NDRIMA NYA GIHEVBULO 7
Wuthangeyi owu madhota ma gu nawo libandlani
Kha nga Kristo a gu hungo nya libandla. Kristo wurumba waye, khuye Muvbanyisi nya libandla a gu givili gyaye.” — EFES. 5:23.
NDZIMO 137 Vanyamayi nyo tumbege
ESI HI NA SI HEVBULAGO AVBA NYA NDRIMA YEYI *
1. Khu gevbini gimwegyo nya sighelo gi girago gu ndranga ya Jehovha yi manega ni gu pwana?
HI NGU tsaka khu gu gira gipandre nya ndranga ya Jehovha. Khu ginani ndranga yathu yi gu na ni gurula ni gu pwanana? Gimwegyo nya sighelo khu gu hatshavbo hi ngu dzi garadzeya gu ninga githawo ava Jehovha a va ningidego wuthangeyi nyo khaguri. Khu lisine, ha gu pwisisa gwadi malulamiselo ya Jehovha maningano ni wuthangeyi hi na manega ni gu pwana nya gu khongolo ngudzu.
2. Siwudziso muni hi na hlamulago avba nya ndrima yeyi?
2 Avba nya ndrima yeyi hi na bhula khu vale va gu na ni wuthangeyi libandlani. Hi na hlamula gambe siwudziso si landreyago: Khu wevbini thumo owu Jehovha a ningidego vandriyathu nya vanyamayi? Ina vandriyathu vatshavbo nya vama mihungo ya vatshavbo vandriyathu nya vanyamayi? Ina wuthangeyi owu madhota ma gu nawo, wu ngu fana ni wuthangeyi owu hungo nya ndranga a gu nawo avba ga mwangadzi waye ni sanana saye? Gupheya hi na wona edzi hi yedego gu va wona khidzo vandriyathu nya vanyamayi.
HI YEDE GU VA WONA KHARINI VANDRIYATHU NYA VANYAMAYI?
3. Ginani gi nga hi phasago gu ninga ngudzu lisima thumo owu vandriyathu nya vanyamayi va wu girago?
3 WHi ngu ninga lisima thumo owu vandriyathu nya vanyamayi va wu girago gasi gu khathaleya dzindranga dzawe, gu tshumayela mahungu nya yadi ni gu phasa vambe libandlani. Hi na va ninga ngudzu lisima ha gu dundrugeya khedzi Jehovha ni Jesu va wonago khidzo vandriyathu nya vanyamayi. Hi na hevbula gambe khedzi hi nga pharago khidzo vanyamayi khu gu pimedzeya edzi Pawulo a va pharidego khidzo.
4. Bhibhiliya ya gu yeyedza kharini gu khiyo Jehovha a ngu ninga lisima vanyamayi kha nga edzi a ningago khidzo vama?
4 Bhibhiliya ya gu ganeya gu khiyo Jehovha a ngu ninga lisima vanyamayi kha nga edzi a ningago khidzo lisima vama. Khu giyeyedzo, iyo yi ngu ganeya gu khiyo dziteponi dza vapostoli, Jehovha ningide liphuvbo nya guage vama ni vanyamayi gasi va gira mithumo nyo samadzise nya nga gu ganeya malimi nyo hambanehambane. (Mith. 2:1-4, 15-18) Vanyamayi ni vama va todzwago khu liphuvbo nya guage va na ni gutumba nyo ya fume ni Kristo. (Gal. 3:26-29) Vanyamayi ni vama va na hakha tshatshazelo nyo vbanye kala gupindruga mafuni. (Gutu. 7:9, 10, 13-15) Nigu vama ni vanyamayi va ningidwe thumo nya gu hevbudze ni gu tshumayela mahungu nya yadi. (Mat. 28:19, 20) Khu giyeyedzo, libhuku la Mithumo la gu ganeya khu ndriyathu nya nyamayi nyo pwane khu Prisila. Uye ni mwama waye Akila va tshamusede lisine Apolo, mwama a nga ba a etide khu gu hevbula Milowo. — Mith. 18:24-26.
