Eni nyi di hega pari yangu kholu nyi di gu pimisa kheni kha nga ba ati gilo khu wukhongeyi. Nyi di mu wudzisa kheni: “Ginani u gitigo khu Bhibhiliya?” Uye kha dzegeya gu nyi hlamula. Ganiolu, khu gu landreya a nyi embede gu khuye mamayi waye a diri moyo nya Dzifakazi dza Jehovha, nigu a hevbude silo nya singi gwaye. Khu kharato, eni nyi di mu lomba gasi a nyi bhuleya simbe.

Ethu hi di bhula kala li ya pfola. Pari yangu yi di nyi embeya khiyo Bhibhiliya ya gu rana Sathane kha nga pfhumu nya litigo leli. (Johane 14:30) Adzina uye a di gu siti isoso khu gale, ganiolu gwangu si diri siphya nigu si nyi giride nyi vbweta guti nya singi. Eni nyi di pwide gupwani, Nungungulu nya gu lulame ni wuwadi khuye a nga ba a fumeya litigo leli, ganiolu iso nyi nga embedwa kha sa nga ba si pwala gwangu kholu ambari olu nyi nga ba nyiri ni 26 myaga basi nyi di wonide silo nya singi si nga ba si nyi garadza.

Papayi wangu a diri mugimbidzisi nya avhiyawu nya masothswa ya Estados Unidos da América. Khu kharato, tepo nyi nga ba nyiri gyanana nyi di gu dziti gu kheni yi di hadzi manega nyimbi kholu masothswa ma di dongide siphisa ni gu vbophosa bhomba. Nyimbi ya Vietnam yi nyi tsolopetede tepo nyi nga ba nyi hevbula Califórnia. Khavbovbo, nyi di dzi pata ni sihevbuli kwanu si nga ba si gira gitereka. Dzipolisiya dzi di zama gu hi himbedzeya gu gira gitereka khu gu hi tutumisa ni gu thumisa gaji, yi nga gira hi si woni gwadi ga tepo yile. Gu diri tepo nya gu garadze ngudzu. Ga gitereka gegi, gu fude vathangeyi nya vangi nya politika ni ava va nga ba va gira gitereka. Nigu khu kotani nya olu vathu va nga ba va ri ni mawonelo nya gu hambane khu gitereka gegi, silo si di engedzeya gu garadza.

Khu 1970, nyi di mana thumo Costa norte do Alasca nigu thumo wowu wu di gu nyi ninga dzitsapawu nya dzingi. Tepo nyi nga vboha Londres nyi di renga mota, khavbovbo nyi kongoma gu hongola sul na nyi si dziti kheni nya gu hongola hayi. Hwane nya migima nyo khaguri nyi di vboha Afrika. Ndziyani nyi di manana ni vathu va nga ba va rura khu tigoni gwawe gasi gu divala sigaradzo va nga ba va tshangana naso.

 Khu kotani nya esi nyi nga ba nyi si wonide ni gu sipwa, sihevbudzo nya Bhibhiliya si gu khiso Sathane khuye a fumago litigo leli, gwangu si di gu pwisisega. Ganiolu, abari gu khandri Nungungulu a fumeyago litigo leli, ginani a girago? Nyi di gu vbweta gu si pwisisa gwadi isoso.

Ga migima yi nga landreya nyi manide hlamulo. Nigu khu gu gimbiya nya tepo nyi tide vathu va nga ba va gola vambe ni gu yeyedza khavo va ngu tumbega ga Nungungulu ga siemo satshavbo womini gwawe.

Tepo nyi nga bweleya Londres, nyi diya vbwetedzeya mamayi wa pari yangu, nigu uye a nyi nigide Bhibhiliya. Khu gu landreya, tepo nyi nga hongola Amesterdão, Holanda, Fakazi nyo khaguri yi nyi wonide na nyi gu leri Bhibhiliya nigu yi nyi phaside gu pwisisa esi nyi nga ba nyi leri. Khu gu landreya nyi hongode Dublin, Irlanda, avbo nyi nga yati Bheteli nya Dzifakazi dza Jehovha dza tigoni mule. Nyi di hidzimeya nya khokhota lidimba, khavbo nyi ngati ndriyathu Arthur Matthews a gu ni guti ni sighingi, nyi di mu lomba gu a hevbula ni eni Bhibhiliya nigu uye dzumede gu gira isoso.

