1. Khu ginani hi yedego gu engisa Jehovha?

ETHU hi yede gu engisa * Jehovha kholu khuye muvangi wathu. Khu kharato, khuye a gomogo giemoni nyo hi embeye esi hi yedego gu gira. (Gutu. 4:11) Gimbe gighelo gi hi girago hi engisa Jehovha khu gu, mafumelo yaye khyadi. Ndrani nya matimo nya vathu, dzipfhumu nya mafu dzi ngu fumeya vathu. Ganiolu, ha gu fananisa edzi vathu va fumago khidzo ni mafumelo ya Jehovha, hi ngu wona gu khethu Jehovha a nguti, a ni lihaladzo, wuhindzi ni pweya-wusiwana, gu hambana ni dzimbe dzipfhumu. — Ekiso. 34:6; Rom. 16:27; 1 Joh. 4:8.

2. Khu guya khu Vahebheru 12:9-11, khu sevbini sighelo si hi girago hi engisa Jehovha?

² Jehovha o vbweta gu khuye hi mu engisa, nasiri khu gu mu thava ganiolu khu kotani nya lihaladzo lathu khuye hi bwe hi mu wona kha nga Babe wathu nya lihaladzo. Avba nya lidangaliya laye ga vaHebheru, Pawulo tshamusede gu khuye hi yede ‘guyingela khu githawo ngudzu Babe wathu’ kholu uye a gu hi hevbudza khu “gufela gukhuye hi phasege.” — Leri Vahebheru 12:9-11.

3. a) Ha gu yeyedza kharini gu khethu ha gu thangedwa khu Jehovha? b) Siwudziso muni hi na si hlamulago?

³ Ethu ha gu thangedwa khu Jehovha tepo hi dzi garadzeyago gu mu engisa siloni satshavbo hi bwe hi dwana ni guwegeleya nyo dzi hatheye habune esi nya sadi ni esi nyo vivbe. (Mav. 3:5) Si ngu hi  vbevbugeya gu engisa Jehovha tepo hi tigu makhalelo yaye nya yadi. Khu ginani? Kholu makhalelo yoyo ma ngu wonega omu nya silo satshavbo a girago. (Ndzi. 145:9) Tepo hi hevbulago nya singi khu Jehovha, lihaladzo lathu khuye lo dandra. Nigu ho ba hi haladza Jehovha, kha hi na nga vbweta gu khethu a hi ninga khwepa nya milayo nya esi hi yedego gu gira ni esi hi si yeligo gu gira. Ha gu dzi garadzeya gu pimisa ni gu wona silo khu mawonelo ya Jehovha hi bwe hi potsa silo nyo vivbe. (Ndzi. 97:10) Dzimbe dzitepo kha si vbevbugi gu engisa Jehovha. Khu ginani? Nigu ginani egi madhota, vapapayi ni vamamayi va gi hevbulago avba nya giyeyedzo gya Nehemiya; Pfhumu Dhavhidhe ni Mariya mamayi wa Jesu? Ndrima yeyi yi na ninga milhamulo ya siwudziso sesi.

4-5. Khu guya khu Varoma 7:21-23, khu ginani si nga garadzago gu engisa Jehovha?

⁴ Gimwegyo nya sighelo gi nga girago si hi garadzeya gu engisa Jehovha, khu kotani nya olu hatshavbo hi thapedwego khu gighoho ni gu mba vbeleya. Khu kharato khandri tepo yatshavbo hi vbwetago gu engisa Jehovha. Tepo Adhamu ni Evha va nga mba engisa Nungungulu khu gu hodza handro, avo va di dzi hatheya khu vabune esi nya sadi ni esi nyo vivbe. (Gen. 3:22) Muhuno gutala nya vathu va gu hatha gu mba engisa Jehovha gu fana ni Adhamu ni Evha, va dzi hatheya khu vabune esi nya sadi ni esi nyo vivbe.

