1-2. Ginani egi ngilozi yi embedego vanyamayi thowoni ga Jesu, nigu gileletelo muni egi Jesu a va ningidego?

KHU dzimindru nya Nisani 16 khu 33 E.C, vanyamayi nyo khaguri va haladzago Nungungulu va di hongola thowoni a nga ba a dzingidwe avbo Jesu. Gu di gu vbindride tanga nya 36 dziora Jesu Kristo na dzingidwe. Tepo va nga vboha lithowoni gasi gu ya todza mafura nyo nungeye givili gya Jesu avo va di thuruga ngudzu khu gu ya mana lithowo na liri liphanga. Ngilozi mweyo yi di embeya vanyamayi vale gu khiyo Jesu a di gu wusidwe khu gufani, yi bwe khiyo: “A na mi hegudzani gu vboha Galileya. Iyo mu na guya mu wonago.”— Mat. 28:1-7; Luka 23:56; 24:10.

² Hwane nya gu ba vanyamayi va khugide khu thowoni, Jesu a di va hidzimeleya a va embeya khuye: “Indrani muya tivisa vandriyangu va hongole Galileya, va na nyi wonela iyoyo.” (Mat. 28:10) Gu wuswa a nga wuswago, Jesu a di girisa tshangano ni vapizane vaye. Avbo nya tshangano wowo uye a di va ninga sileletelo nya lisima ngudzu.

3-4. Khu ginani hi nga ganeyago gu khethu gileletelo gi lovidwego omu ga Matewu 28:19, 20 kha gya nga ba gi hongola ga vapostoli basi? (Wona foto avba nya kapa.)

³ Leri Matewu 28:16-20. Avba nya tshangano owu Jesu a wu giridego, uye tshingiside ngudzu thumo nya lisima wu nga hadzi girwa khu vapizane vaye ndrani nya lizana myaga nyo pheye — a gu thumo wa wumowo hi girago muhuno. Jesu a di khuye: “Indrani mu gimbila mu hevbudza mayigo yatshavbo. . . . Va hevbudzeni gu landrisa satshavbo iso nyi nga mi hevbudzani.”

⁴ Jesu o vbweta gu khuye vatshavbo valandreyi vaye va tshumayela. Gileletelo gile khandri a di gi ningeya ga vapostoli vale nya 11 basi. Ha gu siti kharini? Tepo Jesu a nga ningeya gileletelo gegi nya gu gire vapizane, khandri vapostoli basi va nga ba va romo gigomoni  gya Galileya. Ha gu dziti kharini? Dundruga gu khuwe ngilozi yi ganede esi ga vanyamayi vale: ‘Mu na ya mu wona [Galileya].’ Khu kharato, adzina vanyamayi nya gu tumbege navo va diri iyoyo khu tepo yoyo. Ganiolu khandri isoso basi. Mupostoli Pawulo ganede gu khuye Jesu ‘dzi wonegiside gambe ga gikwata nya vathu nya tengo nya guvbindre livbandre mazana (500) vakhodwa khu gumogo.’ (1 Kor. 15:6) Va di gu tshanganide hayi vandriyathu vatshavbo vava nya 500?

5. Ginani u gi hevbulago omu ga 1 Vakorinto 15:6?

⁵ Hi na ni sighelo nya singi nyo khodwe gu khethu omu ga 1 Vakorinto 15:6, Pawulo a di gu thula tshangano wa Galileya wu tshamusedwego omu ga Matewu gipimo 28. Khu ginani? Nyo pheye, vapizane nya vangi va Jesu va diri Galileya. Khu kharato si di hadzi vbevbuga gu gira tshangano ni vathu nya vangi gigomoni gya Galileya wulangani nyo wu gire ndrangani nya muthu Jerusalema. Nya wuvili, hwane nyo wuswe, Jesu a di tshanganide ni vapizane vaye nya 11 nyumbani nyo khaguri Jerusalema. Nari khatshi Jesu a di gu vbweta gu ninga sileletelo nyo tshumayele ni gu gira vapizane vapostoli vaye basi, uye na giride isoso Jerusalema wulangani nyo rume vapizane vaye gumogo ni vanyamayi vale gasi va ya tshangana naye Galileya.— Luka 24:33, 36.

6. Lowo wa Matewu 28:20 wa gu yeyedza kharini gu khuwo gileletelo nya gu gire vapizane gi ngu thuma ni muhuno nigu vathu va gu gi engisa kharini muhuno?

