YOMARA ni vandriyaye Marcelo ni Hiver va gu vbanya ga lidhoropa li gomogo Guatemala. Yomara a di pheya gu hevbula Bhibhiliya ni Dzifakazi dza Jehovha, nigu nya mba hweya vandriyaye navo va di pheya gu hevbula Bhibhiliya. Ganiolu gu diri ni gigaradzo nyo khaguri. Va vararu va diri sikhumu, nigu kha va nga ba va si khodza gu leri Giibrayili. Khu kharato, muhevbudzi wawe nya Bhibhiliya a di yede gu leri dzindrimana a bwe a leri mavhesi nya Bhibhilya tepo a nga ba a hevbula navo.

Khu kotani nya olu va gu sikhumu si di gu va garadzeya gu hongola mitshanganoni nya libandla ni gu gambe si gu va garadzeya gu gimbiya gipimo nya 40 dzimeneti basi gasi gu vboha Salawuni ya vbafuvbi ni gaya gwawe. Ganiolu, vandriyawe va libandlani va di gu va phasa gasi gu va manega ga mitshangano yatshavbo. Nigu vandriyathu vava nya sikhumu va di pheya gu gira sipandre umo nya mitshangano ya vbakari nya semana, nigu vandriyathu va di gu va phasa gumba divala esi va nga hadzi gu ganeya umo nya sipandre sawe.

Khu Maio nya 2019 mitshangano nya libandla yi di pheya gu girwa ga alidheya yawe. Ga tepo yoyo, patwa moyo wu nga ba wu thuma kha nga vapiyoneru nya tepo yatshavbo wu di gu fulugide gasi gu ya vbanya ga alidheya yawe. Uwo wu diri ni makungu nya gu hevbudzi sikhumu sesi sa siraru gu leri ni gu lova Gibraili, ambari olu va nga ba va si dziti edzi va nga girago khidzo isoso. Avo va di vbwetedzeya bhibhilioteka ni mabhuku nya gibraili gasi gu hevbuleya edzi va nga hevbudzago khidzo vambe gibraili.

Khu migima nya yidugwana, vandriyathu vava nya sikhumu va di pheya gu leri gwadi gibraili nya mba garadzega, nigu isoso si va phaside gu manega ni wupari nyo tiye ni Jehovha. a Olu Yomara, Marcelo ni Hiver va gu thuma kha nga vapiyoneru nya tepo yatshavbo. Nigu Marcelo gambe a gu thuma kha nga muphasedzeyi nya libandla. Dzisemana dzatshavbo avo va di gu khala na va pharegide thumoni ga Jehovha. Gu dzigaradzeya gwawe nya gu thumeye Jehovha si kutside vambe gu gira sasimweso.

Vadriyathu vava nya sikhumu va ngu bonga ngudzu khu lihaladzo va yeyedzidwego libandlani. Yomara wari khuye: “Khu tepo nyo pheye nyi nga manana ni Dzifakazi dza Jehovha, avo va nyi yeyedzide lihaladzo nya lisine nya Wukhisto.” Marcelo a gu engedza gu khuye: “Ethu hi na ni dzipari nya dzadi libandlani gwathu, nigu ethu ho gira gipandre nya ndranga ya Jehovha ya mafuni gwatshavbo va gu na ni lihaladzo.” Yomara ni vandriyaye vo vireya litshigu eli Jehovha a na vbindrugedzago mafu ma khala paradhesi. — Ndzi. 37:10, 11; Isa. 35:5.