⁵ Ambari olu ethu hi si fanigo navo khu kotani nya olu hi mutigo ni gu mu haladza Jehovha, adzina si nga hi garadzeya gu gira esi a si vbwetago tepo yatshavbo. Mupostoli Pawulo emisanide ni gigaradzo gyogyo. (Leri Varoma 7:21-23.) Gu fana ni Pawulo, ethu ha gu vbweta gu gira esi si agidego mahoni ga Jehovha. Ganiolu gu vbwetega hi dwana tepo yatshavbo ni guwegeleya nyo gire silo nyo vivbe.

6-7. Khu gevbini gikhelo nya wuvili gi girago gu si garadza gu engisa Jehovha? Ninga giyeyedzo.

⁶ Gimbe gighelo gi girago gu si hi garadzeya gu engisa Jehovha khu kotani nya kutsedzelo nya mavbanyelo ya omu hi dandredego umo. Mawonelo nya mangi nya vathu ma hambanide ni gugola ga Jehovha. Khu kharato si nga hi garadzeya gu potsa gu pimisa khu ndziya va pimisago khiyo vathu nya litigo. Nga wona giyeyedzo gimwegyo.

⁷ Malangani nyo khaguri, si olovelegide gu vaphya va kutsedzedwa ngudzu gu manega ni dzitsapawu nya dzingi. Ndriyathu nya nyamayi nyo pwani khu Mary a tshanganide ni gigaradzo gyogyo. Na nga si hevbuli lisine, a di gu hevbula ga mweyo nya dzixikola nya tshukwana ngudzu tigoni gwaye. Mary, a di gu kutsedzedwa khu va ndrangani gwaye gu vbweta thumo wu nga hadzi mu ninga dzitsapawu nya dzingi. Nigu anuye a di gu si vbweta isoso. Ganiolu, hwane nyo hevbule lisine ni gu haladza Nungungulu, uye a di vbindrugedza makungo yaye. Ambari ulolo, kha si mu vbevbugeyi. Uye wari khuye: “Dzimbe dzitepo nyi ngu ba nyi mana thumo wu nga hadzi nyi ninga dzitsapawu nya dzingi, ganiolu nyi tugula gu kheni kha nyi na si kodza gu gireya nya singi Jehovha nga olu. Khu kotani nya edzi nyi dandrisidwego khidzo, si ngo gu nyi garadzeya gu bomba. Nyo tutumeya ga Jehovha, gasi a nyi phasa gu vhikisana ni guwegeleya gwangu nyo dzumeye thumo wu nga hadzi nyi gira nyi vbola khu liphuvboni.” — Mat. 6:24.

8. Ginani hi na bhulago khigyo olu?

⁸ Kha nga hi si wonidego, khyadi ngudzu gu engisa Jehovha. Ganiolu ava va thangeyago, nya nga madhota, vapapayi ni vamamayi, va na ni gimbe gighelo nya gu va engisa Nungungulu kholu va na ni lithomo nya gu thangeye vambe vathu. Hongoleni hi wonani simbe siyeyedzo sa omu nya Bhibhiliya esi si hi hevbudzago edzi hi nga thangeyago khidzo khu ndziya yi tsakisago Jehovha.

9. Khu gevbini gigaradzo a emisanidego nagyo Nehemiya?

⁹ Jehovha ningide madhota thumo nya lisima, nyo khathaleye vathu vaye. (1 Ped. 5:2) Madhota ma nga hevbula silo nyo tale khu gu gevisisa edzi Nehemiya a khathaledego khidzo vathu va Jehovha. Kha nga pfhumu ya Judha, Nahemiya a diri ga giemo nyo khugege. (Neh. 1:11; 2:7, 8; 5:14) Nga dundrugeya khu sigaradzo nyo khaguri esi Nehemiya a emisanidego naso. Uye tugude gu khuye vaJudha va di gu thumisa tempele gasi gu gira silo si nga ba si si ningi wuzundzo Jehovha. Nigu, kha va nga ba va phasa vaLevhi khu miningelo yawe kha nga edzi Nayo wa Jehovha wu nga ba wu lomba khidzo. Va di si engisi nayo wa Jehovha maningano ni Sabhadho nigu vambe gwawe va di gu tshadha ni vanyamayi va nya mayigo ava va nga ba va si khozeyi Jehovha. Ghovherinadhori Nehemiya a di yede gu gira gilogyo gasi gu lulamisa gigaradzo gegi. — Neh. 13:4-30.

