1. Vakhozeyi va Jehovha va gu yeyedza kharini gu khavo va ngu haladzana khu gyawe?

VAKHOZEYI va Jehovha mafuni gwatshavbo va gu gira gipandre nya ndranga mweyo. Avo va na ndruye ni ndruye va haladzanago. (1 Johane 4:16, 21) Dzimbe dzitepo va ngu dzi hiya silo nya sikhongolo khu kotani nya vandriyawe, ganiolu gutala nya dzitepo va gu yeyedza lihaladzo lawe khu silwana nya singi va va gireyago. Khu giyeyedzo: Avo va nga embeya malito nyo khaguri nya yadi vandriyawe ni gu va gireya wuwadi. Tepo hi dundrugeyago khu vambe, ha gu pimedzeya Babe wathu wa ndzadzini. — Vaefeso 5:1.

2. Jesu pimedzede kharini lihaladzo la Papayi waye?

² Jesu pimedzede Papayi waye khu guvbeleya. Uye a di gu gireya wuwadi vathu tepo yatshavbo. A di khuye: “Deluni gwangu, enu mwatshavbo mu garadego ni gu lemedwa; eni nyi na mi hefemudza.” (Matewu 11:28, 29) Ha gu pimedzeya Jesu ni gu  ‘alakanya gisiwana,’ hi na tsaka hi bwe hi tsakisa Jehovha. (Ndzimo 41:1) Omu nya ndrima yeyi, hi na wona edzi hi nga dundrugeyago khidzo khu va ndrangani gwathu, vandriyathu libandlani, ni vale hi va manago gutshumayelani.

3. Mwama a nga yeyedza kharini gu khuye a ngu dundrugeya khu mwangadzi waye? (Wona foto gupheyani nya ndrima.)

³ Vama va yede gu khala giyeyedzo avba nya edzi va khathalago khidzo khu vambe ndrangani. (Vaefeso 5:25; 6:4) Bhibhiliya yari khiyo vama va yede gu dundrugeya khu vagadzi vawe ni gu va pwisisa. (1 Pedro 3:7) Mwama a pwisisago a ngu dziti gu khuye ambari olu a hambanago ni mwangadzi waye khu dzindziya nya dzingi, kha si thuli gu khiso uye i tshukwana gu vbindra mwangadzi waye. (Genesi 2:18) Uye a ngu dundrugeya khedzi mwangadzi waye a dzipwago khidzo a bwe a mu phara khu ndziya nya githawo. Mwangadzi nyo khaguri wa Kanadha a gu ganeya esi khu mwama waye: “Uye gima kha kanyisi edzi nyi dzipwago khidzo, mwendro gu ganeya khuye ‘Kha wu yeli gu dzipwa kharato.’ Nigu uye a ngu nyi engiseya gwadi. Tepo a nyi phasago gu vbindrugedza mawonelo yangu avba nya gilo nyo khaguri, a gu gira isoso khu ndziya nya yadi.”

4. Mwama a nga yeyedza kharini gu khuye a ngu dundrugeya khu gudzipwa ga mwangadzi waye khu ndziya a pharago khidzo vambe vanyamayi?

⁴ Mwama a dundrugeyago khu gudzipwa ga mwangadzi waye gima kha hagani khu gu wudzana ni mumbe nyamayi mwendro gu mu khedza khu ndziya nyo vivbe, gani khuye abune, gani khomu nya dzisayiti nya mabhulo, mwendro omu nya interneti. (Joba 31:1) Kha thumisi dzisayiti nya mabhulo gasi gu hagana khu gu wudzana, ni gu kha beyi omu nya dzisayiti nya mba yela. A gu simama na tumbegide ga mwangadzi waye kholu a ngu mu haladza ni gu a ngu haladza Jehovha a bwe a venga silo nyo vivbe. — Leri Ndzimo 19:14; 97:10.

