1. Khu ginani u bongago khu gu ba uri ni Bhibhiliya?

 ETHU hi ngu bonga ngudzu Jehovha kholu a nga hi ninga Bhibhiliya. Umo nya Bhibhiliya uye a ngu hi ninga wusingalagadzi nya wadi wu hi phasago guti esi hi na girago tepo hi tshanganago ni sigaradzo muhuno. Uye gambe a ngu hi tumbisa gu hi ninga wumindru nyo tsakise. Nigu gambe, Jehovha a ngu thumisa Bhibhiliya gasi gu hi phasa guti makhalelo yaye. Tepo hi dundrugeyago khu makhalelo yaye, isoso sa gu hi gira hi tsaka ni gu hi kutsa gu manega ni wupari nyo tiye naye. — Ndzi. 25:14.

2. Khu dzevbini dzindziya edzi Jehovha a dzi thumisidego gasi gu dzi tivegisa ga vathu?

² Jehovha o vbweta gu khuye vathu va muti. Dziteponi dza gale uye a dzi tivegiside ga vathu nyo khaguri khu gu thumisa miloro, siwoniso ni dzingilozi. (Mite. 12:6; Mith. 10:3, 4) Ethu na hi si si kodzi gu hevbula khu dzindziya edzi a nga dzi tivegisa khidzo ga vathu, nari khatshi kha dza lowa umo nya Bhibhiliya. Esi khiso si giridego Jehovha a thumisa vama nyo khaguri gasi gu “lova libhukuni” esi uye a vbwetago gu khuye ethu hi siti. (Jer. 30:2) Khu kotani nya olu “ndzila ya Nungungulu yi lulamide[go],” hi nga tumba gu khethu ndziya a yi thumisago gasi gu ganeya ni ethu khyadi kholu yi ngu hi phasa. — Ndzi. 18:30.

3. Ginani Jehovha a giredego gasi gu Bhibhiliya yi manega kala muhuno? (Isaya 40:8)

³ Leri Isaya 40:8. Lito la Nungungulu li ningide guti vama ni vanyamayi nyo tumbege khu myaga nya yingi. Si kodzegide kharini isoso? Igyogyo giwudziso nya gyadi, kholu Bhibhiliya  yi lovidwe gale umo nya dzirolu edzi khu gu gimbiya nya tepo dzi nga pferugeya. Khu kharato, ethu muhuno hi mwalo dzirolu dzodzo. Ganiolu, Jehovha giride malulamiselo nya gu vathu va gira dzikopiya nya Milowo nya guage. Ambari olu vama a nga va thumisa gasi gu lova Lito laye va nga ba va sa vbeleya, avo va giride gwadi thumo wowo. Mwama moyo lovide esi khu Milowo nya Gihebheru: “Ethu hi ngu tiyisega gu khethu limwalo limbe libhuku la gale li nga sayiswa gwadi nga Bhibhiliya.” Ambari olu Bhibhiliya yi nga lowa gale, umo nya dzirolu dzi nga hegisa khu gu hina ni gu lowa khu vama va nga mba vbeleya, ethu hi nga tiyisega gu khethu esi hi lerigu umo nya Bhibhiliya mapimo ya Jehovha.

4. Ginani hi na bhulago khigyo avba nya ndrima yeyi?

⁴ Jehovha Gifefe nya satshavbo ‘siningwa nya gululame.’ (Jak. 1:17) Bhibhiliya gimwegyo nya sinigwa hi ningidwego khu Jehovha. Tepo muthu nyo khaguri a hi ningago giningwa, uye a gu yeyedza khuye a ngu hiti gwadi ni esi hi si vbwetago. Khiso sasimweso a giridego Muvangi nya Bhibhiliya. Tepo hi lerigo Bhibhiliya ha gu hevbula nya singi khu Jehovha ni gu tugula khethu, a ngu hiti gwadi ni esi hi si vbwetago. Avba nya ndrima yeyi, hi na bhula khedzi Bhibhiliya yi yeyedzago khidzo makhalelo mararu ya Jehovha a gu: guti, gululama ni lihaladzo. Gu pheya hongoleni hi bhulani khu dzindziya edzi Bhibhiliya yi yeyedzago khidzo guti ga Nungungulu.