Eni nyi di tsakide ngudzu, nigu nyi di pheya gu gira gihevbulo gyangu, gu leri Bhibhiliya ni mabhuku nya Dzifakazi dza Jehovha. Isoso si di gu nyi tsakisa ngudzu. Mitshanganoni nya libandla nyi di gu wona sanana si nga ba siti mihlamulo nya siwudziso esi vama nya guti va nga ba hevbude ngudzu va nga ba dzi gira khu myaga nya yingi nya ga: ‘Khu ginani wu gu romo wuvivbi? Khu mani Nungungulu? Ginani gi giregago ha gufa?’ Khu kotani nya olu dzipari dzangu dzatshavbo dzi nga ba dziri Dzifakazi dza Jehovha, si nyi vbevbugede gu gira wupari navo, kholu kha nya nga ba nyiti mumbe muthu dhoropani mule, nigu idzo dzi nyi phaside gu gola Jehovha ni gu gira esi uye a si vbwetago.

Khu 1972, eni nyi di bhabhatiswa. Hwane nya mwaga mowo nyi di pheya gu thuma kha nga piyoneru ga libandla nya lidugwana Newry, Irlanda do Norte. Nyi di lugari ndranga nyo khaguri yi nga ba yi romo gigomoni, avbovbo gu diri ni dzimombe nya dzingi nigu nyi dongisede dziganelo dzangu mbeli gwadzo. Idzo dzi di gira gu khatshi dza gu vega gupima na dzi gu hodza mwasi, idzo kha dza nga ba dzi kodza gu nyi ninga wusingalagadzi, ganiolu dzi nyi phaside gu mba thava vathu tepo nyi vegago dziganelo. Khu 1974 nyi di hatwa gasi gu thuma kha nga piyoneru nya hathege nigu nyi tivanide ni Nigel Pitt oyu a nga khala pari yangu.

Ga tepo yoyo gu diri ni “wughevenga nya wungi” Irlanda do Norte. Vambe va di gu rana Irlanda do Norte khavo “litigo nya dzibhala ni dzibhomba.” Si di gu olovelega gu wona vathu dziruwani na va gu  dwana, gu vbophoseyana ni gu vbiswa dzimovha. Sigaradzo nya singi si diri nya politika ni wukhongeyi. Vawugeyi ni vakhongeyi nya tshetshe nya katolika va di gu dziti khavo Dzifakazi dza Jehovha kha dzi dzibedzedzeyi omu nya politika, nigu idzo dzi di gu vbweta basi gu tshumayela na dzi vhikelegide. Mihungo nya dzindranga tepo yatshavbo yi di gu dziti avbo gu nga hadzi manega wughevenga, nigu va di gu hi gengedza gasi hi khala hwindzo ni malanga yoyo.

Gu manegide simbe siemo nya gu garadze. Litshigu limwedo, na nyi gu tshumayela ni ndriyathu moyo nyo pwani khu Denis Carrigan a gu piyoneru, ga lidhoropa nyo khaguri gu nga ba gu ri mwalo Dzifakazi dza Jehovha, hi di tshangana ni nyamayi nyo khaguri a nga hi singedza khuye hi masotshwa ya Britânia, adzina khu kotani nya olu hi nga ba hi si ganeyi gwadi Giirlandés, isoso si hi thaviside ngudzu! Nigu khu gu ba u ri pari nya masotshwa u nga songwa mwendro gu vbophoswa kamu. Tepo hi nga ba hi vireya movha na hi gu vetwa khu girami, hi di wona nyamayi wule a nga hi singedza, a di duga ni vama vavili khu movhani na va gu hi pontari khu dzinyala. Vama vovo va di hi teya, va ta hi wudzisa maningano khu dziora dzi gimbiyago dzimovha. Tepo yi nga vboha movha, va di ganeya ni mugimbidzisi nya movha. Ganiolu, kha ha nga ba hi sipwa esi va nga ba va ganeya. Tepo hi nga ba hiri movhani ni mugimbidzisi basi hi di pimisa khethu ha gu vboha vbavbandze nya lidhoropa uye a na hi wugeya, ganiolu khandriso si nga girega. Tepo hi nga tshiga khu movhani nyi di wudzisa mugimbidzisi nya movha kheni: “Vama vale va di gu bhula khethu?” Uye a di nyi hlamula khuye: “Nyi va embede kheni nyi ngu miti, khu kharato mu nga garadzegi; mu vhikelegide.”

Khu 1976 avbo nya asembleiya nya distritu, Dublin. a Nyi tivanide ni ndriyathu moyo a nga ba a thuma kha nga piyoneru nyo hathege nyo pwani khu Pauline Lomax a nga ta hi wuseya na guta Inglaterra. A diri muthu nya gutumbege, nya gu dzi nogise nigu a di gu haladza vambe. Uye ni ndriyaye Ray va velegedwe lisineni. Mwaga wu nga landreya, nyi di tshadha ni Pauline hi bwe hi simama gu thuma kha nga piyoneru nya gu hathege Ballymena, Irlanda do Norte.

Khu tepo nyo khaguri, hi thumide nga vawoneleyi nya sipandre na hi gu phasa vandriyathu va Belfast, Londonderry ni mambe malanga. Hi kuhidwe khu vandriyathu va digidego esi va nga ba va si khodwa ni wukhongeyi wawe gasi va thumeya Jehovha. Ni edzi Jehovha a nga va kategisa khidzo ni gu va vhikeya!