5. Libhuku la Luka 10:38, 39, 42, la gu yeyedza kharini gu khilo Jesu a ngu ninga githawo vanyamayi?
5 Jesu a di gu ninga githawo vanyamayi. Uye a di si pimedzeyi Vafarisi va nga ba hevbudza gu khavo vanyamayi va mwalo lisima. Avo va di si ganeyi ni vanyamayi vbakari nya vathu nigu avo kha va nga ba va va hevbudza Milowo. Wulangani nya isoso, Jesu a di gu hevbudza lisine vanyamayi kha nga edzi a nga ba a hevbudza khidzo vama. * (Leri Luka 10:38, 39, 42.) Uye dzumelede gambe vanyamayi gu va hongola naye gutshumayelani. (Luka 8:1-3) Nigu uye ningide lithomo vanyamayi nya gu ya tivise vapostoli khuye wusidwe khu gufani. — Joh. 20:16-18.
6. Ginani egi mupostoli Pawulo a nga gira gasi gu yeyedza gu khuye a di gu ninga githawo vanyamayi?
6 Mupostoli Pawulo dundrugiside Thimoti gu ninga githawo vanyamayi. Uye a mu embede gu khuye a di yede gu phara “vanyamayi nya vakhongolo nga vamayi” nigu ‘vale nya dzimbiri, nga vandriyaye.’ (1 Thim. 5:1, 2) Ambari olu Pawulo a giridego nya singi gasi gu phasa Thimoti gu manega ni gukhodwa nyo tiye, uye a di gu dziti gu khuye mamayi wa Thimoti ni vhovho waye khavo va nga pheya khavo gu mu hevbudza Milowo. (2 Thim. 1:5; 3:14, 15) Omu nya lidangaliya laye ga vaRoma, Pawulo loside vandriyathu nya vanyamayi khu malina yawe. Pawulo khandri a di wona basi thumo owu vandriyathu nya vanyamayi va nga ba va gira, ganiolu, uye bongide gambe khu thumo wawe.— Rom. 16:1-4, 6, 12; Filp. 4:3.
7. Siwudziso muni hi na si hlamulago olu?
7 Ga dzindrimana nya gu pheye hi wonide gu khethu Bhibhiliya kha yi ganeyi gu khiyo vanyamayi va mwalo lisima gu vbindra vama. Vandriyathu nya vanyamayi, nyo golege, va ngu phasa ngudzu libandlani nigu madhota ma ngu vbweta giphaso gyawe gasi gu libandla li simama ni gurula ni gu pwana. Ganiolu, gu na ni simbe siwudziso si vbwetago mihlamulo. Khu giyeyedzo: Khu ginani Jehovha a vbwetago gu khuye vandriyathu nya vanyamayi va ambala gilogyo hungoni? Kha nga olu vandriyathu nya vama a gu avo basi va emisidwego kha nga madhota ni vaphasedzeyi nya libandla, ina sa gu thula gu khiso vatshavbo mihungo ya vandriyathu vatshavbo nya vanyamayi?
INA VANDRIYATHU VATSHAVBO NYA VAMA MIHUNGO YA VANDRIYATHU VATSHABVO NYA VANYAMAYI?
8. Guya khu Vaefeso 5:23, ina vatshavbo vandriyathu nya vama mihungo ya vatshavbo vandriyathu nya vanyamayi? Tshamuseya.
8 Vandriyathu nya vama khandri mihungo ya vatshavbo vandriyathu nya vanyamayi libandlani, Kristo khuye hungo. (Leri Vaefeso 5:23.) Ndrangani, mwama khuye a thangeyago mwangadzi waye. Gyanana nya gikhwathana gi bhabhatisidwego khandri igyo hungo wa mamayi wagyo. (Efes. 6:1, 2) Libandlani, madhota ma na ni wuthangeyi nyo khaguri ga vandriyathu nya vanyamayi ni vandriyathu nya vama. (1 Tes. 5:12; Hebh. 13:17) Vandriyathu nya vanyamayi nya sikwendra va si vbanyigo ni vavelegi vawe, va ngo simama gu ninga githawo vavelegi vawe ni madhota. Ambari ulolo, gufana ni vandriyathu nya vama libandlani, anavo hungo wawe khu Jesu.
