1. Mahungo muni nya lisima aya Jesu a ganedego khayo ni vapizane vaye ga wutshigu waye nyo hegise navo?

GA WUTSHIGU waye nyo hegise ni vapostoli vaye na si gufi, Jesu khumbugide lihaladzo gipimo nya 30 dzinyondro. A di embeya vapizane vaye gu khuye gu vbwetega gu va ‘haladzana.’ (Johane 15:12, 17) Lihaladzo lawe li di hadzi wonega avba nya gu vambe va dziti gu khavo avo va diri valandreyi nya lisine va Kristo. (Johane 13:34, 35) Lihaladzo eli Jesu a ganedego khilo khandri gudzipwa nyo khaguri basi; likhalelo nya tshivba li lombago gudzigaradza. Jesu a di khuye: “Mwalo a gu ni lihaladzo nya likhongolo guvbindra wule a ningelago womi khu gufela dzipari dzaye. Enu mu dzipari dzangu mwa gu girani iso nyi mi rumago.” — Johane 15:13, 14.

2. a) Sithumi sa Nungungulu sa gu tidwa khu ginani muhuno? b) Siwudziso muni hi na si hlamulago omu nya ndrima yeyi?

² Sithumi sa Jehovha muhuno so tidwa khu gudzigaradza gwaso nya gukhongolo gasi gu haladzana ni gu pwanana. (1 Johane 3:10, 11) Gani hi va litigo muni, gani hi va lifumbo muni, gani lidimi muni hi ganeyago, gani ha guta khu hayi  gani hi dandrede hayi. Sithumi sa Jehovha mafuni gwatshavbo si ngu haladzana. Khu ginani lihaladzo li vbwetegago ngudzu muhuno? Jehovha ni Jesu va gu hi vbaha kharini khu lihaladzo? Nigu hi nga li yeyedza kharini lihaladzo lolo gasi gu hi kutsana ni gu tiyisana? — 1 Vakorinto 8:1.

3. “Gikhati [gegi] nya sigaradzo” gya gu khuha kharini vathu?

³ Ha gu vbanya “gikhati nya sigaradzo,” ni gu womi wu “tade khu sigaradzo ni gu tshaniseka.” (2 Thimoti 3:1-5; Ndzimo 90:10) Vathu nya vangi va ngu tshaniseka ngudzu avba nya gu va dogoreya ni gu tshwedza. Mwaga ni mwaga gu ngu tshwedza tanga nya 800 000 vathu, si thulago moyo ndrani nya 40 dzisegundo. Ya walo khiyo nya gu vambe nya vandriyathu va ngu ba va dzipwa kharato va bwe va dzi songa.

4. Vathu muni va omu nya Bhibhiliya va nga dogoreya ni gufa?

⁴ Dziteponi nya gulowe nya Bhibhiliya, simbe sithumi sa Nungungulu si garadzegide ngudzu khu sigaradzo saso nyo bwe si vbweta ni gufa. Khu giyeyedzo, Joba a di gupwa guvbisa nyo bwe khuye: “Nyi garade. Kha nyi nga gu khathala gambe khu womi wangu.” (Joba 7:16; 14:13) Jona a di vbeya ngudzu tshivba nyo bwe khuye: “Khu guralo, uwe PFHUMU Nungungulu, nyi ngu gu lomba u nyi songe, kholu i tshukwana gufa guvbindra guvbanya.” (Jona 4:3) Muprofeti Eliya vbeledwe khu gutumba nyo bwe khuye: “Olu basi, PFHUMU Nungungulu! Dusa womi wangu.” (1 Dzipfhumu 19:4) Jehovha a di gu si gola sithumi soso nyo tumbege nigu a di gu vbweta gu khuye si vbanya. Kha va ninga nandru khu gu ba va dzipwide kharato. Wulangani nya isoso, a di va phasa gu va vbweta gu simama gu vbanya gasi gu va simama gu mu thumeya khu gutumbega.

5. Khu ginani vandriyathu va vbwetago lihaladzo lathu khu lisine?

⁵ Muhuno vandriyathu nya vangi va ngu emisana ni sigaradzo nya singi nigu va gu vbweta lihaladzo lathu. Vambe va gu hegwa ni gu tshaniswa. Vambe gu vbwetega gu va timiseya gu tshaniswa mwendro gulembwa mithumoni yawe. Vambe vo garadzega ngudzu khu gu sa gu hunga gu va thuma dziora nya dzingi vambe khu gu mithumo yawe yi ngu garadza ngudzu. Vambe gambe va na ni sigaradzo nya sikhongolo dzindrangani gwawe. Vambe adzina va na ni mwama mwendro nyamayi a gu mba thumeya Jehovha a khaleyago gu mu ganeleya khu kotani nya isoso. Khu kotani nya sigaradzo sesi ni simbe, nya vangi va gu dzipwa na va rerekide nyo bwe va dzipwa na va si phasi gilo. Khu mani a nga va phasago?

