1. Hi nga vbedza kharini tepo nyo khaguri ni Jehovha?

ETHU hi ngu gola gu vbedza tepo nyo khaguri ni vathu hi va golago. Khu giyeyedzo, mwama ni mwangadzi va ngu gola gu vbedza tepo nyo khaguri vatshavbo. Vaphya va ngu tsaka khu gu manega wulanga wumowo ni dzipari dzawe nigu hatshavbo hi ngu tsaka khu gu manega wulanga wumowo ni vandriyathu va libandlani. Nigu, gu diga satshavbo, hi ngu gola gu vbedza tepo nyo khaguri ni Nungungulu wathu. Hi nga gira kharini isoso? Khu gu gombeya gwaye, hi hevbula Lito laye ni gu dundrugeya khu situmbiso saye ni makhalelo yaye nyo mbure. Tepo hi yi vbedzago ni Jehovha khya lisima ngudzu. — Ndzi. 139:17.

2. Khu sevbini sigaradzo hi tshanganago naso?

² Ambari olu hi tsakago khu gu gombeya ni gu hevbula Bhibhiliya, khandri tepo yatshavbo si vbevbugago gu gira isoso. Ethu ha gu khala na hi pharegide nyo bwe hi hamuga ni tepo nyo gire mithumo ya liphuvboni. Thumo wathu nyo dzivbanyise, gu khataleya ndranga ni yimbe mithumo hi yedego gu gira si nga hi beya ngudzu tepo. Khu kharato, adzina hi nga pimisa gu khethu hi mwalo tepo nyo gombeye, nyo hevbule Bhibhiliya mwendro nyo dundrugeye khesi hi hevbulago.

3. Khu gevbini gimbe gilo gi nga hi beyago tepo?

³ Gu na ni gimbe gilo gi nga hi beyago tepo yathu. Ha gu mba dzi woneya, ethu hi nga pharega khu silo adzina si nga mba hosega, ganiolu si hi beyago ngudzu tepo nyo bwe si hi garadzeya gu tiyisa wupari wathu ni Jehovha. Khu giyeyedzo, khya lisima ngudzu gu vbungadza. Sivbungadzo hi hathago adzina khyadi,  ganiolu ha gu vbedza tepo nyo laphe na hi gu gira isoso, kha hi na nga mana ni tepo nyo gire silo sa liphuvboni. Khu kharato, hi yede gu vega sivbungadzo wulangani waso. — Mav. 25:27; 1 Thim. 4:8.

4. Ginani hi na bhulago khigyo avba nya ndrima yeyi?

⁴ Avba nya ndrima yeyi hi na wona gu khethu khu ginani hi yedego gu thangisa silo nya lisima womini gwathu. Hi na wona gambe edzi hi nga vbedzago khidzo tepo nyo khaguri ni Jehovha hi bwe hi wona edzi hi nga phasegago khidzo khu gu gira isoso.

5. Wusingalagadzi wu gomogo omu ga Vaefeso 5:15-17 wu nga phasa kharini muphya gu hatha silo nya sadi womini gwaye?

⁵Hatha womi nya wadi. Vaphya va ngu garadzega khedzi va nga londrolago khidzo womi wawe. Vahevbudzi ni valongo va gu siri Difakazi dza Jehovha, adzina va nga va kutsa gu hongola univhersidhadhe gasi va si kodza gu mana thumo nya wadi wu na va ningago dzitsapawu nya dzingi. Sihevbulo soso nyo khugege si nga va vbedzeya tepo nya yingi, ganiolu valongo ni dzipari libandlani adzina va nga kutsa vaphya gu londrola womi wawe gasi gu thumeya Jehovha. Ginani gi na phasago muphya a haladzago Jehovha gu hunga silo nya sadi womini gwaye? Uye a nga phasega khu gu hevbula libhuku la Vaefeso 5:15-17 a bwe a dundrugeya khilo. (Leri.) Hwane nya gu ba muphya a hevbude mavhesi yaya, a nga dzi wudzisa gu khuye: ‘Ginani egi Jehovha a gi “golago?” Khu sevbini silo si na mu tsakisago? Nigu khu yavbini makungu ma na nyi phasago gu thumisa gwadi tepo yangu?’ Dundruga gu khuwe “matshigo ya muhuno ma vivbide,” nigu litigo leli li fumedwago khu Sathane li na fuviswa nugunugu. Ha gu thumisa womi wathu gasi gu gira silo si tsakisago Jehovha si na yeyedza wugengeyi.