⁶ Nga wona gimbe gilo nya lisima ngudzu. Gileletelo gya Jesu nya gu gire vapizane kha gya ningwa maKristo ma nga ba ma vbanya ga lizana myaga nya gupheye basi. Ha gu dziti kharini? Tepo Jesu a nga ninga gileletelo gyogyo ga valandreyi vaye, hegiside khu malito yaya: “Eni nyi na bani nyiri nanu gikhati gyatshavbo, kala guhegisani nya litigo.” (Mat. 28:20) Kha nga gu ganeya ga Jesu, vathu nya vangi va ngu gira vapizane muhuno. Nga dundrugeya khesi! Mwaga ni mwaga gipimo nya 300 000 vathu va ngu bhapatiswa kha nga Dzifakazi dza Jehovha, va khala vapizane va Jesu Kristo!

7. Ginani hi na bhulago khigyo nigu khu ginani?

⁷ Nya vangi va hevbulago Bhibhiliya va ngu dandra khu liphuvboni va bwe va bhapatiswa. Ambari ulolo, vambe va hevbulago Bhibhiliya ni ethu va gu wonega na va gu thava gu khala vapizane. Va ngu si gola gu hevbula ganiolu kha va dandri khu liphuvboni gasi va bhapatiswa. Wa gu ba u hevbula Bhibhiliya ni muthu nyo khaguri, hi ngu tiyisega gu khethu wo vbweta gu mu phasa gu vbanya khesi a si hevbulago ni gu bwe a khala mupizane wa Kristo. Ndrima yeyi yi na ganeya khedzi hi nga khuhago khidzo monyo nya gihevbulo gyathu ni edzi hi nga gi phasago khidzo gu dandra khu liphuvboni. Khu ginani hi yedego gu bhula khu mahungu yaya? Kholu dzimbe dzitepo si na vbweta gu hi hunga gu khethu hi na simama gu gimbidzisa gihevbulo nyo khaguri mwendro hi na ema.

8. Khu ginani dzimbe dzitepo si garadzago gu khuha monyo nya sihevbulo sathu?

⁸ Jehovha a gu vbweta gu khuye vathu va mu thumeya khu gu mu haladza. Khu kharato makungo yathu khu gu phasa sihevbulo sathu gu pwisisa gu khiso Jehovha a ngu khathala ngudzu khiso gimwegyo khu gimwegyo nigu a ngu si haladza ngudzu. Ha gu vbweta gu si phasa gu wona Jehovha kha nga “babe nya dzikhulungu mwendro nya ava va fedwego khu vavelegi ni muvhikeli nya dzinoni.” (Ndzi. 68:5) Tepo sihevbulo sago si wonago edzi Nungungulu a si haladzago khidzo, isoso si na khuha myonyo yaso nigu lihaladzo laso khuye li na dandra. Si nga garadzeya sihevbulo nyo khaguri gu wona Jehovha kha nga Papayi waso nya lihaladzo kholu kha sa yeyedzwa lihaladzo khu vapapayi vaso. (2 Thim. 3:1, 3) Tepo u gimbidzisago gihevbulo nya Bhibhiliya tshingisa makhalelo nyo mbure ya Jehovha. Phasa sihevbulo sago gu pwisisa gu khiso Nungungulu wathu nya lihaladzo a gu vbweta gu khuye avo va mana guvbanya nya gupindruge nigu a dzi emisede gu si phasa gu vboheya makungo yoyo. Khu gevbini gimbe hi nga girago?

9-10. Mabhuku muni hi yedego gu ma thumisa gugimbidzisani nya sihevbulo nya Bhibhiliya nigu khu ginani?

 ⁹ Thumisa mabhuku “Ginani hi hevbudzwago khu Bhibhiliya” ni “Continue a Amar a Deus.” Mabhuku yaya ma giredwe ngudzungundzu gu hi phasa gu khuha monyo nya sihevbulo sathu. Khu giyeyedzo, gipimo 1 nya Ginani hi hevbudzwago khu Bhibhiliya gi ngu hlamula siwudziso sesi: Ina Nungungulu a ngu hi khathaleya mwendro vivbedwe khu monyo? O dzipwa kharini Nungungulu tepo vathu va tshanisekago? U nga si kodza gu khala pari ya Jehovha? Ahati libhuku Continue a Amar a Deus ke? Ilo li na phasa sihevbulo sathu gu pwisisa edzi gu thumisa matshina nya milayo nya Bhibhiliya si nga si phasago khidzo gu tshukwadzisa womi waso ni gu hidzimeya ga Jehovha. Ambari wa gu ba u hevbude mabhuku yaya ni simbe sihevbulo, u yede gu dzi dongiseya gwadi gasi gu dzi pwananisa ni giemo nya gihevbulo ni gihevbulo gyago nya Bhibhiliya.

