1-2. Ginani egi mulovi nyo khaguri a ganedego nigu ginani hi na gi wonago avba nya ndrima yeyi?

DZIMILIYONI nya vathu vari khavo va ngu khodwa ga Jesu, ganiolu khava engisi milayo yaye. (2 Thim. 4:3, 4) Mulovi moyo a di khuye: “Nari khatshi muhuno go manega mwama nyo fane ni Jesu, oyu a ganeyago silo nga edzi Jesu a ganedego khidzo . . . , ina hi di hadzi gu mba khodwa gwaye, nga esi hi giridego 2000 myaga hwane? . . . Adzina hi di hadzi hlamula khethu: Ina, hi di hadzi gu mba khodwa gwaye.”

² Tepo Jesu a nga ba ari mafuni, vathu nya vangi va mu pwide na gu hevbudza, va mu wona na gu gira silewugiso, ganiolu kha va khodwa gwaye. Khu ginani? Ga ndrima yi vbindridego hi wonide 4 sighelo si giridego vathu va si khodwi ga Jesu. Avba nya ndrima yeyi hi na wona gambe 4 nya iso. Nigu hi na wona gambe gu khethu khu ginani vathu muhuno va si khodwigo ga esi valandreyi va Jesu va hevbudzago ni egi gi nga hi phasago gu mba dzumeleya ni gevbini gi hi digisa gu thumeya Jehovha.

3. Ginani egi Jesu a giridego gi nga gira vathu nyo khaguri va tshunganeya?

³ Tepo Jesu a nga ba a romo mafuni, uye a di gu pwana ni vatshavbo. Jesu a di gu hodza ni sighanyi ni vathangeyi, ganiolu a di gu vbungadza ni sisiwana ni ava va nga ba va tshaniswa. Uye gambe a di gu phara gwadi vale va nga ba va wonwa kha nga “sighohi.” Esi Jesu a nga ba a gira si giride vathu nyo khaguri va nga ba va dzi wona na va lulamide va tshunganeya. Avo va di wudzisa valandreyi vaye khavo: “Khu ginani mu hodzago ni gu sela gumogo ni vakhuphisi ni sighohi?” Jesu a di hakha khuye: “Khandri  vale va gu nani womi va vbwetago nyanga aholu vadwali. Eni kha nya tela gu ta rana avo va nya gululama, aholu nyi tede gu ta rana sighohi gasi si dzi laye si wuya ndzilani nya lisine.” — Luka 5:29-32.

4. Guya khu muprofeti Isaya, ginani egi Vajudha va nga ba va yede gu gi vireya khu Mesiya?

⁴ Milowo yari khiyo ginani? Na si guti Mesiya mafuni, muprofeti Isaya a di profetide gu khuye litigo li di hadzi gu mu nyenya. Giprofeto gyari khigyo: “Uye a di nyenywa ni gu hembuludwa vbakari nya vathu; uye a diri muthu nya wuvi ni guti gutshaniseka, a di fanana ni muthu, nya gu, a gu wonwa khu vathu va mu sihalela.” (Isa. 53:3) Kha nga edzi gi yeyedzago khidzo giprofeto, Mesiya a di hadzi nyenywa “khu vathu.” Vajudha va matshiguni ya Jesu va di yede gu dziti gu khavo Jesu a di hadzi nyenywa.

5. Vathu nya vangi muhuno va gu va wona kharini valandreyi va Jesu?

⁵ Ina muhuno hi na ni gigaradzo gya gimwegyo? Gutala nya vathangeyi nya wukhongeyi, va gu hakha gwadi mudzitshetsheni gwawe, sighanyi mwendro vale va wonwago khu litigo nga vathu nya guti. Avo va gu dzumeleya vathu vovo, ambari abari gu mavbanyelo yawe kha ma yelani ni gugola ga Nungungulu. Vathangeyi vovo nya wukhongeyi, va gu woneya vbavbatshi sithumi sa Jehovha, ambari olu sithumi sa Jehovha si gu vathu nya sighingi si vbanyago khu milayo ya Jehovha. Makristo yaya nya lisine kha ma wonwi na ma ri ni lisima tigoni momu. Kha nga a ganedego mupostoli Pawulo, Nungungulu a gu hatha “silo nya nyalidede.” (1 Kor. 1:26-29) Ganiolu, ga Jehovha, satshavbo sithumi saye nyo tumbege si na ni lisima.