5. Khu yevbini mweyo nya dzindziya eyi Bhibhiliya yi yeyedzago guti ga Nungungulu?

⁵ Jehovha a ngu dziti gu khuye ethu hi ngu vbweta wusingalagadzi waye nya guti, nigu giningwa a hi ningidego a gu Bhibhiliya gi tade khu guti gwaye. Wusingalagadzi nya Bhibhiliya wu ngu phasa vathu gu dugeleya, nigu Bhibhiliya yi ngu vbindrugedza womi nya vathu. Tepo Mosi a nga lova mabhuku nyo pheye nya Bhibhiliya uye embede vathu va Nungungulu, Israyeli gu khuye: “Magana yaya, khandri nyalidede ni gumbana lisima, aholu khya guvbanya gwanu.” (Dhet. 32:47) Avo va nga ba va engisa Milowo va di gu dugeleya nigu va diri ni womi nyo tsakise. (Ndzi. 1:2, 3) Ambari olu Lito la Nungungulu li lovidwego gale, ilo li na ni tshivba nyo tshukwadzise womi nya vathu. Khu giyeyedzo, omu nya jw.org avba nya dzindrima dzi gu khidzo “A Bíblia muda a vida das Pessoas” u na mana 50 siyeyedzo nya vathu va nga si kodza gu vbindrugedza womi wavo kholu va nga thumisa ni gu engisa wusingalagadzi nya Bhibhiliya. — 1 Tes. 2:13.

6. Khu ginani hi nga ganeyago gu khethu limwalo libhuku li fanago ni Bhibhiliya?

⁶ Limwalo libhuku li fanago ni Lito la Nungungulu. Khu ginani hi ganeyago isoso? Kholu Muvangi nya libhuku leli khu Jehovha, Nungungulu nya tshivba yatshavbo, nya gupindruge ni oyu a gu na ni guti nya gu vbindre ni wevbini muthu. Mabhuku nya mangi ma ngu simama gu lerwi ambari hwane nya gu ba muvangi wakona na gu fude. Nigu wusingalagadzi wu gomogo umo nya mabhuku yoyo dzitepo nya dzingi wu ngu vbindredwa. Ganiolu, wusingalagadzi nya guti wu gomogo umo nya Bhibhiliya wu ngu simama kala gupindruga. Nigu iyo yi ngu phasa vathu vatshavbo gu manega ni womi nya wadi. Tepo hi lerigo Milowo nya guage ni gu dundrugeya khesi hi lerigo, Muvangi nya iyo a na thumisa tshivba yaye a gu liphuvbo nya guage gasi gu hi phasa gu wona edzi hi nga wu thumisago khidzo wusingalagadzi nya Bhibhiliya womini gwathu. (Ndzi. 119:27; Mal. 3:16; Hebh. 4:12) Khu lisine, Muvangi nya Bhibhiliya a ngu dzina gu hi phasa. Esi khiso si hi girago hi leri Bhibhiliya tshigu ni tshigu.