6. Lihaladzo la Jehovha li tiyiside kharini sithumi saye?

⁶ Jehovha a ngu tiyisa sithumi saye gu khuye a ngu si gola olu ni gu a na si gola kala gupindruga. Nga dundrugeya edzi vaIsrayeli va dzipwidego khidzo tepo Jehovha a nga va embeya khuye: “Kholu uwe u di gu golega mahoni gwangu, ni gu zundzega, gambe nyi gu gode,” a bwe khuye “U nga thavi, kholu eni nyi nago”! (Isaya 43:4, 5) Hi ngu dziti gu khethu moyo ni moyo wathu na ni lisima ga Jehovha. * (Wona tshamuselo wa  vbavbatshi.) Bhibhiliya yi ngu tumbisa gu khiyo: a na hi vbanyisa “kha nga [M]uvbanyisi nya tshivba. [A] nengela khu gutsaka khu kotani gwago.” — Sofoniya 3:16, 17.

7. Lihaladzo la Jehovha la gu fana kharini ni lihaladzo la mamayi khu gyanana gyaye? (Wona foto gupheyani nya ndrima.)

⁷ Jehovha a ngu tumbisa gu tiyisa ni gu thaveleya vathu vaye ambari vo ba vari ni sigaradzo muni. A di khuye: “Khavbo avbo, mu na mama, va mi wugarela mawogoni, va mi ladzisa vbamarumbitunu gwawe. Kha nga mayi a tangadzisago gyanana gyaye, eni neni nyi na mi tangadzisani.” (Isaya 66:12, 13) Nga dundugeya khedzi gyanana gi dzipwago khidzo na gi sayisegide mawogoni ga mamayi wagyo mwendro tepo a haganago nagyo! Jehovha a ngu gu haladza ngudzu nigu o vbweta gu khuye u sayisega. Gima u nga kanakani gu khuwe u na ni lisima ngudzu ga Jehovha. — Jeremiya 31:3.

8, 9. Lihaladzo la Jesu la gu hi tiyisa kharini?

⁸ Gimbe gighelo gi hi girago hi dziti gu khethu Jehovha a ngu hi haladza khegi: “Kholu Nungungulu haladzide ngudzu litigo gu kala a ningela Mwanaye wa moyo, gasi ni wevbi a khodwago gwaye a si mbembi, aholu a mane guvbanya nya gupindruge.” (Johane 3:16) Ningelo wa Jesu wa gu yeyedza gu khuwo anuye a ngu hi haladza, nigu lihaladzo lolo li ngu hi tiyisa. Bhibhiliya yari khiyo ambari “gusaniseka, khu sigaradzo” kha gu kodzi gu ‘hi hambanisa ni lihaladzo la Kristo.’ — Varoma 8:35, 38, 39.

⁹ Dzimbe dzitepo hi ngu tshangana ni sigaradzo si hi vbedzago tshivba khu nyamani ambari khu mapimoni, mwendro si hi duseyago gutsaka nyo thumeye Jehovha. Ganiolu gu dundruga edzi Kristo a hi haladzago khidzo gu nga hi ninga tshivba nyo timiseye. (Leri 2 Vakorinto 5:14, 15.) Lihaladzo la Jesu la gu hi gira hi dogoreya gu simama gu  vbanya hi bwe hi thumeya Jehovha. Ilo li nga hi phasa gu hi si dogoreyi gufa, ambari ho ba hi emisana ni dzimhango, gutshaniswa, guvbeledwa khu gutsaka, mwendro gugaradzega.

10, 11. Khu mani a yedego gu vbaha vandriyathu va vbedego tshivba? Tshamuseya.

¹⁰ Jehovha a ngu thumisa gambe libandla gasi gu hi vbaha khu lihaladzo. Tepo hi haladzago vandriyathu libandlani ha gu yeyedza lihaladzo lathu khu Jehovha. Ha gu gira satshavbo hi si kodzago gasi gu phasa vandriyathu guti gu khavo va na ni lisima nigu Jehovha a ngu va haladza. (1 Johane 4:19-21) Mupostoli Pawulo lovide esi: “Khu kharato, tangadzisanani, phasanani moyo ni moyo nga edzi mutago na mu gu gira kala olu.” (1 Vatesalonika 5:11) Khandri madhota basi ma nga girago isoso. Moyo ni moyo wathu a nga pimedzeya Jehovha ni Jesu khu gu thaveleya vandriyathu libandlani. — Leri Varoma 15:1, 2.