Gikwendra gi si vbanyigo ni vavelegi vagyo gyomo vbavbatshi nya wuthangeyi wa Jesu (Wona ndrimana 8)
9. Khu ginani vandriyathu nya vanyamayi dzimbe dzitepo si lombago gu va ambala gilogyo hungoni?
9 Lisine gu Jehovha emiside vama gasi gu thangeya ni gu hevbudza libandlani, ganiolu, uye kha ninga thumo wowo vanyamayi. (1 Thim. 2:12) Khu ginani? Khu gighelo gyagimwegyo gi giridego Jehovha a hatha Jesu kha nga hungo nya vama gasi gu libandla li simama na li sasamedzidwe gwadi. Sa gu lomba gu ndriyathu nya nyamayi a gira thumo owu khu giolovedzo wu girwago khu ndriyathu nya mwama, Jehovha a gu vbweta gu khuye ndriyathu nya nyamayi a ambala gilogyo hungoni. * (1 Kor. 11:4-7) Jehovha a gu vbweta gu khuye vandriyathu nya vanyamayi va ambala gilogyo hungoni, khandri khu gu avo kha va phasi gilo, ganiolu, gasi gu va yeyedza gu khavo va ngu engisa milayo yaye. Olu hi na hlamula giwudziso gi gu khigyo: Khu wevbini wuthangeyi owu mihungo nya dzindranga ni madhota ma gu nawo?
WUTHANGEYI WA MIHUNGO NYA DZINDRNGA NI MADHOTA
10. Khu ginani lidhota dzimbe dzitepo li vbwetago gu vega milayo libandlani?
10 Madhota ma ngu haladza Kristo nigu ayo ma ngu haladza “dzinvuta” edzi Jehovha ni Jesu va va ningidego gasi gu dzi khathaleya. (Joh. 21:15-17) Khu kotani nya olu lidhota li khataleyago libandla, ilo adzina li nga dzi fananisa ni papayi ndrani nya libandla. Khu kharato ilo li nga pimisa gu khilo, kha nga olu hungo nya ndranga a gu ni fanelo nyo vege milayo ndrangani gwaye gasi gu yi vhikeya, lidhota li nga vega milayo eyi yi na vhikeyago dzinvuta dza Nungungulu. Nigu vambe vandriyathu va nga kutsedzeya madhota gu gira isoso khu gu va ma lomba gu ma va hungeya esi va yedego gu gira. Ganiolu, ina madhota libandlani ni mihungo nya dzindranga va na ni wuthangeyi nyo fane?
Madhota ma gu phasa libandla gu li dzipwa na li gu haladzwa li bwe li dzipwa vbafuvbi ni Jehovha. Jehovha, ningide madhota rwalo nya gu duse khu libandlani gighohi gi si dzi layigo (Wona dzindrimana 11-12)
11. Wuthangeyi owu mihungo nya dzindranga yi gu nawo wa gufana khu ndziya muni ni wuthangeyi nya madhota?
11 Pawulo tshamusede gu khuye wuthangeyi nya mihungo nya dzindranga wu ngu fana khu dzindziya nyo khaguri ni wuthangeyi nya madhota. (1 Thim. 3:4, 5) Khu giyeyedzo, Jehovha a gu vbweta gu khuye sivbango nya ndranga si engisa hungo nya ndranga. (Kol. 3:20) Nigu a gu vbweta gu khuye vandriyathu libandlani va engisa madhota. Jehovha a gu vireya gu khuye mihungo nya dzindranga ni madhota va khathaleya khu liphuvboni ava va gomogo vbavbatshi nya wuthangeyi wawe. Gufana ni mihungo nya yadi nya dzindranga, madhota ma ngu phasa ava va tshanganago ni sigaradzo libandlani. (Jak. 2:15-17) Nigu Jehovha a gu vbweta gu khuye madhota ni mihungo nya dzindranga va phasa vambe gu engisa milayo yaye. Uye gambe a ngu gengedza madhota ni mihungo nya dzindranga gu khuye “[Mu] nga vbindrisi avba gu lovidwego khu Nungungulu” omu nya Bhibhiliya. — 1 Kor. 4:6.
