Vathu va nga manega ni gihatheya nasiri ga vathu va tago khu limbe litigo, nya limbe lifumbo, lihundzu mwendro lidimi basi, ganiolu ga vathu nya wumbe wukhongeyi, khu gu ba ari wa gimbe givbango nya wuvelegi mwendro khu gu ba ari muthu nyo ghanye mwendro gisiwana . Vambe va ngu wona vakwawe khu ndziya nya mba yadi khu kotani nya tanga yawe, sihevbulo mwendro makhalelo yawe. Ganiolu, vambe va ngu tshepeta vakwawe khu kotani nya olu va hasidego ni simbe. Ambari ulolo, si nga gira va dzi wona na va ri mwalo gihatheya.

Ina si ngu kodzega gu u thaphedwa khu madwali yaya nya gihatheya? Si ngu vbevbuga gu wona vambe na va ri ni gihatheya. Ganiolu, adzina si nga garadza gu wona gihatheya avbo gwathu. Lisine khu gu vangi nya ethu hi na ni gihatheya khu ndziya nyo khaguri. David Williams, muhevbudzi nya sociologia, a gu tshamuseya gu khuye: “Muthu a gu ba ari ni mawonelo nyo hosege khu tsawa nyo khaguri nya vathu, a gu tshuka a mana moyo wakona nya tsawa wowo, a na mu phara khu ndziya nyo hambane nyo bwe a dzi hanga.”

Wona giyeyedzo gya Ivan. Europa gu diri ni tsawa nyo khaguri nya vathu wu nga ba wu wonedwa vbavbatshi ngudzu. Wari khuye: “Nyi di gu pimisa gu kheni mwalo nya tsawa wule a nga hadzi khala muthu nya wadi.” “Ganiolu, kha nya nga ba nyi tugula gu kheni gihatheya gi nga ba gi nyi tshanisa. Mapimoni gwangu nyi di gu dzi embeya gu kheni esi nyi si pimisago khavo lisine kamo.”

Mifumo nya yingi yi ngu dusa milayo nya gu zame gu vbedza gihatheya. Ganiolu, khu ginani gihatheya gi simamago? Gigaradzo khu gu milayo yoyo ya gu dwanisana basi ni avo va yeyedzago gihatheya, vbavbandze nya gu gi sigule mapimoni ni myonyoni nya vathu. Ganiolu, ina si ngu garadza gu dwanisana ni gihatheya? Ina gu na ni rendre nyo vbedze gihatheya?