1-2. a) Lini ngudzungudzu hi dundrugago gigodwa gyathu gi fudego? b) Ginani egi Jesu a giredego ga wutshigu waye na si gufi?

AMBARI na ri gu, sigodwa sathu si na ni myaga nya yingi na si fude, ethu hi ngu simama gu si dundruga. Ethu ha gu mu dundruga ngudzungudzu litshigu a ngafa khilo.

² Mwaga ni mwaga, dzimiliyoni nya vathu mafuni gwatshavbo va ngu tshangana gasi gu dundruga gufa ga muthu hi mu haladzago ngudzu — a gu Jesu Kristo. (1 Ped. 1:8) Ethu ha gu tshangana, gasi gu dundruga oyu a ningedego womi waye kha nga dzegiso gasi gu hi handza ga gighoho ni gufa. (Mat. 20:28) Khu lisine, Jesu a di gu vbweta gu khuye valandreyi vaye va dundruga gufa gwaye. Ga wutshigu waye na si gufi uye giride gilalelo a bwe a va leleteya khuye: “Girani esi khu gialakanyo gyangu.”— Luka 22:19.

3. Ginani hi na gi wonago avba nya ndrima yeyi?

³ Avba nya ava va hongolago gidundrugisotunu nya gufa ga Kristo, vadugwana basi va gu na ni gutumba nya gu vbanye ndzadzini. Ganiolu, dzimiliyoni nya vathu va gu na ni gutumba nya gu vbanye mafuni, anavo va ngu manega. Avba nya ndrima yeyi, hi na wona sighelo si girago mitsawa yeyi ya mivili yi vbweta ngudzu gu manega gidundrugisotunu mwaga ni mwaga. Hi na wona gambe edzi hi phasegago khidzo khu gu manega gidundrugisotunu. Hongoleni hi pheya khu gu wona sighelo nyo khaguri si girago ava va todzidwego gu manega gidundrugisotunu.

4. Khu ginani Makristo nya gu todzwe ma hodzago gibaba ni gu seya vinyu gidundrugisotunu?

⁴ Mwaga ni mwaga, Makristo matodzidwego ma ngu hodza gibaba ni gu seya vinyu gidundrugisotunu. Khu ginani avo va yedego gu hodza gibaba ni gu seya vinyu? Gasi gu wona hlamulo, wona esi si dugeledego ga wutshigu nya gu hegise wa Jesu mafuni. Hwane nya Phasika, Jesu giride egi gi tidwago kha nga gidundrugiso gya Pfhumu. Uye a di ninga Vapostoli vaye nya 11 gibaba ni vinyu, a bwe a va embeya gu khuye va di yede gu hodza ni gu seya. Jesu a di bhula navo khu si dzumeledzwano sivili, a gu gidzumeledzwano nya giphya ni gidzumeledzwano nya Mufumu. * (Luka 22:19, 20, 28-30) Si dzumeledzwano sesi si tulede lithomo Vapostoli ni tengo nyo khaguri nya vathu, nya gu khale dzipfhumu ni vaprista ndzadzini. (Gutu. 5:10; 14:1) Makristo nyo todzwe ma tshadego, * a gu ayo ma wumbago gipandre nya sidzumeledzwano sesi sa sivili, khayo basi ma hodzago gibaba ni gu seya vinyu gidundrugisotunu.

5. Ginani egi Makristo nyo todzwe ma gitigo maningano ni gutumba ma gu nawo?

⁵ Gu na ni gimbe gighelo gi girago Makristo nya gu todzwe ma vbweta ngudzu gu manega gidundrugisotunu, khu gu igyo gi ngu va ninga lithomo nya gu dundrugeye khu gutumba gwawe. Jehovha a va ningide gutumba nya gu tsakise, a gu givili nya gu mba fa, gu vbanya ndzadzini kala gupindruga, gufuma gumogo ni Jesu Kristo gumogo ni ava nya 144000 nigu guvbindra satshavbo gutumba nya gu khale vbafuvbi ni Jehovha Nungungulu! (1 Kor. 15:51-53; 1 Joh. 3:2) Makristo nya gu todzwe ma ngu dziti gu khayo ma kovhidharidwe gasi ma ya dzi buza khu mathomo yoyo ndzadzini. Ganiolu, gasi ma dzumeledwa gu beya ndzadzini ayo ma yede gu simama gu tumbega kala gufani. (2 Thim. 4:7, 8) Makristo nya gu todzwe ma ngu tsaka khu gu dundrugeya khu gutumba ma gu nago nya gu vbanye ndzadzini. (Tit. 2:13) “Dzimbe dzinvuta ke”? (Joh. 10:16) Khu sevbini sighelo nyo khaguri si girago dzimbe dzinvuta dzi manega gidundrugisotunu?

