1. Khu ginani Dzifakazi dza Jehovha dzi gu vathu nya gutsake? (Wona foto vbatshani.)

DZIFAKAZI DZA JEHOVHA vathu va tsakidego. Ni hayini va manegago gumogo, gani mitshanganoni nya libandla, gani mitshanganoni nya yikhongolo, gani musipfhitshani, avo va gu bhula ni gu hega. Khu ginani va tsakago ngudzu kharato? Kholu va ngu muti Jehovha, “Nungungulu nya gutsake.” Va gu khozeya uye va bwe va zama gu mu pimedzeya. (1 Thimoti 1:11, NM; Ndzimo 16:11) Jehovha khuye Gifefe nya gutsaka, khu kharato o vbweta gu khuye anethu hi tsaka, nigu a ngu hi ninga sighelo nya singi gasi gu hi tsaka. — Dhewuteronome 12:7; Muhevbudzi 3:12, 13.

2, 3. a) So thula ginani gu tsaka? b) Khu ginani sibago si garadza gu mana gutsaka?

² Uwe ke? Ina u tsakide? Gutsaka so thula gu dzipwa gwadi, guenedziswa khu womi wago mwendro gu tsaka ngudzu. Bhibhiliya yo yeyedza gu khiyo ava va kategiswago khu Jehovha va nga tsaka khu lisine. Ganiolu, khu ginani si nga garadzago gu mana gutsaka mafuni yaya ya muhuno?

 ³ Si nga garadza gutsaka ha gu ba hi emisana ni sigaradzo, nya nga gufedwa khu muthu hi mu golago mwendro a gu duswa libandlani, gutshula wugadzi, mwendro gu vbeledwa khu thumo. Si nga hi garadzeya gambe gu tsaka go ba guri mwalo gurula ndrangani khu kotani nyo khaleye mayunga, ha gu hegwa khu sithumi-khwathu mwendro sihevbuli-khwathu, ha gu ba hi wugedwa mwendro gu khotedwa kholu hi khozeyago Jehovha. Adzina womi wathu wu nga pheya gu garadza, hi beledwa khu madwali nya mba vbindra mwendro gu beledwa khu gigaradzo nyo vbeledwe khu gutsaka. Ganiolu dundruga gu khuwe Jesu Kristo, “[nya gutsake, NM] ni tshivba yatshavbo” mwendro Mufumeli, a di gu gola gu thaveleya vathu ni gu va gira va tsaka. (1 Thimoti 6:15; Matewu 11:28-30) Avbo nya Ganelo yaye ya Gigomoni Jesu ganede makhalelo nyo khaguri ma nga hi phasago gu mana gutsaka ambari tepo hi emisanago ni sigaradzo nya singi kholu hi vbanyago mafuni momu ga Sathane.

4, 5. Ginani hi nga girago gasi gu hi tsaka hi bwe simama na hi tsakide?

⁴ Gilo nyo pheye egi Jesu a gi khumbugidego gi na ni lisima ngudzu. A di khuye: “Va ngu tsaka ava va khathalago khesi si va keneleyago khu liphuvboni, kholu Mufumo wa ndzadzini khwawe.” (Matewu 5:3, NM) Ha gu khathala khesi si hi keneleyago khu liphuvboni, ha gu yeyedza gu khethu hi ngu dziti gu khethu gu vbwetega gu hiti Nungungulu ni gu khethu ha gu vbweta guphaswa ni gu thangedwa khuye. Hi nga si yeyedza kharini isoso? Khu gu hevbula Bhibhiliya, gu engisa Nungungulu, ni gu thangisa wukhozeyi waye guvbanyani gwathu. Ha gu gira silo soso, si na hi phasa gu mana gutsaka. Gutumba gwathu nya gu khethu situmbiso sa Nungungulu si na tadzisega nugunugu gu na tiya. Nigu “gu tumba . . . nya gunengele” hi gu manago omu nya Bhibhiliya gu na hi kutsa. — Tito 2:13.

