Avba nya ndrima yi vbindridego, hi wonide siyeyedzo esi Jesu a si ningidego. Siyeyedzo soso sa gu hi phasa gu wona gu emiswa nya Mufumo wa Nungungulu ndzadzini ni gu emiswa ga Jesu Kristo kha nga Pfhumo.

Bhibhiliya ya gu ganeya gu khiyo neti Jesu a nga hakha tshivba nya gu fume, a di dzegeya gu tutumisa Sathane ni madhemoni yaye khu ndzadzini. Olu, Sathane ni madhemoni yaye vomo mafuni momu va thumisana ni vathu, khigyo gighelo gi girago gu gu manega dzitshanisa nya dzingidzingi gu khugeya khu 1914. — Gutuledwa 12:7, 9.

Ambari olu litigo li yago li engedzeya gu hina, Jesu kha nga Pfhumo nya Mufumo wa Nungungulu a ngu gira gilogyo gasi gu phasa vathu mafuni. Giprofeto a gi ganedego nya gu tshumayele mahungu nya yadi mafuni gwatshavbo gi ngu tadzisega muhuno, nigu isoso si ngu tsakisa ngudzu kholu vathu nya vangi va ngu hevbula gu thumisa matshina nya milayo nya Bhibliya womini wawe. (Isaya 2:2-4) Dzimiliyoni nya vathu va hevbude wusingaladzi nya wadi nya edzi va yedego gu wu wona khidzo thumo, edzi va nga sayisago khidzo dzindraga dzawe ni edzi va nga dzi woneyago khidzo avba nya gu gole ngudzu dzithomba. Esi va si hevbulago si ngu va phasa gu khala vathu ava Nungungulu a va vbwetago avba nya Mufumo waye.

Ambari olu Jesu a fumago ndzadzini, mifumo nya vathu yi ngo simama gu fuma mafuni. Ganiolu, Nungungulu embede Jesu khuye: “Fuma vbakari [ga] valala vago.” (Ndzimo 110:2) Nya mba hweya Jesu a na tshungunula vatshavbo va wugeyi, bwelo khavbo a ninga gutshulega vale va engisago Nungungulu.

Ga tepo yeyi, Mufumo wa Nungungulu wu na gira gilogyo gasi

• Gu fuvisa wukhongeli nya malipha. Wukhongeyi nya malipha wa gu hevbudza malipha khu Nungungulu wu bwe wu gira gu vathu va tshaniseka. Bhibhiliya ya gu tshamuseya gu khiyo wukhongeyi nya malipha wa gu fana ni nyamayi nya gibhayi. Gu fuviswa nya wukhongeyi nya malipha gu na khadzisa makandzu vathu nya vangi. — Gutuledwa 17:15, 16.

• Gu fuvisa mifumo nya vathu. Mufumo wa Nungungulu wu na gira gilogyo gasi gu tshungunula mifumo yatshavbo nya vathu. — Gutuledwa 19:15, 17, 18.

• Gu vbedza gutshaniseka. Ginani gi na giregago khu vale va bombago gu engisa Nungungulu va gira silo nyo vivbe? “Aholu va nya guvivbedwa khu monyo, va na fuviswa mafuni.” — Mavingu 2:22.

• Gu fuvisa Sathane ni madhemoni yaye. Sathane ni madhemoni kha va na si khodza gu ‘pengisa gambe mayigo.’ — Gutuledwa 20:3, 10.

Ginani gi na giregago khu vale va dzumeyago Mufumo wa Nungungulu?

Kha nga Pfhumu yi Fumago ndzadzini, Jesu a na gira nya singi si tandridwego gu girwa khu mifumo nya mafu. Uye a na ba ari ni ava nya 144 000 va hathidwego mafuni gasi gu ya fuma ni Jesu ndzadzini. (Gutuledwa 5:9, 10; 14:1, 3) A na gira gu gola ga Nungungulu gu tadzisega mafuni. Ginani egi Mufumo wa Nungungulu wu na gireyago vathu mafuni?

• Wu na vbedza madwali ni gufa. ‘Mwalo ni moyo muvbanyi a na gukhuye: Eni nyi ngu dwala,’ nigu “kha gu na manega gambe gufa.” — Isaya 33:24; Gutuledwa 21:4.

• Wu na resa gurula nya lisine ni gu khadzisega. “Sanana sago si na mana gurula nya gukhongolo ngudzu,” nigu “muthu ni muthu, a na khala mutsani nya uvha waye, ni mutsani nya ngure waye, kha gu na manega muthu nya gu va thurugisele.” — Isaya 54:13; Mikeya 4:4.

• Wu na ninga vathu thumo nya wungi. “Sihathwa sangu si na hodza satshavbo nya thumo nya mandza yawe. Kha va na thumela mahala.” — Isaya 65:22, 23.

• Wu na lulamisa sigaradzo nya tumbunugo. “Giwula ni mafu nya gihala si na tsaka khu isoso; marumbi ma na kulungela, ma na buga senge nya gumbure nya nga makhonwa.” — Isaya 35:1.

• Wu na hevbudza vathu esi va yedego gu gira gasi gu va vbanya kala gupindruga. “Guvbanya nya gupindruge khogu: Vati uwe basi kha nga Nungungulu nya lisine, ni guti Jesu Kristo, a gu uye u nga mu rumelago.” — Johane 17:3.

Nungungulu a gu vbweta gu khuye u dzi buza khu makategwa yaya. (Isaya 48:18) Ndrima yi landreyago yi na tshamuseya esi u nga girago olu gasi gu u ta dzi buza khu wumindru wowu nyo tsakise ngudzu.