1. Ginani adzina gi nga dugeleya tepo u nga bhuleya vambe mahungu nya Bhibhiliya khu tepo nyo pheye?

U NGU dundruga litshigu nyo pheye u nga tugula gu khuwe u li mane lisine? Si gu vbevbugede gu pwisisa satshavbo u nga ba u hevbula umo nya Bhibhiliya. U pimiside gu khuwe vatshavbo va di hadzi tsaka khu gu hevbula esi u si khodwago nigu u di gu tiyisega gu khuwe mahungu ma gomogo umo nya Bhibhiliya ma di hadzi gu phasa vathu gu manega ni litsako ni wumindru nyo tsakise. (Ndzi. 119:105) Na wu tsakide, u di hunga gu bhuleya esi u si hevbudego dzipari dzago ni valongo vago. Ganiolu, igyo gi si tsakisigo khu gu vathu nya vangi kha va dzumeya esi u nga va embeya.

2-3. Dziteponi dza Jesu, ginani egi nya vangi va nga ba va pimisa khuye ni esi a nga ba a hevbudza?

² Kha hi yeli gu hlamala vambe va gu bomba esi hi hevbudzago. Matshiguni ya Jesu vathu nya vangi va bombide esi a nga ba a hevbudza, ambari olu a nga ba a gira silewugiso nya singi si nga ba si yeyedza gu khiso a ngu seketedwa khu Nungungulu. Khu giyeyedzo Jesu wuside Lazaro. Gilewugiso gyegi gi giride ambari vawugeyi vaye va tiyisega gu khavo a di gu seketedwa khu Nungungulu. Ganiolu, vathangeyi nya Gijudha kha va dzumeya gu khavo Jesu a diri Mesiya. Avo va di bwe va vbweta gu songa Jesu ni Lazaro! — Joh. 11:47, 48, 53; 12:9-11.

³ Jesu a di gu dziti gu khuye nya vangi va di hadzi gu mba khodwa gu khavo khuye Mesiya. (Joh. 5:39-44) Uye embede tsawa nya valandreyi va Johane Mubhabhatisi khuye: “Kategide saye wule a si khunguvanyiswigo kheni.” (Mat. 11:2, 3, 6) Gasi khu ginani nya vangi va nga bomba Jesu?

4. Ginani hi na hevbulago avba nya ndrima yeyi?

 ⁴ Avba nya ndrima yeyi ni eyi yi landreyago, hi na wona sighelo nyo khaguri si nga gira vathu va matshigoni ya Jesu va tshunganeya. Hi na wona gambe gu khethu khu ginani vathu nya vangi muhuno va bombago esi hi hevbudzago nigu nya lisima ga satshavbo, hi na wona gu khethu khu ginani hi yedego gu manega ni gukhodwa nya gutiye avba ga Jesu gasi hi si tshunganeyi.

5. Ginani adzina gi giridego vathu nya vangi va pimisa gu khavo Jesu khandri Mesiya a tumbisidwego?

⁵ Nya vangi va bombide Jesu khu kotani nya avba a dandridego avbo. Avo va di gu dzumeya gu khavo Jesu muhevbudzi nya khongolo nigu a di gu gira silewugiso, ganiolu vathu va di gu wona Jesu nga gyanana gya Karpinteiro nyo khaguri basi. Uye a diri wa Nazareta lidhoropa li nga ba li wonedwa vbavbatshi khu vathu. Ambari Nataniyeli mulandreyi wa Jesu ganede khuye “Ina gu ngu dzi kodza gu duga gilo nya gyadi khu Nazareta?” (Joh. 1:46) Nataniyeli adzina a di gu li woneya vbavbatshi lidhoropa lile mwendro adzina a di gu dundrugeya khu giprofeto gi gomogo umo ga Mikeya 5:2, gi nga ba gi ganeya gu khigyo Mesiya a di hadzi velegwa Bhetlehema nasiri Nazareta.

