Esi si giregidego si vbindrugedzide womi wangu, kholu ga tepo yile nyi di pheya gu vbweta guti Nungungulu. Ganiolu, na nyi si mi tshamuseyi esi si giregidego hwane nya wutshigu wule, gwadi nyi mi embeya esi si nyi giregedego na nyi ngari gyanana si nyi giridego nyi vbweta guti Ningungulu.

Nyi velegidwe khu 1937 Guesnain, lidhoropa nyo khaguri la wuronga ga França. Papayi wangu a diri mukembi nya magala nigu uye a nyi hevbudzide gu khuye gu thuma gu na ni lisma. Papayi wangu a nyi hevbudzide gu khuye nyi yede gu nyenya silo nyo vivbe. Uye wonide gu khuye vakembi nya vangi nya magala va di gu pharwa khu ndziya nya mba yadi nigu mathumelo yawe ma di gu vega mhangoni womi wawe, khu kharato a di gu vbweta gu va phasa. Uye a di dzi pata avba nya tsawa wu dwaneyago gu khadziseya nya vakembi nya magala. Uye gambe a di gu goroga khu gu wona malipha nya vathangeyi nya dzitshetshe. Gutala nya avo va di ri ni womi nyo khadzisege, ganiolu va di gu lomba guhodza ni dzitsapawu ga vakembi nya magala. Papayi a di gorogide ngudzu khu kotani nya vathangeyi nya dzitshetshe, khu kharato a di si vbweti gu khuye nyi hevbula ni gevbini gi gimbileyanago ni wukhongeyi. Khu lisine, ethu gima hi di si ganeyi khu Nungungulu.

 Tepo nyi nga ya nyi dandra nyi di pheya neni gu nyenya silo nyo vivbe. Khu giyeyedzo, nyi di pheya gu wona gu kheni vaestrajeru nyo khaguri va nga ba vbanya França va di gu pharwa khu ndziya nyo vivbe. Nyi di gu oloveya gu jogari bhola ni sanana sa ava va tago khu ga mambe mayigo nigu nyi di gu tsakiswa khu gu hagana naso. Gu diga isoso, mamayi wangu a di siri wa França, a diri wa Polónia. Eni nyi di gu vbweta gu kheni vathu nya mafumbo nyo hambane va vbanya gumogo khu gurula va bwe va pharwa khu ndziya nyo fane.

Khu 1957 nyi di ranwa wusotshwatunu. Khidzo nyi nga ya ema khidzo sigomoni sa Algéria ni wutshigu wule nya gidema ngudzu hi ganedego khugo gupheyani. Hwane nya gu lombe giphaso ga Nungungulu nyi di wona buru nasiri lisotshwa. Nyi di heni hefu! Ambari ulolo, esi si giregidego ni nyimbi si nyi giride nyi dzi wudzisa kheni: Khu yavbini makungu nya womi? Gasi ho vbanyeya ginani? Ina Nungungulu a ngu khatala khethu? Ina hi na tshuka hi vbanya mugurulani?

Khu gu gimbiya nya tepo na nyiri ga vavelegi vangu, nyi diti Fakazi mweyo ya Jehovha. A di nyi ninga kopiya nya La Sainte Bible, a gu wuvbindrugedzeyi nya Bhibhiliya khu gifransa wu giridwego khu tshetshe nya Katolika. Tepo nyi nga bweleya Algéria nyi di dzegeya gu pheya gu leri. Lowo wu nga kuha ngudzu monyo wangu Gutuledwa 21:3, 4. Uwo wari khuwo: “Wonani Nyumba ya Nungungulu vbakari nya vathu . . . Uye a na va bavbula marongo mahoni gwawe, kholu gima kha gu na manega gambe gufa, gulila gu na vbela, ni gudilela ni wuvi.” Malito yoyo ma nyi samadziside ngudzu. Nyi di gu khaleya gu dzi wudzisa gu kheni: ‘Ina malito yaya lisine?’ Ga tepo yoyo nyi di siti gilo khu Nungungulu ni Bhibhiliya.