5. Mwangadzi a nga yeyedza kharini gukhathala khu mwama waye?

⁵ Mwama a gu pimedzeya, giyeyedzo nya lihaladzo gya Jesu Kristo a gu hungo waye, si na vbevbugeya mwangadzi waye gu mu yeyedza “githawo”. (Vaefeso 5:22-25, 33) Nigu mwangadzi a gu ba a ninga githawo mwama waye, a na zama gu pwisisa edzi a dzipwago khidzo a bwe a mu phara khu ndziya nya yadi a gu ba a pharegide khu silo nya libandla mwendro a gu ba a emisana ni sigaradzo. Mwama nyo khaguri wa Britaniya wari khuye: “Dzimbe dzitepo, mwangadzi wangu a gu tugula khu makhalelo yangu gu khuye gyomo gi nyi garadzago. Khavbovbo a thumisa litshina nya nayo li gomogo omu ga Mavingu 20:5, ambari so ba si lomba gu a vbwetedzeya lithomo gasi gu “rega” mapimo yangu abari gu gigaradzo nyi nga bhulago naye khigyo.”

6. Hatshavbo hi nga phasa kharini sanana gu dundrugeya khu vambe ni gu gira wuwadi, nigu iso si na phasega kharini?

⁶ Vavelegi va gu yeyedza gukhathaleyana, va gu ninga giyeyedzo nya gyadi sanana sawe. Gu vbwetega gambe gu va hevbudza sanana sawe gu dundrugeya khu vambe ni gu gira wuwadi. Khu giyeyedzo: Vavelegi va nga hevbudza sanana sawe gu mba tutumatutuma Salawuni nya Mufumo. Vo ba vari musipfhitshani, va nga hevbudza sanana sawe gu diga vathu nya vakhongolo va pheya khavo va theya guhodza. Khu lisine, vatshavbo libandlani va nga phasedzeya vavelegi. Khu kharato, gu vbwetega gu hi zundza gyanana gya  gu yeyedza ndruda, khu giyeyedzo, gya gu hi tuleya lidimba. Isoso si na gira gyanana gi dzipwa gwadi nigu si na gi phasa gu pwisisa gu khigyo: “Kategide ngudzu oyu a ningago guvbindra oyu a hakhago.” — Mithumo 20:35.

7. Jesu yeyedzide kharini gukhathala khu mwama moyo nya givbwiri, nigu ginani hi nga gi hevbulago avba nya giyeyedzo gya Jesu?

⁷ Litshigu limwedo, Jesu na gu romo Dhekapoli, vathu “va di mu resela muthu nya givbwiri nyamba ganela gwadi.” (Marko 7:31-35) Jesu a di mu vbanyisa, ganiolu nasiri muvathuni. Khu ginani? Kholu mwama wule a diri givbwiri, adzina kha nga ba a dzipwa na tshulegide vbakari nya vathu nya vangi. Jesu pwisiside gudzipwa gwaye, a “ndreya naye” a hongola wulanga gu nga ba guri mwalo vathu aya mu vbanyisa. Lisine gu kha hi kodzi gu gira silewugiso, ganiolu hi yede gu dundrugeya khesi si vbwetegago ga va vandriyathu ni edzi va dzipwago khidzo hi bwe hi va gireya wuwadi. Mupostoli Pawulo lovide esi: “Hongoleni hi tiyiselane khu gyathu, hi phasana gu gira mithumo nya wuhindzi ni mithumo yatshavbo nya yadi.” (Vahebheru 10:24) Jesu pwisiside edzi mwama wule nya givbwiri a nga ba a dzipwa khidzo a bwe a mu gireya wuwadi. Ina khandri giyeyedzo nya gyadi igyogyo?

8, 9. Hi nga yeyedza kharini gukhathala khava va dandridego khu tanga ni ava va dwalago? (Ninga siyeyedzo.)

