1. Dhavhidhe a diri ga giemo muni nyo garadze?

DHAVHIDHE a di gu thava kholu gu diri ni muthu nyo khaguri a nga ba a vbweta gu mu songa. Sawule, pfhumu nya tshivba ya Israyeli, a di gu vbweta gu mu songa. Tepo Dhavhidhe a nga ba a vbweta gilo nya gu hodze a di ema dhoropani ga Nobhi a lomba 5 dzipawu basi. (1 Sam. 21:1, 3) Khu hwane, uye ni vama vaye va diya sihala phalani. (1 Sam. 22:1) Khu ginani Dhavhidhe a nga ba ari ga giemo gegi?

2. Khu sevbini silo nyo vivbe ngudzu esi Sawule a giridego? (1 Samuweli 23:16, 17)

² Sawule a diri ni lidiwo nya likhongolo ngudzu khu Dhavhidhe kholu vathu nya vangi va di gu mu gola, nigu va di gu mu zundza kholu a nga ba a pala dzinyimbi nya dzingi. Sawule a di gu dziti gu khuye Jehovha a di gu mu digide kholu a nga ba a digide gu mu engisa. Nigu Jehovha a di hathide Dhavhidhe gasi gu khala pfhumu. (Leri 1 Samuweli 23:16, 17.) Ganiolu, Sawule a di ngari pfhumu Israyeli nigu a diri ni mabuthu nya mangi nya masotshwa ni vathu nya vangi nya mambe mayigo va nga ba va mu phasedzeya. Khu kharato, Dhavhidhe a di yede gu thava gasi gu vbulugisa womi waye. Ina Sawule a di gu pimisa gu khuye a di hadzi gu si kodza gu himbedzeya Nungungulu gu emisa Dhavhidhe kha nga Pfhumu? (Isa. 55:11) Bhibhiliya kha yi ganeyi, ganiolu ethu hi nga tiyisega gu khethu Sawule a di gu vega abune mhangoni womi waye. Ava va wugeyago Nungungulu, tepo yatshavbo kha va dugeleyi.

3. Dhavhidhe dzipwide kharini ga siemo a nga ba ari ga iso?

³ Dhavhidhe a diri mwama nyo dzi nogise. Uye kha dzi hatha gasi gu khala pfhumu ya Israyeli, ganiolu khu Jehovha a nga mu  hatha. (1 Sam. 16:1, 12, 13) Sawule a di gu nyenya ngudzu Dhavhidhe. Ganiolu, Dhavhidhe kha ninga nandru Jehovha khu giemo nyo garadze a nga ba ari ga igyo. Nigu, Dhavhidhe kha khaleya gu solasola olu a nga ba ari ni guhodza nya gudugwana ni olu a nga ba a yede gu sihala phalani. Gu diga isoso, tepo Dhavhidhe a nga ba ari phalani si nga gira nari ga tepo yile a nga lova ndzimo nyo mbure yi dhumisago, yi patago malito ma gomogo avba nya lowo wathu nya litshina wu gu khuwo: ‘Gimwalo nya gyadi gi na keneleyago ava va vbwetago Jehovha.’ — Ndzi. 34:10.

4. Khu sevbini siwudziso hi na bhulago khiso, nigu khu ginani si gu na ni lisima?

⁴ Muhuno, sithumi nya singi sa Jehovha dzimbe dzitepo si mwalo guhodza nyo eneye mwendro simbe silo si si vbwetago gasi gu dzi vbanyisa. * Isoso si ngu dugeleya sithumi nya singi sa Jehovha ngudzungudzu ga tepo yeyi nya tungu. Nigu, silo si na engedzeya gu hi garadzeya tepo yi na vbohago “tshanisa nya yikhongolo.” (Mat. 24:21) Khu kharato, hongoleni hi hlamula siwudziso sesi nya 4. Nyo pheye, ‘gimwalo nya gyadi gi nga ba gi keneleya’ Dhavhidhe khu ndziya muni? Nya wuvili, khu ginani hi yedego gu tsaka khu esi hi gu naso? Nya wuraru, khu ginani hi nga tiyisegago gu khethu Jehovha a na hi khataleya? Nya wuna, hi nga dzi dongiseya kharini olu gasi hi emisana ni esi si na dugeleyago mindru wa tshigu?

