1. Ginani Jesu a embedego valandreyi vaye maningano ni matshigu nyo hegise, nigu gi gengedzo muni a va ningidego?

 NA GU keneleya vbadugwana gasi Jesu a songwa, 4 valandreyi vaye va di mu wudzisa khavo: “Giwoniso muni gi na yeyedzago . . . gu hegisa nya litigo?” (Mat. 24:3) Valandreyi vava adzina va di gu vbweta guti gu lini Jerusalema ni tempele si nga hadzi gu tshungunudwa. Umo nya hlamulo waye, Jesu kha ganeya basi esi si nga hadzi gu dugeleya Jerusalema ni tempele, uye gambe a di ganeya khu “gu hegisa nya litigo” kha nga edzi hi si wonago khidzo muhuno. Maningano khu tepo nya gu hegise Jesu a di khuye: “Gasi gikhati ni litshigu, mwalo a dzitigo, ambari dzingilozi dza Ndzadzini, ambari Mwamana, sa gu tidwa khu Babe basi.” Khu kharato uye a di gengedza valandreyi vaye khuye: “khalani na mu dongide.” — Marko 13:32-37.

2. Khu ginani Makristo nya lizana myaga nyo pheye ma nga ba ma yede gu khala na ma dongide?

² Makristo nya Vajudha nya lizana myaga nyo pheye ma di dongide, ganiolu gasi gu vbulugisa womi wawe ma di yede gu simama gu gira isoso. Jesu a di embeya valandreyi vaye khuye va di yede gu vega gupima avba nya gu hegisa nya tepo nya Vajudha, uye a di khuye: “Mwa gu wona Jerusalema na gu randredwe khu dzinyimbi, dzitini nya gukhenu gu vbohide gumbemba gwaye.” Ga tepo yeyi, avo va di yede gu engisa gigengedzo gya Jesu va bwe va “thavele sigomoni.” (Luka 21:20, 21) Vale va nga vega gupima avba nya gigengedzo gegi va vbulugide tepo Roma a nga tshungunula Jerusalema.

3. Ginani hi na bhulago khigyo avba nya ndrima yeyi?

³ Muhuno ha gu vbanya dziteponi nya gu hegise nya litigo leli nya gu vivbe. Khu kharato, hi yede gu simama gu khala na hi dongide. Avba nya ndrima yeyi hi na bhula khedzi hi nga  khalago khidzo vathu nya gu dinganiseye tepo hi yago hi wona sigiro nya litigo leli, edzi hi nga vegago khidzo gupima ga esi hi girago ni edzi hi nga thumisago khidzo tepo yathu.

4. Khu ginani ethu hi vegago gupima avbo nya sigiro nya litigo leli si tadzisago siprofeto nya Bhibhiliya?

⁴ Hi na ni gighelo nya gyadi, gi hi girago hi vbweta gu vega gupima avba nya sigiro nya litigo leli na si tadzisa giprofeto nya Bhibhiliya. Khu giyeyedzo, Jesu ganede khu silo si na hi phasago gu tugula guhegisa nya litigo leli la Sathane. (Mat. 24:3-14) Mupostoli Pedro a hi khutside gu vega gupima avbo nya gu tadzisege nya giprofeto gasi hi simama gu tiyisa gukhodwa gwathu. (2 Ped. 1:19-21) Libhuku nyo hegise nya Bhibhiliya lo pheya khu malito yaya: “Khugo ogu gutuledwa ga Jesu Kristo, ugo a nga ningwago khu Nungungulu, gasi a yeyedze ga sithumi saye iso si guromo vbafuvbi ni gu girega.” (Gutu. 1:1) Khu kharato, ethu hi ngu dzina ngudzu gu vega gupima avba ya esi si giregago muhuno ni guti edzi sigiro soso si tadzisago khidzo giprofeto nya Bhibhiliya. Nigu ethu adzina hi nga dogoreya gu bhuleya vambe khu sigiro soso.