6. Ginani egi Jesu a ganedego umo ga Matewu 11:25, 26, nigu hi nga mu pimedzeya kharini?

⁶ Ginani hi nga girago gasi hi si tshunganeyi? (Leri Matewu 11:25, 26.) U nga dzumeyi gu kutsedzedwa khesi vathu va pimisago khu vathu va Nungungulu. Dzumeya gu khuwe Jehovha a gu hatha basi vathu nya gu dzi nogise gasi gu gira gu gola gwaye. (Ndzi. 138:6) Nigu dundrugeya khu silo nya singi esi Jehovha a giridego ga ava litigo li va wonago na va siti gilo.

7. Khu ginani Jesu a nga embeya Vafarisi khuye vapfhadzedzeyi nigu ginani va giridego?

⁷ Jesu kha ema ni vathangeyi nya wukhongeyi va matshiguni yaye va nga ba va si hevbudzi vathu gu khozeya Jehovha khu ndziya nya yadi. Khu gu tiya hwambo, Jesu kawukide Vafarisi va nga ba va garadzega ngudzu khu gu hamba mandza nasiri gu khathaleya vavelegi. (Mat. 15:1-11) Si nga gira vapizane va Jesu na va hlamadzisidwe khu malito yaye, khu kharato avo va di mu wudzisa gu khavo: “U ngu dziti gu khuwe Vafarisi va tshunganede khesi u ganedego?” Uye a di va hlamula khuye: “Simbo watshavbo wu nga mba yadwa khu Papayi wangu a gomogo ndzadzini, wu na sigudwa. Mu nga garadzegi khavo. Avo sikhumu si hetedzago sikhumu. Kholu gikhumu gya gu hetedza gimbe gikhumu, vatshavbo va na thegeya phalani.” (Mat. 15:12-14) Ambari olu vathangeyi nya wukhongeyi va nga goroga khesi Jesu a nga ganeya uye kha diga gu ganeya lisine.

8. Jesu a yeyedzide kharini gu khuye Nungungulu kha seketeyi watshavbo wukhongeyi?

⁸ Jesu yeyedzide gu khuye sihevbudzo nyo khaguri nya wukhongeyi malipha. Jesu kha seketeya sihevbudzo nya gu pwani Nungungulu a ngu seketeya watshavbo wukhongeyi. Gu hambana ni isoso, Jesu ganede gu khuye vathu nya vangi va di hadzi beya khu mwanya nya gule a gu ndziya yi yisago gufuviswani nigu vadugwana va nga hadzi beya khu ndziya nyo honge a gu ndziya yi yisago guvbanyani. (Mat. 7:13, 14) Jesu ganede gambe gu khuye, vambe va di hadzi gira khatshi vo thumeya Nungungulu ganiolu na va si mu thumeyi. Uye hi gengedzide gu khuye:  “Dzi woneyeni ni vaprofeti nya malipha va tago gwanu na va ambade lidowo nya nvuta, narigu khu ndrani masolwa ma havbidego. Mu na vati khu mihandro yawe.” — Mat. 7:15-20.

9. Khu sevbini sihevbudzo nya wukhongeyi esi Jesu a yeyedzidego gu khuye malipha?

⁹ Milowo yari khiyo ginani? Bhibhiliya yi profetide gu khiyo lihaladzo khu nyumba ya Nungungulu, si di hadzi vbisisa monyo wa Jesu. (Ndzi. 69:9; Joh. 2:14-17) Lihaladzo lolo khilo li giridego Jesu a tivegisa sihevbudzo nya wukhongeyi nya malipha. Khu giyeyedzo, Vafarisi va di gu khavo hefemulo kha wufi, ganiolu Jesu hevbudzide gu khuye avo va fudego va gu lala. (Joh. 11:11) Vasadhusi va di si khodwi avba nya gu wuswe ga ava vafudego, ganiolu Jesu wuside pari yaye Lazaro. (Joh. 11:43, 44; Mith. 23:8) Vafarisi va di gu khavo satshavbo si giregago gu gola ga Nungungulu, ganiolu Jesu hevbudzide gu khuye muthu a nga hatha gu thumeya Nungungulu mwendro ne. — Mat. 11:28.

