Gupheyani hi ganede khedzi Creso a nga kanganyisa khidzo muprista wa Delfos, si nga gira yi padwa pfhumu ya Persiya. Ganiolu, Bhibhiliya yi na ni giprofeto nyo hlamadzise ngudzu gi kuhago pfhumu ya Persiya gi nga tadzisega guya khedzi gi nga profetwa khidzo.

Na gu tshade 200 myaga — pfhumu ya Persiya na yi si velegwi — Isaya, muprofeti nya Muhebheru, a di khumbuga Kiro khu lina a bwe a tshamuseya edzi a nga hadzi pala khidzo lidhoropa nya likhongolo la Bhabhiloni.

Isaya 44:24, 27, 28: “[Jehovha, NM] . . . a ngu ganela kharati, khuye: Eni kheni [Jehovha, NM], nyi girago silo satshavbo, nyi giride ndzadzini, nyiri nyonga nyi ladza mafu, nyiri nyonga. Nyi na embela guetani nya yiphwa, kheni: “Uvbwa, eni nyi na bangisa mitsongo yago.” Nyi na embela Kiro, kheni: “Uye khuye muhavisi wangu, a na landrisa satshavbo si nyi tsakisago; ga Jerusalema nyi na, kheni: U na vbahedzwa; ni ga Nyumba ya Nungungulu, kheni: Siseketelo sago si na vbahedzwa nyaluphye.””

Khu guya khu Heródoto, mulovi nya matimu nya Mugreki, masotshwa ya Kiro ma jikiside mati nya Tsongo wa Ewufrate owu wu nga ba wu khulungeya dhoropani ga Bhabhiloni. Wugengeyi wa Kiro wu giride gu masotshwa yaye ma si kodza gu tshatuga tsongo khu mawundru ma beya dhoropani. Hwane nyo khozise lidhoropa, Kiro a di tshudzisa Vajudha va nga ba vari dzigumbi Bhabhiloni a va diga va bweleya Jerusalema gasi va ya vbahedza ndranga yeyi gu nga ba gu vbindra 70 myaga na guri marumbi.

Isaya 45:1: “[Jehovha, NM] a ngu ganela ga Kiro, a mu todzidego khu mafura, uye a mu pharide khu libogo laye la nyamudye, a mu ninga tshivba gasi a pala mayigo mbeli gwaye, nyi na thela hwanga vafumeli gasi va tule malimba nya lidhoropa, nyamba segwa gambe.”

Vapersiya va bede dhoropani khu mwanya wu nga ba wuri ni malimba mavili, ma nga ba ma sa segwa. Nari khatshi Vabhabhiloni va di si tide esi Kiro a nga ba a vbweta gu gira, na va segide malimba yatshavbo ma nga ba ma khedzide tsongoni. Ganiolu, khu guya khedzi si nga ba si khade khidzo, lidhoropa kha la nga ba li vhikedwe.

Giprofeto gyogyo nyo hlamadzise gimwegyo nya siprofeto nya singi nya Bhibhiliya esi si tadzisegidego khu guvbeleya. a Guhambana ni esi si ganedwago khu vathu khu wumindru, esi gutala nya dzitepo si yisago wuzundzo ga vanungungulu vawe nya malipha, siprofeto nya Bhibhiliya sa guta khiyo ga Wule a gu khuye: “Eni nya gu tivisa esi si giregidego gukhugela guhegulani, gukhugela dzinango dzi vbindridego nidzo dzi nga gutago.” — Isaya 46:10.

 Nungungulu nya lisine, oyu lina laye a gu Jehovha, khuye enga a gu ni tshivba nyo ganeye malito yaya. Lina leli lo thula gu khilo: “A gu gira gu si girega.” Isoso so yeyedza wugengeyi owu a gu nawo nya guti wumindru a bwe a wu tadzisa khu guya khu gugola gwaye. Guti isoso si ngu ninga gutumba nya gu khethu a na tadzisa esi a tumbisidego.

U ngu dzina guti esi siprofeto nya Bhibhiliya si ganeyago khu matshigu yathu? Omu nya 2000 myaga hwane, Bhibhiliya yi profetide gu khiyo “matshigu nya guhegise, gi na manega gikhati nya sigaradzo.” Matshigu nya guhegise nya ginani? Khandri guhegisa nya mafu mwendro vathu, ganiolu guhegisa nya mayunga ni gutshaniseka nya vathu khu dzimiliyoni nya myaga. Hongoleni hi wonani siprofeto nyo khaguri si yeyedzago gu khiso hi womo ‘matshiguni nya guhegise.’

