1-2. Sigaradzo muni esi vandriyathu nya vangi va tshanganago naso?

MUPOSTOLI Pawulo kutside Thimoti gu a dzi garadza thumoni nyo tshumayele. (2 Thim. 4:5) Khu kharato, ethu a gu landrisa wusingalagadzi wa Pawulo, hi bwe hi dzi garadza thumoni wa Nungungulu. Ambari ulolo, dzimbe dzitepo hi ngu tshangana ni sigaradzo. Ga vambe vandriyathu gu patega thumoni nyo tshumayele gilo gi vbwetago gu tiya hwambo. (2 Thim. 4:2) Khu giyeyedzo, nga dundrugeya khu vandriyathu va vbanyago ga mayigo thumo wathu wu himbedzedwago. Avo va gu tshumayela ambari va dzitigo gu khavo va na tshuka va khothedwa.

² Va ngu tshangana ni sigaradzo nya singi si nga va girago va vbeledwa khu tshivba. Khu giyeyedzo, nya vangi va ngu thuma dziora nya dzingi gasi gu mana gilogyo nyo khathaleye khigyo dzindranga dzawe. Avo va ngu dzina gu gira nya singi thumoni nyo tshumayele, ganiolu ya gu vbeya semana na va garade. Vambe va gu tshaniswa khu madwali nya ma khongolo ni gigaradzo nya gu dandre khu tanga. Vambe kha va si kodzi gu duga khu ndrangani, khu kharato va ngu tandrega gu gira esi va nga ba va si vbweta thumoni nyo tshumayele. Vambe va gu dzipwa na vari mwalo lisima mahoni ga Jehovha. Mary, * ndriyathu moyo a vbanyago Oriente Médio wari khuye: “Nyi ngu dzi garadza gasi nyi woneleya mipimiso nya mba yadi, nigu isoso si ngu nyi vbedza tshivba. Nya gu dzipwa nandru, kholu isoso si ngu nyi beya tepo ni tshivba nyi nga hadzi gu yi thumisa thumoni nyo tshumayele.”

3. Ginani hi na hevbulago avba nya ndrima yeyi?

³ Ni gevbini gigaradzo hi tshanganago nagyo, Jehovha a ngu tumbisa gu hi ninga tshivba hi yi vbwetago gasi hi simama gu mu thumeya khavba hi si kodzago khavbo. Na hi si woni edzi Jehovha a nga hi phasago khidzo, hongoleni hi wona edzi a phasidego khidzo  Pawulo ni Thimoti gu gira thumo nyo tshumayele ambari va nga ba va tshangana ni sigaradzo.

4. Sigaradzo muni esi Pawulo a nga tshangana naso?

⁴ Pawulo tshanganide ni sigaradzo nya singi. Pawulo a di gu vbweta giphaso gya Jehovha, tepo valala vaye va nga ba va mu veta, va mu khotheya ni gu zama gu mu songa. (2 Kor. 11:23-25) Pawulo kha khala dzitshoni gu ganeya gu khuye dzimbe dzitepo a ngu vbeya tshivba. (Rom. 7:18, 19, 24) Uye gambe a di gu emisana ni madwali ma nga ba ma gira gu khatshi “muba givilini.” Ga tepo nyo khaguri lombide Nungungulu gu khuye a mu duseya muba yoyo. — 2 Kor. 12:7, 8.

