2 Ina ethu hi na ni nandru khu gutshaniseka gwathu?
Khu ginani si gu sa lisima guti hlamulo nya giwudziso gegi?
Abari gu hi na ni nandru khu gutshaniseka gwathu so thula gu khiso hi nga si kodza gu vbedza gutshaniseka.
Nga dundrugeya khesi
Khu ginani silo sesi si landreyago si yeyedzago gu khiso vathu va na ni nandru khu gutshaniseka hi gu wonago?
-
Gu veteledwa mwendro gu pfinywa.
Organização Mundial da Saúde (OMS) yari khiyo avba nya 4 vathu va dandridego moyo wakone veteledwe wananani waye, yi bwe hi yi khiyo avba nya 3 vanyamayi moyo wakone veteledwe mwendro gu pfinywa, ambari gu girwa silo sesi sa sivili kamo.
-
Gufedwa.
Estatísticas Mundiais da Saúde nya 2018 yo yeyedza gu khiyo “khu 2016 gu songidwe tanga nya 477 000 vathu mafuni gwatshavbo.” Tengo wowo wo engedzeya ga owu nya 180 000 vathu va fudego khu dzinyimbi ni mayunga khu mwaga wowo.
-
Madwali.
Omu nya ndrima nyo khaguri yi dusidwego omu nya revhista National Geographic, mulovi Fran Smith, tshamusede gu khuye: “Vathu nya vangi nyo vbindre dzibhiliyoni va ngu daha, nigu feya, gimwegyo nya silo si vangago livbandre madwali ma songago vathu: madwali nya monyo, madwali nya wuluvi, silondra omu nya misivba, madwali nya mahahu, ni kankro nya mahahu.”
-
Guhambana nya mavbanyelo nya vathu.
Psicólogo moyo nyo pwani khu Jay Watts, tshamusede gu khuye: “Wusiwana, ni gu gireya litsoro vathu khu gu ba vari sisiwana mwendro simbe silo, ni gu tshepetwa khu kotani nya tshonge, gu yeyisa vathu, gu gurumedza gu rura omu hi khalago umo ni gupalisana khu mavbanyelo, satshavbo sesi si ngu engedzeya hwanga, gu vbedzana tshivba, ni gu garadzega.
GASI GU HEVBULA NYA SINGI
Wona vhidhiyu yi gu khiyo Khu ginani Nungungulu a nga vanga mafu?, yi gu romo omu nya jw.org.
Wona esi Bhibhiliya yi si ganeyago:
Sigaradzo nya singi si gomogo mafuni muhuno so vangwa khu vathu.
Nya singi sakone so vangwa khu mifumo yeyi nyo vivbe yi lemedzeyago guvbanya ga vatshavbo va fumedwago khiyo.
“Muthu nya tshivba a gu fumela mumbe muthu gasi gu mu tshanisa.” — MUHEVBUDZI 8:9.
Yomo ndziya nyo vbungule gutshaniseka.
Matshina nya milayo nya Bhibhiliya ma ngu phasa vathu gu manega ni womi nya wadi ni gu vbanyisana khu gurula.
“Monyo nya gurule wa gu vbanyisa givili, aholu lidiwo, madwali nya guhinise sikongolo.” — MAVINGU 14:30.
“Fuvisani vbakari gwanu dzitshikwi, likhulo, gigaha, ligwaha ni milembo, gumogo ni guvivba gwatshavbo.” — VAEFESO 4:31.