⁸ Dundrugeya khava va dandridego khu tanga ni ava va dwalago. Likhalelo nya lisima ngudzu libandlani nya wuKristo lihaladzo, nasiri sigingi. (Johane 13:34, 35) Lihaladzo la gu hi kutsa gu gira satshavbo hi si kodzago gasi gu phasa vandriyathu va dandridego khu tanga mwendro va dwalago gasi gu va mana mitshangano ni gu tshumayela. Hi ngu va phasa ambari sa gu ba si hi garadzeya mwendro sa gu ba si va garadzeya ngudzu avo. (Matewu 13:23) Michael, a gu gikhurubwa, a gu bonga ngudzu khu giphaso a ningwago khu va ndrangani gwaye ni vandriyathu libandlani. Wari khuye: “Khu kotani nya giphaso va nyi ningago, nyi ngu kodza gu manega mitshanganoni nya yingi ni gu patega gutshumayelani tepo yatshavbo. Nya gu gola ngudzu gu tshumayela omu gu manegago vathu nya vangi.”

⁹ Omu nya dziBheteli nya dzingi gu na ni vandriyathu nyo tumbege va gumbidego mwendro gu dwala. Vawoneleyi va va sayisago va ngu va yeyedza lihaladzo khu gu gira malulamiselo nya gu va tshumayela khu gu lova malangaliya ni gu thumisa telefone. Bill, a gu na ni 86 myaga a loveyago vathu va khalago hwindzo wari khuye: “Hi ngu li bonga lithomo leli nya gu love malangaliya.” Nancy, a gomogo omu nya 90 myaga, wari khuye: “Kha nyi woni gu lova malangaliya nari gu rumeya dzienvilope basi. Owu i thumo nya gutshumayele. Gu vbwetega gu vathu vati lisine!” Ethel, a velegidwego khu 1921, wari khuye: “Guvbisa gipandre nya guvbanya  gwangu. Mambe matshigu gu ambala sombo basi gigaradzo gwangu.” Ambari ulolo, uye a ngu tsaka khu gu tshumayela khu telefone nigu na ni maendro nya yadi nya gubweleleye. Barbara, a gu na ni 85 myaga, a gu tshamuseya khuye: “Khu kotani nya olu nyi gu ni sitshetsheya nya singi, si ngu nyi garadzeya gu manega thumoni nya gutshumayele tepo yatshavbo. Ganiolu gutshumayela khu telefone gu ngu nyi vbevbugiseya gu bhula ni vambe. Nyi ngu gu bonga Jehovha!” Na gu si giri ni mwaga, vathu vava va dandridego khu tanga va vbedzide 1228 dziora na va gu tshumayela, va lovide 6265 malangaliya, va ligareya vathu nyo vbindre 2000, va bwe va ningeya 6315 mabhuku! Hi nga tiyisega gu khethu gudzigaradza gwawe gu tsakiside Jehova! — Mavingu 27:11.

10. Hi nga phasa kharini vandriyathu gu phasega mitshanganoni khavba si kodzegago khavbo?

¹⁰ Dundrugeya khu vambe mitshanganoni. Ha gu ba hi khathala khu vambe, hi na phasa vandriyathu gu phasega khu mitshangano khavba si kodzegago khavbo. Khu ndziya muni? Mweyo nya dzindziya, gu mba gedwa mitshanganoni gasi gu hi si va tsolopeteyi. Dzimbe dzitepo hi nga tshuka hi gedziswa khu silo hi nga mba si vireya. Ganiolu ha gu ba hi khaleya gu gedwa, gu vbwetega gu hi dundrugeya khedzi isoso si khuhago khidzo vandriyathu ni esi hi yedego gu vbindrugedza gasi gu yeyedza gu khathala kavo. Dundruga gambe gu khuwe khu Jehovha ni Gyanana gyaye va hi raneyago mitshangano. (Matewu 18:20) Khu lisine gu vbwetega gu hi va ninga githawo khu gu mba gedwa!