6. Ginani egi Mariya a hathidego gu gira nigu khu ginani gi nga ba giri gyadi?

⁶Thangisa esi si gu na ni lisima. Dzimbe dzitepo, gasi gu thumisa tepo yathu khu ndziya nya yadi, adzina si na lomba gu hi hatha gilo gimwego avba nya silo sivili adzina si nga mba hosega. Khu giyeyedzo, nga wona esi si dugeledego tepo Jesu a nga wuseya Mariya ni Marta. Marta a di gu tsakide ngudzu khu gu hakha Jesu ndrangani gwaye nigu a di vbweta gu dongiseya gwadi guhodza nyo tshambe. Ganiolu, Mariya a di londrola lithomo lile khu gu khala ni Jesu a engiseya esi a nga ba a ganeya. Esi Marta a nga ba a gira kha sa nga ba si vivbide, ganiolu Jesu ganede gu khuye “Mariya hathide gipandre nya gyadi.” (Luka 10:38-42) Khu gu gimbiya nya tepo adzina Mariya divaledwe khu gu hodza gu nga phudwa litshigu lile, ganiolu hi nga tiyisega gu khethu uye gima kha divala esi a si hevbudego ga Jesu. Kha nga Mariya a vbedzidego tepo nyo khaguri ni Jesu, anethu hi nga vbedza tepo nyo khaguri ni Jehovha. Hi nga gira kharini gasi hi thumisa gwadi tepo yathu?

7. Khu ginani si gu na ni lisima gu gombeya, gu hevbula Bhibhiliya ni gu dundrugeya khesi hi hevbulago?

⁷Dundruga gu khuwe nombelo, gu hevbula Bhibhilia ni gu dundrugeya khesi u si hevbulago sa gu gira gipandre nya wukhozeyi wathu. Tepo hi gombeyago ha gu ganeya ni papayi wathu wa ndzadzini oyu a hi haladzago ngudzu. (Ndzi. 5:7) Tepo hi hevbulago Bhibhiliya ha gu mana ‘guti ga Nungungulu,’ oyu a gu gifefe nya guti. (Mav. 2:1-5) Tepo hi dundrugeyago khesi hi si hevbulago, ha gu dundrugeya khu makhalelo nyo mbure ya Jehovha hi bwe hi dundruga silo nyo tsakise a vbwetago gu hi gireya. Eyi ndziya  nya yadi nyo thumise gwadi tepo yathu. Ganiolu, ginani gi nga hi phasago gu gira esi?

8. Ginani hi gi hevbulago khedzi Jesu a thumisidego khidzo tepo yaye nari giwulani?

⁸Sa gu kodzega khala ga wulanga wu gu mwalo ligwaha. Wona giyeyedzo gya Jesu. Na si gu pheyi thumo waye mafuni, Jesu vbedzide 40 matshigu nari giwulani. (Luka 4:1, 2) Ga wu langa wule nya mba na ligwaha, Jesu si kodzide gu gombeya ga Jehovha a bwe a dundrugeya khu gu gola ga Papayi waye. Khu lisine, isoso si dongisede Jesu ga silingo a nga hadzi tshangana naso. U nga wuyedwa kharini khu gu hevbula khu giyeyedzo gya Jesu? Abari gu gaya gwanu mu vangi, adzina si nga gu garadzeya gu mana wulanga nyo khale nya mba tsolopetedwa khu gilo. Ga giemo gyogyo, u nga vbwetedzeya wumbe wulanga. Esi khiso si girwago khu ndriyathu moyo nya nyamayi nyo pwane khu Julie tepo a vbwetago gu gombeya ga Jehovha. Uye ni mwama waye va gu khala ga nyumba nya yidugwana França, khu kharato si ngu mu garadzeya gu khala ndrangani nya mba tsolopetedwa khu gilo. Julie wari khuye: “Tshigu ni tshigu nya gu hongola Parki. Eyi nyi ngu si kodza gu khala nyonga nyi bhula ni Jehovha nya mba tsolopetedwa khu gilo.”

9. Ambari olu a nga ba khala na pharegide, Jesu yeyedzide kharini gu khuye a di gu ninga lisima wupari waye ni Jehovha?

⁹ Jesu a di gu khala na pharegide. Tepo Jesu a nga ba a gira thumo waye nyo tshumayele mafuni, gitshungu gi di gu mu landriseya ni hayini a nga ba a hongola nigu vatshavbo va di gu vbweta gu khala naye. “Vatshavbo va dhoropani va di tombanide mwanyani nya ndranga,” gasi gu mu wona. Ambari ulolo, Jesu a di gu dzi ninga tepo nyo tiyise wupari waye ni Jehovha. Ni mambagugya, Jesu a di gu “khuga a gu hongola giwulani” gasi gu ya bhula ni Papayi waye. — Marko 1:32-35.

10-11. Guya khu Matewu 26:40, 41, khu wevbini wusingalagadzi owu Jesu a ningidego vapizane vaye thembweni ga Getsemani, ganiolu ginani gi dugeledego?

