Rendre nya wadi nya gihatheya
Dzimiliyoni nya vathu va landrede matshina nya milayo hi ma wonidego omu nya dzindrima nya revhista yeyi gasi gu pala gihatheya myonyoni gwawe. Lisine gu kha si kodzegi gu gi pala gihatheya khu tshivba yathu. Ganiolu, so thula gu khiso kha gi na nga tshuka gi fuvide?
Mufumo wu na fuvisago gihatheya
Mifumo nya vathu kha yi si kodzi gu vbedza gihatheya. Ganiolu isoso so thula gu khiso gu mwalo mufumo wu na si kodzago gu fuvisa gihatheya?
Mufumo wu na fuvisago gihatheya wu na
-
1. Kutsa vathu gu vbindrugedza mapimiselo yawe ni edzi va dzipwago khidzo khu vambe.
-
2. Vbedza gigaradzo gi girago gu hi si va phari gwadi vambe.
-
3. Manega ni vathangeyi nya vadi nyo tumbege va simama kala gupindruga na vari mwalo gihatheya.
-
4. Tshanganisa vathu nya mayigo yatshavbo.
Bhibhiliya yi ngu hi tiyisegisa gu khiyo Nungungulu na ni mufumo. Mufumo wowo wo ranwa pwani “Mufumo wa Nungungulu.” — Luka 4:43.
Nga wona esi mufumo wowo wu na girago:
1. Sihevbudzo nya sadi
‘Vathu va tigoni, va na hevbula gululama.’ — ISAYA 26:9.
“Thumo nya wululami wu na bani wuri gurula, ni handro nya wululami, wu na bani na wuri gukhadzisega ni gutumbega kala gupindruga.” — ISAYA 32:17.
So hi hevbudza ginani esi? Mufumo wa Nungungulu wu na hevbudza vathu silo nya sadi. Tepo vathu va na tigo esi nya sadi ni esi nyo vivbe — esi nyo lulame ni esi nyo mba lulama — mawonelo yawe khu vambe vathu ma na vbindrugedza. Vatshavbo va na kodza gu gireya silo nya sadi vambe ni gu haladza vathu vatshavbo.
2. Mufumo wa Nungungulu wu na vbedza guvivba
Nungungulu “a na va bavbula marongo mahoni gwawe, kholu gima kha gu na manega gambe gufa, gulila gu na vbela, ni gudilela ni wuvi, kholu dzitshanisa dza gale dzi vbindride.” — GUTULEDWA 21:4.
So hi hevbudza ginani esi? Mufumo wa Nungungulu wu na vbedza wuvi watshavbo wu vangwago khu guvivba. Gu na ba guri mwalo gighelo nya gu vathu va tshaniseka.
3. Wuthangeyi nya wadi
“Kha na lamula gukhedza khu khovbe nya muthu, mwendro gu kona gukhedza khu gu pwa ndzeve; Aholu, a na lamula sisiwana khu nayo, a pila mahungu ya va nya gu dzi nogisa va tigoni khu gululama; a na veta litigo khu lipitso nya magana yaye, khu furugedzo wa kanani gwaye, a na songa va nya guvivba.” — ISAYA 11:3, 4.
So hi hevbudza ginani esi? Jesu Kristo, Pfhumu nya Mufumo wa Nungungulu wa ndzadzini, a na fumeya mafu yatshavbo khu gurula. Jesu kha nga fevha litigo nyo khaguri a nyenya limbe, nigu a na gira satshavbo gasi vathu vatshavbo mafuni va engisa milayo yaye.
4. Gupwanana
Mufumo wa Nungungulu wo hevbudza vathu gu va “hengela mapimo mamowo, lihaladzo limwedo, hefemulo mowo ni gudogorela gumogo basi.” — VAFILIPI 2:2.
So hi hevbudza ginani esi? Ava va na fumedwago khu Mufumo wa Nungungulu kha va na nga ganeya khu likana basi gu khavo ‘hi ngu pwanana’, ganiolu va na ba vari ni “mapimo mamowo” kholu va na ba va haladzana.