5. Ginani hi yedego gu gi potsa, ganiolu ginani hi yedego gu gira? (Wona dzifotu.)

⁵ Tepo hi bhulago ni vambe khu giprofeto nya Bhibhiliya, ethu hi yede gu potsa gu dhumba esi si na giregago. Khu ginani? Kholu ethu kha hi vbweti gu ganeya ni gevbini gi na hambanisago libandla. Khu giyeyedzo, ethu adzina hi ngapwa vathangeyi nya litigo leli na va ganeya khesi va nga girago gasi gu lulamisa gigaradzo nyo khaguri mwendro gu andrisa gurula ni gu khadzisega. Wulangani nyo dhumbe gu khethu gyo tadzisega giprofeto gya 1 Vatesalonika 5:3, ethu hi yede gu hevbula mahungu nya maphya ma ngari gu duswago. Tepo hi dzi seketeyago avba nya mahungu ma dusidwego khu hengeledzano ya Jehovha hi na phasa libandla gu simama gu pwanana nigu “[hengela] mapimo” ya mamowo. — 1 Kor. 1:10; 4:6.

6. Ginani hi gi hevbulago ga 2 Pedro 3:11-13?

⁶ Leri 2 Pedro 3:11-13. Mupostoli Pedro a ngu hi phasa gu vega gupima avbo nya gighelo gi hi girago hi hevbula siprofeto nya Bhibhiliya. Uye a gu hi kutsa gu “lirela guta nya Litshigu la Nungungulu.” Khu ginani? Kholu kha hi vbweti guti “litshigu lolo ni ora” eli Jehovha a na resago Harimagedhoni ganiolu, khu gu ha gu vbweta gu thumisa tepo hi gu nayo gasi hi “vbanya khu mavbanyelo nya yadi nya wukhodwa, nya gutsakise Nungungulu.” (Mat. 24:36; Luka 12:40) Khu mambe maganelelo, ethu ha gu vbweta gu gira silo khu ndziya nya yadi nigu tiyisega gu khethu esi hi gireyago Jehovha ha gu mu gireya kholu hi mu haladzago. Gasi hi si kodza gu gira esi, ethu hi yede gu vega gupima ga esi hi girago.

7. Ha gu yeyedza kharini gu khethu hi ngu vega gupima ga esi hi girago? (Luka 21:34)

⁷ Jesu a embede valandreyi vaye gasi va si vegi basi gupima abva nya sigiro nya litigo lelli, ganiolu avba nya esi va girago. Gigengedzo gegi gyomo guagane omu nya libhuku la Luka 21:34. (Leri.) Jesu a ganede mailto yaya: “Dzi woneleni.” Oyu a vegago gupima ga esi a girago a gu khala na dongide gasi gu dzi woneya ga dzimhango dzi na vegago wupari waye ni Jehovha mhangoni a bwe a dzi potsa. Khu ndziya yeyi, uye a na simama lihaladzoni la Nungungulu. — Mav. 22:3; Judha 20, 21.

8. Gi gengedzo muni egi mupostoli Pawulo a ningago Makristo?

 ⁸ Mupostoli Pawulo a embede Makristo gu ma dzi woneya gasi ga esi ma girago. Khu giyeyedzo, uye a embede Makristo ya Efeso khuye: “Dzi woneleni guvbanyani gwanu.” (Efes. 5:15, 16) Sathane dzitepo nya dzingi a gu zama gu tshungunula wupari wathu ni Jehovha. Bhibhiliya ya gu hi kutsa gu “tugula egi Pfhumu a golago gukhuye [hi giri],” ha gu gira isoso hi na si kodza gu dzi vhikeya ga milapwi ya Sathane. — Efes. 5:17.