6. Ginani gi nga hadzi phasa vathu va matshiguni ya Jesu guti gu khavo uye a diri Mesiya?

⁶ Milowo yari khiyo ginani? Muprofeti Isaya ganede gu khuye valala va Jesu va di hadzi gu mba theya kota khu “matshigu nya gu vbanye gwaye.” (Isa. 53:8) Gu di profetidwe nya singi maningano khu mahungu yaya. Nari khatsi vathu va di dzi ningide tepo nya gu hevbule satshavbo si pategago avbo nya mahungo yaya, va di hadzi gu dziti gu khavo Jesu velegidwe Bhetlehema nigu a diri gitugulwana gya pfhumu Dhavhidhe. (Luka 2:4-7) Jesu velegidwe ga wulanga gu nga ba gu profetidwe umo ga Mikeya 5:2. Ganiolu, gigaradzo muni gi nga ba gi romo? Vathu va di vbiredzeya gu lamula, avo va di si siti satshavbo si pategago, khu kotani nya isoso kha va khodwa ga Jesu.

7. Khu ginani vathu nya vangi muhuno va bombago gu engisa mahungu nya Dzifakazi dza Jehovha?

⁷ Ina muhuno hi na ni gigaradzo gya gimwegyo? Ina, gyomo. Gutala nya sithumi sa Jehovha, kha si dugeyi malangani nya gu wonegeye. Khu kharato, avo va gu wonwa nga “vathu nya mba na sihevbulo.” Vambe vathu va gu pimisa gu khavo sithumi sa Jehovha kha si ninganedwi khu gu hevbudza vambe Bhibhiliya kholu kha va hevbula ga dzixikola nya lisima nya wukhongeyi. Vambe vari khavo Dzifakazi dza Jehovha wukhongeyi wa Amèrica. Ganiolu, lisine khu gu gutala nya Dzifakazi dza Jehovha kha dzi vbanyi Amèrica. Vambe va pwide na gu ganedwa gu pwani Dzifakazi dza Jehovha kha dzi khodwi ga Jesu. Khu myaga nya yingi vathu va Jehovha va di gu ranwa gu pwani “va na Sathane” “va wugeyi” nigu vathu nya vangi va ri khavo wukhongeyi wathu “i tshetshe nya va tsungu.” Nya vangi kha va dzini gu khala Dzifakazi dza Jehovha kholu va pwago mahungu yoyo ni olu va sitigo lisine khu vathu va Jehovha.

8. Guya khu Mithumo 17:11, ginani egi vathu va yedego gu giti maningano ni sithumi sa Nungungulu muhuno?

⁸ Ginani egi vathu va nga girago gasi va si tshunganeyi? Vathu va yede gu gevisisa gwadi satshavbo si pategago. Khiso a giridego mulovi nya Ivhangeli ya Luka, uye a di dzi emisede gu gira wugevisisi “gasi guti idzo si nga dugelelago khidzo gu pheyani.” Uye a di gu vbweta gu khuye vahevbuli nya mahungu yaya “vati lisine” maningano ni esi va nga ba va si pwide khu Jesu. (Luka 1:1-4) Vajudha va dhoropani ga Bhereya va di gu fana ni Luka. Tepo va ngapwa mahungu nya yadi maningano ni Jesu, avo va di gevisisa milowo nya Gihebheru gasi gu tiyisega gu khavo esi va nga sipwa lisine. (Leri Mithumo 17:11.) Khu ndziya nyo fane, vathu muhuno va yede gu gevisisa satshavbo si pategago. Avo va yede gu fananisa sihevbudzo sa vathu va Nungungulu ni  esi Milowo yi ganeyago. Avo va yede gambe gu hevbula khesi vathu va Nungungulu va girago muhuno. Va guti gwadi vathu va Nungungulu, kha va na nga khodwa avba nya silo nyo vivbe esi vathu va ganeyago maningano ni sithumi sa Nungungulu.

9. Tepo Jesu a nga bomba gu yeyedza giwoniso gya ndzadzini, ginani gi nga girega?

⁹ Sihevbudzo sa Jesu si di gu hlamadzisa, ganiolu ga vathu va matshiguni ya Jesu isoso basi kha sa nga ba si eneya. Avo va di gu vbweta gu khavo Jesu a dzi yeyedza gu khuye khu Mesiya, khu gu va yeyedza “giwoniso gya ndzadzini.” (Mat. 16:1) Adzina avo va lombide Jesu gu gira isoso kholu va di si ma pwisisi gwadi malito ma gomogo omo ga Dhaniyeli 7:13, 14, ganiolu yi di si vbohi tepo gasi Jehovha a tadzisa giprofeto gegi. Sihevbudzo sa Jesu si di yede gu va gira va tiyisega gu khavo uye khuye Mesiya. Tepo Jesu a nga bomba gu gira giwoniso va nga ba va gi vbweta avo va di diga gukhodwa gwaye. — Mat. 16:4.