6. Khu Ginani dzimbe dzinvuta dzi manegago gidundrugisotunu mwaga ni mwaga?

⁶ Dzimbe dzinvuta dzi ngu hongola gidundrugisotunu nigu, kha dzi hodzi gibaba ni gu seya vinyu, ganiolu dzi ngu tsaka khu gu manega eyi. Khu 1938, avo va nga ba va ri ni gutumba nya gu vbanye mafuni va kovhidharidwe khu tepo nya gu pheye gu manega gidundrugisotunu. Mukhedziseyi nya 1 nya Março nya 1938, wu ganede gu khuwo: “Si na ba siri sadi ngudzu gu [dzimbe dzinvuta] dzi manega avbo nya tshangano wowo, dzi bwe dzi wona esi si girwago . . . Igyo gigiro nyo tsakise gwadzo nidzo.” Gufana ni muthu nyo khaguri a tsakago khu gu ranwa gasi guya wona mutshadhu, dzimbe dzinvuta dzi ngu tsaka khu gu manega gidundrugisotunu.

7. Khu ginani dzimbe dzinvuta dzi vbwetago ngudzu gu engiseya ganelo nya gidundrugiso?

⁷ Dzimbe dzinvuta anidzo dzi ngu tsaka khu gutumba dzi gu nago. Idzo dzo vireya khu maho nya gufuviye gu engiseya ganelo nya gidundrugiso, kholu ganelo yoyo ya gu yeyedza edzi Jesu Kristo ni ava nya 144000 va na phasago khidzo vathu nya gutumbege ndrani nya 1000 myaga. Na va gu thangedwa khu Pfhumu  yawe Jesu Kristo, Makristo yoyo nyo todzwe ma na phasa avba nya gu vbindrugedze mafu ma khala paradhesi ma bwe ma phasa vathu nya gutumbege gu vbeleya. Dzimiliyoni nya vathu va manegago avbo nya gidundrugiso, va ngu tsaka khu gu dundrugeya edzi si na tadzisegago khidzo siprofeto nya Bhibhiliya nya nga esi si gomogo umo ga Isaya 35:5, 6; 65:21-23 ni Gutuledwa 21:3, 4. Gu dzi dundrugeya na va romo mafuni nya maphya gumogo ni sigodwa savo, si ngu tiyisa gutumba gwawe khu wumindru ni gu dzi emiseya gwawe nya gu mba diga gu thumeya Jehovha. — Mat. 24:13; Gal. 6:9.

8. Khu gevbini gimbe gighelo gi girago gu dzimbe dzinvuta dzi manega gidundrugisotunu?

⁸ Wona gimbe gighelo gi girago dzimbe dzivuta dzi manega gidundrugisotunu. Idzo dzo vbweta gu yeyedza lihaladzo ladzo ni gu seketeya Makristo nya gu todzwe. Lito la Nungungulu li profetide khu khilo, Makristo ma todzidwego ni ava va gu na ni gutumba nya gu vbanye mafuni va na thuma gumogo. Khu ndziya muni? Hongoleni hi wona siyeyedzo nyo khaguri.

9. Giprofeto gi gomogo umo ga Zakariya 8:23, gyo yeyedza ginani maningano ni edzi dzimbe dzinvuta dzi dzipwago khidzo khu Makristo nyo todzwe?

⁹ Leri Zakariya 8:23. Giprofeto gegi nyo mbure gyo tshamuseya edzi dzimbe dzinvuta dzi dzipwago khidzo khu vandriyawe va todzidwego. Lito “Mujudha” ga gu thudwa tsawa nya Makristo nyo todzwe ma ngo vbanyago mafuni. (Rom. 2:28, 29) “Likhumi vama nya gute khu mafumbu yatshavbo nya malimi ma ganedwago khu vathu nya mayigo” ga gu thudwa dzimbe dzinvuta. Idzo dza gu “phara tshoka nya mwendra,” a gu gu dzi pata ni Makristo nya gu todzwe, khu gu dzi hengeya navo avba nya wukhozeyi wu agidego. Khu kharato, ga wutshigu nya gidundrugiso, dzimbe dzinvuta dza gu yeyedza gu khidzo dzi ngu dzi pata ni Makristo nyo todzwe khu gu manega navo avba nya gidundrugiso.

