NGAPWA GUTSAKISA GWASO! Muvangi wathu a ngu tumbisa gu hi ninga womi nya gupindruge omu mafuni. Ambari ulolo, gutala nya vathu si ngu va garadzeya gu si khodwa isoso. Vari khavo: ‘Guvbanya ni gufa so gira gipandre nya womi. Ni wevbini muthu, lo mu vboheya litshigu a nafa.’ Vambe vari khavo si ngu kodzega guvbanya kala gupindruga, ganiolu nasiri avba mafuni. Vari khavo gu vbanya kala gupindruga so kodzega basi muthu a gufa a vbedza a hongola ndzadzini. Wo si wona kharini?

Nu si hlamuli giwudziso gegi, pheya khu gu gevisisa mihlamulo nya Bhibhiliya nya siwudziso sesi sa siraru: Ndziya eyi muthu a nga girwa khiyo yi ngu yeyedza gu khiyo a na vbanya myaga mingani? Ma diri yavbi makungo nyo pheye ya Nungungulu khu vathu ni mafu? Gufa gu phede kharini?

Ga satshavbo silo nyo vbanye esi Nungungulu a si vangidego omu mafuni, muthu khuye a vangidwego khu ndziya nyo hathege ngudzu. Khu ginani hi ganeyago isoso? Bhibhiliya yari khigyo muthu khuye enga a giridwego khu “mufananiso” wa Nungungulu. (Genesi 1:26, 27) So thula ginani isoso? So thula gu khiso muthu vangidwe nari ni makhalelo nyo fane ni aya ya Nungungulu, nya nga lihaladzo ni guti silo nya gululame.

Gimbe gambe khu gu muthu a ngu si kodza gu pimisa, gu dundrugeya, guti silo nya sadi ni esi nya guvivbe, nigu na ni gudogoreya nya gu vbwete gu manega ni gupwanana ni Nungungulu. Isoso khiso si hi girago hi wona gumbura ni gudandra nya satshavbo esi Nungungulu a si vangidego, hi bwe hi tsakeya dzimuzika ni simbe. Nya lisima ga satshavbo khu gu muthu a ngu si kodza gu khozeya Muvangi. Makhalelo yoyo mo gira muthu a hambana ngudzu ni satshavbo si vbanyago omu mafuni.

Khu kharato, dundrugeya khesi: Nari khatshi Nungungulu a di gu vbweta gu khuye vathu va vbanya gitepwana basi, ina a di hadzi va ninga makhalelo yoyo nyo hlamadzise ni makodzelo nya gu ma tshukwadzisa? Lisine khu gu Nungungulu ningide vathu makhalelo nya guhathege gasi va vbanya kala gupindruga omu mafuni.

Ganiolu, vambe vari khavo Nungungulu kha nga ba a vbweta gu khuye hi vbanya kala gupindruga omu mafuni. Vari khavo mafu ma giredwe gu hi vbanya umo khu gitepwana basi gasi gu wonwa ava va ninganedwago khu gu ya vbanya ndzadzini ni Nungungulu kala gupindruga. Nari khatshi isoso lisine, ina Nungungulu nari mwalo nandru khu Kotani nya satshavbo silo nyo vivbe si tadzidego litigo muhuno?  Isoso si di hadzi hambana ni edzi uye a khadego khidzo. Maningano ni Nungungulu,Bhibhiliya yari khiyo: “Thumo waye wu vbelede, kholu dzindzila dzaye dzatshavbo dzi lulamide! Nungungulu tumbegide, avbo gwaye gu mwalo gukanganyisa; Uye khwa lisine ni gululama.” — Dhewuteronome 32:4.

Bhibhiliya yo dzegeya gu vega guagani makungo ya Nungungulu khu mafu khu gu ganeya malito yaya: “Ndzadzi ya gu lumba [Jehovha, NM]; aholu litigo a li ningede ga vathu.” (Ndzimo 115:16) Thuloyo, Nungungulu vangide mafu gasi ma khala wulanga nyo mbure nya gu va khala vathu. Thede satshavbo hi si vbwetago gasi hi dzi buza khu womi kala gupindruga.

