WA GU ba u vbweta guti ora, ginani u girago? Adzina wa gu khedza avbo nya ralogi yago. Adzina u wona gu khuwe dzi uma ora ni 30 dzimeneti nya siyambo. Ginani u nga hadzi embeya pari nyo khaguri yi nga gu wudzisa gu khiyo, “ora muni?”

Isoso sa guya khomu u vbanyago umo. Khu giyeyedzo, adzina u nga ganeya gu khuwe, “dzi 1:30” nya siyambo mwendro “dzi 13:30.” Ga malanga nyo khaguri adzina u nga ganeya khuwe, go keneleya 30 dzimeneti gasi yi womba 2 ora nya siyambo.

Vathu va teponi nya gulowe nya Bhibhiliya va di gu ganeya kharini dziora? Anavo va diri ni maganelelo nya mangi. Milowo nya giHebheru ya gu thumisa malito nya nga “dzimindru,” “mihani,” ni “silambo.” (Genesi 8:11; 19:27; Dhewuteronome 28:29; 1 Dzipfhumu 18:26) Ganiolu dzimbe dzitepo Bhibhiliya yi ngu ba yi thumisa mambe malito.

Teponi ya Israyeli wa gale, gu di gu olovelega gu manega mukhedziseyi, ngudzungudzu vbawutshigutuno. Vaisrayeli va di gu kabanisa wutshigu khu sipandre siraru va nga ba va si rana khavo “gu pila.” (Ndzimo 63:6) Tepo Jesu a nga velegwa, vaJudha va di gu kabanisa wutshigu khu dzitepo dzina, nga vaGreki ni vaRoma.

Mabhuku ma ganeyago khu thumo nya gutshumayele wa Jesu ma ngu ganeya khu sipandre soso dzitepo nya dzingi. Khu giyeyedzo, “marandra gugya,” Jesu gimbide vbatshani nya mati a yela ngalava va nga ba va romo vapizane vaye. (Matewu 14:25) Nigu Jesu ganede esi avba nya gipimaniso gyaye: “Nari pwani mune ndranga a ngu giti gikhati yi na gu tago khigyo mbafa vbakari nya wutshigu a na gu ghadha, gasi a si phangedwi nyumba yaye.” — Matewu 24:43.

Jesu khumbugide dzitepo dzatshavbo nya dzina tepo a nga embeya vapizane vaye khuye khalani na mu dongide “kholu kha mu giti gikhati a wuyago khigyo mune ndranga, gani silambo, gani vbakari nya wutshigu, . . . gani mambagugya, gani dzimindrudzile.” (Marko 13:35) Tepo nyo pheye nya dzitepo dzodzo, a gu “silambo,” yi di gu khugeya hwane nyo ba li ngari gu pfola lidambo kala omu nya dzi 21 ora. Eyi nya wuvili, a gu “vbakari nya wutshigu” yi di gu khugeya dzi 21 ora, kala vbakari nya wutshigu. Eyi nya wuraro, a gu “mambagugya,” mwendro tepo wu embago khonge, yi di gu khugeya vbakari nya wutshigu kala omu nya dzi 3 ora nya dzimindrudzile. So wonega khatshi khiyo tepo yeyi wu nga embago khiyo khonge ga wutshigu a nga modwa khuwo Jesu. (Marko 14:72) Eyi nya wuna, yi gu “dzimindrudzile” yi di gu khugeya khu dzi 3 ora nya dzimindrudzile kala li khuga lidambo.

Khu kharato ambari olu vathu va teponi yoyo va nga ba vari mwalo dziralogi nya nga edzi hi gu nadzo muhuno, va diri ni ndziya nyo ganeye khiyo dziora.