• Yi hathidwe khu Nungungulu. “Kheni nyi nga emisa mufumeli wangu . . . Nyi na gu ninga mayigo ma khala thomba yago, mafu yatshavbo ma na lumba uwe.” — Ndzimo 2:6, 8.

• Gitugulwana gya Pfhumu Dhavhidhe. “Hi velegedwe gyanana, hi ningidwe gyanana nya gikhwathana . . . Gasi wufumu waye nya gurule wu engedzelane kala gupindruga, vbagikhalotunu nya wufumu wa Dhavhidhe ni mufumo waye, a wu tiyisa ni gu wu seketela khu nongameto ni gululama.” — Isaya 9:6, 7. 

• Yi velegedwe Bhetlehema. “Bhetlehema . . . , khavbo gwago gu na duga uye a na khalago mufumeli . . . Wugulu waye wu na vboha kala mahegiso nya litigo.” — Mikeya 5:2, 4.

• Yi nyenyidwe yi bwe yi songwa khu vathu. “A di fanana ni muthu, nya gu, a gu wonwa khu vathu va mu sihalela. . . . Uye payidwe khu kotani nya sighoho sathu, a pfareledwa khu kotani nya guvivbe gwathu.” — Isaya 53:3, 5. 

• Yi wusidwe khu gufani yi bwe yi ningwa wuzundzu. “Khu na diga guvbanya gwangu phalani nya vafi; khu na diga gihathwa gyago gifa. . . . Nyi napwa gutshamba nyamudye gwago kala gupindruga.” — Ndzimo 16:10, 11.

Ndrani nya matimo yatshavbo nya vathu, Jesu Kristo khuye basi a tshamusedwago avba nya matimo yaya. Kholu, ngilozi yi embede Mariya mamayi wa Jesu khiyo: “Nungungulu a na mu pharisa ndronga nya wufumu wa babe waye Dhavhidhe. . . . Mufumo waye gima kha wu na nga vbela.” — Luka 1:31-33.

Jesu kha na nga fuma na ri mafuni. Uye a na fumeya vathu na ri ndzadzini kha nga Pfhumu nya Mufumo wa Nungungulu. Ginani gi mu girago a ninganedwa gu fuma? Wona esi Jesu a si giridego tepo a nga ba ari mafuni.

•   Jesu a di gu khathala khu vathu. Jesu phaside vama ni vanyamayi, sanana ni vakhongolo; nyamba khedza khu tumbunugo mwendro makhalelo yawe. (Matewu 9:36; Marko 10:16) Tepo mwama moyo nyo dwale khu sokono a nga khuye: “Pfhumu, wa gu dzina nyi agise,” Jesu na gu kutswa khu gu pweya wusiwana a di mu vbanyisa. — Marko 1:40-42.

• Jesu a hi hevbudzide edzi hi nga tsakisago khidzo Nungungulu. A di khuye: “Kha mu dzi kodzi gu thumela Nungungulu ni dzithomba.” Ganede gambe khuye hi yede gu phara vambe khedzi hi vbwetago gu khethu va hi phara khidzo. Yeyedzide gu khuye Nungungulu kha tsakeyi basi esi hi si girago, a ngu tsakeya gambe esi hi si pimisago ni edzi hi dzipwago khidzo. Khu kharato gasi gu tsakisa Nungungulu, hi yede gu woneleya myonyo yathu. (Matewu 5:28; 6:24; 7:12) Jesu tshingiside ngudzu gu khuye gasi gu mana gutsaka nya lisine, hi yede gu hevbula khesi Nungungulu a si vbwetago gu khuye hi gira, hi bwe hi si landreya. — Luka 11:28.

• Jesu hevbudzide khu lihaladzo. Malito ya Jesu ni mithumo yaye si diri ni tshivba nigu si di gu khuha myonyo nya vaengiseyi vaye. “Gidzemo gi di liwuga sihevbudzo saye. Kholu a di gu va hevbudza kha nga uye a gu ni fanelo nya guhevbudze.” (Matewu 7:28, 29) A va hevbudzide gu khuye: “Golani valala vanu.” Uye gombelede vale va nga hadzi mu songa khuye: “Baba, va tsetselele, kholu kha va giti igyo va girago.” — Matewu 5:44; Luka 23:34.

Jesu hevbudzidwe khu gu vbeleya gasi gu fuma mafuni khu ndziya yi na phasago vathu vatshavbo. Ganiolu lini a phedego gu fuma?