7. Bhibhiliya yi phaside kharini vathu va Nungungulu gale gasi va pwanana?

 ⁷ Yimbe ndziya eyi Bhibhiliya yi yeyedzago gu khiyo yi na ni guti ga Nungungulu, khu gu iyo yi ngu phasa vathu va Nungungulu gu manega ni gupwanana. Tepo Vaisrayeli va nga beya Tigoni nya Gitumbiso avo va di gu khala malanga nya gu hambane-hambane. Vambe va diri vagogi, va di gu fuya sirengo nigu va diri valimi. Vaisrayeli va nga ba va khala umo nya gipandre nyo khaguri tigoni nya gitumbiso, si di hadzi gu va vbevbugeya gu divala vambe Vaisrayeli va nga ba va khala mambe malanga. Khu kharato, Jehovha a di gira malulamiselo nya gu Vaisrayeli vatshavbo va tshangana gumogo gasi gu engiseya Lito laye na li gu lerwi ni gu tshamusedwa. (Dhet. 31:10-13; Neh. 8:2, 8, 18) Nga dundrugeya edzi Vaisrayeli nya gutumbege va dzipwidego khidzo tepo va nga vboha Jerusalema ni gu wona dzimiliyoni nya vambe vakhozeyi va nga ba vata khu ga simbe sipandre sa tigoni nya gitumbiso. Jehovha phaside vathu vaye gu simama gupwanana. Khu gu landreya, tepo libandla nya Wukristo li nga wumbwa, umomo gu diri ni vama ni vanyamayi va nga ba va ganeya malimi nya gu hambane-hambane nigu na va guta khu malanga nya gu hambane. Ganiolu, khu kotani nya olu va nga ba va gola Milowo avo va di gu simama gupwanana umo nya wukhozeyi nya lisine. Makristo nya maphya ma di yede gu tshangana ni vambe vakhozeyi gasi ma phaswa gu pwisisa Lito la Nungungulu. — Mith. 2:42; 8:30, 31.

8. Bhibhiliya ya gu phasa kharini vathu va Jehovha muhuno gupwanana?

 ⁸ Nungungulu wathu a gu na ni guti a ngu simama gu hi hevbudza ni gu phasa vathu vaye gupwanana khu gu thumisa Bhibhiliya. Bhibhiliya yi ni lisine eli Jehovha a vbwetago gu khuye hi liti. Ethu tepo yatshavbo hi ngu tshangana gumogo libandlani, umo nya mitshangano nya sipandre ni dzikongresu gasi gu engiseya Milowo na yi gu lerwi ni gu tshamusedwa. Khu kharato, Bhibhiliya ferameta nya lisima eyi Jehovha a yi thumisago gasi gu phasa vathu vaye “gu mu thumela khu monyo moyo.” — Sof. 3:9.

9. Likhalelo muni li vbwetegago gasi hi kodza gu pwisisa Bhibhiliya? (Luka 19:21)

⁹ Wona gimbe gilo gi yeyedzago gu khigyo Jehovha a na ni guti. Uye a giride gu sipandre nya singi nya Milowo si lowa khu ndziya nya gu si pwisiswa basi khu vale va dzi nogisago. (Leri Luka 10:21.) Vathu va malangani yatshavbo va ngu leri Bhibhiliya. Mwama moyo lovide esi: “Vathu nya vangi va ngu leri gwadi Bhibhiliya guvbindra mambe mabhuku.” Ganiolu, avo va dzi nogisago khu lisine khavo basi va si kodzago gu pwisisa ni gu thumisa esi Bhibhiliya yi ganeyago. — 2 Kor. 3:15, 16.

10. Khu yevbini yimbe ndziya eyi Bhibhiliya yi yeyedzago guti ga Jehovha?

¹⁰ Ethu hi ngu hevbula khu guti ga Jehovha umo nya Bhibhiliya khu yimbe ndziya. Jehovha kha hevbudzi basi vathu vaye kha nga tsawa. Ganiolu, uye a gu hevbudza ni gu thaveleya moyo ni moyo wathu tepo hi lerigo Lito laye. (Isa. 30:21) Tepo u tshanganago ni gigaradzo, ina u di nga leri lowo wu nga gira gu khatshi wu di lovedwa uwe? Khu lisine, Bhibhiliya yi lovidwe gasi gu phasa vathu vatshavbo. U nga mana kharini mahungu ma gimbeleyanago ni giemo gyago? Isoso si nga kodzega basi kholu Muvangi nya Bhibhiliya khuye a gu na ni guti nya gungi mafuni gwatshavbo. — 2 Thim. 3:16, 17.