11. Khu ginani vandriyathu va gu na ni sipandre mitshanganoni va yedego gu landreya gileletelo gi gomogo omu ga 1 Vakorinto 14:40?

¹¹ Ha gu ba hi khathala khu vandriyathu, hi na landreya gileletelo gegi nya Bhibhiliya: “Aholu girani esi satshavbo khu githawo ni nayo.” (1 Vakorinto 14:40) Vandriyathu va gu na ni sipandre mitshanganoni va ngu landreya gileletelo gegi khu gu mba ba tepo. Khu ndziya yoyo, khandri vo dundrugeya basi  khu muganeyi a landreyago ganiolu khu libandla latshavbo gambe. Dundrugeya khedzi va khuhwago khidzo vambe ya gu gedwa gu vbeya mitshangano. Vambe vandriyathu gu vbwetega va gimbidzisa dzimovha mipfhuka nyo laphe gasi gu bweleya gaya. Vambe gu vbwetega gu va ya khileya xapa mwendro kamboyi. Vambe va na ni vama mwendro vagadzi va sirigo Dzifakazi va vbwetago gu khavo va vboha ndrangani khu tepo.

12. Khu ginani hi yedego gu haladza madhota ni gu ma ninga githawo? (Wona kwadru “Dundrugeya khava va thangeyago.”)

¹² Madhota ma ngu dzi garadza mitshanganoni ni thumoni nya gutshumayele, khu kharato gu vbwetega gu hi ma haladza ni gu ma ninga githawo. (Leri 1 Vatesalonika 5:12, 13.) Khu lisine u ngu bonga ngudzu khu satshavbo va gu gireyago. U nga yeyedza gubonga gogo khu gu va engisa ni gu va seketeya nya mba gurumedzwa, kholu “khavo va khedziselago gikhati gyatshavbo mihefemulo yanu, va na wudziswa khu Nungungulu khu kotani nya isoso.” — Vahebheru 13:7, 17.

13. Ginani hi gi hevbulago khu ndziya eyi Jesu a pharidego khiyo vathu?

¹³ Maningano ni Jesu, Isaya profetide esi: “Kha na funya tshava yi pandregidego, ambari gu tshima litirisida li nga gu tuvigago wutshi.” (Isaya 42:3) Lihaladzo a nga ba ari nalo Jesu khu vathu li giride gu a va pweya wusiwana. Uye a di gu pwisisa gudzipwa ga ava va nga ba va vbede tshivba nga “tshava yi pandregidego” mwendro “litirisida li nga gu tuvigago wutshi,” khu kharato a di va gireya wuwadi ni gu va laphiseya monyo. Ambari sanana si di gu vbweta gu manega ni Jesu. (Marko 10:14) Lisine gu kha hi kodzi gu pwisisa ni gu hevbudza nga Jesu! Ganiolu hi nga yeyedza gukhathala khu vathu va gipandreni hi tshumayelago umo khu maganelelo yathu tepo hi girago isoso, ni tepo hi yi vbedzago.

14. Khu ginani hi yedego gu dundrugeya khedzi hi ganeyago khidzo ni vathu?

¹⁴ Hi yede gu ganeya kharini ni vathu? Dzimiliyoni nya vathu muhuno va “garade havo hokohoko” khu dzinogosi nya guvivbe ni wukanganyisi, dzipolitika, ni vathangeyi nya dzitshetshe nya mafu yaya. (Matewu 9:36) Handro nya isoso, khu vathu nya vangi kha va ngo tumba gambe muthu nigu va mwalo gutumba. Khu kharato malito hi ma thumisago ni lito lakona gu vbwetega gu si yeyedza gu khiso hi vathu nya vadi ni gu hi ngu khathala khavo! Vathu nya vangi va ngu dzumeya gu ganeya ni ethu nasiri basi kholu hi thumisago gwadi Bhibhiliya ganiolu kholu hi khathalago khavo khu lisine ni gu va ninga githawo.

