Khu myaga ni myaga, mwalo muthu a nga ba a si kodza gu hlamula giwudziso gegi. Khu kharato, vathu nya vangi va di gufa khu mwadwali ni mitungo. Khu gu hegisa, vasiyentista va di mana hlamulo nya wadi. Va di tugula gu khavo madwali nya mangi ma di gu vangwa khu dzibactéria ni dzivírus. Khu kotani basi nya gu tugule lisine leli, si kodzegide gu dzi vhikeya ni gu thuma madwali nya mangimangi.

Ganiolu, gu ngari ni simbe siwudziso nya lisima. Wa gu pimisa gu khuwe gu mana mihlamulo nya siwudziso sesi si di hadzi gu khuha?

• Khu mani Nungungulu?

• Khu mani Jesu Kristo?

• Ginani Mufumo wa Nungungulu?

• Ginani gi na giregago mindru wa tshigu?

Dzimiliyoni nya vathu va manide mihlamulo nya siwudziso sesi, nigu womi wawe wu tshukwadziside ngudzu. Anuwe u nga phaswa khu mihlamulo yakone.

Adzina u nga dzi wudzisa gu khuwe: ‘Ina si ngu kodzega gu mana hlamulo nya gilo ni gilo?’ Khu lisine, muhuno si ngu garadza ngudzu gu mana mihlamulo nya gilo ni gilo. Khu ginani?

 Vathu nya vangi kha va ngo tumba mufumo, dzinogosi, mwendro dzinotisiya. Si ngu va garadzeya guti gu khavo muthu nyo khaguri a gu ganeya silo si nga girega, mwendro mawonelo basi, a gu siha mahungo nyo khaguri mwendro a gu lipha kamo. Khu kotani nya olu gu tadego mahungu nya mangi nya malipha ni gu mba muti oyu nya gu mu tumbe, vathu nya vangi va ni mawonelo nyo hambanehambane maningano ni lisine, mwendro gu mba tiyisega kamo gu khavo lomo lisine.

Ambari ulolo, si ngu kodzega gu mana mihlamulo nya siwudziso nya lisima guvbanyani. Khu magirelo muni? Khu gu gira sasimweso u girago tshigu ni tshigu wa gu vbweta gu mana hlamulo nya giwudziso nyo khaguri.

Gani khu magirelo muni, uwe tshigu ni tshigu u ngu vbwetedzeya lisine. Wona giyeyedzo gya Jessica. A di khuye: “Gyanana gyangu gi ngu vengwa khu dzinume. Dzinumyana dzidugwana basi dzi nga mu gireya gigaradzo nya gikhongolo.” Khu kotani nya isoso, na nga si rengi gilogyo nyo hodze, Jessica o pheya khu gu tiyisega gu khuye guhodza gogo kha gu na nga dwadzisa gyanana gyaye gani. Wari khuye: “Gilo nyo pheye nyi girago, gu leri gwadi esi si thedwego omu nya guhodza gogo. Nya gu gira wugevisisi nya wukhongolo, nyo bwe kamo nyi wudzisa ava va giridego guhodza gogo gu kheni gu mwalo mhango gani. Nyo bwe nyi wudzisa ga vambe vathu nyo tumbege gu kheni mune guhodza gule a ngu gu dongiseya khu ndziya nya yadi gani.”

Adzina siwudziso u vbwetedzeyago mihlamulo yakone tshigu ni tshigu si mwalo lisima nya likhongolo nga sa Jessica. Ganiolu u nga thumisa wumeseri nyo fane gasi gu mana mihlamulo nya siwudziso satshavbo. U yede:

• Guti satshavbo si pategago.

• Gu gevisisa nyadzadi.

• Gu tiyisega gu khuwe omu u gevisisago mahungu yoyo gu ngu tumbega gani.

Wumeseri wowu wu na gu phasa gu mana mihlamulo nyo tumbege nya siwudziso nya lisima guvbanyani. Kharini?

Tepo Jessica a nga ba a vbwetedzeya lisine omu nya Bhibhiliya, a di thumisa wumeseri wa wumowo a wu thumisago a gu ba a gevisisa khu madwali ya gyanana gyaye. Wari khuye: “Gu leri ni gu gevisisa gwadi si nyi phaside gu mana lisine omu nya Bhibhiliya.” Kha nga Jessica, vathu nya vangi va tugude esi Bhibhiliya yi ganeyago khu siwudziso sesi:

• Khu ginani hi vangidwego?

• Ginani gi giregago ha gufa?

• Khu ginani hi tshanisekago?

• Ginani Nungungulu a girago gasi gu vbedza gutshaniseka?

• Hi nga gu mana kharini gutsaka ndrangani?

U nga mana mihlamulo nyo tumbege nya siwudziso sesi ni simbe khu gu u leri Bhibhiliya, ni gu gira wugevisise omu nya internet, omu nya www.pr418.com.