5. Ginani egi Pawulo a gi kodzidego gu gira ambari olu a nga ba a tshangana ni sigaradzo?

⁵ Jehovha ningide tshivba Pawulo gasi a simama thumoni gwaye nyo tshumayele ambari olu a nga ba a tshangana ni sigaradzo. Wona esi Pawulo a si kodzidego gu gira. Khu giyeyedzo, tepo a nga ba a khothedwe umo nya nyumba nyo khaguri Roma, uye tshumayede vathu nya vangi khu sighingi a bwe a tshumayela vathangeyi. (Mith. 28:17; Filp. 4:21, 22) Uye gambe tshumayede dzighadhi ni ava va nga ba va mu wuseya. (Mith. 28:30, 31; Filp. 1:13) Ndrani nya tepo yayimweyo, Nungungulu thumiside Pawulo gasi gu lova malangaliya ma phasidego Makristo nya lisine gale, nigu ma ngo phasa Makristo nya lisine muhuno. Nigu giyeyedzo gya Pawulo gi tiyiside libandla la Roma, khu kharato Bhibhiliya yo yeyedza gu khiyo vandriyathu va iyoyo va di “tivisa mahungu ya Nungungulu khu tshivba nya mba thava gilo.” (Filp. 1:14) Lisine gu Pawulo dzimbe dzitepo a di gu hegedwa, ganiolu uye a di gu dzi garadza gu gira esi si gomogo tshivbani gwaye. Nigu isoso “si phasedzede gu dandra Ivhangeli.”— Filp. 1:12.

6. Guya khu 2 Vakorinto 12:9, 10, ginani gi phasidego Pawulo gu gira thumo nyo tshumayele?

⁶ Pawulo a di gu dziti gu khuye nari khatshi kha phaswa khu Jehovha na sa si kodza gu gira esi a nga gira. Khu kharato uye ganede gu khuye tshivba ya Nungungulu ya gu “tadzisega ga vale va gu mwalo tshivba.” (Leri 2 Vakorinto 12:9, 10. ) Jehovha thumiside liphuvbo laye nya guage gasi gu ninga tshivba Pawulo, khu kharato mupostoli yoyu nyo tumbege a si kodzide gu gira thumo nyo tshumayele ambari a nga ba a wugedwa, a khothedwa ni gu tshangana ni simbe sigaradzo.

7. Sigaradzo muni esi Thimoti a nga ba ari naso si nga hadzi gu mu tandregisa gu gira thumo a ningidwego?

⁷ Ambari Thimoti a nga ba ari muphya wa gu  mu fananisa ni Pawulo, a nuye vbwetide giphaso gya Jehovha gasi gu gira thumo nyo tshumayele. Thimoti gimbide ni Pawulo umo nya maendro nya wu misiyonariyu. Gu diga isoso, Pawulo lombide Thimoti gu gira mambe maendro gasi gu wuseya ni gu tiyisa mabandla. (1 Kor. 4:17) Adzina Thimoti a di gu dzi wona na si ninganedwi khu gu gira isoso. Adzina khiso si giridego Pawulo a ganeya khuye: “Kha gu vbwetegi ni moyo a gu yeyisa khu gu khuye u ngari gikhwathana.” (1 Thim. 4:12) Nigu ga tepo yoyo, Thimoti a di gu emisana ni muba waye givilini a gu — ‘Madwali nya mba kala.’ (1 Thim. 5:23) Ganiolu Thimoti a di gu dziti gu khuye liphuvbo nya guage la Jehovha li di hadzi gu mu ninga tshivba a nga ba a yi vbweta gasi gu tshumayela mahungu nya yadi ni gu thumeya vandriyaye. — 2 Thim. 1:7.

8. Jehovha a gu hi ninga kharini tshivba muhuno?

⁸ Muhuno, Jehovha a ngu ninga “tshivba nya yikhongolo” sithumi saye. Khu kotani nya tshivba yoyo, hi ngu si kodza gu mu thumeya khu gu tumbega. (2 Kor. 4:7) Hongoleni hi wona 4 dzindziya edzi Jehovha a dzi thumisago gasi gu hi ninga tshivba: Nombelo, Bhibhiliya, vandriyathu ni thumo nyo tshumayele.