5-6. Ndzimo 23:1-6, a gu hi phasa kharini gu pwisisa esi Dhavhidhe a nga ba a vbweta gu ganeya tepo a nga khuye sithumi sa Jehovha kha si na nga “keneledwa khu gilo”?

⁵ Ginani egi Dhavhidhe a nga ba a vbweta gu ganeya tepo a nga khuye sithumi sa Jehovha kha si na nga “keneledwa khu gilo”? Tepo Dhavhidhe a nga lova Ndzimo 23, uye thumiside malito nyo fane, khu kharato ndzimo yeyi yi nga hi phasa gu pwisisa esi a nga ba a vbweta gu ganeya. (Leri Ndzimo 23:1-6.) Dhavhidhe a gu pheya ndzimo yeyi khu malito yaya: “PFHUMU Nungungulu muhavisi wangu; kha nyi na kaneledwa  khu gilo.” Ga mambe mavhesi nya ndzimo, Dhavhidhe khumbugide silo nya lisima ngudzu a ningidwego khu Jehovha kholu a nga mu dzumeya kha nga muhavisi waye. Jehovha a mu gimbidziside “dzindzilani nya gululame” nigu uye seketede Dhavhidhe ga dzitepo nyo tsakise ni edzi nya mba dzadi. Dhavhidhe a di gu dziti gu khuye ambari olu a nga ba a romo ‘panini ga Jehovha nya mwasi nya gu nyuge,’ uye a di hadzi emisana ni sigaradzo womini gwaye. Dzimbe dzitepo uye adzina a vbede tshivba nyo bwe a gira gu khatsi “a gimbila kovani nya gidema nya lufu” nigu a di hadzi manana ni valala. Ganiolu, kha nga olu Jehovha a nga ba ari muhavisi waye, Dhavhidhe a di hadzi gu mba “thava gilo.”

⁶ Ganiolu, gu na ni giwudziso gegi hi yedego gu gi hlamula. Dhavhidhe ‘a di si keneledwi khu gilo’ khu ndziya muni? Uye a diri ni satshavbo a nga ba a si vbweta khu liphuvboni. Litsako laye li di si dzi seketeyi avba nya dzithomba. Dhavhidhe a di gu tsaka khesi Jehovha a nga ba a mu ninga. Egi gi nga ba giri ni lisima gwaye gu diri makategwa ya Jehovha ni gu vhikedwa khuye.

7. Guya khu Luka 21:20-24, khu sevbini sigaradzo si nga tshangana ni Makristo ma nga ba ma vbanya Judha?

⁷ Malito ya Dhavhidhe ma gu hi phasa gu pwisisa gu khayo si na ni lisima gu mba thangisa dzithomba womini gwathu. Ethu hi nga tsaka khu dzithomba hi gu nadzo, ganiolu kha hi yeli gu dzi wona kha nga gilo nya lisima womini gwathu. Eli li diri lisine nya lisima eli Makristo nyo khaguri ma nga ba ma vbanya Judha ma nga li pwisisa. (Leri Luka 21:20-24.) Jesu a di gu va gengedzide gu khuye yi di hadzi vboha tepo avba lidhoropa la Jerusalema li nga hadzi ‘randredwa khu masotshwa.’ Tepo si nga hadzi girega silo sesi avo va di yede gu tutumeya “sigomoni” gasi vaya sihala. Avo va gu khuga khu dhoropani mule va di hadzi vbuluga, ganiolu avo na va tshide dzithomba dzawe hwane. Hwane nya myaga nyo khaguri, Mukhedziseyi wu ganede gu khuwo: “Avo va digide mathembwe, dzindranga dzawe ni dzithomba dzawe mu dzinyumbani. Avo va di tumba gu khavo Jehovha a di hadzi gu va vhikeya ni gu va phasa nigu va di thangisa wukhozeyi waye.”

8. Sihevbudzo muni hi nga si hevbulago khu esi si dugeledego Makristo ya lizana myaga nya gupheye ma nga ba ma vbanya Judha?