10. Jesu a tadziside kharini esi Isaya a lovidego maningano ni Mesiya?

¹⁰ Milowo yari khiyo ginani? Muprofeti Isaya lovide esi maningano ni Mesiya: “Kha na gulumela mwendro gu dzi khusedza, ambari gu pwadza lito laye mitendrelani.” (Isa. 42:1, 2) Tepo Jesu a nga ba a gira thumo waye nya gu tshumayele kha nga ba a dzi khusedza, uye kha vbaha dzitempeli, uye kha ambala sombo nya lisima nya wukhongeyi nigu kha vbweta gu khuye vathu va thumisa malina nya lisima gasi gu mu rana. Ambari tepo a nga modwa khu pfhumu Herodhi, Jesu kha dzumeya gu gira gilewugiso gasi gu dzi yeyedza. (Luka 23:8-11) Lisine gu Jesu giride silewugiso nyo khaguri, ganiolu nya lisima gwaye gu diri gu tshumayela mahungu nya yadi. Uye embede vapizani vaye gu khuye: “Khiso nyi nga si tela.” — Marko 1:38.

11. Mapimo muni nyo hosege vathu nyo khaguri va gu nawo muhuno?

¹¹ Ina muhuno hi na ni gigaradzo gya gimwegyo? Ina. Vathu nya vangi muhuno va gu tsakiswa khu dzitshetshe nya dzikhongolo dzi mburisedwego gwadi, vathangeyi nya dzitshetshe va gu na ni malina nyo khugege ni mibuzu nya gu  nya vangi kha va guti omu yi dugeyago umo. Ganiolu, vathu va gomogo umo nya dzitshetshe dzodzo, ginani va hevbulago khu Nungungulu ni situmbiso saye? Ava va tago mitshanganoni yathu, va gu ta hevbula esi Jehovha a vbwetago gu khuye hi gira. Dzisalawu dzathu nya Mufumo malanga ma mburisedwego gwadi nigu ma agide. Ava va thangeyago libandlani kha va ambali sombo nya lisima si va tivegisago nigu kha va ranwi khu malina nyo khugege. Sihevbudzo sathu ni esi hi si khodwago so seketedwa umo nya Lito la Nungungulu. Ambari ulolo, vathu nya vangi muhuno kha va khodwi esi hi hevbudzago, khu gu khavo kha hi pategi umo nya mibuzo ni gu khavo esi hi hevbudzago khandriso va vbwetago gu sipwa.

12. Guya khu Vahebheru 11:1, 6, gukhodwa gwathu gu yede gu dzi seketeya avba nya ginani?

¹² Ginani hi nga girago gasi hi si tshunganeyi? Mupostoli Paulo embede Makristu ya Roma khuye: “Gukhodwa gwa guta khu gupwa mahungu hi tiviswago, gutivisa gwa guta khu mahungu ya Kristo.” (Rom. 10:17) Mibuzo yi si seketedwigo umo nya Bhibhiliya ambari na yi mburide kharini mwendro gu tsakisa, iyo kha yi tiyisi gukhodwa gwathu. Igyo gi nga hi phasago gu tiyisa gukhodwa gwathu gu hevbula Lito la Nungungulu kholu “muthu nya mba khodwa kha dzi kodzi gu tsakisa Nungungulu.” Khu kharato, hi yede gu tiyisa gukhodwa gwathu na hi dziseketeya avba nya sihevbudzo nya lisine. (Leri Vahebheru 11:1, 6.) Kha si vbwetegi gu hi wona giwoniso gya ndzadzini gasi hi tiyisega gu khethu hi li manide lisine. Gihevbulo nya Bhibhiliya gi ngu hi phasa gu tiyisega gu khethu hi manide lisine nigu igyo gi ngu hi duseya ni gwevbini gu kanakana hi gu nago.

