1-2. a) Khu ginani Harimagedhoni yi gu mahungu nya yadi ga vathu? b) Siwudziso muni hi na bhulago khiso avba nya ndrima yeyi?

INA u di ngapwa vathu na va gu fananisa Harimagedhoni ni nyimbi yi thumisago siphisa si gu ni makodzelo nyo fuvise satshavbo (guerra nuclear) mwendro ni mhango nyo khaguri nya tumbunugo? Guhambana ni isoso, esi Bhibhiliya yi si ganeyago khu Harimagedhoni sa gu pata mahungu nya yadi, gu gu gighelo gi hi girago hi tsaka. (Gutu. 1:3) Nyimbi nya Harimagedhoni kha yi na nga fuvisa vathu ganiolu yi na va vbulugisa! Si na kodzega kharini isoso?

² Bhibhiliya ya gu yeyedza gu khiyo nyimbi nya Harimagedhoni yi na vbulugisa vathu khu gu fuvisa yatshavbo mifumo nya vathu, yi bwe yi fuvisa wuvivbi yi wu tshikedza khu gululama, yi bwe gambe yi vhikeya mafu ga silo nyo vivbe. (Gutu. 11:18) Gasi gu hi pwisisa gwadi lisine leli, hongoleni hi bhulani khu siwudziso sesi nya sina: Ginani Harimagedhoni? Ginani gi na giregago na yi si gu vbohi? Hi nga gira kharini gipandre nya ava va na vbulugiswago nyimbini yeyi? Hi nga simama kharini na hi tumbegide kha nga olu Harimagedhoni yi yago yi hidzimeya?

3. a) Lito Harimagedhoni la gu thula ginani? b) Khu guya khu Gutuledwa 16:14, 16, khu ginani hi nga ganeyago gu khethu Harimagedhoni khandri wulanga nya lisine?

³ Leri Gutuledwa 16:14, 16. Lito “Harimagedhoni” lo manega gumogo basi omu nya Bhibhiliya, nigu la guta khavbo nya lito nya giHebheru li tshamuseyago gigomo gya Megidhu. Megidhu li diri limwedo nya madhoropa ya Israyeli wa gale. (Jos. 17:11) Ganiolu Harimagedhoni khandri lina nya wulanga nya lisine wu gomogo mafuni. Gasi gu ganeya lisine, go thudwa tepo “vafumeli vatshavbo va mafuni” va na tshanganago gasi gu wugeya Jehovha. (Gutu. 16:14) Ambari ulolo, avba nya ndrima yeyi hi na thumisa lito “Harimagedhoni” gasi gu thula nyimbi yi na giregago gitepwana hwane  nya gu ba dzipfhumu nya mafu dzi tshanganide. Ha gu dziti kharini gu khethu Harimagedhoni kha gu thudwi wulanga nya lisine? Gupheya, gimwalo gigomo nya lisine nyo pwani khigyo Megidhu. Nya wuvili, Megidhu gakone khandri gukhongolo ngudzu nyo kala va eneya gu tshangana “vafumeli vatshavbo va mafuni” ni masotshwa yawe gumogo ni siphisa sawe. Nya wuraru, kha nga hi na si wonago avba nya ndrima yeyi, nyimbi nya Harimagedhoni yi na pheya tepo “vafumeli” nya mafu va na wugeyago vathu va Nungungulu va vbanyago mayigoni nya mangi mafuni.

4. Khu ginani Nungungulu a ranago nyimbi yaye nya yikhongolo nyo hegise gu khuye Harimagedhoni?

⁴ Ina ka, khu ginani Jehovha a yelanisago nyimbi nyo hegise nya gikhongolo ni Megidhu? Dziteponi nya gulowe nya Bhibhiliya, dzinyimbi nya dzingi dzi di gu dwanwa Megidhu mwendro vbafuvbi ni kova wa Jezereyeli. Litshigu limwedo, Jehovha belede mweyo nya dzinyimbi dzodzo. Khu giyeyedzo, khu gu thumisa “mati ya Megidhu,” Nungungulu phaside mulamuli nya muIsrayeli Bharaki gu pala libutho la vakhanani li nga ba li thangedwa khu Sisera. Bharaki ni muprofeti Dhebhora va di bonga ngudzu Jehovha kholu a va phasidego gu pala khu giliwugiso. Va di emba, khavo: “Khu ndzadzini dzi di dwana dzinyeledzi . . . dzi wugela Sisera. Va di kukulutwa khu tsongo wa Kisomi.” — Val. 5:19-21.