Nyi vbanyide Irlanda khu 10 myaga. Khu 1981 hi di ranwa gasi gu hongola xikola ya Gileade turma 72. Hwane nya gu ba hi vbedzide gu hevbula, hi di rumedwa Serra Leoa, África Ocidental.

Ethu hi di gu vbanya ga ndranga nya vamisiyonaryu ni 11 vandriyathu. Hi di gu thumisa hatshavbo likozinya lalimwedo, gipeto gyagimwegyo, telefoni yayimweyo ni mitshini nya gu handze khayo ni gu bangisa sombo. Maghezi ma diri mwalo tshivba nigu ma di gu pilega-pilega, magondzo ma di gu beya khu vbatshani nya nyumba nigu minyoga yi di gu beya khumo nya sihogohogwana.

Ambari olu hi nga ba hi vbanya ga ndranga yi nga ba yi phede gu garala, hi di gu tsaka ngudzu khu gu tshumayela. Vathu va gipandreni mule va di gu ninga githawo Bhibhiliya, nigu va di gu hi engiseya gwadi. Sihevbuli sangu nya singi si vbindrugedzide si khala Dzifakazi dza Jehovha. Tepo nyi nga pheya gu thuma bheteli kha nya nga ba nyi vbedza tepo nya yingi thumoni nya gu tshumayele. Khu kotani nya isoso, vathu nya vangi va di pheya gu rana Pauline khavo: “Ngadza Robert”, eni va nyi rana khavo:  “Mwama wa Pauline.” Pauline a di gu tsaka a gu ranwa kharato.

Vandriyathu va diri sisiwana, ganiolu Jehovha tepo yatshavbo a di gu va ninga esi va nga ba va si vbweta, dzimbe dzitepo khu ndziya nya gu samadzise ngudzu. (Mat. 6:33) Nyi ngu dundruga litshigu limwedo ndriyathu moyo nya nyamayi a nga ba a ri ni dzitsapawu nya gu eneye basi gu renga guhodza gasi a hodza uye ni gyanana gyaye, ganiolu uye a di ninga dzitsapawu dzodzo ndriyathu moyo a nga ba a dwala gasi a ya renga rendre. Ga litshigu li nga landreya, nya mba si vireya a di livbedwa dzitsapawu nya gu khathaleye ndzudzu waye khu nyamayi moyo a nga ba a si muti. Gu ni siemo nya singi nga egi si yeyedzago edzi Jehovha a khathaleyago khidzo vathu vaye.

Ethu hi thumide Serra Leoa khu 9 myaga. Khavbovbo, nyi di ya thuma Bhetheli ya Nigeria yi nga ba yiri Bheteli nya yikhongolo. Eni nyi di ya gira thumo wa wumowo nyi nga ba nyi gira Serra Leoa, ganiolu Pauline a di vbindrugedza thumo. Uye a di gu vbedzide 130 dziora migima yatshavbo thumoni nyo tshumayele, nigu uye a diri ni sihevbuli nya singi nya Bhibhiliya. Ganiolu, uye a di ningwa thumo nya gu sone nigu a di gu vbedza matshigu nya mangi na gu sona sombo nyo pfherugeye. Si dzegide tepo nyo laphe gasi a dzi pwananisa ni giemo a nga ba ari ga igyo, ganiolu a tugude gu khuye vandriyathu nya vangi va di gu ninga lisima thumo a nga ba a gira. Isoso si mu giride a vbwetedzeya mathomo nya gu tiyise vambe Vabhetelita.

Mavbanyelo ya Nigéria ma diri maphya gwathu, khu kharato hi di yede gu hevbula nya singi. Ga tepo nyo khaguri, ndriyathu moyo nya mwama a dita xikritoriyo gwangu a ta nyi yeyedza ndriyathu moyo nya nyamayi a nga ba ari muphya Bheteli. Tepo nyi nga mu ninga mandza gasi gu mu losa, uye a di nyi khidzimeya. Eni nyi di hlamala ngudzu! Nyi di dzegeya gu dundrugeya khu milowo mivili, a gu Mithumo 10:25, 26 ni Gutuledwa 19:10. Nyi bwe nyi dzi wudzisa gu kheni: ‘Ina nyi yede gu mu embeya gu kheni u nga giri isoso?’ Ga tepo yayimweyo, na nyi gu pimisa gu kheni uye a dzumeledwe guta Bheteli; uye a ngu siti esi Bhibhiliya yi hevbudzago.