⁵ Ho ba hi vbweta gutsaka, gu vbwetega gu hi simama gu tiyisa wupari wathu ni Jehovha ambari gu dugeleya ginani guvbanyani gwathu. Mupostoli Pawulo lovide esi: “Nengelani ga Pfhumu; nyi ngu engedza gu mi embela, nengelani!” (Vafilipi 4:4) Gasi gu khala pari nya yikhongolo ya Jehovha, gu vbwetega gu hi manega ni guti ga Nungungulu. Lito la Nungungulu lari khilo: “Kategide muthu wule a manidego guti ni mapimo. Guti Simbo wu ningago womi ga vale va gu manelago, va kategide vatshavbo va gu sayisago.” — Mavingu 3:13, 18.

6. Ginani gimbe hi yedego gu gira gasi gu simama na hi tsakide?

⁶ Ganiolu, si na ni lisima ngudzu gu simama gu thumisa esi hi si hevbulago omu nya Bhibhiliya gasi gu hi simama na hi tsakide. Jesu tshingiside lisima nya isoso tepo a nga khuye: “Kha nga olu mu sitigo silo sesi, mu na bani mu kategile mwa gu si landrisa.” (Johane 13:17; leri Jakobe 1:25.) Isoso si  ngu vbwetega ngudzu ha gu ba hi vbweta gu tadzisa esi si hi keneleyago khu liphuvboni hi bwe hi khala na hi tsakide. Ganiolu hi nga mana kharini gutsaka go ba guri ni silo nya singi si nga hi vbedzeyago gutsaka? Hongoleni hi wona esi Jesu a ganedego khu gu landreya avba nya Ganelo yaye ya Gigomoni.

7. Ava va liyago va nga tsaka khu ndziya muni?

⁷ “Va kategide vale va lilago, kholu va na tangadziswa.” (Matewu 5:4) Adzina hi nga dzi wudzisa gu khethu ‘Si nga kodzega kharini gu vathu va tsaka na va gu liya?’ Jesu kha nga ba a ganeya khu vatshavbo va liyago. Vathu nya vangi nyo vivbe va ngu liya, mwendro kha va tsaki, kholu va ngu emisana ni sigaradzo nya sikhongolo nya “matshigu nya guhegise” gi gu “gikhati nya sigaradzo.” (2 Thimoti 3:1) Ganiolu avo va gu khathala khu silo sawe basi nasiri khu Jehovha, khu kharato kha va manegi ni wupari naye, nigu kha va mani gutsaka. Jesu a di gu ganeya khu vale va khathalago khesi si va keneleyago khu liphuvboni. Avo va gu liya kholu va wonago gu khavo vathu nya vangi va ngu bomba Nungungulu mwendro kha va vbanyi khesi Jehovha a si vbwetago. Nigu va ngu dziti gu khavo sighohi, ni gu va ngu wona silo nyo thise si dugeleyago Mafuni. Jehovha a ngu va wona ava va liyago khu lisine, nigu a ngu va tiyisa khu Lito laye, a bwe a va ninga gutsaka ni womi. — Leri Ezekiyeli 5:11; 9:4.

8. Gu khala muthu nyo rule gu nga gu phasa kharini gutsaka?

⁸ “Va kategide va nya gurula, kholu va na hodza thomba nya litigo.” (Matewu 5:5) Gu khala muthu nyo rule gu nga gu phasa kharini gutsaka? Vathu nya vangi va na ni gigaha ni maghilivindra, esi si yisago sigaradzoni. Ganiolu tepo va hevbulago lisine, va gu vbindrugedza va bwe va ambala “muthu muphya.” Olu avo va na ni monyo nya “gupwele wusiwana, nya ndruda, nya gu dzi nogise, nya gurule ni gutimisela.” (Vakolosi 3:9-12) Kha nga handro wakona, va na ni lihaladzo, va ngu pwana gwadi ni vambe vathu, nigu va tsakide. Gimbe gambe khu gu Lito la Nungungulu li ngu tumbisa gu khilo va na “hodza thomba nya litigo.” — Ndzimo 37:8-10, 29.