¹¹ Vambe libandlani va tshanisekago khu madwali nyo vbeledwe khu gutsaka mwendro gugaradzega va gu vbweta giphaso nya vadhogodheya ni mirendre. (Luka 5:31) Madhota ni vambe libandlani va ngu dziti gu khavo ambari olu va nga mba hevbula wudhogodheya, giphaso ni guthaveleya va kodzago gu ninga si na ni lisima ngudzu. Vatshavbo libandlani va nga ‘tiyisela ava va rerekago, va sayisa vadwali, va hunisela vatshavbo.’ (1 Vatesalonika 5:14) Gu vbwetega gu hi zama gu pwisisa edzi vandriyathu va dzi pwago khidzo. Gu vbwetega gu hi va laphiseya monyo hi bwe hi ganeya navo khu ndziya yi na gu va thaveleyago va gu ba va vbede tshivba. Ina u ngu zama gu tiyisa vambe? Ginani u nga girago gasi gu u engedzeya gu thaveleya ni gu kutsa vambe?

12. Ninga giyeyedzo nya muthu a thaveledwego khu lihaladzo la libandlane gwaye.

 ¹² Moyo nya ndriyathu nya nyamayi wa Ewuropa wari khuye: “Dzimbe dzitepo nyi ngu tedwa khu mapimo nyo dzi songe, ganiolu nyi na ni giphaso nya gyadi. Libandla langu li ngu vbulugisa womi wangu. Vandriyathu libandlani va ngu nyi thaveleya ngudzu ni gu nyi yeyedza lihaladzo. Ambari olu va gu vadugwana va dzitigo gu khavo nyi na ni madwali nyo vbeledwe khu gutsaka, libandla tepo yatshavbo li dzi emisede gu nyi phasa. Patwa moyo wa gu nyi phara nga gyanana gyawe khu liphuvboni. Wu ngu nyi sayisa gwadi, nigu wu dziemisede gu nyi phasa ni yevbini ora.” Lisine gu khandri vatshavbo va na gu si kodzago gu ninga giphaso khu ndziya nyo fane. Ganiolu hatshavbo hi nga gira nya singi gasi gu phasa vandriyathu libandlani. * (Wona tshamuselo wa vbavbatshi.)

13. Ginani hi yedego gu gira gasi gu thaveleya vambe?

¹³ Khala muengiseyi nya wadi. (Jakobe 1:19) Tepo hi engiseyago gwadi ha gu yeyedza lihaladzo. Gira siwudziso nya sadi si na gu gu phasago gu pwisisa edzi a dzipwago khidzo ndriyago. Uye a na dziti gu khuye u ngu khathala, ambari wo yeyedza khu khovbe basi. Tepo a ganeyago, laphisa monyo u mu diga a dzi tshula gwadi nya mba mu piya. Wa gu khala muengiseyi nya wadi, u na mu pwisisa gwadi nigu si nga mu phasa gu gu tumba. Khavbovbo si na mu vbevbugeya gu engiseya esi uwe u ganeyago tepo u zamago gu mu phasa. Wa gu khathala khu vambe khu lisine, u na va thaveleya ngudzu kamo.

14. Khu ginani hi si yeligo gu sola-sola?

¹⁴ U nga sola-soli. Muthu a gu na ni gigaradzo nyo vbeledwe khu gutsaka kha na nga dzipwa gwadi a gu pimisa gu khuye hi ngu mu sola. Khavbovbo si nga gu garadzeya gu mu phasa. “Vomo va dusago magana nya gupaye kha nga litshari, aholu lidimi la va nya guti, la gu ninga womi.” (Mavingu 12:18) Lisine gu gima kha hi na nga ganeya malito ma na payago muthu a vbedego tshivba khu nyagigwenye, ambari ulolo hi nga mu gira apwa guvbisa ngudzu ha gu ganeya nya mba pheya khu gu pimisa. Gasi gu tiyisa ndriyathu, gu vbwetega gu hi mu gira a tiyisega gu khuye ha gu zama gu pwisisa giemo gyaye khu lisine. — Matewu 7:12.