Eni nyi di dzuwega mapimo, khu hwane nyi ya gira wugevesisi. Eni nyi tugude gu kheni ndriyathu wule a di gira sile kholu khidzo va nga ba va vbanya tigoni gwawe. Vama anavo va di gu losana khu ndziya yayimweyo. Iyoyo yi diri ndziya nyo yeyedze khiyo githawo. Ganiolu, isoso kha sa nga ba si gira gipandre nya wukhozeyi, nigu umo nya Bhibhiliya gu  na ni siyeyedzo nyo fane. (1 Sam. 24:8) Eni nyi tsakide ngudzu khu gu ba nya sa ganeya silo si nga hadzi tshonegisa ndriyathu.

Eni nyi tide vandriyathu Vanigéria va tumbegidego khu myaga nya yingi. Wona giyeyedzo gya Isaya Adagbona. b Uye a hevbude lisine na ngari muphya, ganiolu uye a di popodwa madwali nya sokono. Uye a di rumedwa ga wulanga va nga ba va khala vathu va nga ba vari ni madwali yoyo, nigu eyi khuye enga a nga ba ari Fakazi ya Jehovha. Ambari olu a nga ba a wudegedwa, uye a phaside 30 vathu ni gu vbindra gu dzumeya lisine a bwe a gira libandla iyoyo.

Khu 1996 hi diya thuma bheteli ya Quênia. Eyi yi diri tepo nyo pheye na hi gu bweleya ga lidhoropa leli. Ethu hi di gu khala bheteli. Vbavbandze nya vandriyathu va nga ba va khala vbale, gu diri ni dzindzogo nya dzingi. Dzindzogo dzodzo, dzi di gu gola guba mihandro ya vandriyathu. Litshigu limwedo, ndriyathu moyo wa bheteli a di diga janela na yi tudwe, tepo a nga wuya a diya mana dzindzogo nya dzingi na dzi gu dogoreya guhodza gwaye nyumbani. Uye a di womba huwa a bwe a duga khu gu tutuma, anidzo dzidzongo dzi di womba huwa dzi duga khavba nya janeya.

Eni ni Pauline hi di beya umo nya libandla nya Giswahili. Khu hwane nya tepo nyo khaguri, eni nyi di hathwa gasi gu gimbidzisa Gihevbulo nya libhuku nya libandla (olu gi ranwago kha nga Gihevbulo nya Bhibhiliya nya libandla). Ambari ulolo, eni kha nyi nga ba nyi kodza gu ganeya gwadi lidimi lolo. Eni nyi di yede gu dongiseya gasi nyi ya si kodza gu gira gwadi siwudziso. Vandriyathu va gu hlamula na si gu khugeya monyoni nasiri esi si nga lowa avba nya libhuku, eni kha nyi nga ba nyi si kodza gu si pwisisa. Isoso si di gu nyi garadzeya ngudzu. Eni nyi di gu va pweya vandriyathu. Ganiolu, nyi samadzisidwe khu gu ba va nyi laphiseya monyo, gu dzi nogisa ni gu nyi dzumeleya gu gimbidzisa mitshangano.

Ethu kha ha khala tepo nya yingi Quênia. Khu 1997, ethu hi di ranwa gasi gu hongola ha thuma Bheteli ya Brooklyn, Nova Iorque. Ga litigo leli vathu va di gu ghanyide ngudzu, umo hi nga hadzi gu tshangana ni simbe sigaradzo. (Mav. 30:8, 9) Ganiolu, vandriyathu va di gu yeyedza gukhodwa gwawe. Avo va di gu thumisa tepo yawe, dzithomba dzawe gasi gu seketeya hengeledzano ya Jehovha.

Khu myaga nya yingi, ethu hi wonide gukhodwa ga vandriyathu ga siemo nyo hambane-hambane. Irlanda nyi wonide gukhodwa ga vandriyathu ambari olu va nga ba va vbanya vbakari nya sitereka. Afrika nyi wonide gukhodwa ga vandriyathu ambari va nga ba vari sisuwana ni olu va nga ba va tshangana ni madwali, nigu Estados unidos nyi wonide gukhodwa ga vandriyathu ambari olu va nga ba va ghanyide. Khu lisine, Jehovha a ngu tsaka khu gu wona vathu na va gu yeyedza gu khavo va ngu mu haladza ni ga gevbini giemo.

Myaga yi di vbindra khu gu vbiredza nga katshi “gikari gya mulugi.” (Joba 7:6) Ethu olu ha gu thuma ni vambe vandriyathu tshinza ga mafuni gwatshavbo Warwick, Nova Iorque ni gu ethu hi tsakide khu gu simama gu thuma ni vambe vathu va yeyedzago khu lisine gu khavo va ngu haladza vambe. Ethu hi tsakide khu gu gira satshavbo hi si kodzago gasi gu seketeya Pfhumu yathu Jesu Kristo, eyi nya mba hweya yi na tshatshazeyago sithumi saye nyo tumbege. — Mat. 25:34.