5. Nyimbi nya Harimagedhoni yi hambanide ni nyimbi ya Bharaki khu ndziya muni?

⁵ Bharaki ni Dhebhora va segide ndzimo yawe khu malito yaya: “PFHUMU Nungungulu, valala vago va na fise guralo, aholu, avo va gu golago va na khale nga lidambo, avbo li dugago khu tshivba yaye yatshavbo.” (Val. 5:31) Ndrani nya Harimagedhoni, valala va Nungungulu va na fuviswa ganiolu vale va mu haladzago va na vbulugiswa. Ambari ulolo, gu na ni guhambana gu gumogo vbakari nya dzinyimbi dzedzi dza dzimbili. Nyimbini nya Harimagedhoni, vathu va Nungungulu kha va na nga dwana. Ambari gu soma matshari. Avo va na dzi garadzeya basi gu “dzi rudzisa,” va bwe va tumba Jehovha ni nyimbi yaye ya ndzadzini. — Isa. 30:15; Gutu. 19:11-15.

6. Jehovha a nga thumisa ginani gasi gu fuvisa valala vaye nyimbini nya Harimagedhoni?

⁶ Nungungulu a na fuvisa kharini valala vaye nyimbini nya Harimagedhoni? Adzina a nga thumisa dzindziya nya dzingi. Khu giyeyedzo, uye a nga thumisa sirevareva, maralala ni gulasa. (Joba 38:22, 23; Ezek. 38:19-22) Adzina a nga gira gu valala vaye va dwana khu gyawe. (2 Dzik. 20:17, 22, 23) Mwendro gu thumisa dzingilozi dzaye gasi gu fuvisa vatshavbo va nya guvivba. (Isa. 37:36) Ambari o thumisa ni gevbini, uye a na pala. Vatshavbo valala vaye va na fuviswa, nigu vatshavbo va nya gululama va na vbuluga. — Mav. 3:25, 26.

7-8. a) Khu guya khu 1 Vatesalonika 5:1-6, silo muni nyo mba olovelega si na huweledwago khu vafumeyi? b) Khu ginani malipha yoyo ma gu mhango?

⁷ Gu huweledwa nya “Litigo li lade, gu mwalo gilo,” gu na girega na li si gu vbohi “litshigu” la Jehovha. (Leri 1 Vatesalonika 5:1-6.) Omu ga 1 Vatesalonika 5:2, ‘litshigu la Jehovha’ lo thula tshanisa nya yikhongolo. (Gutu. 7:14) Hi na dziti kharini gu khethu tshanisa nya yikhongolo yi phede? Bhibhiliya yari khiyo gu na huweledwa silo nyo mba olovelega. Igyogyo gi na ba giri giwonegiso nyo khethu tshanisa nya yikhongolo yi phede.

⁸ Gu na huweledwa mahungu ma profetidwego, nyo pwani “Litigo li lade, gu mwalo gilo.” Khu ginani vafumeli va na ganeyago isoso? Ina vathangeyi nya wukhongeyi va na patega navo mahungoni yoyo? Adzina. Ganiolu hi ngu dziti gu khethu madhemoni ma na kutsedzeya vafumeli nya malipha gu ganeya malipha yoyo. Nigu, malipha yoyo ma na ba mari mhango, ngudzungudzu kholu ma na girago vathu va pimisa gu khavo gu rude narigo yo pheya tshanisa nya yikhongolo ga dzatshavbo, matimoni nya vathu. Khavbovbo, gu nata “khu gipitipiti, gumbemba  vbatshani gwawe. Va na khala nga nyamayi nya mimba gikhati a lumwago.” Ina ka, ginani gi na dugeleyago sithumi nyo tumbege sa Jehovha? Kha nga olu va si yitigo gwadi tepo yi na pheyago khiyo tshanisa nya yikhongolo, tepo yi na pheyago, adzina va nga thuruga, ganiolu avo kha va na nga thava.