10. Nehemiya emisanide kharini ni sigaradzo saye?

¹⁰ Nehemiya kha thumisa giemo gyaye nya wufumo gasi gu gurumedza vathu va Nungungulu gu engisa gugola gwaye. Wulangani nya isoso, uye a di gombeya ga Jehovha a lomba giphaso, a bwe a hevbudza vathu milayo ya Jehovha. (Neh. 1:4-10; 13:1-3) Nehemiya gambe thumide ni vandriyaye, a bwe a va phasa gu vbahedza mabhiyo ya Jerusalema. —  Neh. 4:15.

11. Khu guya khu 1 Vatesalonika 2:7, 8, madhota ma yede gu khathaleya kharini libandla?

¹¹ Adzina madhota kha ma na nga emisana ni sigaradzo nyo fane ni esi sa Nehemiya, ganiolu ayo ma nga pimedzeya giyeyedzo gyaye khu dzindziya nyo hambanehambane. Khu giyeyedzo, ayo ma gu dzi garadzeya gu phasa vandriyathu. Nigu, ayo kha ma thumisi malungelo yawe gasi gu dzikhusedza. Wulangani nya isoso, ma gu khathaleya libandla khu lihaladzo. (Leri 1 Vatesalonika 2:7, 8.) Khu kotani nya olu va dzi nogisago va bwe va haladza vambe khu lisine, avo va gu ganeya ni vandriyathu khu ndziya nya lihaladzo. Andrew, lidhota limwedo nyo vidzwe, wari khuye: “Nyi wonide gu kheni lidhota la gu ba liri ni wuwadi ni wupari, si ngu khuha ngudzu myonyo ya vandriyathu. Makhalelo yoyo ma gu kutsa  libandla gu thumisana gwadi ni madhota.” Ndriyathu Tony a thumidego khu tepo nyo laphe kha nga lidhota, wari khuye: “Nya gu zama gu thumisa wusingalagadzi wu gomogo omu ga Vafilipi 2:3, nyi bwe tepo yatshavbo nyi zama gu dzi gira nyalidede ga vatshavbo. Isoso si ngu nyi phasa gu potsa gu mba gurumedza vambe gu nyi engisa.”

12. Khu ginani si gu sa lisima gu madhota ma dzi nogisa?

¹² Madhota ma yede gu dzinogisa kha nga Jehovha. Ambari olu Jehovha a gu Pfhumu yi khugegidego ndzadzini ni mafuni, uye a ngu “noga” gasi gu dusa ‘gisiwana wumbwani.’ (Ndzi. 18:35; 113:6, 7) Khu lisine, Jehovha a ngu nyenya va nya gu dzikhusedza. — Mav. 16:5.

13. Khu ginani lidhota li yedego gu woneleya esi li ganeyago ni edzi li ganeyago khiyo?

¹³ Mweyo nya dzindziya nya gu lidhota li engisa Jehovha khu gu li woneleya esi li ganeyago ni edzi li ganeyago khidzo. La gu mba gira isoso, adzina li nga ganeya gu vbaladzeya la gu mba ningwa githawo khu ndriyathu nyo khaguri. (Jak. 1:26; Gal. 5:14, 15) Andrew a khumbugidwego gupheyani, wari khuye: “Ndriyathu a gu mba nyi ninga githawo, dzimbe dzitepo nyi ngu ba nyi dogoreya ni gu mu hakha khu ndziya nya mbasi yadi. Ganiolu, nyi ngu dundrugeya khu siyeyedzo sa vathu nyo tumbege va omu nya Bhibhiliya, nigu isoso si ngu nyi phasa gu hevbula lisima nyo dzinogise ni gu khala muthu nyo rule.” Madhota nya mangi ma gu yeyedza gu khayo ma ngu engisa Jehovha khu gu yeyedza lihaladzo ni gu bonga tepo va bhulago ni vandriyathu libandlani gupata ni madhota khwathu. — Kol. 4:6.