10. Ginani egi Jehovha a giridego gasi gu tadzisa giprofeto gi gomogo umo ga Ezekiyeli 37:15-19, 24, 25?

¹⁰ Leri Ezekiyeli 37:15-19, 24, 25. Jehovha a ngu tadzisa giprofeto gegi, khu gu gira gu Makristo nyo todzwe ni dzimbe dzinvuta va thuma gumogo. Giprofeto gegi gyo ganeya khu dzindronga dzimbili. Ava va gu na ni gutumba nya gu vbanye ndzadzini va gu fana ni “ndronga ya Judha,” (a gu ga lihundzu leli li nga hatwago dzipfhumu dza Israyeli), nigu ava va gu na ni gutumba nya gu vbanye mafuni va gu fana ni “ndronga ya Efrayimi.” * Jehovha a di hadzi gu pata mitsawa yeyi ya mivili yi khala ‘ndroga mweyo.’ Esi so thula gu khiso avo va gu thuma gumogo khu gu pwana na va gu thangedwa khu Pfhumu yawe Jesu Kristo. Mwaga ni mwaga Makristo nyo todzwe ni dzimbe dzinvuta va ngu manega gidundrugisotunu, nasiri kha nga mitsawa mivili nyo hambane, ganiolu kha nga “tshambi moyo” na wu gu thangedwa khu “muhavisi moyo basi.” — Joh. 10:16.

11. “Dzinvuta” dzi khumbugwago umo ga Matewu 25:31-36, 40 dza gu yeyedza kharini gu khidzo dza gu seketeya vandriye va Kristo?

¹¹ Leri Matewu 25:31-36, 40. “Dzinvuta” dzi khumbugidwego khu Jesu dza gu thula vathu nya gululame dziteponi nya mahegiso, va gu na ni gutumba nya gu vbanye mafuni a gu dzimbe dzinvuta. Idzo dza gu seketeya vandriye va Kristo va ngo vbanyago mafuni khu gu va phasedzeya gu tadzisa thumo wowu nya lisima nya gu tshumayele mafuni gwatshavbo ni gu gira vapizane. — Mat. 24:14; 28:19, 20.

12-13. Dzimbe dzinvuta dza gu seketeya kharini vandriye va Kristo?

¹² Myaga yatshavbo ga dzisemana hwane na  gu si vbohi gidundrugiso, dzimbe dzinvuta dza gu yeyedza gu khidzo dzi ngu seketeya vandriye va Kristo khu gu patega avbo nya lidima nya gu raneye vathu va tsakeyago gasi vata gidundrugisotunu. (Wona quadro yi gu khiyo “ Ina u ngu dzi dongiseya gasi gu gira gilogyo ndrani nya tepo nya gidundrugiso?”) Idzo gambe dzi ngu gira esi si vbwetegago avbo nya gidundrugiso, ambari na dzi gu dziti gu khidzo a mwalo ni moyo a todzidwego libandlani gwadzo. Dzimbe dzinvuta dzi ngu tsaka khu gu seketeya vandriye va Kristo khu dzindziya dzedzi. Dzinvuta dzedzi dzi ngu dziti gu khidzo Jesu a gu wona esi dzi gireyago vandriyaye va todzidwego nga khatshi dzo gireya uye kamo. — Mat. 25:37-40.

¹³ Khu sevbini simbe sighelo si hi girago hi manega gidundrugisotunu, ambari abari gu gutumba gwathu khwa gu vbanya ndzadzini mwendro mafuni?

14. Jehovha ni Jesu va hi yeyedzide kharini lihaladzo?

¹⁴Hi ngu bonga khu lihaladzo eli Jehovha ni Jesu va hi yeyedzago. Jehovha a ngu hi yeyedza lihaladzo laye khu dzindziya nya dzingi, ganiolu uye yeyedzide lihaladzo laye nya likhongolo khethu khu gu rumeya Gyanana gyaye nyo gi gole gasi gi ta tshaniseka gi bwe gifa khu kotani yathu. (Joh. 3:16) Nigu Jesu nuye yeyedzide gu khuye a ngu hi haladza khu gu dzi emiseya gu ningeya womi waye khethu. (Joh. 15:13) Ethu gima kha hi na nga si kodza gu livba lihaladzo eli Jehovha ni Jesu va hi yeyedzidego. Ganiolu, hi nga si kodza gu yeyedza gubonga gwathu khesi hi girago tshigu ni tshigu womini gwathu. (Kol. 3:15) Nigu ethu ho manega Gidundrugisotunu gasi hi dundrugeya khu lihaladzo eli va hi yeyedzidego ni gu yeyedza edzi hi va haladzago khidzo.

15. Khu ginani Makristo nyo todzwe ni dzimbe dzinvuta va ningago ngudzu lisima dzegiso?

¹⁵Ethu hi ngu bonga ngudzu khu giningwa nya dzegiso. (Mat. 20:28) Makristo ma todzidwego ma ngu ninga ngudzu lisima dzegiso kholu wu ngu gira gutumba gwawe gu kodzega. Khu kotani nya gukhodwa va gu nago khu muphaso wa Kristo, Jehovha va wonide nga vathu nyo lulame a bwe a va gira sanana saye. (Rom. 5:1; 8:15-17, 23) Anidzo dzimbe dzinvuta dzi ngu bonga khu dzegiso. Khu kotani nya olu dzi khodwago avba nya muphaso wa Kristo, idzo dzi ngu ema mbeli ga Nungungulu dzi mu thumeya wutshigu ni mihani nigu dzi na ni gutumba nyo vbuluge avba nya “tshanisa nya yikhongolo.” (Gutu. 7:13-15, NM) Makristo nyo todzwe ni dzimbe dzinvuta va gu yeyedza gu khavo va ngu bonga khu dzegiso khu gu manega Gidundrugisotunu mwaga ni mwaga.