⁸ Gilo muni nya lisima hi nga gi hevbulago khu esi si nga dugeleya Makristo ya lizana myaga nyo pheye ma nga ba ma vbanya Judha? Mukhedziseyi hi wu khumbugidego wari khuwo: “Mindru watshigu adzina hi nga tshangana ni silingo si na yeyedzago edzi hi dzi wonago khidzo dzithomba.” Ina ha gu wona dzithomba kha nga gilo nya lisima gwathu, mwendro nya lisima gwathu gu vbulugiswa womi wathu khu gu hi tumbega ga Nungungulu? Tepo gu na vbohago mahegiso, adzina si na lomba gu hi timiseya sigaradzo hi bwe hi dzi hiya silo nyo khaguri. Hi na gira ni gevbini gi vbwetegago, gu fana ni Makristo nya lizana myaga nyo pheye ma nga khuga khu Judha.” *

9. Wusingaladzi wa Pawulo a ningidego Vahebheru wa gu gu tiyisa kharini?

⁹ Nga dundrugeya khedzi si garadzedego khidzo Makristo yale gu diga satshavbo ma nga ba mari naso ma bwe ma ya pheya womi wavo ga wumbe wulanga! Si lombide gu va manega ni gu khodwa gasi va tiyisega gu khavo Jehovha a di hadzi gu va phasa gu mana esi va nga ba va si vbweta. Ganiolu, gu diri ni gilo gi nga hadzi gu va phasa. 5 myaga hwane, Varoma na va si dhumeyi Jerusalema, mupostoli Pawulo a di ningide wusingalagadzi nya wadi Vahebheru. Uye a di khuye: “Guvbanyani gwanu mu nga dzi digi mu gu fumwa khu makolo nya dzitsapawu; nengelani khu esi mu gu naso, kholu Nungungulu ganede, khuye: ‘Eni gima kha nyi na mi diga.’ Khu guralo, hi ngu tiya longo hi ganela, khethu: ‘Pfhumu khuye muphasedzeli wangu, eni kha nyi thavi  gilo. A nga nyi gira ginani muthu?’” (Hebh. 13:5, 6) Isoso si vbevbugede ava va nga thumisa wusingaladzi wa Pawulo, nya gu tsake khu silo nya sidugwana va nga ba vari naso ga ndranga yawe nya yiphya. Avo va di gu tiyisega gu khavo Jehovha a na va ninga esi va nga ba va si vbweta. Malito ya Pawulo ma gu hi gira hi tiyisega gu khethu Jehovha a na hi ninga esi hi si vbwetago.

10. Khu wevbini “sihalo” owu Pawulo a hi embedego?

¹⁰ Pawulo ningide Thimoti wusingaladzi nyo fane nigu wusingaladzi wowo wu nga hi phasa nethu. Uye lovide gu khuye: “Ha nga mana gilogyo nya guhodze ni gu ambala, si enede.” (1 Thim. 6:8) Ina isoso so thula gu khiso kha hi yeli gu hodza guhodza nyo tshambe, hi manega ni nyumba nya yadi mwendro gu renga sombo nya siphya? Isoso khandriso Pawulo a nga vbweta gu ganeya. Pawulo a di gu vbweta gu ganeya gu khuye hi yede gu tsaka khu iso hi gu naso khu nyamani. (Filp. 4:12) Uwowo wu diri “sihalo” wa Pawulo. Gilo nya lisima ngudzu gwathu wupari wathu nyo tiye ni Nungungulu na siri dzithomba. — Habh. 3:17, 18.