¹⁰ Ga wutshigu waye nyo hegise mafuni, Jesu a di dzi vbweteya wulanga nya mba na ligwaha avba a nga si kodza gu dundrugeya ni gu gombeya. Uye manide wulanga wowo thembweni ga Getsemani. (Mat. 26:36) Ga wutshigu wule, Jesu embede vapizane vaye gilo nya lisima ngudzu maningano ni nombelo.

¹¹ Wona esi si dugeledego ga wutshigu wule. Tepo va nga vboha thembweni ga Getsemani li di hwide ngudzu, adzina saye gu diri vbakari nya wutshigu. Jesu a di embeya vapostoli vaye khuye: “Khalani avba mu vireya,” ni gu uye a di hongola a ya gombeya. (Mat. 26:37-39) Tepo a nga ba a gombeya, vapizane vaye va di tshala va lala. Tepo a nga ta va mana na va gu lala, Jesu a di va gengedza khuye: “Khalani na mu dongide, mu gombeya tepo yatshavbo.” (Leri Matewu 26:40, 41.) Jesu a di gu dziti gu khuye avo  va di gu garadzega nigu va di gu garade. Jesu pwisiside giemo gyawe, khu kharato a di gu dziti gu khuye “givili gi garade.” Ganiolu, ginani gi nga girega? Ga dzitepo dza dzimbili edzi Jesu a nga hongola aya gombeya, a di wuya a ta va mana na va lade wulangani nya gu va gombeya.— Mat. 26:42-45.

12. Ginani hi nga girago abari gu dzimbe dzitepo hi ngu tandrega gu gombeya khu kotani nya gu garadzega mwendro gu garala ngudzu?

¹²Hatha tepo nya yadi. Dzimbe dzitepo adzina hi nga dzipwa na hi garadzegide mwendro gu garala ngudzu gasi gu gombeya. Abari gu isoso si ngu gu giregeya, dziti gu khuwe khandri uwe wenga. Khu kharato, ginani u nga girago? Vathu nyo khaguri va nga ba va olovede gu gombeya vbawutshigutunu na va gu vbweta gu lala, va wonide gu khavo si ngu phasa ngudzu gu gombeya vbasiyambotunu na va si garali ngudzu. Vambe va tugude gu khavo va ngu si kodza gu vega gwadi gupima va gu gombeya na va khade mwendro na va khidzimide. Ginani u nga girago wa gu tandrega gu gombeya khu kotani nya gu garadzega mwendro gu vbeya tshivba? Bhuleya Jehovha edzi u dzipwago khidzo. Tiyisega gu khuwe Papayi wathu nya lihaladzo a na gu pwisisa. — Ndzi. 139:4.

13. Mitshini yi nga hi tsolopetaya kharini tepo hi gombeyago, hi hevbulago Bhibhiliya ni gu ba hiri mitshanganoni?

¹³U nga dzumeleyi gilo gi gu tsolopeteya wa gu ba u hevbula. Gu gombeya khandriyo basi ndziya hi nga yi thumisago gasi gu tiyisa wupari wathu ni Jehovha. Gu hevbula Lito la Nungungulu ni gu manega mitshanganoni nya libandla aniso si nga hi phasa gu tiyisa wupari wathu ni Nungungulu. Ina gyomo gilo u nga girago gasi u londrola gwadi tepo u yi hathidego gasi gu hevbula ni gu wona mitshangano nya libandla? Dzi wudzise gu khuwe: ‘Ginani gi nyi tsolopeteyago nya gu ba nyiri mitshanganoni mwendro tepo nyi zamago gu hevbula?’ Egi adzina gi nga hi tsolopeteyago gu hakha dzixamadha, dziemeyili mwendro dzimesaji omu nya telefone yathu mwendro wumbe mutshini. Dzibhiliyoni nya vathu va na ni mitshini yeyi. Vagevisisi nyo khaguri va ganede gu khavo khu gu basi hi manega ni telefone vbafuvbi si nga hi tsolopeteya. Muhevbudzi moyo nya psicologia ganede gu khuye: “Muthu kha si kodzi gu vega gupima avba nya esi a girago, kholu so gira khatshi mapimo yaye momo ga wumbe wulanga.” Na wu nga si pheyi tshangano nya gipandre ni Kongresu, hi ngu tala gu embedwa gu pwane  hi yede gu theya silensiyu omu nya dzitelefone dzathu gasi hi si tsolopeteyi vambe. Ina hi nga gira sasimweso gasi mitshini yathu yi si hi tsolopeteyi tepo hi gombeyago ni gu hevbula Bhibhiliya?