9. Nombelo wu nga hi phasa kharini?

⁹ Hi ngu tiyiswa khu nombelo. Ga Vaefeso 6:18, Pawulo a gu hi kutsa gu gombeya “gikhati gyatshavbo.” Jehovha a na hlamula milombelo yathu khu gu hi tiyisa. Jonnie, a vbanyago Bolìvia a wonide giphaso gya Jehovha tepo a nga ba a emisana ni sigaradzo. Mwangadzi waye ni vavelegi vaye va di dwala khu tepo yayimweyo. Si mu garadzede Jonnie gu khathaleya va vararu. Mamayi waye a difa, nigu si dzegide tepo nyo laphe gasi mwangadzi waye ni papayi waye va hawuluga. Jonnie na ganeya khu tepo yoyo nyo garadze wari khuye: “Tepo nyi nga ba nyi garadzega, egi gi nga ba gi nyi phasa gu gira nombelo nyo kongome.” Jehovha ningide Jonnie tshivba a nga ba yi vbweta gasi gu timiseya. Ronald lidhota limwedo la Bolìvia a tide gu khuye mamayi waye a ni câncer. Igyo gi si tsakisigo khu gu ga ngima wu nga landreya mamayi waye a difa. Ginani gi mu phasidego gu emisana ni gigaradzo gyogyo? Uye wari khuye: “Tepo nyi gombeyago ga Jehovha, nya gu mu embeya edzi nyi dzipwago khidzo. Nyi ngu dziti gu kheni Jehovha a ngu nyi pwisisa gwadi guvbindra ni wevbini muthu, nigu khu lisine a ngu nyiti gwadi guvbindra eni mune.” Dzimbe dzitepo hi ngu lemedwa khu sigaradzo nyo bwe hi si dziti gu khethu ginani hi na ganeyago avba nya nombelo. Ganiolu, Jehovha a ngu hi kutsa gu gombeya gwaye ambari na si hi garadzeya gu ganeya edzi hi dzipwago khidzo. — Rom. 8:26, 27.

10. Guya khu Vahebheru 4:12, khu ginani si gu na ni lisima gu hevbula Bhibhiliya ni gu dundrugeya khesi hi lerigo?

¹⁰ Bhibhiliya yi ngu hi tiyisa. Pawulo a di gu hevbula Milowo gasi gu mana tshivba ni gu thaveledwa, khu kharato anethu hi yede gu gira sasimweso. (Rom. 15:4) Gwadi gu hi hevbula Lito la Nungungulu, hi bwe hi dundrugeya khesi hi si hevbulago. Tepo hi girago isoso Jehovha a gu thumisa liphuvbo laye nya guage gasi gu hi yeyedza edzi Bhibhiliya yi nga hi phasago khidzo gu timiseya gigaradzo gyathu. (Leri Vahebheru 4:12.) Ronald a khumbugidwego gupheyani wari khuye: “Nyi tsakide ngudzu kholu nyi dzi garadzidego gu hevbula Bhibhiliya ga wutshigu ni wutshigu. Eni nyo dundrugeya ngudzu khu makhalelo ya Jehovha ni edzi a pharago khidzo sithumi saye khu ndziya nya lihaladzo. Isoso si ngu nyi tiyisa.

11. Bhibhiliya yi phaside kharini ndriyathu moyo nya nyamayi a nga ba a garadzega?

¹¹ Gu dundrugeya khesi hi lerigo umo nya Lito la Nungungulu si ngu hi phasa gu wona sigaradzo sathu khu ndziya nya yadi. Nga wona esi si dugeledego ndriyathu moyo nya nyamayi. Uye a di gu  garadzega ngudzu kholu a fedwego khu mwama waye, khu kharato lidhota limwedo li di mu ninga mawonelo nyo leri libhuku la Joba. Uye a di dzumeya gu gira isoso. Na ngo pheya gu leri uye kha tsakiswa khu mapimiselo ya Joba. Uye a di gu khaleya gu ganeya gu khuye: “Joba u nga khaleyi basi gu pimisa khu sigaradzo sago!” Ganiolu, uye tugude gu khuye a di gu pimisa nya nga edzi Joba a nga ba a pimisa khidzo. Isoso si mu phaside gu vbindrugedza mapimiselo yaye si bwe si mu ninga tshivba nya gu timiseye guvbisa a nga ba a gupwa kholu a nga ba a fedwe khu mwama waye.