15. Khu dzevbini dzindziya nyo khaguri hi nga dundrugeyago khidzo khu vathu va gipandreni hi tshumayelago?

¹⁵ Gu na ni dzindziya nya dzingi hi nga khathalago khidzo khu vathu gipandreni hi tshumayelago umo. Gu vbwetega gu hi gira siwudziso khu ndziya nya yadi yi yeyedzago githawo. Moyo nya piyonero a di gu tshumayela gipandreni egi vathu va gu na ni  dzitshoni, khu kharato a di si va giri siwudziso si nga hadzi va gira va garadzega va gu mba wuti hlamulo wakona. A di si wudzisi silo nya nga esi: “U ngu liti lina la Nungungulu?” mwendro “Ginani Mufumo wa Nungungulu?” Wulangani nya isoso a di gu ganeya kharati, “Omu nya Bhibhiliya nyi hevbude gupwani Nungungulu na ni lina. Nyi nga gu yeyedza lina laye?” Magirelo yoyo kha ma thumi malangani yatshavbo, kholu vathu ni mitumbunugo si hambanide. Ganiolu gu vbwetega gu tepo yatshavbo hi phara vathu khu ndziya nya githawo ni wuwadi. Gasi gu gira isoso gu vbwetega gu hi vati gwadi.

16, 17. Hi nga yeyedza kharini wuwadi tepo hi hungago a) ora nya gu endreye khiyo vathu? b) tepo hi na vbedzago na hi bhula navo?

¹⁶ Khu yevbini ora hi yedego gu endreya khiyo vathu? Tepo hi tshumayelago khu ndranga ni ndranga, vathu kha va hi vireya kholu khandri va di hi rana. Khu kharato, gwadi gu va endreya khu dziora edzi va na gu ba vari ni tepo nyo bhule. (Matewu 7:12) Khu giyeyedzo, ina vathu va gipandreni u tshumayelago va ngu gola gu gedwa gu wuga guvbeyani nya semana? Abari kharato, adzina u nga pheya khu gutshumayela ndziyani, omu gu manegago vathu nya vangi, mwendro gu gira maendro nya gubweleleye ga vathu u dzitigo gu khuwe va na ni tepo nyo bhule khu ora yoyo.

¹⁷ Hi yede gu vbedza tepo muni? Vathu nya vangi va pharegide ngudzu, khu kharato gwadi gu mba hweya, ngudzungudzu litshigu nyo pheye. Gwadi gu rodzisa mabhulo yathu wulangani nyo hweye. (1 Vakorinto 9:20-23) Vathu va gu wona gu khavo hi ngu pwisisa gu khethu va pharegide, si nga gira va dzumeya gu bhula nathu ga tepo yi landreyago. Ha gu yeyedza makhalelo hi ningwago khu liphuvbo la Nungungulu, hi na khala “sithumi [si] thumago gumogo ni Nungungulu” khu lisine. Si nga gira gambe gu Jehovha a hi thumisa gasi gu phasa muthu nyo khaguri gu hevbula lisine! — 1 Vakorinto 3:6, 7, 9.

18. Makategwa muni hi na ma manago, ha gu khathala khu vambe?

¹⁸ Khu kharato hongoleni hi gira satshavbo hi si kodzago gasi gu khathaleya va ndrangani gwathu, vandriyathu libandlani, ni ava hi va manago gutshumayelani. Khavbovbo, hi na mana makategwa, olu ni mindru wa tshigu. Ndzimo 41:1, 2 yari khiyo: “Kategide oyu a alakanyago gisiwana; litshigu nya sigaradzo a na vbanyiswa khu [Jehovha, NM]. [Jehovha, NM] a ngu mu sayisa, a mu ninga guvbanya ni gunengela mafuni.”