9. Hi nga tugula kharini esi Jehovha a vbwetago gu khuye hi gira?

⁹ Khandri tepo yatshavbo Bhibhilya yi na hi embeyago dzimhango dzi nga vegago mhangoni wupari wathu ni Jehovha. Dzitepo nya dzingi ethu hi yede gu hunga silo si gu mba khubungwa khu gu kongoma omu nya Milowo. Gasi gu hatha gwadi silo khu wugengeyi, ethu hi yede gupwisisa “egi Pfhumu a golago gu khuye hi gira.” Hi nga gira isoso khu gu hevbula Lito la Nungungulu tshigu ni tshigu ni gu dundrugeya khilo. Tepo hi pwisisago esi Jehovha a vbwetago gu khuye hi gira hi bwe hi zama gu manega ni “mahingigedzo ya Kristo,” hi na si kodza gu khala “vathu nya guti,” ambari ya gu ba yi ri mwalo milayo nyo kongome yi ganeyago khu esi hi yedego gu gira. (1 Kor. 2:14-16) Dzimbe dzitepo, si ngu vbevbuga gu tugula esi hi yedego gu si potsa, ganiolu dzimbe dzitepo kha si vbevbugi.

10. Khu dzevbini dzimhango nyo khaguri hi yedego gu dzi potsa?

¹⁰ Dzomo dzimhango nyo khaguri hi yedego gu dzi potsa, nya nga gu hagana khu gu namorari nya mba na gighelo nyo pwale, gu seya ngudzu, limidzu, gu ganeya silo si khunguvanyisago vambe, gu sixitiri dzifilimi dzi yeyedzago maghilivindra, dzipornografia si simbi nya nga esi. (Ndzi. 101:3) Nala wathu Dhiyabhulosi, tepo yatshavbo a gu vbwetedzeya dzindziya nya gu vege wupari wathu ni Jehovha mhangoni. (1 Ped. 5:8) Ha gu mba dzi woneya, Sathane a nga yala mapimoni ni monyoni gwathu dzi nyingi nya lidiwo, gu mba tumbega, wugundreli, gu dzikhusedza ni giviti. (Gal. 5:19-21) Gupheyani, ethu adzina hi nga pimisa gu khethu gu dzipwa khu ndziya yeyi khandri mhango. Ganiolu, ha gu mba gira gilogyo gasi gu potsa makhalelo yaya, ayo ma na dandra vbadugwana–vbadugwana monyoni gwathu gu fana ni madwali ma gu mba khataledwa ni gu isoso si di hadzi gu hi reseya sigaradzo nya singi.—Jak. 1:14, 15.

11. Khu yevbini mhango nya yikongolo hi yedego gu yi posta, nigu khu ginani?

¹¹ Mweyo nya dzimhango hi yedego gu yi potsa dzipari nya mba dzadi. Wona giyeyedzo gegi. Uwe wa gu thuma ni muthu nyo khaguri a gu siri Fakazi ya Jehovha. Nigu wa gu vbweta gu khuwe githumi-kwanu gi wona Dzifakazi dza Jehovha khu ndziya nya yadi, khu kharato u gi yeyedza wuwadi nigu gi phasa. Adzina dzimbe dzitepo u nga hodza nagyo gilogyo khu intervalo. Khu gu gimbiya nya tepo u pheya gu hodza nagyo gilo nyo khaguri tepo yatshavbo. Khu tepo nyo khaguri, muthu yoyo a pheya gu ganeya silo nya mba handzega, nigu gupheyani u si dzini gu mu hlamula; khu gu gimbiya nya tepo u oloveya gupwa maganelelo yoyo si bwe si si gu khunguvanyisi gambe. Ganiolu, litshigu limwedo githumi kwathu gi gu rana gasi mu ya seya gilogyo hwane nya thumo, khavbovbo u dzumeya. Khu gu hegisa, u pheya gu gira esi si girwago khu githumi-kwanu. Ga giemo gegi, ina u di hadzi gu dzega tepo nyo laphe gasi u pheya gu gira silo si girwago khu githumi-kwanu? Khu lisine, ethu hi ngu yeyedza wuwadi nigu hi ngu ninga githavo vathu vatshavbo, ganiolu ethu hi yede gu  dundruga gu khethu hi nga gira silo sasimweso si girwago khu vale hi vbedzago tepo nya yingi navo. (1 Kor. 15:33) Ha gu vega gupima avba nya esi hi girago, nga edzi Jesu a hi gengedzidego khidzo, hi na potsa gu gira wupari ni vale va gu mba vbanya khu milayo ya Jehovha. (2 Kor. 6:15) Ethu hi na si kodza gu tugula mhango hi bwe hi yi potsa.