14. Khu wevbini thumo owu Jehovha a ningidego vapapayi, nigu ginani a gi vireyago gwavo?

¹⁴ Jehovha hathide vapapayi kha nga mihungo nya dzindranga, nigu Nungungulu a gu vireya gu khuye va laya ni gu hevbudza sanana sawe. (1 Kor. 11:3; Efes. 6:4) Ganiolu, isoso kha si thuli gu khiso vavelegi va yede gu thumisa giemo gyawe khedzi va dzinago khidzo. Jehovha khuye muvangi nya ndranga, khu kharato vapapayi va yede gu lomba Jehovha a va phasa gu khathaleya dzindranga dzawe. (Efes. 3:14, 15) Vapapayi va gu yeyedza gu khavo va ngu engisa Jehovha khu gu thumisa malungelo yawe khu ndziya yi tsakisago Nungungulu. Avo va ngati nya singi khu gu hevbula khu gu vbanya ga Pfhumu Dhavhidhe.

15. Khu ginani Pfhumu Davhidhe a gu giyeyedzo nya gyadi ga vapapayi?

¹⁵ Jehovha hathide Dhavhidhe kha nga hungo nasiri basi nya ndranga yaye ganiolu wa vatshavbo vaIsrayeli. Kha nga Pfhumu, Dhavhidhe a diri ni makodzelo nya mangi. Dzimbe dzitepo uye thumiside wufumu wowo gasi gu gira sighoho nya sikhongolo ngudzu. (2 Sam. 11:14, 15) Ganiolu uye yeyedzide gu khuye a ngu engisa Jehovha khu gu dzumeya gu laywa khuye. Tepo a nga gombeya ga Jeovha, uye a di mu embeya  edzi a nga ba adzipwa khidzo a bwe a dzi garadzeya gu engisa wusingalagadzi wa Jehovha. (Ndzi. 51:1-4) Gasi gu engedzeya, uye yeyedzide gu dzi nogisa a bwe a dzumeya wusingalagadzi a ningidwego nasiri basi khu vama ganiolu khu vanyamayi gambe. (1 Sam. 19:11, 12; 25:32, 33) Dhavhidhe hevbude khu sighoho saye a bwe a vega gupima gwaye gwatshavbo avba nyo thumeye Jehovha.

16. Ginani egi vapapayi va nga gi hevbulago khu Dhavhidhe?

¹⁶ Ginani egi vapapayi va nga gi hevbulago khu Pfhumu Dhavhidhe? Uye kha nga thumisa malungelo a ningidwego khu Jehovha khu ndziya nyo vivbe. Uye dzumede sighoho a giridego ni gu dzumeya wusingalagadzi wa omu nya Bhibhiliya a ningidwego khu vambe. Wa gu gira isoso, ndranga yago yi na gu ninga githawo khu kotani nya gu dzi nogise gwago. Tepo u gombeyago ni ndranga yago, tuleya Jehovha monyo wago, khu kharato ndranga yago yi napwa edzi uwe u vbwetago khidzo gu phaswa ni gu gimbidziswa khuye. Nya lisima ga satshavbo, wona thumo wa Jehovha nga gilo nya lisima womini gwago. (Dhet. 6:6-9) Giyeyedzo gyago nya gyadi khigyo giningwa nya lisima ngudzu u nga ningago ndranga yago.

17. Khu wevbini thumo owu vamamayi va ningidwego khu Jehovha?

¹⁷ Jehovha ningide vamamayi thumo nya lisima ngudzu ndrangani, a bwe a va ninga thumo nyo phasedzeye guhevbudzani nya sanana. (Mav. 6:20) Esi vamamayi va si girago ni esi va si ganeyago si ngu khuha sanana sawe womini gwawe gwatshavbo. (Mav. 22:6) Hongoleni hi wonani esi vamamayi va nga si hevbulago avba nya giyeyedzo gya Mariya mamayi wa Jesu.

18-19. Vamamayi va nga hevbula ginani avba nya giyeyedzo gya Mariya?

¹⁸ Mariya a di gu yiti gwadi milowo. Uye a di gu ninga ngudzu githawo Jehovha nigu khade pari yaye nya yi khongolo. Uye a di gu gola gu gira esi Jehovha a si vbwetago ambari sa gu ba si thula gu vbindrugedza silo nyo khaguri womini gwaye. — Luka 1:35-38, 46-55.

