Khu levbi lina la Nungungulu? Khu wugulu, Nungungulu a di khuye: “Eni kheni [Jehovha, NM.]: Eli khilo lina langu nyi ranwago khilo!” (Isaya 42:8) Lina la Nungungulu li ngu manega 7000 malanga omu nya Bhibhiliya. Ambari ulolo, vavbindrugedzeyi nya dziBhibhiliya nya dzingi va tshikedzide khu nyagigwenye lina laye khu silinana nya nga “Pfhumu.” Nungungulu a gu vbweta gu khuye u khala pari yaye, khu kharato a ngu gu kutsa gu mu rana khu “lina laye.” — Ndzimo 105:1.

Jehovha a ngu ranwa khu maranelo nya mangi. Bhibhiliya yi ngu rana Jehovha khu malina nya nga “Nungungulu,” “Nya Tshivba Yatshavbo,” “Babe,” “Pfhumu,” ni “Pfhumu yi khugegidego ngudzu mafuni ni ndzadzini.” Avba nya milombelo nya yingi yi lovidwego omu nya Bhibhiliya, vathu va di hidzimeya ga Nungungulu khu gu thumisa maranelo nya mangi nya githawo, mwendro khu lina laye kamo a gu Jehovha. — Dhaniyeli 9:4.

 Makhalelo ya Nungungulu. Nungungulu kha wonegi kholu liphuvbo. (Johane 4:24) Bhibhiliya yi ngu fakaza gu khiyo “mwalo muthu a wonidego Nungungulu” (Johane 1:18) Bhibhiliya yi ngu yeyedza edzi Nungungulu a dzipwago khidzo khu kotani nya esi si girwago khu vathu. Avo va nga mu gorosa, mwendro gu “nengedziswa khavo.” — Mavingu 11:20; Ndzimo 78:40, 41.

Makhalelo nyo samadzise ya Nungungulu. Nungungulu mwalo gihatheya; uye a ngu tsakeya vathu nya mafumbo ni mayigo yatshavbo. (Mithumo 10:34, 35) Uye gambe na ni “wuhindzi ni pwela wusiwana; A hwelago gu goroga, A tadego khu wuwadi ni gutumbega.” (Ekisodha 34:6, 7) Ganiolu, avba nya makhalelo yatshavbo ya Nungungulu, gu ni aya nya mana ma samadzisago ngudzu.

Tshivba. Kha nga olu a gu “Nungungulu nya Tshivba Yatshavbo,” uye na ni tshivba nyo tadzise situmbiso saye satshavbo. — Genesi 17:1.

Guti. Guti ga Nungungulu gukhongolo ngudzu guvbindra ga vathu vatshavbo. Khiso si girago Bhibhiliya yi ganeya gu khiyo khuye “wamoyo nya guti.” — Varoma 16:27.

Gululama. Tepo yatshavbo Nungungulu a gu gira esi si lulamidego. Mithumu yaye yi “lulamide” tepo yatshavbo nigu “avbo gwaye gu mwalo gukanganyisa.” — Dhewuteronome 32:4.

Lihaladzo. Bhibhiliya yari khiyo “Nungungulu lihaladzo.” (1 Johane 4:8) Esi sa gu thula gu khiso Nungungulu khandri a gu yeyedza basi lihaladzo; uye o wa lihaladzo khu gu kongoma. Satshavbo a girago sa gu dzi seketeya avba nya lihaladzo, ni gu isoso si ngu hi phasa khu dzindziya nyo hambanehambane.

Wupari wa Nungungulu ni vathu. Nungungulu Papayi wathu nya lihaladzo wa ndzadzini. (Matewu 6:9) Ha gu khodwa gwaye, hi nga khala dzipari dzaye. (Ndzimo 25:14) Khu kharato, Nungungulu a ngu gu kutsa gu hidzimeya gwaye khu nombelo ni gu vega ‘avbo gwaye sigaradzo sago satshavbo, kholu uye a ngu gu khathalela” — 1 Pedro 5:7; Jakobe 4:8.

Jesu khandri Nungungulu. Jesu khuye yenga a giridwego khu Nungungulu khu wugulu. Khiso si girago a ranwa pwani Gyanana gya Nungungulu. (Johane 1:14) Hwane nya gu wumbe Jesu, Jehovha a di thumisa matewula yaye nga meseri nya ‘thumo’ gasi gu gira silo ni vathu vatshavbo. — Mavingu 8:30, 31; Vakolosi 1:15, 16.

 Jesu gima kha dzi rana gu khuye Nungungulu. Vbavbandze nya isoso, a di tshamuseya khuye: “Nya guta khiyo gwaye [Nungungulu], ni gu gambe khuye a nyi rumedego.” (Johane 7:29) Litshigu limwedo na gu ganeya ni vapizane vaye, Jesu a di rana Jehovha gu khuye “Babe wangu, a gu Babe wanu nenu” ni “Nungungulu wangu, a gu Nungungulu wanu nenu.” (Johane 20:17) Tepo Jesu a ngafa, Jehovha a di mu wusa gasi a ya vbanya ndzadzini, a bwe a mu ninga wufumu na khade khu nyamudye Gwaye. — Matewu 28:18; Mithumo 2:32, 33.

Jesu Kristo a nga gu phasa gu hidzimeya ga Nungungulu

Jesu dzude mafuni gasi gu ta hi hevbudza maningano ni Papayi waye. Jehovha khu gu kongoma a di khuye manigano ni Jesu: “Oyu khu Mwamana wangu nya gigodwa, mu yingiseni.” (Marko 9:7) Guvbindra ni wevbini muthu, Jesu a ngu muti gwadi Nungungulu. A di khuye: “Mwalo a mutigo khu mani Mwamana vbavbandze ga Babe ekha, gambe mwalo a mutigo khu mani Babe vbavbandze ga Mwanaye ekha, ni wule Mwamana a dzinago gu mu tulela.” — Luka 10:22.

Jesu yeyedzide makhalelo ya Nungungulu khu gu vbeleya. Jesu pimedzede gwadi makhalelo ya Papayi waye avba nya gu huye khuye: “Uye a nyi wonago, a ngu wona Babe.” (Johane 14:9) Khu gu a yeyedza khu gu vbeleya lihaladzo la Papayi waye khu malito ni sigiro, Jesu a di gu gira gu vathu va kutsega gu hidzimeya ga Nungungulu. A di khuye: “Eni kheni ndzila, ni lisine, ni guvbanya. Mwalo a vbohago ga Babe nyamba yiswa kheni.” (Johane 14:6) A di gambe khuye: “Vakhozeli nya lisine va na khozelago Babe khu liphuvbo ni lisine, khavo vakhozeli va vbwetwago khu Babe.” (Johane 4:23) Ngapwa sawena! Jehovha a gu vbwetedzeya vathu nya nga uwe, va vbwetago guti lisine maningano naye.