15. Dziferameta muni hi nga dzi thumisago gasi gu thaveleya vambe?

¹⁵ Thumisa lito la Nungungulu gasi gu thaveleya vambe. (Leri Varoma 15:4, 5.) Bhibhiliya khya “Nungungulu a gu gifefe nya gutimisele ni gutiya,” khu kharato kha si samadzise gu khiso hi ngu mana guthaveledwa nya gukhongolo omu nya lito laye. Hi na ni Índice das Publicações da Torre de Vigia ni Guia de Pesquisa para Testemunhas de Jeová. Khu gu thumisa dziferameta dzedzi hi nga mana milowo ni mabhuku hi nga ma thumisago gasi gu thaveleya ni gu kutsa vandriyathu.

16. Makhalelo muni ma na hi phasago gu thaveleya muthu a vbedego tshivba?

¹⁶ Yeyedza wuwadi ni wuhindzi. Jehovha  khuye “Babe nya wuhindzi, Nungungulu nya guthavelele gwatshavbo,” ni gu na ni “wuhindzi nya wukhongolo” ga sithumi saye. (Leri 2 Vakorinto 1:3-6; Luka 1:78; Varoma 15:13) Pawulo ningide giyeyedzo nya gyadi nya isoso kholu a di gu pimedzeya Jehovha. Uye a di khuye: “hi diri ni fanelo nya guhengule gilogyo. Aholu, hi di dzi rudzisa vbakari gwanu hi mi sayisa nga edzi mayi a sayisago khidzo sanana saye. Khu gu mi haladzani ngudzu, hi di dzi emisede gumba mi ningani Mahungu nya Yadi basi, aholu, ni gu ningela gambe guvbanya gwathu khu enu, kholu enu mu khade nga sanana sathu nya sigodwa.” (1 Vatesalonika 2:7, 8) Ha gu yeyedza wuwadi nga Jehovha, si nga gira gu hi thaveleya ndriyathu a gombeyago gasi gu a thaveledwa!

17. Hi yede gu va wona kharini vandriyathu gasi gu va kutsa?

¹⁷ U nga vireyi gu khuwe vandriyago va vbeleya. Wona silo edzi si gu idzo khu lisine. Wa gu vireya gu khuwe vandriyathu va vbeleya, kha si na nga gimbiya gwadi. (Muhevbudzi 7:21, 22) Dundruga gu khuwe Jehovha, a ngu ganeya lisine nya esi a si vireyago gwathu. Khu kharato gu vbwetega gu hi laphiseyana monyo. (Vaefeso 4:2, 32) Gima kha hi vbweti gu gira vandriyathu va dzipwa khatshi kha va giri gilo mwendro gu va fananiseya ni vambe. Wulangani nya isoso, ha gu va kutsa hi bwe hi ndrindra gupima gwawe gasi gu va wona silo nya sadi va si kodzago gu gira. Isoso si nga va phasa gu mana gutsaka tepo va thumeyago Jehovha. — Vagalatiya 6:4.

18. Khu ginani gu vbwetegago gu hi vbahana khu gyathu khu lihaladzo?

¹⁸ Moyo ni moyo nya sithumi sa Jehovha na ni lisima gwaye ni ga Jesu. (Vagalatiya 2:20) Hi ngu haladza vandriyathu khu lisine, khu kharato gu vbwetega gu hi va phara khu ndziya nya lihaladzo. “Hongoleni hi dzi garadze khu gu vbweta silo sile si hi reselago gurula ni gu tiyiselana gukhodwani.” (Varoma 14:19) Edzi hi wu lambedego khidzo womi paradhesini, tepo hatshavbo hi na gu ba hi mwalo gighelo nyo hi vbedze tshivba! Gu na ba guri mwalo gambe madwali ni dzinyimbi. Vathu kha va na ngafa gambe khu kotani nya gighoho, kha hi na nga tshaniswa gambe khu kotani nyo thumeye Jehovha, gu na ba guri mwalo gambe sigaradzo nya ndranga ni sigaradzo guvbanyani. Guvbeyani nya 1000 myaga, vathu vatshavbo va na ba va vbelede. Ava va na gu simamago na va tumbegide avba nya gulingwe nya guhegise Jehovha a na va rana sanana saye mafuni nigu va na “hengela wudhumoni nya gutshulege nya sanana sa Nungungulu.” (Varoma 8:21) Khu kharato, hongoleni hi yeyedze lihaladzo li vbahago hi bwe hi phasana guvbuluga gasi gu hi mana litigo nyo tsakise la Nungungulu.