9. Ina Jehovha a na fuvisa litigo la Sathane khu gumogo? Tshamuseya.

⁹ Jehovha kha na nga fuvisa litigo latshavbo la Sathane khu gumogo, nga edzi a giridego khidzo matshiguni ya Nowa. Wulangani nya isoso, uye gupheya a na fuvisa gipandre gimwegyo, gimbe a na thumisana nagyo khu gu landreya. A na pheya khu gu fuvisa Bhabhiloni nya khongolo, a gu watshavbo wukhongeyi nya malipha. Khavbovbo nyimbini nya Harimagedhoni, a na fuvisa simbe sipandre si patago politika, wusotshwa ni wurengisi. Hongoleni hi bhulani gwadi khu sipandre sesi sa sivili nya lisima.

10. Khu guya khu Gutuledwa 17:1, 6, ni 18:24, khu ginani Jehovha a na fuvisago Bhabhiloni nya khongolo?

¹⁰ “Gu lamudwa nya gibhayi gikhongolo.” (Leri Gutuledwa 17:1, 6; 18:24.) Bhabhiloni nya khongolo a ngu nyenyezisa ngudzu lina la Nungungulu. Uye a gu phalalegiseya malipha khu Nungungulu. Gu fana ni nyamayi nya gibhayi, wukhongeyi nya malipha kha wu tumbegi ga Jehovha khu gu dzi pata ni vafumeyi nya mafu. Uwo wa gu tshanisa vathu vaye, ni gu va surubanya dzitsapawu dzawe. Nigu, wukhongeyi nya malipha wu ngu songa vathu nya vangi, gupata ni simbe sithumi sa Nungungulu. (Gutu. 19:2) Jehovha a na tshungunula kharini wukhongeyi nya malipha?

11. “Girengo nya gufuvile” gyo emeya ginani, nigu Nungungulu a na gi thumisa kharini gasi gu wugeya Bhabhiloni nya khongolo?

¹¹ Jehovha a na thumisa “likhumi dzikheho” nya “girengo nya gufuvile” gasi gu tshungunula ‘gibhayi nya gikhongolo.’ Girengo gegi nyo fananise gyo emeya Nações Unidas. Likhumi dzikheho dzo emeya dzihengeledzano nya politika dzi phasedzeyago Nações Unidas. Khu tepo yi vegisidwego khu Nungungulu, dzihengeledzano dzodzo nya politika dzi na wugeya Bhabhiloni nya khongolo. Idzo dzi na “mu gira gisiwana, [dzi] mu diga wumbwiri,” khu gu mu dzegeya dzatshavbo dzithomba dzawe, ni gu tivegisa wuvivbe waye. (Gutu. 17:3, 16) Gutshungunudwa gogo gu  na vbiredza ngudzu, nyo bwe khatshi gu di girega khu litshigu limwedo basi. Khu kharato ava va seketeyago wukhongeyi nya malipha va na homoga myonyo, ngudzungudzu kholu Bhabhiloni nya khongolo a talago khu dzikhusedza, khuye: “Nyi khade vbagikhalotunu nya wufumu kha nga mufumeli, kha nyiri noni, gambe gima kha nyi napwa wuvi.” — Gutu. 18:7, 8.