¹⁰ Ginani u yedego gu gira abari gu gihevbulo gyago gi tsakisidwe khu mahungu nyo khaguri ma gomogo omu nya libhuku nyo khaguri li gu mba gira gipandre nya Dziferameta nyo hevbudze khidzo? Adzina u nga gi kutsa gu gi dzi hevbuleya  gyabune gasi u si kodza gu simama gu gimbidzisa gihevbulo khu gu thumisa limwedo nya mabhuku aya hengeledzano yi hi leletedego gu gimbidzisa khayo sihevbulo nya Bhibhiliya.

11. Lini hi yedego gu pheya gu tula ni gu sega gihevbulo khu nombelo nigu hi nga phasa kharini gihevbulo gyathu gu pwisisa lisima nya isoso?

¹¹ Pheyani gihevbulo khu nombelo. Khu lisine, si na ni lisima ngudzu gu tula ni gu sega gihevbulo khu nombelo nigu u nga hweyi gu thumisa nombelo. Gu vbwetega hi phasa gihevbulo gyathu guti gu khigyo hi nga si kodza basi gu pwisisa Lito la Nungungulu khu gu phaswa khu Liphuvbo la Nungungulu. Vambe vahevbudzi nya Bhibhiliya va ngu tshamuseya gighelo gi hi girago hi pheya gihevbulo nya Bhibhiliya khu nombelo khu gu thumisa Jakobe 1:5, yi gu khiyo: “A gu bani a romo moyo wanu a keneledwago khu guti, a na gu lombe ga Nungungulu.” Khu hwane, a gi wudzisa esi: “Hi nga lomba kharini guti ga Nungungulu?” Nya mba kanakana gihevbulo gi na khigyo, khu gu hi gombeya ga Nungungulu.

12. U di hadzi thumisa kharini Ndzimo 139:2-4 gasi gu phasa gihevbulo gyago gu tshukwadzisa milombelo yagyo?

¹² Hevbudza sihevbulo sago edzi si yedego gu gombeya khidzo. Va tiyisegise gu khuwe Jehovha a gu vbweta gupwa milombelo yawe yi khugeyago monyoni. Si tshamuseye gu khuwe migombeloni yathu hi nga si kodza gu tuleya Jehovha myonyo yathu — si thulago gu mu embeya silo hi gu mba tiya gu embeya vambe vathu. Si dundrugise gu khuwe Jehovha a ngu yiti mipimiso yi etidego ya monyoni gwathu. (Leri Ndzimo 139:2-4.) Hi nga si kutsa gambe gu lomba giphaso ga Nungungulu gasi si kodza gu mba pimisa khu ndziya nyo vivbe ni gu pala mavbanyelo nyo vivbe. Khu giyeyedzo, gihevbulo nyo khaguri nya Bhibhiliya adzina gi ngu tsakiswa ngudzu khu buzo nyo khaguri owu maKristo ma si yeligo gu patega gwawo. A ngu dziti gu khuye isoso si vivbide ganiolu a nga gu tsakiswa ngudzu khu sigiro nyo khaguri nya buzo wowo. Mu kutse gu embeya Jehovha edzi a dzipwago khidzo nigu lomba giphaso gasi a gira basi esi Nungungulu a si golago. — Ndzi. 97:10.

13. a) Khu ginani hi si yeligo gu hweya gu raneya mitshangano sihevbulo sathu? b) Hi nga gira kharini gasi gu phasa sihevbulo sathu gu dzipwa na siri gaya tepo si hongolago Salawuni nya Mufumo?

¹³ U nga hweyi gu raneya mitshangano sihevbulo sago nya Bhibhiliya. Esi sihevbulo sago si sipwago ni gu si wona mitshanganoni yathu nya wuKristo si nga khuha myonyo yaso si bwe si si kutsa gu dandra khu liphuvboni. Si yeyedze vhidhiyu Ginani gi giregago Salawuni nya Mufumo? u vbedza u si raneya gu hongola nago. So kodzega dzi ningedze gu si phasa khu magimbilelo yakone. Si na ni lisima ngudzu gu lomba vahuweleyi nyo hambanehambane gasi u hongola navo sihevbuloni sago. Khu ndziya yoyo, sihevbulo sago si na tivana ni vambe vandriyathu libandlani, khu kharato tepo si hongolago mitshanganoni yathu si na dzipwa na siri gaya.