11. Ginani hi gi hevbulago avbo nya malito ya Mosi a embedego Vaisrayeli maningano ni gu tsaka khesi hi gu naso?

¹¹ Esi hi pimisago gu khethu khiso hi si vbwetago adzina khandriso sasimweso ni esi Jehovha a sitigo gu khuye hi ngu si vbweta. Wona esi Mosi a embedego Vaisrayeli hwane nya gu ba va vbedzide 40 myaga giwulani. Uye a di khuye: “Pfhumu Nungungulu wago, a gu kategiside ga thumo watshavbo nya mandza yago; Uye a ngu dziti nya gukhuye u ngu legalega giwulani momu nya gikhongolo; Pfhumu Nungungulu wago, a diri ni uwe ndrani nya myaga yatshavbo yoyo nya magumana;  gimwalo ni gimwegyo gi gu kiyeledego.” (Dhet. 2:7) Ndrani nya 40 myaga yoyo, Jehovha va ningide mana gasi gu hodza, sombo sawe kha sa hagala, khu kharato va simamide gu ambala sombo va nga khuga naso khu Egipto. (Dhet. 8:3, 4) Ambari olu vambe va nga ba va si tsaki khu silo sesi, Mosi a dundrugiside Vaisrayeli gu khuye avo va diri ni satshavbo va nga ba va si vbweta. Jehovha a na tsaka ha gu hevbuleya gu tsaka khesi hi gu naso. Uye o vbweta gu khuye hi bonga ambari khu silo nya sidugwana a hi ningago hi bwe hi si wona kha nga giningwa gitago khiyo gwaye.

12. Ginani gi yeyedzago gu khigyo Dhavhidhe a di si dzitumbi, ganiolu a di gu tumba Jehovha?

¹² Dhavhidhe a di gu dziti gu khuye Jehovha tumbegide, nigu a ngu khataleya vale va mu haladzago. Tepo Dhavhidhe a nga lova Ndzimo 34, womi waye wu diri mhangoni, ambari ulolo khu maho nya gu khodwe uye a di wona ‘ngilozi ya Jehovha’ na yi gu mu “vhikeya.” (Ndzi. 34:7) Yimbe tepo Dhavhidhe a di gu fananisa ngilozi ya Jehovha ni lisotshwa eli tepo yatshavbo li khedziseyago valala. Dhavhidhe a diri lisotshwa nyo tiye, nigu Jehovha a di mu tumbiside gu khuye uye a di hadzi khala Pfhumu. Ganiolu, uye a diri ni makodzelo yaye nya gu thumise giwindri nya fijiga mwendro litshari gasi gu pala nala. (1 Sam. 16:13; 24:12) Dhavhidhe a di tumba Nungungulu na gu tiyisega gu khuye ngilozi ya Jehovha ya gu vhikeya vale va mu ningago githawo. Lisine gu, ethu muhuno kha hi vireyi gu vbulugiswa khu ndziya nyo samadzise, ganiolu hi ngu dziti gu khethu ni wevbini a tumbago Nungungulu a na mana womi nya pindrugedwa ambari ha gufa olu.

13. Tepo Goge wa Magoge a na hi wugeyago, khu ginani si na girago gu khatshi hi mwalo muvhikeyi, ganiolu khu ginani hi si yeligo gu thava? (Wona foto ya avba nya kapa.)

¹³ Nugunugu gutumba gwathu nya gu khethu Jehovha a na hi vhikeya, gu na lingwa. Tepo Goge wa Magoge, a gu hengeledzano nya mayigo, a na wugeyago vathu va Nungungulu, womi wathu wu na gira khatshi womo mhangoni. Si na lomba gu hi tiyisega gu khethu Jehovha a na hi vbulugisa. Ga mayigo, hi na fana ni dzinvuta dzi gumwalo muhavisi nigu khatshi mwalo muthu nya gu hi vhikeye. (Ezek. 38:10-12) Ethu hi na ba hi ri mwalo matshari nigu kha hi na nga trenari gasi gu dwana nyimbi. Mayigo ma na hi wona nga vathu nya mba vhikelega. Mayigo ma na pimisa gu khayo si na vbevbuga gu hi pala. Avo kha va dziti gu khavo dzingilozi dza Jehovha dzi dzi emisede gu hi vhikeya, ganiolu ethu hi ngu siti isoso kholu hi na ni gukhodwa. Khu lisine, mayigo kha ma siti isoso kholu ayo kha ma khodwi ga Nungungulu. Avo va na hlamaleya ngudzu tepo va na wonago libuthu na li guta khu ndzadzini gasi gu ta hi dwaneya. — Gutu. 19:11, 14, 15.