12. Jehovha kha na nga dzumeleya gu khuye vathu nya litigo va gira ginani, nigu khu ginani?

¹² Nungungulu kha na nga dzumeleya gu khuye vathu nya litigo va fuvisa vathu vaye. Avo va ngu dzipwa matshandza khu gu emeya lina laye, va bwe va engisa gileletelo gyaye nyo dzi hambanise ni Bhabhiloni nya khongolo. (Mith. 15:16, 17; Gutu. 18:4) Avo gambe va ngu dzi garadzeya gu phasa vambe gu dzi hambanisa naye. Khu kharato, ambari olu sithumi sa Jehovha si na vhikedwago tepo Bhabhiloni nya khongolo a na tshungunudwago, iso si na simama gu manega ni gukhodwa nyo tiye gasi gu timiseya esi si na landreyago.

13. a) Khu mani Gogi? b) Khu guya khu Ezekiyeli 38:2, 8, 9, ginani gi na kutsago Gogi gu wugeya vathu va Nungungulu?

¹³ Guwugeya ga Gogi. (Leri Ezekiyeli 38:2, 8, 9.) Hwane nyo tshungunudwe wukhongeyi watshavbo nya malipha, gu na tshala basi hengeledzano mweyo nya wukhongeyi, gu gu sithumi sa Jehovha. Isoso si na mu vbisa Sathane. Uye a na yeyedza likhulo laye khu gu ganeya malito “nya guvivbe,” gu gu malipha ya madhemoni ma na kutsedzeyago hengeledzano nya mayigo gu wugeya sithumi sa Jehovha. (Gutu. 16:13, 14) Hengeledzano yoyo yo ranwa gupwani i “Gogi givelegwa gya tigoni ga Magogi.” Tepo hengeledzano yoyo yi na wugeyago vathu va Jehovha, yi na ba yi pheya Harimagedhoni. — Gutu. 16:16.

14. Ginani egi Gogi a na gi tugulago?

¹⁴ Gogi a na tumba “libogo nya wuthu,” gu gu matshari yaye. (2 Dzik. 32:8) Ethu hi na tumba Jehovha Nungungulu wathu, iso si na wonegago nga khatshi wupumbo ga vathu nya litigo. Khu ginani? Kholu Bhabhiloni nya khongolo a na ni tshivba, ganiolu vanungungulu vaye kha va na si kodza gu mu vbulugisa ga “girengo” gile ni ga “likhumi dzikheho” dzile! (Gutu. 17:16) Khu kharato Gogi a na pimisa gu khuye a na hi fuvisa khu guvbevbuga. “Kha nga lipfhi li fenengedzago litigo,” uye a na wugeya vathu va Jehovha. (Ezek.  38:16) Ganiolu Gogi a na tugula gu khuye o hongola gumbembani. Gu fana ni Faro yiphwani nyo fuviye, Gogi a na tugula gu khuye a gu dwana ni Jehovha. — Ekiso. 14:1-4; Ezek. 38:3, 4, 18, 21-23.

15. Ginani egi Jesu a na girago nyimbini nya Harimagedhoni?

¹⁵ Kristo gumogo ni nyimbi yaye ya dzandzini va na vhikeya vathu va Nungungulu va bwe va tshungunula khu gu vbeleya Gogi ni matshari yaye. (Gutu. 19:11, 14, 15) Ganiolu, ahati nala nya khongolo wa Jehovha, Sathane, a na sengago hengeledzano nya mayigo gu wugeya vathu va Nungungulu nyimbini nya Harimagedoni ke? Jesu a na mu mola gumogo ni madhemoni yaye, a va theya phalani nyo ete khu 1000 myaga. — Gutu. 20:1-3.

16. a) Hi nga yeyedza kharini gu khethu hi ngu muti Nungungulu? b) Ginani gi na dugeleyago vathu va tidwago khu Jehovha nyimbini nya Harimagedhoni?