Hwane nyo wuye khu wusotshwatuno khu 1959, nyi di manana ni Fakazi mweyo ya Jehovha nyo pwane khu François. Uye nyi hevbudzide lisine khu Bhibhiliya, khu giyeyedzo, uye nyi yeyedzide omu nya Bhibhiliya lina la Nungungulu, Jehovha. (Ndzi. 83:18) François gambe nyi tshamusede gu khuye Jehovha a na resa gululama mafuni, a vbindrugedza mafu ma khala paradhesi a bwe a tadzisa malito ma gomogo omu ga Gutuledwa 21:3, 4.

Sihevbudzo sesi si di gu pwala nigu si kuhide monyo wangu, ganiolu esi si nga ba si girwa khu vathangeyi nya dzitshetshe si di gu nyi vbisa. Eni nyi di gu vbweta gu kheni vatshavbo va dziti gu khavo esi va hevbudzago si mwalo omu nya Bhibhiliya. Nyi dzipwide nga edzi a nga ba a dzipwa khidzo papayi wangu. Nyi di si vbwetari gambe. Nyi di gu vbweta gu gira gilogyo gasi gu lulamisa gigaradzo gegi.

François ni dzipari dzangu nya dziphya nya Dzifakazi dza Jehovha, dzi nyi phaside gurula mapimo. Avo va nyi tshamusede gu khavo kha nga Makristo, kha hi yeli gu lamula vambe, ganiolu hi yede gu va phasa khu gu va embeya mahungu nya yadi nya Mufumo wa Nungungulu. Owu khuwo thumo Jesu a giridego, nigu khuwo thumo wawumowo a nigidego valandreyi vaye. (Mat. 24:14; Luka 4:43) Aneni si lombide gu nyi hevbula gu ganeya ni vathu nya mafumbo yatshavbo khu ndziya nya yadi ni githawo. Bhibhiliya yari khiyo: “Oyu a guromo thumoni wa Pfhumu mwalo fanelo nya gubele nuye mihambanoni. Aholu, gu vbwetega gu pwanana ni vathu vatshavbo.” — 2 Thim. 2:24.

Nyi vbidrugedzide esi si nga ba si vbwetega nigu nyi bhabhatisidwe kha nga moyo nya Dzifakazi  dza Jehovha khu 1959 avba nya tshangano nya gipandre. Tshanganotunu nyi tide ndriyathu nya nyamayi nyo pwane khu Angèle nigu a di mburide ngudzu mahoni gwangu. Nya mba hweya nyi di pheya gu hongola nyi ya wuseya libandlani gwaye. Nigu, khu 1960 hi di tshadha. Uye khu lisine nyamayi nya wadi ngudzu nigu giningwa gi tago khiyo ga Jehovha. —  Mav. 19:14.

Khu gu gimbiya nya tepo nyi hevbude nya singi nya lisima ga vandriyathu nya guti ni gu vidzwa khu liphuvboni. Gilo nya lisima ngudzi nyi hevbudego khegi: Ha gu vbweta gu dugeleya ni ga wevbini thumo nyo garadze hi ningwago, hi yede gu dzi nogisa hi bwe hi landreya wusingalagadzi wu gomogo omu ga Mavingu 15:22 wu gu khuwo: “Avbo gu guromo madhota nya mangi, makungo ma gu duga gwadi.”

Khu 1964 nyi phede gu wona gu kheni wusingalagadzi wowu wu ngu thuma kamo. Ga mwaga wule nyi emisidwe kha nga muwoneleyi nya gipandre, nigu thumo wangu gu diri gu wuseya mabandla, gasi gu tiyisa vandriyathu ni gu va phasa gu manega ni wupari nyo tiye ni Jehovha. Ganiolu, ga tepo yile nyi diri ni 27 myaga basi nigu nyi diri mwalo guti nya gungi. Khu kharato nyi giride sihoso nya singi. Ganiolu, nyi hevbude khu sihoso sangu. Gu diga isoso nyi hevbude silo nya singi nya lisima ga vandriyathu va vidzidwego.

Hwane nyo endreye libandla limwedo Parìs, moyo nya ndriyathu a vidzidwego khu liphuvboni a di nyi wudzisa khuye hi nga bhulanyana honga! Nyi di mu hlamula kheni: “Gu mwalo gigaradzo.”

