INA SI NGU KODZEGA GU DZI HATHEYA WUMINDRU U WU VBWETAGO? Vathu nyo khaguri vo khodwa gu khavo Nungungulu ghemide khu gale edzi womi wawe wu na khalago khidzo; khu kharato gu mwalo gu hatha. Vo tandrega gu tadzisa makungo nyo khaguri, vari khavo yi mwalo ndziya nya gu va si kodza kholu “Nungungulu si lugide gale gu khuye si na girege kharato!”

Vambe va ngu vbeya tshivba khu gu mbati gu khavo va na vbanya kharini mafuni momu nyo tale khu sigaradzo ni wuvivbi. Si nga gira na va zamide gu tshukwadzisa womi wawe, ganiolu dzinyimbi, wughevenga, dzimhango nya tumbunugo ni madwali, si ngu songa makungo yawe. So va gira va dzi wudzisa khavo: ‘Gasi nyo dzi tshaniseya ginani?’

Lisine gu siemo nyo khaguri nya guvbanye si nga kuha makungo yago. (Muhevbudzi 9:11) Ganiolu, wumindru wago, khuwe wabune u yedego gu dzi hatheya. Bhibhiliya yo yeyedza gu khiyo wumindru wago wu pharidwe khesi u si hathago. Nga wona esi yi ganeyago.

Mosi, muthangeyi nya litigo la Israyeli wa gale, embede vathu gu khuye ava va nga ba vari vbafuvbi ni gu beya Tigoni nya Gitumbiso, khuye: ‘Nyi vegide mbeli gwago guvbanya ni gufa, makategwa ni libango. Hatha guvbanya gasi u kodza gu mana guvbanya, uwe gumogo ni livelego lago. U na gola Jehovha Nungungulu wago, u mu yingisa ni gu namarela avbo gwaye.’ — Dhewuteronome 30:15, 19, 20.

‘Nyi vegide mbeli gwago guvbanya ni gufa, makategwa ni libango. Hatha guvbanya.— Dhewuteronome 30:19

Thuloyo, Jehovha tshudziside Vaisrayeli wugumbini Egipto a bwe a va ninga gutumba nya gu ya vbanye na va tsakide Tigoni nya Gitumbiso. Ganiolu, na sa sa girega halahala. Gasi va mana makategwa yoyo, va di yede gu “hatha guvbanya”. Khu ndziya muni? Khu gu ‘gola Jehovha Nungungulu, ni gu yingisa ni gu namarela avbo gwaye.’

Muhuno anuwe u yede gu hatha. Esi u na hathago, khiso si na yeyedzago edzi wumindru wago wu na khalago khidzo. Wo hatha gu haladza Nungungulu, ni gu engisa lito laye u bwe u namareya gwaye, wo hatha womi — womi ny agupindruge paradhesini mafuni. Ganiolu, so thula ginani gu haladza Nungungulu, ni gu engisa lito laye, ni gu namareya gwaye?

Lihaladzo likhalelo nyo pheye la Nungungulu. Mupostoli Johane lovide gu khuye: “Nungungulu lihaladzo.” (1 Johane 4:8) Khu gighelo gyogyo, tepo Jesu a nga wudziswa gu pwani khu wevbini nayo nya wukhongolo ga yatshavbo, a di khuye: ‘Haladza Jehovha Nungungulu wago khu monyo wago watshavbo ni hefemulo wago watshavbo ni mapimo yago yatshavbo.’ (Matewu 22:37) Gupwanana nya lisine ni Jehovha Nungungulu go seketedwa khu lihaladzo, nasiri khu gu engisa ni gu mu thava. Ganiolu, khu ginani hi yedego hatha gu haladza Nungungulu?

Edzi Jehovha a haladzago khidzo vathu si ngu fana ni edzi vavelegi va haladzago khidzo sanana sawe. Ambari olu va nga ne vbeleya, vavelegi va gu na ni lihaladzo va ngu hevbudza sanana sawe, va si tiyisa, va si seketeya, va bwe va si laya kholu vo vbweta gu khavo si tsaka si bwe si dugeleya guvbanyani. Ginani egi vavelegi va gi vireyago ga sanana sawe? Vo vireya gu khavo si va haladza si bwe si vbanya  khesi va si hevbudzidego gasi si dugeleya guvbanyani. Khu ndziya nyo fane, Jeovha, Papayi wathu nyo vbeleye, o vireya gu khuye hi yeyedza gubonga khu satshavbo esi a hi gireyago.