12. Ginani egi vapizane va Jesu va nga ba va yede gu gira na va gu vireya gu hegisa nya litigo?

¹² Jesu a di gu vbweta gu khuye vapizane waye va khala na va pharegide, na va gu vireya gu hegisa nya litigo. Jesu a va ningide thumo; a di va ruma gu tshumayela mangu nya yadi “Jerusalema ni Judheya gwatshavbo, ni Samariya, kala mahegiso nya mafu.” (Mith. 1:6-8) Khu lisine, owu i thumo nya wukhongolo valandreyi va Jesu va wu hakhidego! Khu gu va gira satshavbo va si kodzago gasi gu tshumayela vambe, avo va di gu thumisa gwadi tepo yawe.

13. Khu ginani hi yedego gu thumisa gwadi tepo yathu? (Vakolosi 4:5)

¹³ Leri Vakolosi 4:5. Gasi gu vega gupima ga esi hi girago ethu hi yede gu pimisa khedzi hi nga thumisago khidzo tepo yathu. “Sigiro hi ngu ba si vbireya” si nga khuha ni wevbini muthu. (Muh. 9:11, NM) Kholu gya mindru  kha gi tidwe. Womi wathu nya mba hweya wu na mwalalega.

14-15. Hi nga thumisa kharini gwadi tepo yathu? (Vahebheru 6:11, 12) (Wona fotu.)

¹⁴ Ethu hi nga thumisa gwadi tepo yathu khu gu gira gugola ga Jehovha hi bwe hi tiyisa wupari wathu naye. (Joh. 14:21) Ha gu vbweta gu “simama [gu] khala na [hi] tiyide [hi] thuma gikhati gyatshavbo khu gunengela esi Nungungulu a si vbwetago.” (1 Kor. 15:58) Khu kharato, tepo mahegiso ma na vbohago, gani gu hegisa nya womi wathu mwendro gu hegisa nya litigo leli nyo vivbe, ethu kha hi na nga dzi laya. — Mat. 24:13; Rom. 14:8.

¹⁵ Muhuno, Jesu a ngo simama gu leleteya vapizane vaye gu tshumayela Mufumo wa Nungungulu mafuni gwatshavbo. Uye a ngu tadzisa gitumbiso gyaye. Umo nya mitshangano yathu ni umo nya mabhuku yathu, Jesu a ngu hi hevbudza edzi hi nga tshumayelago khidzo mahungu nya yadi, nigu uye gambe a ngu hi ninga satshavbo hi si vbwetago gasi gu gira thumo wowo. (Mat. 28:18-20) Ethu ho gira esi Jesu a vireyago gu khuye hi gira khu gu dzi garadzeya gu tshumayela vambe ni gu va hevbudza, ni gu bwe hi khala na hi dongide na hi gu vireya litshigu eli Jehovha a na fuvisago litigo leli nyo vivbe. Khu gu thumisa wusingalagadzi wu gomogo umo ga Vahebheru 6:11, 12, ethu hi na tiyisa gutumba gwathu “kala mahegiso.” — Leri.

16. Ginani hi yedego gu dzi emiseya gu gira?

¹⁶ Jehovha a hungide litshigu a na fuvisago litigo la Sathane. Tepo li na vbohago litshigu lolo, a na tadzisa satshavbo siprofeto si gogomoo umo nya lito laye. Ganiolu, dzimbe dzitepo ethu adzina hi nga pimisa gu khethu gu hegisa kha gu na nga vboha nugunugu. Ambari ulolo, litshigu la Jehovha “kha [li] na hwela.” (Habh. 2:3) Khu kharato, hi yede gu dzi emiseya gu “tumba Pfhumu Nungungulu,” khu gu hi “[namereya] ga Nungungulu [wathu].” — Mik. 7:7.