Hatha gwadi esi u yedego gu si thangisa. Bhibhiliya yo hi kutsa gu “vega gupima avba nya silo nya lisima ngudzu.” (Vafilipi 1:10) Dongiseya lista nya esi u yedego gu gira — khu hwane u wona gu khuwe khu sevbini nya lisima, nya givbiredza mwendro satshavbo si ngu fana. Dundruga gu khuwe adzina saye gu na ni gilo nya lisima ganiolu, nasiri gya givbiredza. Khu giyeyedzo guya renga guhodza si nga gira nari sa lisima ganiolu nasiri sa givbiredza nigu gambe dundruga gu khuwe gu na ni silo si girago khatsi khya givbiredza ganiolu nasiri nya lisima nya nga gu sixitiri silo esi u si golago ngudzu. a

Gira makungo. Muhevbudzi 10:10 o ganeya gu khuye “Gibhewula gya gu bani gya sa lodzwa gi na gu gireya thumo; gu vbweta gu engedzeya tshivba; aholu wugengeyi wu ngu ninga tshatshazelo muthu.” Ginani hi gi hevbulago? Gu fana ni muthu oyu a kokago dzikhuni, a yedego go lodza gibhewula na si gu pheyi gu koka dzikhuni gasi a si hodzi tepo, uwe u na kodza gu thumisa gwadi tepo yago wa gu gira makungo nya esi u yedego gu gira na wu si gu giri. Khu kharato u nga pheyi khu gu gira esi nya mbana lisima kholu si nga gu vbedzeya tepo si bwe si gu vbedza tshivba. Wa gu mba u tshaledwe khu tepo nyo khaguri hwane nya gu ba u vbedzide esi u nga si hunga gu gira, londrola tepo yoyo gasi u gira simbe silo. Wa gu gira makungo nya esi u yedego gu gira silo sago si na gimbiya gwadi.

Vbevbugisa womi wago. Dzi emiseye gu ganeya gu khuwe ahihi ga silo esi si gu mwalo lisima mwendro si nga gu vbedzeyago basi tepo yago. Wa gu dzi tadzeya mithumo nya yingi si na gu gira u garala u bwe u vbeledwa khu litsako.

Gu kanakana ni gu khaleya gu thindrekisa silo. “Uye a khedziseyago dziphuvbo, gima kha yali, ni wule a khedziseyago mapfhi, gima kha na vbwera.” (Muhevbudzi 11:4) Ginani hi gi hevbulago? Gu khaleya gu thindrekisa silo si ngu hodza tepo nigu mulimi oyu a vireyago dzinango nya dzadi gasi gu yala khu mahegiso si nga gira a si yali ne a si vbweri gilo, khu ndziya nyo fane hamba dzi woneya hi nga dzumeleya hwanga wu hi gira hi khala vathu nyo kanakaneyi esi hi na girago womini gwathu mwendro wu nga hi gira hi pimisa gu khethu hi yede gu hunga makungo basi ho ba hiti satshavbo si pategago ga mahungu yoyo. Hi yede gu pheya khu gu gira wugevisisi na hi ngasi hi hungi makungo nya lisima. Mavingu 14:15 wo ganeya gu khuwo “muthu nya mapimo a gu khedza umo a gandrago.” Ambari ulolo dzimbe dzitepo mambe makungo ma nga hi gira hi kanakana. — Muhevbudzi 11:6.

Gu vbweta gu satshavbo u girago si vbeleya. Libhuku la Jakobe 3:17 lo ganeya gu khilo “Ganiolu, wugengeyi wu tago khu vbatshani wu agide, wu na ni gurula, wu ngu ninganiseya, wu dzi emisede gu engisa, wu tade khu wuhindzi ni mihandro nya yadi, wu mwalo gihatheya nigu kha wu pfhadzedzeyi.” Si ngu pwisisega gu muthu a vbweta gu gira satshavbo a si kodzago gasi gu gira silo nya sadi. Dzimbe dzitepo hi nga vbweta gu gira silo nya sikhongolo khu mahegiso hi si si kodzi hi bwe hi vbeya tshivba. Khu giyeyedzo muthu oyu a hevbuleyago lidimi nya liphya a yede gu dziti gu khuye dzimbe dzitepo a na phazama nigu tepo a phazamago a yede gu hevbula gilogyo. Muthu wule a vbwetago gu khuye satshavbo a girago si vbeleya yimbe tepo a nga thava gu ganeya na gu thava gu khuye a na phazama nigu isoso si nga mu gira a hweya gu hevbuleya lidimi leli nya liphya. Si na ni lisima guti gu khandri silo satshavbo hi si kodzago gu gira gu na ni esi hi na gu si tandrago. Mavingu 11:2 o ganeya gu khuye, “Avbo gu guromo matshandza, dzomo gambe dzitshoni, aholu ga avo va dzi nogisago, gomo guti.” Vathu vale va dzitigo gu khandri satshavbo va na gu si kodzago gu gira, va dzi vegago vbavbatshi kha va thavi gu dzi hega tepo va phazamago.

Dzi vegeye pimo nya tepo u vbedzago na wu gu thuma mwendro gu vbungadza. “Gyandza gimwegyo basi nya muthu nya gurule, guvbindra mandza mavili nya muthu nya wughimaghima khu gu dzi garadza ngudzu; ugogo nugo gututuma hwane nya phuvbo yi vbindrago.” (Muhevbudzi 4:6) Wule a gu mba dzi pimeya tepo a thumago gutala nya dzitepo kha tshaledwi khu tepo nya gu khedzise thumo a wu girago kholu o khala na gu garade mwendro na gu pharegide, ganiolu, muthu nya wugara tepo yatshavbo agu vbweta gu hefemula. Khu kharato Bhibhiliya ya gu hi kutsa gu thuma khu ndziya nya yadi hi bwe hi tsaka khu handro nya thumo wathu. Kholu gyogyo “giningwa gya Nungungulu.” — Muhevbudzi 5:19.