12. Jehovha a gu thumisa kharini vandriyathu gasi va hi tiyisa?

¹² Vandriyathu va ngu hi tiyisa. Yimbe ndziya eyi Jehovha a yi thumisago gasi gu hi tiyisa, vandriyathu. Pawulo lovede vandriyaye khuye: “Nya gu gola gu kheni hi ta tiyiselana hatshavbo.” (Rom. 1:11, 12) Mary, hi ganedego khuye gupheyani a ngu gola ngudzu gu manega ni vandriyaye. Uye wari khuye: “Jehovha thumiside vandriyathu nya gu va di si siti sigaradzo sangu. Avo va di gu nyi embeya malito nyo tiyise, mwendro gu nyi ninga lidangaliya ni gu isoso khiso nyi nga ba nyi si vbweta ga tepo yile. Gimbe gilo gi nyi phasago, gu bhula ni vandriyathu va dugeledwego khu sigaradzo nyo fane ni iso sangu kholu nyi ngu hevbula nya singi khavo. Nigu madhota tepo yatshavbo ma gu nyi embeya gu khayo nyi na ni lisima libandlani.”

13. Hi nga tiyisana kharini mitshanganoni?

¹³ Wumbe wulanga hi nga si kodzago gu tiyisana mitshanganoni. Wa gu hongola mitshanganoni u nga zama gu tiyisa vambe khu gu va embeya gu khuwe u ngu va haladza nigu u ngu bonga khu esi va girago. Khu giyeyedzo, na hi si pheyi mitshangano, lidhota limwedo nya gu pwani khu Peter li di embeya ndriyathu moyo nya nyamayi oyu mwama waye a gu siri Fakazi khilo: “Si ngu nyi tiyisa gu gu wona avba. Uwe ni sanana sago nya 6 kha mu faltari mitshanganoni nigu iso tepo yatshavbo si dongide gu hlamula.” Ndriyathu wule nya nyamayi a di tala maho khu marongo. Khu gu bonga uye a di hlamula khuye: “Nyi di gu vbweta ngudzu gupwa malito yoyo muhuno.”

14. Thumo nyo tshumayele wu nga hi phasa kharini?

¹⁴ Thumo nyo tshumayele wu ngu hi tiyisa. Hi ngu tsaka khu gu bhuleya vambe mahungu nya Bhibhiliya, gani va ngu tsakeya mwendro kha va tsakeyi. (Mav. 11:25) Ndriyathu moyo nyo pwani khu Stacy, wonide edzi thumo nyo tshumayele wu tiyisago khidzo. Givbango gimwegyo gya ndrangani gwaye gi di duswa libandlani, ni gu isoso si mu garadzide ngudzu. Uye a di gu khaleya gu dzi wudzisa khuye ‘Ina na nyi giride gilogyo gasi gu mu phasa?’ Stacy si di gu mu garadzeya gu ema gu pimisa khu gigaradzo gegi. Ginani gi phasidego Stacy gu emisana ni gigaradzo gegi? I thumo nyo tshumayele! Tepo a nga ba a tshumayela, uye a di gu vega gupima gwaye ga vathu ga gipandreni gwaye va nga ba va vbweta giphaso. Uye wari khuye: “Ndrani nya tepo yoyo, Jehovha a nyi ningide gihevbulo nya Bhibhiliya gi nga mba hweya gu dandra khu liphuvboni. Isoso si nyi tiyiside ngudzu. Gilo gi nyi phasago ngudzu womini gwangu gu patega thumoni nyo tshumayele.”