10. Khu ginani esi hi hevbudzago si girago nya vangi va tshunganeya?

¹⁰ Ina muhuno hi na ni gigaradzo gya gimwegyo? Ina. Nya vangi va ngu tshunganeya tepo hi yeyedzago vathu umo nya Bhibhiliya gu khethu simbe sihevbudzo nya wukhongeyi malipha. Khu giyeyedzo, gasi gu woneleya vathu, vathangeyi nya wukhongeyi vo hevbudza gu khavo Nungungulu a gu vbisa vathu nya gu vivbe niloni. Ganiolu, ava va khozeyago Jehovha, Nungungulu nya lihaladzo, va gu phasa vathu gu pwisisa gu khavo sihevbudzo soso malipha. Vathangeyi nya wukhongeyi va gu hevbudza gambe gu khavo hefemulo kha wufi, ganiolu ethu ha gu si vega guagani gu khethu gihevbudzo gyogyo gi mwalo umo nya Bhibhiliya. Kholu nari khatshi hefemulo kha wufi, gitumbiso nya gu wuge ga ava vafudego na gi si pwali nigu ambari olu wukhongeyi nya wungi wu hevbudzago gu khuwo ni gevbini hi giregago guvbanyani gwathu gi di vegwa kharato khu Nungungulu, ethu ha gu hevbudza gu khethu muthu tshulegide gu dzi hatheya. A nga hatha gu thumeya Nungungulu mwendro gu mba mu thumeya. Va gu dzipwa kharini vathangeyi nya wukhongeyi tepo hi girago isoso? Gutala nya dzitepo va gu goroga ngudzu.

11. Guya khu malito ya Jesu ma gomogo omu ga Johane 8:45-47, ginani egi Nungungulu a vbwetago gu khuye vathu vaye va gira?

 ¹¹ Ginani hi nga girago gasi hi si tshunganeyi? Ha gu ba hi gola lisine, hi yede gu khodwa ni gu engisa sileletelo sa Nungungulu. (Leri Johane 8:45-47.) Gu hambana ni Sathane Dhiyabhulosi, ethu gima kha hi na nga diga lisine. Ethu gima kha hi na nga gira ni gevbini gi dwanisanago ni esi hi si khodwago. (Joh. 8:44) Nungungulu o vbweta gu khuye sithumi saye si “nyenya esi nyo vivbe” si bwe si “gira esi nya sadi” gu fana ni Jesu. — Rom. 12:9; Hebh. 1:9.

12. Khu ginani Vajudha nya vangi va tshunganedego khedzi Jesu a fudego khidzo?

¹² Khu gevbini gimbe gilo gi giridego Vajudha va si khodwi ga Jesu? Pawulo a di khuye: “Ethu ha gu tivisa Kristo a khokhotedwego vbasimbotunu nya tshanisa. Mahungu yaya ma gu khunguvanyisa Vajudha.” (1 Kor. 1:23) Khu ginani Vajudha nya vangi va nga tshunganeya kholu Jesu a ngafa avbo nya simbo nya tshanisa? Ga Vajudha, gu ba Jesu a fude avbo nya simbo nya tshanisa, si di gu gira gu khatshi uye gighevenga ni gighohi. Khu kharato, avo kha va khodwa gupwani uye khuye Mesiya. — Dhet. 21:22, 23.

13. Ginani egi Vajudha va nga tshunganeya va nga mba theya kota khigyo?

¹³ Vajudha va nga tshunganeya, kha va vega gupima avbo ga satshavbo si nga ba si patega. Avo kha va vega gupima avbo nya gu Jesu a diri mwalo nandru, a di singedzwa nigu pharidwe khu ndziya nya mba yadi. Avo va nga lamula Jesu kha va vbweta gu lamula khu ndziya nyo lulame, avo va giride silo khu givbiredza nigu va ndragide milayo nya yingi nya malamulelo. (Luka 22:54; Joh. 18:24) Nari khatshi valamuli vale va diri mwalo gihatheya, avo na va phede khu gu gevisisa gwadi satshavbo esi Jesu a nga ba a singedzwa. Ganiolu, wulangani nya isoso, avo kamwe khavo “va nga vbweta gilo nya gu mu singedze gasi va mane gu mu songa.” Tepo mano yawe ma nga mba dugeleya, muprista nya khongolo a di zama gu gira Jesu a ganeya silo si nga hadzi mu songisa. Isoso si di si gimbileyani ni Nayo wa teponi yile. (Mat. 26:59; Marko 14:55-64) Ambari tepo Jesu a nga wuswa khu ga  vafudego, valamuli vale va di simama va mu phara khu ndziya ya mba yadi. Avo va di livba “dzitsapawu nya dzingi” masotshwa ma nga ba ma woneleya lithowo la Jesu, gasi ma gimbiya ma phalaligiseya malipha nya gu khayo Jesu bidwe. — Mat. 28:11-15.

