Mwama a hodzago salada
Bhibhiliya khandri libhuku nya mirendre. Ambari ulolo, iyo yi na ni wusingalagadzi wu hi phasago gu manega ni womi nya wadi. Wona wusingalagadzi nyo khaguri nya Bhibhiliya wu nga gu phasago gu manega ni womi nya wadi.
SAYISA GIVILI GYAGO
LITSHINA NYA NAYO NYA BHIBHILIYA: “Mwalo muthu a vengago givili gyaye. Aholu a gu gi hodzisa ni gu gi sayisa gwadi.” — Vaefeso 5:29.
SO THULA GINANI: Litshina leli nya nayo nya Bhibhiliya la gu hi kutsa gu sayisa givili gyathu gasi hi manega ni womi nya wadi. Mubiko nyo khaguri wa gu yeyedza gu khuwo madwali nya mangi handro nya edzi vathu nya vangi va hathago gu vbanya khidzo. Ganiolu muthu a gu hatha gwadi mavbanyelo, a nga mana womi nya wadi.
GINANI U YEDEGO GU GIRA:
-
Mahodzelo. Hodza guhodza ni gu seya dzisumo nya dzadi, u bwe u seya mati nyo eneye.
-
Dzi tiyise mili. Gani u na ni tanga muni, wa gu khaleya khu gu dzi nawula u na mana womi nya wadi ambari wa gu ba u garadzwa khu sitshetsheya. Valongo ambari ni vadhogodheya va nga gu kutsa gu dzi tiyisa mili, ganiolu, u yede gu gira gilogyo!
-
Lala khu gu eneya. Muthu a si laligo khu gu eneya, a nga dzi vangeya madwali nya makhongolo. Vambe vathu va gu thumisa tepo va nga hadzi lala khiyo gasi gu gira simbe silo. Ganiolu, wa gu dzi tshiyela tepo nya gu lale khu gu eneya, wa gu dzi hatheya womi nya wadi.
POTSA MAVBANYELO NYA MBA YADI
LITSHINA NYA NAYO NYA BHIBHILIYA: “Hongoleni hi dzi handze guvivba gwatshavbo nya givili ni liphuvbo.” — 2 Vakorinto 7:1.
SO THULA GINANI: Hi nga dzi buza khu womi nya wadi ha gu potsa gu daha dzifeya. Idzo dzi na ni ndruma nya gu dwadzise ni gu songa vathu.
GINANI U YEDEGO GU GIRA: Hunga litshigu u na digago gu daha, u bwe u li lova avba nya kalendariyu. Na gu keneleya litshigu limwedo gasi gu vboheya litshigu lolo u hatidego, wola dzimasu dzatshavbo nya dzisigari u dzudzuga, gupata ni gevbini gi gimbeleyanago ni gu daha. U nga khaleyi malanga gu gu ni vathu va dahago. Embeya dzipari ni valongo vago gu khuwe u digide gu daha, gasi va feya gu gu phasa.
MAMBE MATSHINA NYA NAYO NYA BHIBHILIYA
U nga lomba Bhibhiliya ga mweyo nya Dzifakazi dza Jehovha dza gipandreni gwago
U NGA GIRI SILO KHU MAGIRELO NYA MHANGO.
“Wa gu vbaha nyumba nya yiphya nya gitezi, u na gira libhiyo likupakupani la gitezi, gasi u si mani nandru nya novba, a gu thega muthu nya khaguri khu vbale.” — DHEWUTERONOME 22:8.
WONELEYA ZANGA YAGO.
“Muthu nya litimiselo a na ni mapimo, aholu uye nya gihafane a gu vbiredzela gu yeyedza wupumbu waye.” — MAVINGU 14:29.
U NGA HODZI GUVBINDRA PIMO.
“U nga hengeli gumogo ni dzibewudzi, ambari ni va nya limidzo nya nyama.” — MAVINGU 23:20.