15. Ginani u gi hevbudego khu malito ya Mary?

¹⁵ Vambe vandriyathu va gu pimisa gu khavo, khu kotani nya giemo gyawe kha va na nga si kodza gu gira nya singi thumoni nyo tshumayele. Anuwe wo dzipwa kharato, dundruga gu khuwe Jehovha a ngu tsaka khu gu dzi garadza gwago. Nga wona gambe giyeyedzo gya Mary. Tepo a nga hongola ga limbe libandla gu ganedwago lidimi nya estrangeiro, uye a di dzipwa na si phasi gilo. Uye wari khuye: “Khu tepo nyo khaguri, egi nyi nga ba nyi gi kodza basi gu diri gu ningeya mihlamulo nyo role, nyi leri ndrimana nya Bhibhiliya ni gu ningeya gidangaliyana gimwegyo thumoni nyo tshumayele.” Mary a di gu dzi fananisa ni vathu va ganeyago gwadi lidimi lile, khu kharato a  di gu dzipwa nasiri wa gilo. Ambari ulolo, uye vbindrugedzide mapimiselo yaye. Uye wonide gu khuye Jehovha a nga mu thumisa ambari olu a nga ba a si kodzi gu ganeya gwadi lidimi lile. Mary wari khuye: “Esi Bhibhiliya yi ganeyago si vbevbugide nigu si nga vbindrugedza womi nya vathu.

16. Ginani gi nga phasago ava va gu mba si khodza gu duga khu ndrangani, ganiolu va vbwetago gu tshumayela?

¹⁶ Adzina u ngu dzina ngudzu gu patega thumoni nyo tshumayele, ganiolu kha wu si kodzi gu khuga khu ndrangani. Tiyisega gu khuye Jehovha a ngu gu wona nigu a ngu pwisisa giemo gyago. Uye a nga gu tuleya lithomo nya gu tshumayele ava va gu sayisago, vaenfermeru mwendro vadhogodheya. Gu diga isoso, u nga fananisi esi u girago muhuno ni esi u nga ba u si kodza gu gira gale kholu isoso si nga gu vbedza tshivba. Zama gu wona esi Jehovha a girago olu gasi gu gu phasa, wa gu gira isoso u na mana tshivba nyo timiseye ni gevbini gigaradzo nya mba vbeledwa khu litsako.

17. Guya khu Muhevbudzi 11:6, khu ginani hi si yeligo gu ema gu hongola thumoni nyo tshumayele?

¹⁷ Ethu ha gu dzi garadzeya gu yala dzimbewu nya lisine, ganiolu kha hi yiti eyi yi na bugago. (Leri Muhevbudzi 11:6.) Khu giyeyedzo, Barbara a gu na ni 80 myaga ni gu vbindra, uye tepo yatshavbo a gu tshumayela khu telefone ni malangaliya. Ga limwedo nya malangaliya yoyo, uye a di theya Mukhedziseyi nya 1 nya Março nya 2014, uwo u diri ni ndrima yi nga ba yi ganeya gu khiyo: “O que Deus tem feito por você.” Uye a di si dziti gu khuye lidangaliya lile li hongode ga patwa mowo wu nga ba wu emide gu thumeya Jehovha. Uwo wu leride khu gu phindra phindra revhista yile. Mwama wakone dzipwide nga khatshi Jehovha a gu ganeya naye khu wugulu. Patwa wowu wu di pheledza gu hongola mitshanganoni wu bwe wu pheledza gu thumeya Jehovha hwane nya 27 myaga. Nga dundrugeya khedzi Barbara a tsakidego khidzo ni gu tiyiswa khu gu wona mihandro nya lidangaliya lile.

18. Ginani hi yedego gu gira gasi hi tiyiswa khu Nungungulu?

¹⁸ Jehovha a ngu hi ninga silo nya singi gasi gu hi tiyisa. Nya nga nombelo, Bhibhiliya, vandriyathu ni thumo nyo tshumayele. Ha gu thumisa silo sesi, hi na yeyedza gu khethu Jehovha khandri gu o va di tshivba basi nya gu hi phase, ganiolu a ngu dzina gu hi phasa. Tepo yatshavbo tumba Papayi wago wa ndzadzini u bwe u tiyisega gu khuwe uye a na tsaka khu gu “yeyedza tshivba yaye ga vale va mu vbwetago khu monyo wawe watshavbo.” — 2 Dzik. 16:9.