14. Ginani egi Milowo yi nga ba yi profetide khu gufa ga Mesiya?

¹⁴ Milowo yari khiyo ginani? Lisine gu Vajudha nya vangi matshiguni ya Jesu va di si pimisi gu khayo Mesiya a di yede gufa. Ganiolu, Milowo yi di profetide khiso. Iyo yari khiyo: “A di ningela womi waye a songwa; a sayedwa gumogo ni sighohi, gikhati a rwadego sighoho sa vathu nya vangi, a di lombelela khu sighohi.” (Isa. 53:12) Khu kharato, gu diri mwalo gighelo nya gu Vajudha va tshunganeya tepo Jesu a nga songwa kha nga gighohi.

15. Ginani egi Dzifakazi dza Jehovha dzi singedzidwego gi giridego vambe va tshunganeya?

¹⁵ Ina muhuno hi na ni gigaradzo gya gimwegyo? Ina. Jesu, singedzidwe ni gu lamudwa khu ndziya nya mba yadi. Nigu khiso sasimweso si giregago ni Dzifakazi dza Jehovha muhuno. Nga wona siyeyedzo nyo khaguri. Estados Unidos, umo nya myaga nya 1930 kala 1940, sithumi sa Nungungulu si hongode dzitepo nya dzingi tribhunali gasi siya emeya gu tshulega gwaso nyo khozeye Nungungulu. Vambe valamuli va di gu dzegeya gu yeyedza gu khavo va ngu hi nyenya. Quebec, tigoni ga Canadà, wukhongeyi ni wufumu wu thumide khu wumowo gasi gu fuvisa thumo wathu. Vahuweleyi nya vangi va hongode pasoni kholu va bhuledego vavhizinyu vawe khu Mufumo wa Nungungulu. Alemanha, mufumo wa Vanazi wu songide vaphya nya vangi nyo tumbege. Ga myagana yeyi, vandriyathu nya vangi Russia va modwe ni gu khotedwa khu kotani nya gu ganeye khu Bhibhiliya a gu igyo egi wufumu wu gi wonago nga “actividades extremistas.” Ambari Tradução do Novo Mundo da Bíblia Sagrada khu Girusso yi himbedzedwe nigu ya gu wonwa kha nga material extremista khu kotani nya olu yi thumisago lina la Jehovha.

16. Guya khu 1 Johane 4:1, khu ginani hi si yeligo gu dzumeya malipha ma ganedwago maningano ni sithumi sa Jehovha?

¹⁶ Ginani hi nga girago gasi hi si tshunganeyi? Hi yede guti satshavbo si pategago. Ga ganelo yaye ya gigomoni, Jesu gengedzide vaengiseyi vaye gu khuye va di hadzi va lipheya va bwe va va ‘singedza satshavbo silo nya guvivbe.’ (Mat. 5:11) Malipha yaya ma guta khiyo ga Sathane. Uye a gu kutsedzeya vawugeyi gu phalalegiseya malipha khava va haladzago lisine. (Gutu. 12:9, 10) Ethu kha hi yeli gu engiseya malipha yoyo. Ethu gima kha hi yeli gu dzumeleya malipha yoyo ma hi theya hwanga mwendro gu hi gira hi vbeledwa khu gu khodwa. — Leri 1 Johane 4:1.