11. Tepo yi nga lowa Bhibhiliya, Nungungulu yeyedzide kharini gu khuye a mwalo gihatheya?

¹¹ Limbe likhalelo eli Jehovha a gu nalo gululama. (Dhet. 32:4) Muthu nya gu lulame tepo yatshavbo a ngu yeyedza khuye a mwalo gihatheya nigu Jehovha a mwalo gihatheya. (Mith. 10:34, 35; Rom. 2:11) Ethu hi ngu wona isoso khu kotani nya olu Bhibhiliya yi lovidwego khu malimi nya mangi. 39 mabhuku nyo pheye nya Bhibhiliya ma lovidwe khu Gihebheru gasi si vbevbugeya vathu va tepo yoyo gu pwisisa Milowo. Ambari ulolo, dziteponi dzodzo Makristo nya mangi ma di gu ganeya Gigreki. Khu kharato, 27 mabhuku nyo hegise nya Bhibhiliya ma lovidwe khu Gigreki. Jehovha kha hunga gu khuye Lito laye li lowa basi khu lidimi limwedo. Muhuno vathu nya vangi va ngu ganeya malimi nya gu hambane-hambane. Avo va nga hevbula kharini khu Jehovha?

12. Dhaniyeli 12:4 a gu tadzisega kharini matshigoni yaya nyo hegise?

¹² Khu gu thumisa muprofeti Dhaniyeli, Jehovha tumbiside khuye matshigoni nyo hegise “guti nya [lisine]” hi gu manago umo nya Bhibhiliya gu di hadzi gu khala “nya guete,” nigu vathu nya vangi va di hadzi gu gu pwisisa. (Leri Dhaniyeli 12:4.) Gimwegyo nya silo gi phasidego vathu nya vangi gu pwisisa Bhibhiliya khu kotani nya olu va nga thumisa mabhuku ma seketedwago khiyo. Bhibhiliya libhuku li nga vbindrugedzedwa ni gu kabanisedwa mafuni gwatshavbo. Dzibhibhiliya dzi girwago khu dziempreza nya dzinogosi dzimbe dzitepo dzi ngu dhura ngudzu. Vathu va Jehovha va ngu vbindrugedzeya Lito la Nungungulu khu  sipandre mwendro yatshavbo khu 240 malimi ni gu vbindra, nigu vatshavbo va nga manega ni Bhibhiliya nya mba livba gilo. Kha nga handro wakone, vathu va mayigoni gwatshavbo va ngu hevbula maningano ni “mahungu yaya nya yadi nya Mufumo” na ma nga si vbohi mahegiso. (Mat. 24:14) Nungungulu wathu nya gululame a gu vbweta gu ninga vathu nya vangi lithomo nya gu muti ni gu leri Lito laye. Isoso sa gu kodzega kholu a hi haladzago ngudzu.

13. Khu ginani hi nga ganeyago gu khethu Bhibhiliya yo yeyedza lihaladzo la Jehovha? (Johane 21:25)

¹³ Bhibhiliya yi ngu hi phasa gu pwisisa gu khethu likhalelo nya likhongolo la Jehovha lihaladzo. (1 Joh. 4:8) Uye a ngu hi embeya esi si vbwetegago gasi hi tiyisa wupari wathu naye, gu mana womi nya gutsakise olu ni gu mana womi nya gupindruge. Khu kharato, uye kha hi ninga mahungu nya mangi hi gu mba ma vbweta gasi gu mu thumeya. — Leri Johane 21:25.

14. Khu yevbini yimbe ndziya Bhibhiliya yi yeyedzago gu khiyo Jehovha a ngu hi haladza?

¹⁴ Jehovha gambe a yeyedzide lihaladzo laye khu gu ganeya ni ethu khu ndziya nya yadi. Umo nya Bhibhiliya uye kha hi ninge sasamedzo nya milayo yi ganeyago khesi hi gu mba yela gu gira ni esi hi yedego gu gira ga sipandre satshavbo nya womi wathu. Wulangani nya isoso, uye a gu thumisa matimo nya gu vbanye nya vathu, siprofeto ni wusingalagadzi si nga hi phasago gu hunga gwadi makungo. Khu dzindziya dzedzi, Lito la Nungungulu li ngu hi kutsa gu mu haladza ni gu mu engisa khu monyo wathu watshavbo.