Uye a di nyi wudzisa khuye: “Louis, gasi dhogodheya a gu phasa mani, mudwali mwendro oyu a si dwaligo?”

Nyi di hlamula kheni: “Mudwali.”

Uye a di khuye: “Lisine furi. Ganiolu, nyi ngu wona gu kheni wa gu vbedza tepo nya yingi ni ava va vidzidwego khu liphuvboni, khu giyeyedzo muwoneleyi nya libandla. Libandlani gwathu, gu na ni vandriyathu nya vangi nya vaphya, nyo degule ni ava va vbedego tshivba. Avo va di hadzi tsaka ngudzu wa gu vbedza gitepwana navo mwendro gu hongola magaya gwavo u ya hodza navo gilogyo.”

Lihaladzo eli a nga ba a ri nalo khu dzinvuta dza Jehovha li kuhide monyo wangu. Nyi di vega hwane gu dzikhusedza gwangu nyi thumisa wusingalagadzi a nyi ningidwego. Nyi ngu mu bonga ngudzu Jehovha khu gu ba nyi tide vandriyathu nya nga ava.

Khu 1969 ni 1973 nyi di emiswa gasi gu woneleya Departamento de alimenteção ga mitshangano ya mivili nya mayigo yatshavbo Colombes,  Parìs. Avba nya tshangano wu giridwego khu 1973 si lombide gu hi hodzisa tanga nya 60 000 vathu khu 5 matshigu. Khu lisine si nyi thede hwanga vbadugwana. Gasi gu dugeleya gambe ga giemo gegi, nyi di yede gu thumisa wusingalagadi wu gomogo omu ga Mavingu 15:22 wu ganeyago khu gu vbweta wusingalagadzi ga vathu va vidzidwego. Khu kharato, nyi di lomba giphaso ga vandriyathu va vidzidwego. Vandriyathu vovo va di gu pata vasongi nya sirengo, valimi, vaphuli ni vagwevhi. Khu lisine thumo wowu wu di gu wonega khatshi wu ngu garadza, ganiolu khu gu thuma kha nga tsawa hi si kodzide.

Khu 1973 eni ni mwangadzi wangu hi di konvhidharwi gasi hi ya thumeya Bheteli ya França. Thumo nyo pheye nyi nga ba nyi yede gu wu gira wu di gu garadza nuwo. Nyi di yede gu rumeya mabhuku ga vandriyathu Camarrões Africa, ganiolu thumo wathu eyi wu di gu himbedzedwa gu khugeya 1970 nigu wu simamide gu himbedzedwa kala 1993. Ga tepo yeyi gambe nyi di dzipwa khatshi kha nyi na nga si kodza gu gira thumo wowu. Moyo nya ndriyathu a nga ba woneleya thumo França, si nga gira na tugude edzi nyi nga ba nyi dzipwa khidzo. Khu kharato, a di nyi tiyisa khuye: “Vandriyathu va Camarrões va ngu vbweta nguzu guhodza nya liphuvbo. Hongole hi va hodzisa!” nigu hi di gira kamo isoso.

Nyi giride maendro nya mangi ga mayigo ma ninganidego ni Camarrões, khu kharato nyi si kodzide gu tshangana ni madhota ya tigoni mule. Vandriyathu vovo va diri ni tiya-hwambo ni wugengeyi, khu kharato va nyi phaside gu mana dzindziya nya gu rumeye guhodza ga liphuvboni tepo yatshavbo ga vandriyathu va Camarrões. Jehovha ketegiside gu dzigaradza gwathu. Khu lisine, khu gipimo nya 20 myaga, vandriyathu va tigoni mule kha va diga gu mana Mukhedziseyi ni gibhukwana gi duswago ngima ni ngima gi nga ba gi ranwa gu pwane Wuthumeli wathu nya Mufumo.