Gasi hi engisa lito la Nungungulu gu vbwetega hiti esi a hi embeyago. Kha nga olu hi gu mbapwa lito laye khu gukongoma, ha gupwa Nungungulu tepo hi lerigo ni gu vbanya khesi si gomogo omu nya Lito laye, a gu Bhibhiliya. — 1 Johane 5:3.

Gasi gu yeyedza lisima nya gu engise lito la Nungungulu, Jesu a di khuye: ‘Muthu kha yeli gu vbanya khu guhodza basi, ganiolu khu malito yatshavbo ma tago khiyo ga Jehovha.’ (Matewu 4:4) Gu hevbula Lito Nungungulu si na ni lisima ngudzu guvbindra guhodza. Khu ginani? Solomoni, Pfhumu nyo gengeye, tshamusede gu khuye: “guti gu ngu vhikela muthu, kha nga dzitsapawu nidzo dzi ngu vhikela, aholu, guti gu ngu phasa ngudzu kholu gu ngu ninga guvbanya vale va gu nago.” (Muhevbudzi 7:12) Guti ni wugengeyi si tago khiyo ga Nungungulu si nga hi vhikeya si bwe si hi phasa gu gira silo nya sadi si na hi yisago womini nya gupindruge teponi yi tago.

Ga ndrima yi vbindridego hi ganede khu giyeyedzo gya Jesu, nya gu khiyo: “Mwanya wu yisago guvbanyani wudugwana, nigu ndziya yakona niyo yi hongide, vadugwana va yi manago.” (Matewu 7:13, 14) Gasi hi phasega gwadi hi bwe hi vboha omu hi hongolago umo, a gu womini nya gupindruge, gu vbwetega hi gimbiya khu ndziya yoyo na hi thangedwa khu muthu nyo gengeye. Khu kharato, hi na gighelo nyo pwale nya gu hi garadzegeya gu vbweta gu manega ni wupari nya wukhongolo ni Nungungulu. (Ndzimo 16:8) Ganiolu, hi nga si gira kharini isoso?

Tshigu ni tshigu, gu na ni silo nya singi hi yedego gu gira ni simbe nya singi hi dogoreyago gu gira. Silo soso si nga hi gama mwendro gu hi tsolopeteya nyo bwe hi si yi mani tepo nyo dundrugeye khesi Nungungulu a si vbwetago gwathu. Khu gighelo gyogyo, Bhibhiliya yi ngu hi gengedza khiyo: “Dzi woneleni guvbanyani gwanu. Mu nga vbanyi kha nga sipumbu, aholu kha nga vathu nya guti. Sayisani gwadi gikhati mu gu nagyo. Kholu matshigo ya muhuno ma vivbide.” (Vaefeso 5:15, 16) Hi nga simama gu namareya ga Nungungulu khu gu wona wupari wathu naye kha nga gilo nya lisima ngudzu womini gwathu. — Matewu 6:33.

Khu nge si kodzi gu vbindrugedza esi u giridego gale, ganiolu gyomo u nga girago gasi uwe ni ava u va haladzago mu manega ni wumindru nya wadi. Bhibhiliya yo yeyedza gu khiyo Papayi wathu wa ndzadzini, Jehovha Nungungulu, a ngu hi haladza ngudzu nigu a ngu hi embeya esi a vbwetago gu gira. Nga wona malito ya muprofeti Mikeya:

“Uwe muthu, Uye gu nonedzide iso si gu sadi, iso [Jehovha] a si vbwetago gukhuye u si gira khu esi: Gira iso si lulamidego, gola wuwadi, u gimbila khu gu dzi nogisa mbeli ga Nungungulu wago.” — Mikeya 6:8.

U na dzumeya gu gimbiya ni Jehovha u mana makategwa nya gupindruge aya a tumbisago ava va girago isoso? Hatha khu wabune!