Mihungo nya dzindranga yi ningidwe wuthangeyi khu Jehovha gasi gu thangeya dzindranga dzawe. Hungo nya ndranga a gu na ni lihaladzo, a gu pheya khu gu bhula ni mwangadzi waye na si gu hungi gu gira silo (Wona ndrimana 13)
12-13. Kha nga si yeyedzwago omu ga Varoma 7:2, thumo owu mihungo nya dzindranga yi ningidwego wu hambanide kharini ni thumo nya madhota?
12 Ambari ulolo, gomo gu hambana avba nya thumo wu ningidwego lidhota ni thumo wu ningidwego hungo nya ndranga. Khu giyeyedzo, Jehovha hathide madhota gasi ma thuma kha nga valamuli a bwe a ma ninga rwalo nya gu duse khu libandlani gighohi gi si dzi layigo.— 1 Kor. 5:11-13.
13 Ambari ulolo, Jehovha ningide mihungo nya dzindranga wuthangeyi nyo khaguri owu a nga ne ninga madhota. Khu giyeyedzo, Jehovha ningide wuthangeyi mihungo nya dzindranga nyo vege milayo ndrangani yi bwe yi tiyisega gu khiyo yi ngu landredwa gani. (Leri Varoma 7:2.) Nigu hungo nya ndranga na ni fanelo nya gu vege ora eyi sanana si yedego gu vboha khiyo ndrangani. Ni gu gambe hungo nya ndranga na ni fanelo nya gu tsayise sanana saye sa gu mba engisa milayo yi vegidwego. (Efes. 6:1) Khu lisine, hungo nya ndranga a gu ni lihaladzo a gu pheya khu gu bhula ni mwangadzi waye na si gu vegi milayo ndrangani, kholu avo va vavili “nyama mweyo.” * — Mat. 19:6.
NINGA GITHAWO KRISTO KHOLU KHUYE HUNGO NYA LIBANDLA
Jesu na gu thangedwa khu Jehovha, a gu ninga sileletelo libandla nya wuKristo. (Wona ndrimana 14)
14. Ginani egi Marko 10:45 a ganeyago gi yeyedzago gu khigyo Jehovha giride gwadi khu gu hatha Jesu kha nga hungo nya libandla? b) Khu wevbini thumo nya Huwo nya Guthangeye? (Wona kwadru yi gi khiyo: “ Thumo wu ningidwego Huwo nya Guthangeye.”)
14 Khu gu thumisa dzegiso, Jehovha rengide womi wa moyo ni moyo wathu libandlani ni wa vatshavbo vale va khodwago ga Jesu. (Leri Marko 10:45; Mith. 20:28; 1 Kor. 15:21, 22) Khu kharato, si ngu pwala gu ba Jehovha a hathide Jesu, oyu a ningedego womi waye khu kotani yathu, gu khala hungo nya libandla. Khu kharato, Jesu a na ni fanelo nya gu vege milayo eyi vathu, dzindranga ni libandla latshavbo va yedego gu yi landrisa a bwe a tiyisega gu khuye ina milayo yoyo yi ngu landriswa gani. (Gal. 6:2) Ganiolu, Jesu a ngu gira nya singi gu vbindra gu vega milayo basi. Uye a ngu khatala ni gu haladza moyo ni moyo wathu. — Efes. 5:29.
15-16. Ginani u gi hevbulago khu esi si ganedwego khu ndriyathu nya nyamayi nyo pwani khu Marley ni ndriyathu nya mwama nyo pwani khu Benjamin?