¹⁶ Gani hi vaphya lisineni, gani hi va gale, gasi gu vbuluga nyimbini nya Harimagedhoni gu vbwetega hi yeyedza gu khethu hi ngu muti Nungungulu hi bwe hi engisa ‘Mahungu nya yadi ya Pfhumu yathu Jesu Kristo.’ (2 Tes. 1:7-9) Ethu ha gu yeyedza gu khethu hi ngu muti Nungungulu tepo hi tigo esi a si golago, esi a si nyenyago ni milayo yaye. Ha gu yeyedza gambe isoso tepo hi mu haladzago ni gu mu engisa, hi bwe hi khozeya uye basi. (1 Joh. 2:3-5; 5:3) Tepo hi yeyedzago gu khethu hi ngu muti Nungungulu, ha gu manega ni lithomo nyo tidwe khuye, si thulago guvbulugiswa nyimbini nya Harimagedhoni. (1 Kor. 8:3) Khu ndziya muni? Kholu gu tidwa khuye sa gu thula gu tsakedwa khuye.

17. Sa gu thula ginani gu engisa “mahungu nya yadi ya Pfhumu yathu Jesu Kristo”?

¹⁷ “Mahungu nya Yadi ya Pfhumu yathu Jesu Kristo” ma gu pata latshavbo lisine li hevbudzidwego khu Jesu, li gomogo omu nya Lito la Nungungulu. Ethu ha gu engisa mahungu nya yadi tepo hi vbanyago khayo. Gu engisa gogo go pata gu simama gu thangisa Mufumo, gu vbanya khu guya khu milayo nya yadi ya Nungungulu, hi bwe hi tshumayela Mufumo wa Nungungulu. (Mat. 6:33; 24:14) Sa gu pata gambe gu seketeya maKristo ma todzidwego tepo ma khathaleyago thumo wawe nya lisima ngudzu. — Mat. 25:31-40.

18. Makristo ma todzidwego ma na tshatshazeya wuwadi va yeyedzwago, khu dzindziya muni?

 ¹⁸ Sithumi si todzidwego sa Nungungulu, nugunugu si na tshatshazeya “dzimbe dzinvuta” khu kotani nya wuwadi watshavbo dzi va yeyedzago. (Joh. 10:16) Khu ndziya muni? Na yi si gu pheyi nyimbi nya Harimagedhoni, vatshavbo ava nya 144 000 va na wuswa va hongola ndzadzini kha nga maphuvbo ma si figo. Khavbovbo, avo va na patega nyimbini ya dzandzini, yi na tshigirago Gogi yi bwe yi vhikeya vathu va Jehovha. (Gutu. 2:26, 27; 7:9, 10) Khu lisine, gidzemo nya gikhongolo gi na ni lithomo nyo phasedzeye sithumi si todzidwego sa Jehovha na si ngo romo mafuni!

19-20. Ambari olu hi tshanganago ni sigaradzo, hi nga simama kharini na hi tumbegide kha nga olu Harimagedhoni yi hidzimeyago?

¹⁹ Ndrani nya matshigu yaya nyo hegise, sithumi sa Jehovha nya singi si ngu emisana ni sigaradzo. Ambari ulolo, hi nga timiseya khu gu tsaka. (Jak. 1:2-4) Sihalo wakone, nombelo wu khugeyago monyoni. (Luka 21:36) Kha hi yeli gu gombeya basi, ganiolu tepo yatshavbo hi yede gu hevbula Lito la Nungungulu hi bwe hi dundrugeya khesi hi si hevbulago, gupata ni siprofeto si ganeyago khesi si na dugeleyago matshiguni yathu. (Ndzi. 77:12) Ha gu gira isoso, hi bwe hi thuma khu sighingi thumoni nyo tshumayele, hi na simama gu tiyisa gukhodwa gwathu ni gutumba gwathu.

²⁰ Dundrugeya khedzi u na tsakago khidzo tepo Bhabhiloni nya khongolo a na tshungunudwago ni tepo yi na vbeyago Harimagedhoni! Nigu nya lisima ngudzu, dundrugeya khedzi u na tsakago khidzo tepo lina la Nungungulu ni wuzundzo waye si na rungudzwago! (Ezek. 38:23) Khu lisine Harimagedhoni mahungu nya yadi ga vale va mu tigo Nungungulu, va engisa Gyanana gyaye, va bwe va timiseya kala mahegiso. — Mat. 24:13.