17. Esi si giregidego Jesu na a si gufi, adzina si giride vathu nyo khaguri va tshunganeya khu ndziya muni?

¹⁷ Na gu tshade vbadugwana gasi gu afa, Jesu sengidwe khu moyo nya vapostoli vaye nya 12. Mumbe mupostoli waye, dangide Jesu guraru, nigu vatshavbo vapostoli vaye va mu tshide enga ga wutshigu wule na a si gufi. (Mat. 26:14-16, 47, 56, 75) Jesu kha hlamadziswa khiso. Uye a di ganede gu khuye isoso si di hadzi dugeleya. (Joh. 6:64, 13:21, 26, 38; 16:32) Adzina vambe va tshunganede khu gu wona isoso, va pimisa gu khavo: ‘Abari gu mavbanyelo ya vapostoli va Jesu khayo aya, kha nyi dzini gu gira gipandre nya tshawa wowo.’

18. Siprofeto muni si tadzisegidego Jesu na a si gufi?

¹⁸ Milowo yari khiyo ginani? Mazanazana myaga hwane Jesu na a si guti mafuni, Jehovha a di yeyedzide umo nya Lito laye khuye Mesiya a di hadzi ningedwa ga valala khu 30 singerengere nya parata. (Zak. 11:12, 13) Uye a nga hadzi mu ningeya pari yaye. (Ndzi. 41:9) Muprofeti Zakariya anuye lovide khuye: “Bayisa Muhavisi dzi  fela gu phalalega dzinvuta.” (Zak. 13:7) Vathu nya myonyo nya yadi va di hadzi gu mba diga gu khodwa ga Jesu khu kotani nya esi si dugeledego. Wulangani nya isoso, gu wona siprofeto sesi na si gu tadzisega avbo ga Jesu na si engedzede gu tiyisa gukhodwa gwawe.

19. Avo va gu ni myonyo nya yadi ginani va gitigo?

¹⁹ Ina muhuno hi na ni gigaradzo gya gimwegyo? Ina. Muhuno vathu va nga ba va tidwa kha nga Dzifakazi dza Jehovha va digide lisine va khala vawugeyi nigu va gu zama gu ndreyisa vambe. Avo va gu phalalegiseya mahungu nya mba yadi ni malipha khu Dzifakazi dza Jehovha, khu gu thumisa dzijornali, Radhiyu, TV ni Interneti. Ganiolu, avo va gu ni myonyo nya yadi kha va tshunganeyi khu kotani nya isoso, wulangani nya isoso, avo va ngu dziti gu khavo Bhibhiliya yi di profetide gu khiyo vathu va di hadzi khala vawugeyi. — Mat. 24:24; 2 Ped. 2:18-22.

20. Guya gu 2 Thimoti 4:4, 5, ginani gi na hi phasago gu mba tshunganeya khu kotani ya vale va digidego Jehovha?

²⁰ Ginani hi nga girago gasi hi si tshunganeyi? Hi yede gu simama hi tiyisa gukhodwa gwathu khu gu hi hevbula Bhibhiliya tshigu ni tshigu, hi gombeya hi bwe hi khala na hi pharegide khu thumo owu Jehovha a hi ningidego. (Leri 2 Thimoti 4:4, 5.) Ha gu ba hi ri ni gukhodwa, kha hi na nga garadzega tepo hi na pwago mahungu nya mba yadi maningano ni Dzifakazi dza Jehovha. (Isa. 28:16) Lihaladzo lathu khu Jehovha, Lito laye, ni vandriyathu, si na hi phasa gu mba tshunganeya khu kotani ya vale va emidego gu thumeya Jehovha.

21. Ambari olu vathu nya vangi muhuno va bombago esi hi hevbudzago, ginani egi Lito la Nungungulu li hi tumbisago?

²¹ Dziteponi dza Jesu nya vangi va tshunganede va bwe va si khodwi gwaye, ambari ulolo, nya vangi va khodwe gwaye. Ga vathu vovo, gu diri ni givbango gimwegyo nya tribhunali nya Gijudha ni “vathu nya vangi ngudzu nya tsawa nya vaphasi nya mhamba.” (Mith. 6:7; Mat. 27:57-60; Marko 15:43) Khu gufana, mazanazana nya vathu muhuno kha va dzumeleyi gilo gi va gira va tshunganeya. Khu ginani? Kholu avo va nguti ni gu haladza lisine li gomogo omu nya Milowo. Kha nga li ganeyago Lito la Nungungulu “avo va golago nayo wago va gu vbanya gurulani nya gukhongolo; gimwalo gi va khunguvanyisago.” — Ndzi. 119:165.