Gu khugeya ga tepo hi nga pheya gu namorari, nyi wonide gu kheni Angèle a diri ni wupari nyo tiye ni Jehovha ni gu isoso si wonegide gwadi womini  wathu kha nga patwa. Khu giyeyedzo, ga litshigu hi nga tshadha, uye a di nyi lomba gasi gu gira nombelo maningano ni misuwo yathu nyo thumeye Jehovha khavba hi kodzago khavbo kha nga patwa. Nigu Jehovha hlamude nombelo wule.

Angèle nyi kutside gambe gu tumba Jehovha tepo yatshavbo. Khu giyeyedzo, tepo hi nga konvhidharwi gasi guya thumeya Bheteli khu 1973, nyi di kanakana kholu nyi di gu gola ngudzu gu thuma kha nga muwoneleyi nya gipandre. Ganiolu, Angèle a di nyi dundrugisa gu khuye: ‘Ethu hi di hendzeledza womi wathu ga Jehovha, khandri tshukwana gu gira esi hengeledzano yaye yi hi lombago?’ (Hebh. 13:17) Nyi di ema naye, khu kharato hi hongola Bheteli. Mwangadzi wangu muthu a gu ni wugengeyi, a ninganiseyago silo a haladzago ngudzu Jehovha. Makhalelo yaya ma ngu tiyisa lipango lathu nigu ma hi phaside gu hunga gu gira silo nya sadi ndrani nya myaga yeyi hi gomogo hatshavbo.

Ambari olu hi dandridego khu tanga, Angèle a ngo simama gu khala mwangadzi nya wadi ni oyu a phasedzeyago. Khu giyeyedo, dzixikola nya dzingi nya Mufumu dza gu girwa khu Gingiza. Gasi gu patega avba nya dzixikola dzodzo eni ni Angèle si lombide gu hi dzi garadza gasi gu tshukwadzisa Gingiza gyathu. Hi hongode ga libandla li thumisago lidimi nya Gingiza, ambari olu ga tepo yoyo hi nga ba hi ri ni 70 myaga ni guvbindra. Khu kotani nya thumo wangu, kha nga givbango nya Kometi Bheteli ya França, gu hevbula limbe lidimi kha sa nyi vbevbugeya. Ganiolu, eni ni Angèle hi di gu phasana. Olu hi gu nani 80 myaga ni gu vbindra ho simama gu dongiseya mitshangano khu Gingiza ni Gifransa. Nigu ho zama gu patega tepo yatshavbo thumoni nyo tshumayele ni mitshanganoni ni libandla lathu. Jehovha a ngu kategisa gudzigaradza hi gu girago gasi hi hevbula Gingiza.

Khu 2017 hi hakhide makategwa nya mangi. Eni ni Angèle hi manide lithomo nyo ya kursari xikola nya sivbango nya Kometi ni vagadzi vawe yi giredwego Centro Educacional da Torre de vigia Patterson, Nova York.

Khu lisine Jehovha muhevbudzi nya khongolo. (Isa. 30:20) Khu kharato, hatshavbo, gani hi dandride khu tanga, gani hi vaphya hi ngu mana sihevbudzo nya sadi. (Dhet. 4:5-8) Khu lisine nyi tugude gu kheni vaphya va engisago Jehovha, vandriyathu nya guti ni ava va vidzidwego khu liphuvboni va nga si kodza gu hunga gu gira silo nya sadi womini va bwe va khala sithumi nyo tumbege sa Jehovha. Mavingu 9:9 wari khuye: “Laya muthu a gu ni guti, kholu a na engedzela guti ngudzu, hevbudza muthu nya gululame, kholu a na engedzela guti gwaye.”

Ndzimbe dzitepo nyi ngu dundrugeya khu wutshigu wule nya gidema ni gu thisa sigomoni sa Algéria 60 myaga hwane. Ga wutshigu wule nyi di si dundrugeyi gu kheni nyi di hadzi manega ni womi wowu nyo tsakise. Nyi hevbude nya singi ga vambe. Jehovha ningide eni ni Angèle womi nyo tsakise. Khu kharato, eni ni mwangadzi wangu hi dzi emisede gu hevbula nya singi ga Papayi wathu wa ndzadzini ni ga vandriyathu va gu ni guti ni gu vidzwa khu liphuvboni va haladzago Nungungulu.