13. Khu ginani nya vangi va nga mba khodwa ga Jesu?

¹³ Matshiguni ya Jesu vapizane va Johane Mubhabhatisi va hlamade ngudzu khu gu wona vapizane va Jesu na va si pfhungi. Jesu tshamusede gukhuye avo va diri mwalo gighelo nya gu giri isoso uye na ngo vbanya. (Mat. 9:14-17) Ambari ulolo, Vafarisi ni vambe valala va Jesu va di gu mu wugeya kholu a nga ba a si landrisi sihena sawe. Vama vovo va gorogide ngudzu tepo  Jesu a nga hawulugisa vadwali nyo khaguri khu Sabhadho. (Marko 3:1-6; Joh. 9:16) Avo va di gu dzi khusedza khu gu khavo, va ngu sayisa Sabhadho, ganiolu gwavo kha sa nga ba si hosegide gu gira dzinogosi umo nya tempele, khu kharato avo va gorogide ngudzu tepo Jesu a nga va kawuka khu isoso. (Mat. 21:12, 13, 15) Tepo va ngapwa Jesu na gu tshumayela sinagogani Nazareta, va di goroga ngudzo tepo a nga thumisa siyeyedzo nya matimo ya Israyeli gasi gu va yeyedza gu khuye avo va diri va magundrele nigu va diri mwalo gukhodwa. (Luka 4:16, 25-30) Vathu nya vangi kha va khodwa ga Jesu kholu uye kha gira esi va nga ba va si vbweta. — Mat. 11:16-19.

14. Khu ginani Jesu a nga kawuka sihena nya vathu si nga ba si si pwani ni Bhibhiliya?

¹⁴ Milowo yari khiyo ginani? Khu gu thumisa muprofeti Isaya Jehovha a di khuye: “Kha nga olu vathu vava va hidzimelago avbo gwangu khu magana ma dugago khu kanani gwawe, va gu nyi dhumisa khu magana basi, aholu myonyo yawe yomo hwindzo ngudzu ni Eni, kholu githawo gyawe ni Eni gya gu manega basi khu milayo va mi hevbudego ni vathu.” (Isa. 29:13) Jesu giride gwadi khu gu ba a kawukide sihena nya vathu si gu mba pwanana ni Lito la Nungungulu. Ava va nga ba va wona milayo ni sihena nya vathu kha nga silo nya lisima ngudzu gu vbindra milayo ya umo nya Bhibhiliya, va di gu yeyedza gu khavo kha va khodwi ga Jehovha ni ga oyu a nga mu rumeya kha nga Mesiya.

15. Khu ginani vathu nya vangi muhuno va gu mba gola Dzifakazi dza Jehovha?

¹⁵ Ina muhuno hi na ni gigaradzo gya gimwegyo? Ina, hi nagyo. Vathu nya vangi va ngu goroga khu kotani nya Dzifakazi dza Jehovha, kholu idzo kha dzi pategi umo nya mibuzo ni ga sihena si gu mba pwanana ni Bhibhiliya, nya nga gu dundruga matshigu nya gu velegwe ni gu hodza khisimuso. Vambe va ngu goroga ngudzu tepo Dzifakazi dza Jehovha dzi gumba patega umo nya mibuzo yi gimbelanago ni wufumo ni tepo idzo dzi gu mba landriseya sihena nya madzingelo si dwanisanago ni sihevbudzo nya Bhibhiliya. Vathu vovo vo pimisa gu khavo Nungungulu a ngu tsaka khedzi va mu khozeyago khidzo. Ganiolu oyu a hathago gu landriseya sihena nya litigo leli, vbavbandze nyo landrise sihevbudzo nya Bhibhiliya kha tsakisi Jehovha. — Marko 7:7-9.

16. Guya khu Ndzimo 119:97, 113, 163-165, ginani hi yedego gu gira nigu ginani hi yedego gu gi potsa?

¹⁶ Ginani hi nga girago gasi hi si tshunganeyi? Hi yede gu haguleya lihaladzo nyo tiye khu milayo ni matshina nya milayo ya Jehovha. (Leri Ndzimo 119:97, 113, 163-165.) Ha gu ba hi haladza Jehovha hi na potsa ni gevbini gihena gi gu mba mu tsakisa. Nigu kha hi na nga dzumeleya ni gevbini gi khala nya lisima gwathu gu vbindra lihaladzo lathu khu Jehovha.