¹⁹ Vamamayi, enu mu nga pimedzeya Mariya khu dzindziya nyo hambanehambane. Khu ndziya muni? Nyo pheye, khu gu simama gu tiyisa wupari wago ni Jehovha khu gu hevbula Bhibhiliya ni gu gombeya tepo yatshavbo. Nya wuvili, khu gu vbindrugedza silo nyo khaguri womini gwago gasi gu tsakisa Jehovha. Khu giyeyedzo, adzina u dandrisidwe khu vavelegi nya gi zangazangani, va ganeyago khu ndziya nya mba si yadi ni sanana sawe. Khu kharato adzina u nga pimisa gu khuwe si olovelegide gu sanana si pharwa khu ndziya yoyo. Ambari hwane nyo hevbule esi Jehovha a si vbwetago maningano ni gu dandrisa sanana, adzina si nga gu garadzeya gu simama na wu rude ni gu laphiseya monyo sanana sago, ngudzungundzu sa gu mba gu engisa, ni gu ba u garade. (Efes. 4:31) Wa gu dzipwa khu ndziya  yoyo, khya lisima gu tutumeya ga Jehovha khu nombelo. Mamayi nyo khaguri nyo pwani khu Lydia, wari khuye: “Dzimbe dzitepo nyi ngu gombeya ngudzu ga Jehovha gasi a nyi phasa gu mba ganeya malito nyo paye mwendro dzitshamba tepo sanana sangu si gu mba nyi engisa. Nyi ngu ba nyi ema gu ganeya naso, nyi gombeya ga Jehovha khu monyoni, gasi a nyi phasa. Gu gombeya si ngu nyi rudzisa.” — Ndzi. 37:5.

20. Khu gevbini gigaradzo vamamayi va tshanganago nagyo, nigu va nga gi pala kharini?

²⁰ Gimbe gigaradzo vambe vamamayi va tshanganago nagyo, khu gu mba kodza gu yeyedza sanana sawe gu khavo va ngu si haladza. (Tit. 2:3, 4) Nya vangi nya vamamayi vovo va dandrede mu dzindrangani omu va nga ba va si pharwi khu ndziya nya lihaladzo khu vavelegi vawe. Abari gu uwe u dandrisidwe kharato, u nga pimedzeyi gighoho gi giridwego khu vavelegi vago. Mamayi a engisago Jehovha a yede gu hevbula edzi a nga yeyedzago khidzo lihaladzo sanana saye. Adzina si nga mu garadzeya gu vbindrugedza mapimo yoyo, gudzipwa gogo ni mavbanyelo yoyo. Ganiolu, a gu gira isoso, uye gumogo ni sanana saye va na tsaka khu lisine.

21-22. Khu guya khu Isaya 65:13, 14, hi na wuyedwa khu ginani ha gu engisa Jehovha?

²¹ Pfhumu Dhavhidhe a di gu liti lisima nyo engise Jehovha. Lovide, khuye: “Sileletelo sa PFHUMU Nungungulu si lulamide, si ngu tsakisa monyo, guruma ga PFHUMU Nungungulu gomo safani, gu ngu wenengedza maho. Ni githumi gyago gi ngu ningwa khayo guti; oyu a ma landrisago, a na mana tshatshazelo.” (Ndzi. 19:8, 11) Muhuno hi nga wona guhambana gu gomogo avba nya vathu va engisago Jehovha ni ava va bombago wusingalagadzi nya lihaladzo wa Jehovha. Ava va engisago Jehovha va gu “embelela khu gutsaka nya myonyo yawe.” — Leri Isaya 65:13, 14.

²² Tepo madhota ni vapapayi ni vamamayi va dzi emiseyago gu engisa Jehovha, womi wawe wa gu vbindrugedza, dzindranga dzawe dza gu mana gu tsaka nigu libandla latshavbo la gu engedzeya gu pwana. Nya lisima ga satshavbo, avo va gu tsakisa monyo wa Jehovha. (Mav. 27:11) Ugogo khugo gutsaka nya gukhongolo ga gwatshavbo!