9. a) A di gu vbweta gu khuye ginani Jesu tepo a nga khuye va nya gurula va na “hodza thomba nya litigo”? b) Khu ginani “vale va gu ni ndzala ni lidora nya ndruda mwendro wuwadi” va na tsakago?

⁹ A di gu vbweta gu khuye ginani Jesu tepo a nga khuye va nya gurula va na “hodza thomba nya litigo”? Ava va todzidwego va na hodza thomba nya litigo tepo va na li fumeyago kha nga dzipfhumo ni vaphasi nya mhamba. (Gutuledwa 20:6) Dzimiliyoni nya ava va gu mwalo gutumba nya guya vbanye ndzandzini va na hodza thomba nya litigo tepo va na dzumeledwago gu vbanya mafuni kala gupindruga. Va na ba va vbelede nigu va na mana gurula ni gutsaka. Vathu vovo khavo gambe Jesu a ganedego khavo tepo a nga khuye: “Va kategide vale va gu ni ndzala ni lidora nya ndruda mwendro wuwadi.” (Matewu 5:6) Gudogoreya gwawe wuwadi gu na khuriswa tepo Jehovha a na dusago guvivba gwatshavbo. (2 Pedro 3:13) Mafuni nya maphya, vathu nya vadi va na tsaka nigu gima kha va na nga liya gambe khu kotani nya guvivba gu girwago khu vathu nyo vivbe. — Ndzimo 37:17.

10. So thula ginani gu gira wuhindzi?

¹⁰ “Va kategide va nya wuhindzi, kholu  va na giredwa wuhindzi.” (Matewu 5:7) Gu gira wuhindzi so thula gu yeyedza wuwadi, gu rula, gupweya-wusiwana, si thulago gu pweya gisiro vale va tshanisekago. Khu kharato wuhindzi khandri gudzipwa nyo khaguri basi. Bhibhiliya yo hi hevbudza gu khiyo gu gira wuhindzi so pata gambe gu gira gilo nyo khaguri gasi gu phasa vambe.

11. Gipimaniso nya muSamariya wule nya wuhindzi gya gu hi hevbudza ginani?

¹¹ Leri Luka 10:30-37. Gipimaniso gya Jesu nya muSamariya wule nya wuhindzi gya gu hi ninga giyeyedzo nya gyadi nya tshamuselo nya wuhindzi. Musamariya wule a dipwa gisiro ni pweya-wusiwana mwama wule a nga ba a tshaniseka, ni gu isoso si mu kutside gu phasa. Hwane nyo ba Jesu na ningide gipimaniso gile, a di khuye: “Indra uya gira nuwe kharato.” Khu kharato adzina hi nga dzi wudzisa kharati: ‘Ina nyi ngu gira sasimweso? Ina nyi ngu gira esi si giridwego khu muSamariya wule nya wuhindzi? Tepo vambe va tshanisekago, ina nyi nga gira gilogyo gasi gu va phasa? Ina nyi nga engedzeya gu gira gilogyo gasi gu va phasa? Khu giyeyedzo, ina nyi nga phasa ava va dandridego khu tanga libandlani, dzinoni, mwendro sanana esi vavelegi vaso va gu mba thumeya Jehovha? Ina nyi nga ganeya khu ndziya nya yadi ga “ava va rerekago” gasi gu va tiyisa?’ — 1 Vatesalonika 5:14; Jakobe 1:27.

12. Khu ginani hi tsakago tepo hi girago wuhindzi?

¹² Khu ginani hi tsakago ha gu gira wuhindzi? Tepo hi gireyago wuhindzi vambe, ha gu ninga, nigu Jesu ganede gu khuye gu ninga gu ngu hi gira hi tsaka. Gimbe gighelo khigyo nya gu hi ngu dziti gu khethu ha gu tsakisa Jehovha. (Mithumo 20:35; leri Vahebheru 13:16.) Pfhumo Dhavhidhe ganede esi khu muthu a yeyedzago wuhindzi: “A na vbanyiswa khu PFHUMU Nungungulu. A mu ninga guvbanya ni gunengela mafuni.” (Ndzimo 41:1, 2) Ha gu yeyedza wuhindzi ni gupweya-wusiwana vambe, hi na giredwa nethu wuhindzi khu Jehovha ni gu hi na tsaka kala gupindruga. — Jakobe 2:13.