16. Khu gevbini gimbe gighelo gi hi girago hi manega Gidundrugisotunu?

¹⁶ Gimbe gighelo gi hi girago hi manega Gidundrugisotunu khu gu ha gu vbweta gu engisa Jesu. Ambari ha gu ba hiri ni gutumba nyo vbanye ndzadzini mwendro mafuni, moyo ni moyo wathu gu vbwetega a engisa gileletelo gya Jesu egi a gi ganedego ga wutshigu waye nyo hegise tepo a nga gira gilalelo. Uye a di khuye: “Girani esi kha nga gialakanyo gyangu.” — 1 Kor. 11:23, 24.

17. Gidundrugiso gyo hi phasa kharini gu tiyisa wupari wathu ni Jehovha?

¹⁷Ha gu tiyisa wupari wathu ni Jehovha. (Jak. 4:8) Kha nga hi si hevbudego, Gidundrugiso gyo hi ninga lithomo nyo dundrugeye khu gutumba ogu Jehovha a hi ningidego ni gu dundrugeya khu lihaladzo nya likhongolo eli a hi yeyedzidego. (Jer. 29:11; 1 Joh. 4:8-10) Tepo hi dundrugeyago khu gutumba gwathu khu wumindru  ni lihaladzo nya mba vbeya eli Nungungulu a gu nalo khethu, lihaladzo lathu khu Jehovha la gu engedzeya nigu wupari wathu naye wa gu tiya. — Rom. 8:38, 39.

18. Gudundrugeya khu giyeyedzo gya Jesu, so hi kutsa gu gira ginani?

¹⁸Ha gu kutsega gu pimedzeya giyeyedzo gya Jesu. (1 Ped. 2:21) Na gu tshade matshigwana gasi gu gira Gidundrugiso, ethu ho vega gipima avba nya matimo ma ganeyago khu semana nyo hegise ya Jesu mafuni, gufa gwaye ni guwuswa gwaye. Khavbovbo, ga wutshigu nya Gidundrugiso, ganelo yi vegwago yo hi dundrugisa lihaladzo eli Jesu a gu nalo khethu. (Efes. 5:2; 1 Joh. 3:16) Tepo hi lerigo maningano ni giyeyedzo gya Jesu hi bwe hi dundrugeya khigyo, ha gu kutsega gu “vbanya nga edzi a nga vbanyago khidzo Jesu Kristo.” — 1 Joh. 2:6.     

19. Hi nga simama kharini lihaladzoni la Jehovha?

¹⁹Ha gu dzi emiseya gu simama lihaladzoni la Nungungulu. (Judha 20, 21) Ethu ho simama lihaladzoni la Nungungulu khu gu gira satshavbo hi si kodzago gasi gu mu engisa, hi agisa lina laye hi bwe hi tsakisa monyo waye. (Mav. 27:11; Mat. 6:9; 1 Joh. 5:3) Gu manega Gidundrugisotunu so hi kutsa gu vbanya tshigu ni tshigu khu ndziya yi yeyedzago Jehovha khiyo ‘nyo vbweta gu simama lihaladzoni gwago kala gupindruga.’

20. Khu sevbini sighelo nyo pwale hi gu naso nyo manege Gidundrugisotunu?

²⁰ Gani hi na ni gutumba nyo vbanye kala gupindruga ndzadzini mwendro mafuni, hi na ni sighelo nyo pwale nyo manege Gidundrugisotunu. Mwaga ni mwaga, tepo hi tshanganago ga litshigu leli, ha gu dundruga gufa ga muthu hi mu haladzago ngudzu, a gu Jesu Kristo. Gu diga satshavbo ha gu dundruga lihaladzo nya likhongolo eli Jehovha a yeyedzidego khethu khu gu hi ninga Gyanana gyaye kha nga dzegiso. Mwaga wowu Gidundrugiso gi na girega khu Livbandre, 15 nya Abril nya 2022 vbasiyambotunu. Ethu hi ngu haladza Jehovha ni Gyanana gyaye, khu kharato khu litshigu nya gudundruge gufa ga Jesu, gimwalo gi gu na ni lisima gwathu guvbindra gu manega Gidundrugisotunu.