15. a) Bhibhiliya ya gu yeyedza kharini gu khiyo Jehovha a ngu khathala khethu? b) Ava hi va wonago avba nya fotu va gu dundrugeya khu vamani? (Gen. 39:1, 10-12; 2 Dzipf. 5:1-3; Luka 2:25-38)

 ¹⁵ Bhibhiliya ya gu yeyedza gu khiyo Jehovha a ngu khathala ngudzu khethu. Khu ndziya muni? Omu nya Lito laye gu na ni matimo ma yeyedzago edzi vathu va dzipwidego khidzo. Ethu hi nga pwisisa gudzipwa gwawe kholu avo va diri vathu “kha nga ethu.” (Jak. 5:17) Nya lisima ngudzu khu gu, ha gu wona edzi Jehovha a pharidego khidzo vathu vovo hi na si kodza gu pwisisa gwadi gu khethu “Pfhumu tade khu wuwadi ni wuhindzi.” — Jak. 5:11.

16. Ginani hi gi hevbulago khu Jehovha tepo hi lerigo Bhibhiliya maningano khava va girago sighoho? (Isaya 55:7)

¹⁶ Bhibhiliya yi ngu yeyedza lihaladzo la Jehovha khethu khu yimbe ndziya. Milowo yi ngu hi tiyisegisa gu khiyo Nungungulu wathu kha na nga hi diga ha gu tshuka hi mu ghoheya. Vaisrayeli va ghohede Jehovha khu dzitepo nya dzingi, ambari ulolo tepo va nga dzi laya khu lisine Nungungulu a va divalede. (Leri Isaya 55:7.) Makristo nya gu pheye anayo ma di gu dziti gu khayo Nungungulu a di gu ma haladza ngudzu. Khu gu kutswa khu liphuvbo nya guage, mupostoli Pawulo a kutside Makristo makhwathu gu ‘tsetseleya ni gu thaveleya’ mwama moyo a nga dzi laya kholu a nga ba giride sighoho nya sikhongolo. (2 Kor. 2:6, 7; 1 Kor. 5:1-5) Esi sa gu yeyedza gu khiso Jehovha kha na nga tsukula vakhozeyi vaye khu gu ba va mu ghohede. Khu gu kutswa khu lihaladzo, Jehovha a na va phasa ni gu va kawuka gasi va khala gambe dzipari dzaye. Muhuno, Jehovha a ngu tumbisa sasimweso ga sighohi si dzi layidego. — Jak. 4:8-10.

17. Khu ginani Bhibhiliya yi gu giningwa nya lisima?

¹⁷ Jehovha a hi ningide giningwa nya gu mbure ngudzu. Khu ginani Lito laye li gu na ni lisima? Kha nga hi si hevbudego, Bhibhiliya yi ngu yeyedza guti, gululama ni lihaladzo la Nungungulu. Libhuku leli la gu yeyedza gu khilo Jehovha a gu vbweta gu khuye hi muti. Uye a gu vbweta gu khuye ethu hi khala dzipari dzaye.

18. Hi nga yeyedza kharini gu khethu hi ngu bonga khu “giningwa nya gululame” a gu Bhibhiliya?

¹⁸ Ethu kha hi vbweti gu divala gu khethu Lito la Nungungulu “giningwa nya gululame.” (Jak. 1:17) Hongoleni hi simama gu yeyedza gubonga gwathu khigyo. Hi nga gira isoso khu gu hi leri ni gu dundrugeya khesi hi leridego. Ha gu gira isoso, hi nga tiyisega gu khethu Muvangi nya Bhibhiliya a na kategisa gu dzigaradza gwathu nigu ethu “hi na mana guti ga Nungungulu.” — Mav. 2:5, NM.