13, 14. Khu ginani si gu na ni lisima gu manega ni ‘monyo nya wadi’?

¹³ Jesu a di khuye: “Va kategide va nya myonyo nya yadi, kholu va na wona Nungungulu.”  (Matewu 5:8) Gasi gu manega ni monyo nya wadi gu vbwetega gu mapimo yathu ni gudogoreya gwathu na si agide, mwendro na si handzegide. Isoso si na ni lisima ha gu ba hi vbweta gukhethu Jehovha a hakha wukhozeyi wathu. — Leri 2 Vakorinto 4:2; 1 Thimoti 1:5.

¹⁴ Ava va gu ni myonyo nya yadi va nga manega ni wupari nya wadi ni Jehovha, a nga khuye: “Va kategide vale va handzago dzingandzo dzawe.” (Gutuledwa 22:14) So thula ginani ‘gu handza dzingandzo dzawe’? Ga ava va todzidwego so thula gu khiso Jehovha a gu va wona na va agide, a na va ninga womi wu si figo ndzadzini, nigu va na tsaka kala gupindruga. Ga ava nya vangi va vireyago gu vbanya mafuni, so thula gu khiso Jehovha a na va dzumeleya gu khala dzipari dzaye kholu a gu va wona nga vathu nya vadi. Bhibhiliya yo hi embeya gu khiyo va “handzide dzingandzu dzawe va dzi agisela novbani nya Nvutana.” — Gutuledwa 7:9, 13, 14.

15, 16. Vathu nya myonyo nya yadi va nga “wona Nungungulu” khu ndziya muni?

¹⁵ Jehovha a di khuye: “Muthu kha dzi kodzi gu nyi wona a wuya a simama guvbanya.” (Ekisodha 33:20) Khu kharato, so kodzega kharini gu muthu nya wadi a “wona Nungungulu”? Lito nya giGreki li vbindrugedzedwego pwani “gu wona” li nga thula gu dundrugeya, gu pwisisa, mwendro guti. Khu kharato “gu wona Nungungulu” so thula gu pwisisa gukhethu muthu muni, hi bwe hi gola makhalelo yaye. (Vaefeso 1:18) Jesu a di gu pimedzeya makhalelo ya Nungungulu khu guvbeleya, khu kharato a di khuye: “Uye a nyi wonago, a ngu wona Babe.” — Johane 14:7-9.

¹⁶ Gimbe gambe, ha gu “wona Nungungulu” tepo hi wonago edzi a hi phasago khidzo guvbanyani gwathu. (Joba 42:5) Hi nga “wona,” gambe mwendro guvega gupima avba nya silo nyo samadzise esi Jehovha a tumbisago gu gireya vale va simamago na va agide mwendro na vari ni myonyo nya yadi va bwe va mu thumeya khu gutumbega. Nigu ava va todzidwego va na wona Jehovha khovbe ni khovbe tepo va na wuswago va hongola ndzadzini. — 1 Johane 3:2.