2 Thimoti 3:1-5: “Matshigu nya guhegise, gi na manega gikhati nya sigaradzo. Kholu vathu va na dzi khusedza va khala va magundrele, va nya gugola dzitsapawu, va nya matshandza, va nya gu dzi gugumugisa, va nya gu wugela Nungungulu, gumba yingisa vavelegi, gumba bonga, va nyamba khodwa. Vana bani vari vathu nyambana lihaladzo ni wuhengeli. Va na singedzana khu gyawe. Va na bani vari vathu nyamba khodwa ni gumba dzi phara, va nya guhambana ni wuthu, va nyamba vbweta esi nya sadi, Va nya malipha, va nya mapimo nya guvivbe, va nya gugola gu dzi tsakisa khu silo nya mafu guvbindra Nungungulu. Va na sayisa giemo nya wukhodwa, aholu va ganedza tshivba yakone.”

U ngu khodwa gu khuwe vathu va guya va engedzeya gu manega ni mavbanyelo yaya muhuno? U ngu si wona gu khuwe hi randredwe khu vathu nya gu dzi gole, ni va nyo gola dzitsapawu, ni va nya matshandza? U ngu si wona gambe gu khuwe vathu vo engedzeya gu garadza va bwe va si vbweti gu dzumeleyana ni vambe? Vbavbandze nyo kanakane, u ngu si wona gu khuwe gumba engisa vavelgi sa guya si engedzeya nigu vathu nya vangi vo gola gu dzi tsakisa guvbindra gu tsakisa Nungungulu. Makhalelo yaya ma guya ma engedzeya tshigu ni tshigu gu gyago.

Matewu 24:6, 7: “Mu napwa na gu ganedwa khu dzinyimbi, ni ligwaha nya dzinyimbi. . . . Mayigo ma na wugelana; ni mifumo yakone yi na wugelana niyo; dzi na manega dzindzala, mitungu ni sirevareva malangani nya gutale.”

Go ganedwa pwani vathu va fudego khu kotani nya dzinyimbi gukhugeya khu 1914 va ngu vbindra 100 dzimiliyoni. Tengo wowo wu ngu vbindra vathu nya mayigo nyo khaguri. Nga dundugeya guliya, guvbisa nya myonyo, ni gutshaniseka gu vangidwego khu dzinyimbi dzodzo. Ina mayigo ma hevbude gilogyo ma bwe ma dzi garadzeya gu fuvisa dzinyimbi?

Matewu 24:7: “Gu na manega dzindzala.”

Programa Mundial de Alimentos yi di khiyo: Mafuni gwatshvbo gu ngu fumwa ngudzu guhodza nyo eneye gu hodzisa vathu vatshavbo. Ganiolu, 815 dzimiliyoni nya vathu va ngo simama gu femba mukhu va lala tshigu ni tshigu. Gu diga isoso, vbakari nya vathu vararu, muthu moyo a ngu dwala khu kotani nya gu tshaniseke khu ndzala.” Gu ngu ganedwa pwani mwaga ni mwaga, sanana nya tanga nya 3 dzimiliyoni si ngufa khu ndzala.

Luka 21:11: “Si na manega sirevareva nya sikhongolo.”

Mwaga ni mwaga, gu ngu dugeleya sirevareva nya singi mafuni. Gipimo nya 50 000 nya iso nya sikhongolo si pwidwego khu vathu. Tanga nya 100 nya iso si ngu ghoheteya dzinyumba. Mwaga ni mwaga gu ngu dugeleya sirevareva nya sikhongolo ngudzu. Khu guya khu wugevisisi nyo khaguri, gukhugeya khu 1975 kala 2000, sirevareva nya mafu si songide 471 000 vathu.

Matewu 24:14: “Mahungu yaya nya yadi nya Mufumo ma na tshumayedwa mafuni gwatshavbo, gasi ma khala wufakazi ga mayigo yatshavbo, khavbo gu na tago guhegisa.”

Dzifakazi dza Jehovha, dzi vbindrago 8 dzimiliyoni, dzi ngu tshumayela mahungu nya yadi nya Mufumo wa Nungungulu khu gipimo nya 240 mayigo. Idzo dzo tshumayela mahungu nya yadi madhoropani nya makhongolo, ni sidhoropanani, hwindzo nya madhoropa ni sigomoni. Giprofeto gegi gyari khigyo thumo wowu wo kala wu vboha avbo Nungungulu a gu vbwetago, “khavbo gu na tago guhegisa.” Si na thula ginani isoso ga vathu? Si na thula guvbeya nya gufume nya vathu ni gupheya nya gufume nya Mufumo wa Nungungulu. Situmbiso muni si tadziswago khu Mufumo wa Nungungulu? Gasi u siti, leri esi si landreyago.