nyi dzimeyago.” — MARÍA.
“Mwangadzi wangu a difa hwane nya gu ba a dwade khu Câncer tanga nya 13 myaga. Nyi ngu dundruga gu kheni nyi di gu gombeya ga Nungungulu matshigu yatshavbo. Nyi ngu dziti gu kheni uye a di gu nyi engiseya ni gupwa guvbisa nyi nga ba nyi gupwa. Isoso si di gu nyi ninga gurula.” — RAÚL.
“Nombelo giningwa nya lisima egi Nungungulu a ningidego vathu.” — ARNE.
Nombelo giningwa nya lisima ngudzu ga María, Raúl, Arne ni vambe. Khu gu thumisa nombelo, avo va ngu tiyisega gu khavo va nga ganeya ni Nungungulu, va mu bonga ni gu mu lomba giphaso. Avo va ngu khodwa ga malito ma gu romo omu nya Bhibhiliya ma gu khayo: “Hi ngu tumba gu khethu ni gevbini hi lombago gi gimbileyanago ni gugola ga Nungungulu, uye a ngu hipwa.” — 1 Johane 5:14.
Ganiolu, vathu nya vangi si ngu va garadzeya gu khodwa ga esi Bhibhiliya yi si hevbudzago maningano khu gu gombeya ga Nungungulu. Steve a gu tshamuseya edzi a nga dzipwa khidzo tepo a nga ba a gombeya. Uye wari, khuye: “Tepo nyi nga ba yi ri ni 17 myaga nyi di fedwa khu dzipari dzangu dza dziraru, mwenyo nya dzipari dzangu yi difa avba nya mhango nya movha, edzi dzimbe dza dzimbili dzi di dzama phwani.” Ginani egi Steve a giridego? Wari, khuye: “Nyi di gombeya ga Nungungulu nyi mu wudzisa gu kheni, ‘khu ginani si nga girega sile?’ Ganiolu, kha nya mana hlamulo. Khu kharato nyi di dzi wudzisa gu kheni, ‘khu ginani hi yedego gu gombeya?’” Gu fana ni Steve, vathu nya vangi va pimisago gu khavo milombelo yawe kha yi hlamudwi va nga dzi wudzisa gu khavo, ina si na ni lisima gu gombeya?
Ganiolu, egi khandrigyo basi gighelo gi nga girago vathu va pimisa gu khavo kha va yeli gu gombeya. Vambe va gupimisa gu khavo olu Nungungulu a tigo satshavbo, kha si lombi gu gombeya hi mu bhuleya satshavbo sigaradzo hi tshanganago naso mwendro gu mu lomba gilo nyo khaguri.
Vambe vo pimisa gu khavo Nungungulu kha na nga engiseya milombelo yawe khu kotani nya silo nya gu vivbe va giridego gale. Jenny a gu tshamuseya gu khuye: “Eni nyi ngu garadzega ni gu dzi laya khu kotani nya silo nya gu vivbe nyi giridego. Khu kharato, eni nya gu dzipwa na nyi si ninganedwi gu Nungungulu a engiseya milombelo yangu.”
Ahati uwe, wa gu wu wona kharini nombelo? Abari gu anuwe wa gu dzipwa nga vathu va khumbugidwego avba nya ndrima yeyi, u na tsaka khu guti esi Bhibhiliya yi ganeyago khu nombelo. Ethu hi nga tumba esi Bhihiliya yi ganeyago khu nombelo, a iyo yi na hi phasa gu mana mihlamulo nya siwudziso nya singi nya nga esi:
-
Ina Nungungulu a ngu engiseya milombelo yathu?
-
Khu ginani Nungungulu a gu mba hlamula milombelo yatshavbo?
-
Ginani hi yedego gu gira gasi Nungungulu a engiseya milombelo yathu?
-
Nombelo wu nga gu phasa kharini?
a Milombelo nya yingi nya sithumi nya gutumbege sa Nungungulu yi lovidwe omu nya Bhibhiliya, gu pata ni milombelo ya Jesu Kristo. Milowo nya Gihebheru yi tidwago ngudzu kha nga Velho Testamento, yi na ni tanga nya 150 milombelo. Vathu nyo khaguri va gu wu wona kharini nombelo?
You May Also Like
SIWUDZISO SI GIRWAGO KHU VAPHYA
Khu ginani nyi yedego gu gombeya?
Nombelo gilo hi girago basi gasi hi dzipwa gwadi mwendro uwo wu ngu vbindra isoso?