14. Hi nga dzi dongiseya kharini olu gasi gu emisana ni esi si na giregago mindru watshigu?

¹⁴ Hi nga dzi dongiseya kharini olu gasi gu emisana ni esi si na hi dugeleyago mindru watshigu? Gupheya, kha hi yeli gu wona dzithomba kha nga gilo nya lisima womini gwathu kholu litshigu limwedo si na lomba gu hi diga dzithomba hwane. Ethu gambe hi yede gu tsaka khesi hi gu naso hi bwe hi tsaka khu olu hi gu na ni wupari nyo tiye ni Jehovha. Tepo hi yago hi muti gwadi Nungungulu wathu, hi nga tiyisega gu khethu uye a na hi vhikeya tepo Goge wa Magoge a na hi wugeyago.

15. Ginani gi giregedego Dhavhidhe na a ngari lidzaha gi nga mu gira a tiyisega gu khuye Jehovha tepo yatshavbo a na mu phasa?

¹⁵ Wona gambe esi si phasidego Dhavhidhe ni gu si na hi phasago nethu gasi gu dzi dongiseya gu emisana ni sigaradzo. Dhavhidhe a di khuye: “Lingani mupwa edzi PFHUMU Nungungulu a gu wadi khidzo.” (Ndzi. 34:8) Malito yaya ma gu  yeyedza gu khayo khu ginani Dhavhidhe a nga ba a tumba giphaso gya Jehovha. Dhavhidhe tepo yatshavbo a di gu tumba Jehovha, nigu Nungungulu waye, gima kha mu diga. Tepo Dhavhidhe a nga ba ari muphya, dwanide ni mwama moyo nya tshivba nyo pwane khu Gholiya nigu a di mu embeya na tiyide khuye: “Muhuno kamwe PFHUMU Nungungulu a na gu ningela mandzani gwangu.” (1 Sam. 17:46) Khu hwane, tepo Dhavhidhe a nga ba ari pfhumu, Sawule zamide gu mu songa khu dzitepo nya dzingi. Ganiolu, Jehovha “a di ema” ni Dhavhidhe. (1 Sam. 18:12) Kha nga olu Dhavhidhe a nga ba a wonide giphaso gya Jehovha tepwana hwane, uye a di gu dziti gu khuye Jehovha a di hadzi gu mu phasa ga gigaradzo gile.

16. Hi nga ‘linga’ kharini wuwadi wa Jehovha?

¹⁶ Ha gu landrisa sileletelo sa Jehovha olu hi na tiyisega gu khethu mindru watshigu a na hi vbulugisa. So lomba gu hi manega ni gukhodwa hi bwe hi tumba Jehovha gasi hi si kodza gu lomba patrawu wathu gu khethu a hi ninga matshigu nyo khaguri gasi hi hongola mitshanganoni nya gipandre mwendro Kongresu, mwendro gu vbindrugedza longoloko nya ma thumelo gasi hi si kodza gu hongola mitshanganoni yatshavbo nya libandla ni thumoni nyo tshumayele. Ahati a gu tshuka patrawu wathu a bomba gilombo gyathu hi bwe hi luza thumo ke? Ina hi na tumba gu khethu Jehovha gima kha na nga hi diga ni gu khethu uye a na hi khataleya? (Hebh. 13:5) Vandriyathu nya vangi va gu romo thumoni nya tepo yatshavbo va ngu ganeya khedzi Jehovha a va phasidego khidzo tepo va nga ba va tshangana ni sigaradzo. Jehovha tumbegide.

17. Khu wevbini lowo nya mwaga nya 2022 nigu khu ginani wu phasago?

¹⁷ Ha gu ba hi ri ni Jehovha gi mwalo gilo gi nga hi girago hi thava esi si na giregago mindru watshigu. Nungungulu wathu gima kha na nga hi diga ha gu thangisa Mufumo waye womini gwathu. Gasi gu hi dundrugisa khu lisima nya gu dzi dongiseye olu, gasi gu emisana ni matshigu nyo garadze mindru watshigu hi bwe hi tumba gu khethu Jehovha gima kha na nga hi diga, Huwo nya Guthangeye yi hathide Ndzimo 34:10 kha nga lowo wathu nya mwaga nya 2022. Wu gu khuwo: ‘Gimwalo nya gyadi gi na keneleyago ava va vbwetago Jehovha.’