14. Ginani gi nga kutsago gihevbulo gu dandra khu liphuvboni?

¹⁴ Makungo yathu khu gu phasa sihevbulo sathu nya Bhibhiliya gu dandra khu liphuvboni. (Efes. 4:13) Tepo muthu nyo khaguri a dzumeyago gu hevbula Bhibhiliya nathu, si nga gira na gu vbweta gu wona ngudzungudzu edzi Bhibhiliya yi na mu phasago khidzo. Ganiolu, tepo lihaladzo laye khu Jehovha li dandrago, adzina a nga pheya gu pimisa khedzi a nga phasago khidzo vambe, gupata ni vandriyathu libandlani. (Mat. 22:37-39) Yo vboha tepo nya yadi u nga digi gu bhuleya gihevbulo gyago gu khuwe hi na ni lithomo nyo seketeye thumo nya Mufumo khu dzitsapawu dzathu.

15. Hi nga phasa kharini gihevbulo gyathu nya Bhibhiliya guti esi gi nga girago tepo gi tshanganago ni sigaradzo?

¹⁵ Hevbudza gihevbulo gyago esi gi yedego gu gira tepo gi tshanganago ni sigaradzo. Khu giyeyedzo, nga dundrugeya gyo tshuka gihevbulo gyago, gi gu muhuweleyi a nga si bhapatiswigo, gi gu embeya gu khigyo gi gandranide ginyalana ni  ndriyathu nyo khaguri libandlani. Wulangani nyo eme nagyo, khu ginani u gu mba gi embeya esi Bhibhiliya yi hi kutsago gu gira? Adzina gi nga divaleya ndriyathu gi bwe gi divala esi si giregidego. Gyo tandrega gu gira isoso, gi yede gu bhula ni ndriyathu yoyo khu wuwadi ni lihaladzo na giri ni makungo nyo gire gurula naye. (Fananisa ni Matewu 18:15.) Phasa gihevbulo gyago gu dongiseya esi gi na ganeyago. Gi yeyedze edzi gi nga thumisago khidzo JW Library^®, Guia de Pesquisa para Testemunhas de Jeová ni jw.org^® gasi gu hevbula dzindziya nya dzadi nyo lulamise khidzo sigaradzo. Gyo hevbula edzi gi nga lulamisago khidzo sigaradzo ni vambe na gi si bhapatiswi gi na si kodza gu pwana ni vandriyathu libandlani hwane nyo bhapatiswe.

16. Khu ginani si gu sadi gu rana vambe vahuweleyi gasi u hongola navo sihevbuloni sago nya Bhibhiliya?

¹⁶ Lomba vambe vandriyathu libandlani mwendro muwoneleyi nya gipandre gasi guya gimbidzisa navo gihevbulo gyago nya Bhibhiliya. Khu ginani? Gasi gu engedzeya ga esi hi si khumbugidego, vambe vahuweleyi si nga gira na vari giemoni nya gyadi nyo phase gihevbulo gyago ga sipandre esi uwe u gu mwalo makodzelo nyo gi phase. Khu giyeyedzo, nga dundrugeya gihevbulo gyago na gi gu zamide gu diga gu daha ganiolu gi tandregide dzitepo nya dzingi. Rana ndriyathu a si kodzidego gu pala gigaradzo gyogyo gasi u hongola naye ga gihevbulo gyago, si nga gira na si kodzide gu dugeleya hwane nyo ba a zamide dzitepo nya dzingi. Ndriyathu yoyo adzina a nga si kodza gu gi ninga wusingalagadzi owu kamo wu nga ba wu vbwetwa khu gihevbulo gyago. Wa gu ba u thava gu gimbidzisa gihevbulo gyago na wuri ni ndriyathu a wonegago na ari ni guti nya gungi khu liphuvboni, mu lombe a gu gimbidziseya gihevbulo gyago. Gihevbulo gyago gi nga phasega ngudzu tepo u ranago vambe gasi va ya gu phasa gu gimbidzisa gihevbulo gyago. Dundruga gu khuwe makungo yathu gu phasa gihevbulo gu dandra khu liphuvboni.

17-18. Ginani u yedego gu dundrugeya khigyo tepo u hungago gu ema gu hevbula ni muthu nyo khaguri?