15 Vandriyathu nya vanyamayi va nga yeyedza gu khavo va ngu ninga githawo Kristo khu gu engisa sileletelo va ningwago khu ava uye a va hathidego gasi gu thangeya. Vandriyathu nya vanyamayi va ngu seketeya esi si ganedwego khu ndriyathu nya nyamayi nyo pwani khu Marley a vbanyago Estados Unidos a nga khuye: “Nyi ngu ninga lisima lithomo nyi gu nalo nyo khale mwangadzi ni ndriye libandlani. Nyo simama gu dzigaradza gasi nyi ninga githawo wuthangeyi owu Jehovha a ningidego mwama wangu ni madhota. Esi si ngu nyi vbevbugeya gu gira kholu mwama wangu ni vandriyathu libandlani va ngu nyi ninga githawo nigu va ngu bonga khu esi nyi girago.”
16 Vandriyathu nya vama, va gu yeyedza gu khavo va ngu pwisisa malulamiselo nya wuthangeyi khu gu ninga githawo ni gu zundza vandriyathu nya vanyamayi. Ndriyathu moyo nyo pwani khu Benjamin, a vbanyago Inglaterra wari khuye: “Nyi hevbude nya singi khu mihlamulo ya vandriyathu nya vanyamayi mitshanganoni ni mawonelo va ma ningeyago maningano ni gu tshumayela ni gu hevbudza khu ndziya nya yadi. Khu lisine thumo va wu girago khwa lisima ngudzu.”
17. Khu ginani hi yedego gu ninga githawo malulamiselo aya Jehovha a giridego nya gu vambe va manega ni wuthangeyi?
17 Vama, vanyamayi, mihungo nya dzindranga ni madhota libandlani va gu ninga githawo malulamiselo aya Jehovha a ma giridego nya gu vambe va manega ni wuthangeyi, libandla li na manega ni gurula. Nigu nya lisima ga satshavbo khu gu hi na dhumisa Papayi wathu nya lihaladzo wa ndzadzini, Jehovha. — Ndzi. 150:6.
NDZIMO 123 Seketeya hengeledzano ya Jehovha khu gutumbega
^ par. 5 Khu wevbini thumo owu Jehovha a ningidego vandriyathu nya vanyamayi libandlani? Ina vandriyathu vatshavbo nya vama mihungo ya vatshavbo vandriyathu nya vanyamayi? Ina wuthangeyi owu madhota ma gu nawo, wu ngu fana ni wuthangeyi owu mihungo nya dzindranga yi gu nawo? Avba nya ndrima yeyi hi na wona edzi Bhibhiliya yi nga hi phasago khidzo gu mana mihlamulo nya siwudziso sesi.
^ par. 5 Wona ndrimana 6 avba nya ndrima nya gihevbulo yi gu khiyo: “Phasedzeya vandriyago nya vanyamayi libandlani,” nya Mukhedziseyi nya Setembro nya 2020.
^ par. 9 Wona kwadru yi gu khiyo: “ Khu ga sevbini siemo avba ndriyathu nya nyamayi a yedego gu ambala gilogyo hungoni?”
^ par. 13 Gasi guti oyu a gu na ni fanelo nya gu hathe libandla eli ndranga yaye yi na hongolago yi ya tshangana umo, wona dzindrimana 17-19 nya ndrima nya gihevbulo yi gu khiyo: “Ninga lisima vatshavbo vandriyathu libandlani” yi gomogo omu nya Mukhedziseyi nya Agosto nya 2020.
^ par. 59 Gasi gu mana mambe mahungu nyo enegedzelege khu mahungu yaya, wona libhuku “Continue a Amar a Deus,” pajina 244.
^ par. 64 Gasi guti nya singi khu thumo wu ningidwego Huwo nya Guthangeye, wona Mukhedziseyi nya 15 nya Julho nya 2013, dzipajina 20-25, khu giPutukezi.