Dzi tshiyele tepo nya gu u lala. Mulovi moyo nya Bhibhiliya ganede gu khuye “Nyi ngu lala ligovbe nyi hefemula khu gurula.” (Ndzimo 4:8) Vathu nya vangi va ngu dzina gu lala 8 dziora khu litshigu gasi va wuga ni tshivba, na va gu tsakide ni gu bwe va si kodza gu pimisa khu ndziya nya yadi. Gu lala tepo nyo eneye si nga hi phasa gu dundruga silo ni gu vega gupima tepo hi hevbulago. Khu kharato gu lala tepo eyi yi vbwetegago ndziya nya gu thumise gwadi tepo yathu. Ganiulo, ha gu mba si gira soso si na hi garadzeya gu hevbula, hi na khaleya gu gira dzimhango ni gu vbiredzeya gu goroga.

Zama gu gira esi u si kodzago. “Nya sadi khu gu wona silo khu maho, guvbindra gu si dogorela khu monyo.” (Muhevbudzi 6:9) Ginani hi gi hevbulago? Muthu nya gu gengeye kha dzumeleyi esi a si golago ni esi a si vbwetago gu gira si woneleya womi waye ngudzu ngudzu ga esi a sitigo gu khuye kha na nga si kodza gu gira. Khu kharato, uye kha dzumeleyi gu dzi publicidade edzi dzi girago gu khatsi tshade dzi mu pfhadzedzeya nigu a ngu potsa gu gira mangava. Vbavbandze nya isoso uye a ngu tsaka khu esi a si kodzago gu gira ni esi maho yaye ma si wonago.

Dziti gu khuwe wa gu vbanyeya ginani. Wa gu ba u dziti gu khuwe wa gu vbanyeya ginani si na gu phasa gu wona esi nya sadi, esi si gu na ni lisima ni esi si na gu phasago womini wago. Nari gu khatsi womi wago wa gu fana ni flexa mavbanyelo yago ma di hadzi gu gu yeyedza omu o yedego gu hongola. Khu kharato, gu manega ni mavbanyelo nya yadi si nga gu phasa gu thangisa esi si gu na ni lisima womini wago ni gu thumisa gwadi tepo yago. U nga si kodza kharini gu u manega ni mavbanyelo nya yadi? Vathu nya vangi va gu hevbuleya mavbanyelo nya yadi omu nya Bhibhiliya kholu va ngu dziti gu khavo gifefe nya guti nya gukhongolo. — Mavingu 2:6, 7.

Thangisa lihaladzo womini gwago. Vakolosi 3:14 vo ganeya gu khuwo “Ambalani lihaladzo, kholu ilo la gu gira gu vathu vatshavbo va pwanana khu gu vbeleya.” Go ba gu mwalo lihaladzo kha si kodzegi gu hi tsaka mwendro hi vbanya na hi gu dzipwa gwadi ndrangani. Muthu wule a gu mba yeyedza lihaladzo adzina saye khu gu thangisa thumo mwendro dzitsapawu womini waye a gu dzi vbweteya gu khala na sa tsaka. Si gu pwisisega gu Bhibhiliya yi ganeya khu gu phindra-phindra gu lihaladzo gilo nya lisima ngudzu womini gwathu. — 1 Vakorinto 13:1-3; 1 Johane 4:8.

Dzi ningi tepo nya guti gwadi Nungungulu. Geoff oyu a haladzago ngudzu mwangadzi waye ni sanana saye sasivili, a gu na ni thumo nya gu wu goli ngudzu, dzipari nya dzadi, kha nga olu a thumeyago hospital gu tala nya dzitepo a di gu wona vathu na va gu tshaniseka ngudzu ni gufa, uye a di gu dzi wudzisa gu khuye “Ina kamo hi di giredwa silo sesi?” Litshigu limwedo uye a di leri limwedo nya mabhuku ma duswago khu dzifakazi dza Jehovha nigu uye a di mana hlamulo nya giwudziso gyaye.

Geoff bhulede esi a nga ba a si hevbula mwangadzi waye ni sanana saye, avo va si tsakede nigu ndranga yaye yatshavbo yi di pheya gu hevbula Bhibhiliya. Isoso, si phaside ngudzu ndraga yaye. Olu va gu thumisa tepo yawe gasi gu gira silo nya lisima. Gu hevbula Bhibhiliya si va phaside gu manega ni gu tumba nya womi nya gupindruge omu mafuni na va gu vbanya nya mba garadzega. — Gutuledwa 21:3, 4.

Giyeyedzo gya Geoff gya gu hi gira hi dundruga malito ya Jesu ma gu khayo “Va ngu tsaka ava va dzitigo gu khavo va ngu vbweta gu thangedwa khu Nungungulu, kholu Mufumo wa ndzadzini khwawe.” (Matewu 5:3) Wo si wona kharini? Ina u nga dzi ninga tepo gasi u ti gwadi Nungungulu? Gasi gu ganeya lisine yi mwalo yimbe ndziya nya gu u tsakiswa khu womi muhuno ni mindru wa tshigu.