¹⁷ Gihevbulo gyago nya Bhibhiliya gya gu ba gi si tshunguhedzi khu liphuvboni, si na lomba gu u dzi wudzisa esi: ‘Ina nyi yede gu ema gu hevbula naye?’ Na wusi hungi esi u na girago, gu vbwetega u dundrugeya khu makodzelo yagyo. Vambe va ngu hweya gu dandra khu liphuvboni gu vbindra vambe. Dzi wudzise esi: ‘Edzi gihevbulo gyangu gi dandrago khidzo khu liphuvboni, ina si ngu longoloka ni giemo gyaye?’ ‘Ina gi phede gu “landrisa,” mwendro gu vbanya khesi gi si hevbulago?’ (Mat. 28:20) Si nga gira gu gihevbulo gi nonoka gu dandra khu liphuvboni, ambari ulolo, vbadugwanavbadugwana gi yede gu vbindrugedza silo nyo khaguri.

¹⁸ Ginani hi yedego gu gira ho ba hi hevbula ni muthu khu tepo nyo khaguri ganiolu kha ningi lisima gihevbulo? Nga wona giyeyedzo gegi: U vbedzide gu hevbula ni gihevbulo gyago libhuku Ginani hi hevbudzwago khu Bhibhiliya ni gu adzina u phede gu hevbula nagyo libhuku Continue a Amar a Deus, ganiolu igyo gima gi si hongoli mitshanganoni yathu nya libandla ambari Gidundrugisotunu! Nigu dzimbe dzitepo gi ngu thindreka gu hevbula khu sighelo nya mba pwala. Ga giemo  gyogyo, gu vbwetega u bhula nagyo kamo gwadi. *

19. Ginani u nga embeyago muthu nyo khaguri a si ningigo lisima gihevbulo nya Bhibhiliya, nigu ginani u yedego gu dundrugeya khigyo?

¹⁹ Adzina u nga pheya mabhulo khu gu gi wudzisa esi: ‘Ginani u gi wonago na gi gu garadzeya ngudzu gasi gu khala mweyo nya Dzifakazi dza Jehovha?’ Adzina gihevbulo gyago gi nga hlamula esi: ‘Nyi ngu si gola gu hevbula Bhibhiliya ganiolu gima kha nyi na nga si kodza gu khala Fakazi ya Jehovha!’ A gu ba a pimisa isoso nari gu mu na ni tepo nya yingi na mu gu hevbula, ina gu ngari ni gighelo nyo simame gu hevbula ni muthu nya nga yoyo? Ganiolu gihevbulo gyago gi nga dzegeya gu gu embeya egi gi mu tandregisago gu dandra khu liphuvboni. Khu giyeyedzo, adzina gyo pimisa gu khigyo kha gi na nga si kodza gu tshumayela khu ndranga ni ndranga. Tepo u tugulago edzi gi dzipwago khidzo, u na si kodza gu gi phasa gwadi.

20. Gupwisisa Mithumo 13:48, si nga hi phasa kharini guti gu khethu hi na simama mwendro hi na ema gu hevbula ni muthu nyo khaguri?

²⁰ Ya walo khu gu simbe sihevbulo nya Bhibhiliya si ngu fana ni vaIsrayeli va matshiguni ya Ezekiyeli. Nga wona esi Jehovha a va embedego khu gu thumisa Ezekiyeli: “Wona gukhuwe u womo gwawe kha nga uye a embelelago dzindzimo nya lihaladzo, khu lito nya gumbure li pwalago gwadi; kholu va gupwa magana yago aholu kha va ma landrisi.” (Ezek. 33:32) Si nga hi garadzeya gu embeya muthu nyo khaguri gu khethu hi na ema gu hevbula naye. Ambari ulolo, “matshigu [ma tshadego] madugwanana.” (1 Kor. 7:29) Wulangani nyo dzi vbedzeye tepo nyo laphe na hi gu hevbula ni muthu a si dandrigo khu liphuvboni, hi yede gu vbweta vathu va na yeyedzago gu khavo “va dzi emisede gu hakha guvbanya nya gupindruge.” — Leri Mithumo 13:48 khavba nya tshamuselo wa vbavbatshi. *

21. Khu wevbini lowo wathu nya mwaga nya 2020, nigu wu nga hi phasa gu gira ginani?

²¹ Ndrani nya mwaga nya 2020, lowo wathu nya mwaga wu na hi phasa gu vega gupima avba nyo tshukwadzise thumo wathu nyo gire vapizane. Uwo wa gu pata malito ma ganedwego khu Jesu tshanganoni nya lisima ngudzu wu giridwego gigomoni gya Galileya: ‘Indrani mu ya gira vapizane . . . mu va bhapatisa.’ — Mat. 28:19.