17. Vathu nya vangi matshiguni ya Jesu va di gu vireya gu khavo Mesiya a gira ginani?

¹⁷ Vathu nyo khaguri matshiguni ya Jesu va di gu vbweta ngudzu gu khavo mufumo wu vbindrugedzwa. Avo va di gu tshaniswa ngudzu khu mufumo wa Roma. Khu kharato, avo va di gu vbweta gu khavo Jesu a va tshula ga gigaradzo gyogyo. Ganiolu, tepo va nga zama gu mu gira mufumeyi uye a di bomba. (Joh. 6:14, 15) Vaprista ni vambe va di gu ningwa khu Varoma sikhalo nyo khaguri ni wufumo, khu kharato va di gu thava gu khavo Jesu a vbindrugedza mufumo wa Roma. Gu garadzega gwavo khu kotani nya politika, gu giride Vajudha nya vangi va diga gu khodwa ga Jesu.

18. Khu sevbini siprofeto maningano ni Mesiya esi nya vangi va nga mba theya kota khiso?

¹⁸ Milowo yari khiyo ginani? Siprofeto nya singi si ganeyago khu Mesiya si di gu ganeya gu khiso uye a di hadzi gu khala ndrena mwendro mudwani nya nyimbi a palago, ganiolu simbe siprofeto sa gu yeyedza gu khiso uye a di hadzi  pheya khu gufa khu kotani nya sighoho sathu. (Isa. 53:9, 12) Ganiolu, khu ginani Vajudha va nga ba vari ni mawonelo nyo hosege khu Mesiya? Khu gu nya vangi gwavo va di gu vbweta gu khavo sigaradzo sawe si lulamiswa kamwe ga gitepwana gile. Nya vangi matshiguni ya Jesu va di si theyi kota khu siprofeto si nga ba si si tumbisi gu lulamiswa nya sigaradzo sawe ga tepo yile.— Joh. 6:26, 27.

19. Mawonelo muni nyo hosege ma girago vathu nya vangi muhuno va bomba esi hi hevbudzago?

¹⁹ Ina muhuno hi na ni gigaradzo gya gimwegyo? Ina, gyomo. Vathu nya vangi muhuno kha va khodwi avba nya esi hi hevbudzago, kholu ethu kha hi dzi bedzedzeyi umo nya politika. Avo vo pimisa gu khavo hi yede gu vhota pfhumu nyo khaguri, ganiolu ethu hi ngu dziti gu khethu ha gu hatha muthu kha nga mufumeli wathu, hi na ba hi pfhurareya Jehovha. (1 Sam. 8:4-7) Vathu gambe va nga pimisa gu khavo ethu hi yede gu vbaha dzixikola, dziospitali ni gu gira yimbe mithumo gasi gu phasedzeya gitshungu. Avo va ngu bomba mahungu hi hevbudzago, kholu ethu ha gu dzi garadza avbo nya thumo nya gu tshumayele, vbavbandze nyo dzi garadzeye gu lulamisa sigaradzo nya litigo leli.

20. Kha nga si tshingisidwego khu Jesu umo ga Matewu 7:21-23, ginani gi yedego gu khala nya lisima ngudzu gwathu?

²⁰ Ginani hi nga girago gasi hi si tshunganeyi? (Leri Matewu 7:21-23.) Gilo nya lisima gwathu gu gira thumo owu Jesu a nga hi ninga. (Mat. 28:19, 20) Kha hi vbweti gu pfhala khu gu lulamisa sigaradzo nya litigo leli. Ethu hi ngu haladza vathu nigu hi ngu khatala khavo, ganiolu hi ngu yiti ndziya nya yadi nyo phase khiyo muthu kwanu, a gu gu mu hevbudza maningano ni Mufumo wa Nungungulu ni gu mu phasa gu khala pari ya Jehovha.

21. Hi yede gu dzi emiseya gu gira ginani?

²¹ Avba nya ndrima yeyi hi bhude khu 4 silo si nga gira vathu va si khodwi ga Jesu nigu silo soso si ngo simama gu gira vathu nya vangi muhuno va si khodwi avba nya esi valandreyi va Jesu va hevbudzago. Ina hi yede gu dzi woneya ga silo sesi basi? Ahihi. Avba nya ndrima yi landreyago, hi na wona gambe 4 silo si nga hi girago hi tshunganeya. Dzi emiseye gu mba dzumeleya ni gevbini gi gu gira u ema gu landreya Jesu u bwe u tiyisa gukhodwa gwago.