“Ndzadzi ya gu lumba PFHUMU Nungungulu; aholu litigo a li ningede ga vathu.”—Ndzimo 115:16

Bhibhiliya gambe yo dzegeya gu veta tshinani yo ba yi ganeya khu makungo ya Nungungulu khu vathu. Embede Adhamu ni Evha gu khuye va velega va ‘tadza mafu, va ma fumeya. . . . ni . . .  satshavbo si vbanyago mafuni.’ (Genesi 1:28) Nga wona lithomo hi gu nalo nyo engedzeye mivbingano nya Paradhesi mafuni! Isoso so yeyedza gu khiso Adhamu ni Evha, ni sanana sawe, va di hadzi vbanya kala gupindruga omu mafuni, nasiri ndzadzini.

Gasi khu ginani hi fago? Bhibhiliya yo yeyedza gu khiyo gimwegyo nya sanana nya liphuvbo sa Nungungulu, egi khu gu gimbiya nya tepo gi nga tidwa kha nga Sathane, a di zama gu ghoheteya malulamiselo ya Nungungulu Edheni. Si girigide kharini isoso?

Sathane a di kutsedzeya vavelegi vathu nyo pheye, Adhamu ni Evha, gu khuye va dzi pata naye va wugeya Nungungulu. Tepo Sathane a nga khuye Nungungulu a ngu vama silo nya sadi — a gu fanelo nya gu hunge khu vabune esi nya sadi ni esi nya guvivbe — va di hatha gu dzi pata ni Sathane va pfhurareya Nungungulu. Khu yevbini mihandro va yi manidego khisoso? Khu gu gimbiya nya tepo va difa, kha nga a nga ba a ganede Nungungulu. Va di luza lithomo nya gu vbanye kala gupindruga Paradhesini mafuni. — Genesi 2:17; 3:1-6; 5:5.

Gumba engisa ga Adhamu ni Evha gu kuhide vathu vatshavbo, gu pata ni ethu muhuno. Lito la Nungungulu lari khilo: “Gighoho gi bede mafuni khu muthu moyo basi [Adhamu], gambe gighoho gi yade gufa. Khidzo kharato gufa gu enedzidego vathu vatshavbo kholu vatshavbo va ghohide.” (Varoma 5:12) Muhuno ha gufa kholu vavelegi vathu nyo pheye va hi thapedziside gighoho ni gufa, khandri khatshi si di vegiswa kharato khu Nungungulu.

Gumba engisa ga Adhamu ni Evha thembweni ga Edheni kha ga vbindrugedza makungo ya Nungungulu khu vathu ni mafu. Lihaladzo nyo vbeleye la Nungungulu ni gululama gwaye si mu kutside gu tula ndziya nya gu hi tshudzise ga gighoho ni gufa. Mupostoli Pawulo a gu tshamuseya gu khuye: “Handro nya gighoho khu gufa, aholu, giningwa hi gi manago ga Nungungulu khu guvbanya nya gupindruge, gumogo ni Jesu Kristo, Pfhumu yathu.” (Varoma 6:23) Khu gu hi haladza, Nungungulu hi ningide “Mwanaye wa moyo, gasi ni wevbi a khodwago gwaye a si mbembi, aholu a mane guvbanya nya gupindruge.” (Johane 3:16) Jesu tshudziside vathu vatshavbo va nga ba va dzimede khu kotani ya Adhamu khu gu dzi ningeya khu gudzina gwaye kha nga dzegiso. a

Nugunugu, gitumbiso gya Nungungulu nya gu rese paradhesi omu mafuni gi na tadzisega. U na dzi buza khu wumindru wowo nyo tsakise wo engisa gigengedzo gegi gya Jesu: “Beyani khu mwanya nya gu honge, kholu mwanya wu yisago gufuviswani wu gude, ni ndziya yakone yikhongolo, nigu vangi va beyago khiyo; ganiolu, mwanya wu yisago guvbanyani wudugwana, nigu ndziya yakona niyo yi hongide, vadugwana va yi manago.” (Matewu 7:13, 14) Gu dzi buza khu wumindru nyo tsakise si na kodzega khesi u na hathago. Ginani u na hathago?