17. Khu ginani vathu va vbahago gurula va tsakago?

¹⁷ Khu gu landreya, Jesu a di khuye: “Va kategide vakhongoteli nya vathu.” (Matewu 5:9) Ha gu pheya khethu hi vbweta gurula ni vambe, hi na tsaka. Mupizane Jakobe a di khuye: “Vale va vbahago gurula, va gu yala gurulani, va gu vbwera mihandro nya guvbanye nya gululame.” (Jakobe 3:18) Khu kharato wo ba u si pwani gwadi ni muthu nyo khaguri libandlani gwago mwendro ndrangani gwago, lomba Jehovha gasi a gu phasa gu vbaha gurula. Khavbovbo, Jehovha a na gu ninga liphuvbo laye nya guage, li na gu phasago gu yeyedza makhalelo nya wukristo, nigu u na tsaka. Jesu tshingiside lisima nyo pheye khethu hi vbaha  gurula tepo a nga khuye: “Khu kharato, wa guya gira ningelo wago vbagiluvelotunu, nuri vbakari, u dundruga gukhuwe u hosede ndriyago, diga ningelo wago vbagiluvelotunu, uya phela khu gukhongotelana ni ndriyago; khavbo u wuyago gwadi u ta gira ningelo wago.” — Matewu 5:23, 24.

18, 19. Khu ginani maKristo ma tsakago ambari ma gu ba ma tshaniswa?

¹⁸ “Mu kategide enu, mwa gu vadwa, mu saniswa, mu singedzwa guvivba gwatshavbo khu kotani yangu.” A di gu vbweta gu khuye ginani Jesu? A di engedzeya khuye: “Nengelani mu ghiya, kholu tshatshazelo wanu wu na bani wuri wukhongolo Ndzadzini. Kholu khidzo kharati va nga sanisago khidzo vaprofeti va gale.” (Matewu 5:11, 12) Tepo vapostoli va nga vetwa va bwe a himbedzedwa gu tshumayela, “va di duga khu phathani mwendro nyumbani nya wulamuli nya giJudha na va tade khu gunengela.” Lisine gu kha va tsakiswa khu gu vetwa. Ganiolu avo va di tsakide kholu va ‘ningidwe wuhigo nya gusaniswe’ khu kotani nya lina la Jesu. — Mithumo 5:41.

¹⁹ Muhuno nugo, vathu va Jehovha va ngu timiseya na va tsakide tepo va tshaniswago khu kotani nya lina la Jesu. (Leri Jakobe 1:2-4.) Gufana ni vapostoli, kha hi gu tsakeyi gutshaniseka mwendro gutshaniswa. Ganiolu ha gu simama na hi tumbegide ga Jehovha, a na hi ninga gutiya-hwambo gu vbwetegago gasi gu timiseya. Nga dundrugeya khesi si dugeledego Henryk Dornik ni ndriyaye. Khu Agosto nya 1944, va di rumedwa wubotshwatuno. Ava va nga ba va va tshanisa va di khavo: “Kha si kodzegi gu va gurumedza gu gira gilo. Gutshaniswa gwawe ga gu va reseya gutsaka.” Henryk tshamusede khuye: “Ambari olu nyi nga ba nyi si dogoreyi gu tshaniswa, gu tshaniseka khu kotani nya gutumbega gwangu ga Jehovha na nyi tiyide hwambo si nyi resede gutsaka.” A di bwe khuye: “Milombelo yangu nyo vbise yi nyi hidzimiside vbafuvbi ni Jehovha, nigu yeyedzide gu khuye Muphasedzeyi a tumbegago.”

20. Khu ginani hi tsakago khu gu thumeya “Nungungulu nya gutsake”?

²⁰ Tepo Jehovha, “Nungungulu nya gutsake,” a tsakago khethu, anethu hi nga tsaka ambari ha gu ba hi tshaniswa, ho wugedwa khu valongo, ho dwala, mwendro ho gumba. (1 Thimoti 1:11, NM) Hi nga tsaka gambe kholu Nungungulu wathu, “a si liphigo,” a hi tumbiside silo nya singi nyo tsakise. (Tito 1:2) Tepo Jehovha a na tadzisago situmbiso saye, kha hi na nga dundruga gambe sigaradzo hi gu naso olu. Khu lisine, kha hi si kodzi gu dundrugeya edzi womi wu na tsakisago khidzo Paradhesini ni edzi hi na tsakago khidzo! Lisine kheli, hi “na fumela litigo, [hi] na nengela khu gurula nya gungi.” — Ndzimo 37:11.