14. Guya khu Vafilipi 4:6, 7, Jehovha a na hi phasa kharini gu vega gupima avba nya silo sa liphuvboni?

¹⁴Lomba Jehovha gasi a gu phasa gu vega gupima. Wa gu tugula gu khuwe wa gu pheya gu pimisa khu simbe silo tepo u girago gihevbulo gyago nya muthu enga mwendro tepo u gomogo mitshanganoni, lomba giphaso ga Jehovha. Wa gu ba u garadzega adzina si nga gu garadzeya gu vega gupima avba nya silo sa liphuvboni, ganiolu khya lisima ngudzu gu vega gupima gwaso. Khu kharato, gombeya u lomba gurula ogu gu na sayisago nasiri basi monyo wago, ganiolu ni “mapimo” yago gambe. — Leri Vafilipi 4:6, 7.

15. Hi na wuyedwa khu ginani ha gu vbedza tepo nyo khaguri ni Jehovha?

¹⁵ Wa gu dzi ninga tepo nya gu bhule ni Jehovha, u mu engiseya u bwe u dundrugeya khuye, u na wuyedwa ngudzu. Khu ndziya muni? Gupheya, u na hunga makungu nya yadi. Bhibhiliya yi ngu hi tiyisegisa gu khiyo “wule a gimbilago ni va nya mapimo, a na mana mapimo.” (Mav. 13:20) Wa gu vbedza tepo nyo khaguri ni Jehovha, a gu gifefe nya guti, u na khala muthu nya guti. Uwe u na pwisisa gwadi edzi u nga mu tsakisago khidzo u bwe u potsa gu gira silo si mu khunguvanyisago.

16. Gu vbedza tepo nyo khaguri ni Jehovha sa gu hi phasa kharini gu khala vahevbudzi nya vadi?

¹⁶ Nya wuvili, u na khala muhevbudzi nya wadi. Tepo hi hevbulago Bhibhiliya ni muthu nyo khaguri, makungu yathu gu phasa gihevbuli gyathu gu hidzimeya ga Jehovha. Tepo hi yago hi gombeya ga Jehovha hi bwe hi hevbula khuye, lihaladzo lathu khuye li na engedzeya nigu si na hi vbevbugeya gu phasa gihevbuli gyathu gu haladza Jehovha. Dundrugeya khu giyeyedzo gya Jesu. Uye a di gu ganeya khu Papayi waye khu ndziya nya lihaladzo, iso si giridego valandreyi vaye va kutsega gu haladza navo Jehovha. — Joh. 17:25, 26.

17. Khu ginani nombelo ni gihevbulo nya muthu enga si hi phasago gu tiyisa gukhodwa gwathu?

¹⁷ Nya wuraru, gukhodwa gwago gu na engedzeya gu tiya. Wona esi si dugeleyago tepo u lombago gileletelo, guthaveledwa ni giphaso ga Nungungulu. Tepo yatshavbo Jehovha a hlamulago milombelo yathu, gukhodwa hi gu nago khuye ga gu engedzeya gu tiya. (1 Joh. 5:15) Ginani gambe gi nga hi phasago gu tiyisa gukhodwa gwathu? Gihevbulo nya muthu enga. Dundruga gu khuwe “gukhodwa gwa guta khu gupwa mahungu hi tiviswago.” (Rom.  10:17) Khu kharato, ha gu vbweta gu tiyisa gukhodwa gwathu, hi yede gu gira nya singi gu vbindra gu manega ni guti basi. Ginani gambe hi yedego gu gira?

18. Khu ginani hi yedego gu dundrugeya? Tshamuseya.

¹⁸ Hi yede gu dundrugeya khu esi hi si hevbulago. Wona matshango ya mulovi nya Ndzimo 77. Uye a di gu garadzega kholu a nga ba a pimisa gu khuye uye ni vambe Vaisrayeli va di si tsakedwi gambe khu Jehovha. Uye a di gu tandrega ni gulala vbawutshigutunu kholu a di gu garadzega khu isoso. (Mavhesi 2-8) Ginani a giridego? Uye a di embeya Jehovha khuye: “Nyi na alakanya gambe mithumo yatshavbo u giridego, nyi alakanyela sigiro sago nya gusamadzise.” (Livhesi 12) Khu lisine, muembi yoyu nya dzindzimo a di gu siti esi Jehovha a giredego vathu vaye gale. Ambari ulolo, uye a di garadzega a bwe a dzi wudzisa gu khuye: “Nungungulu a di divaledwa khu wuwadi waye, gani? Likhulo li di dzega wulanga nya wuhindzi waye, gani?” (Livhesi 9) Khavbovbo, muembi yoyu a di dundrugeya khu mithumo ya Jehovha a bwe a dundrugeya khu wuwadi ni pweya-wusiwana a yeyedzidego vathu vaye gale. (Livhesi 11) Si reside handro muni? Muembi yoyu a di tiyisega gu khuye Jehovha gima kha na nga diga vathu Vaye. (Livhesi 15) Khu ndziya nyo fane, wa gu dundrugeya khesi Jehovha a giredego vathu vaye gale ni esi a gu gireyago, gukhodwa gwago nuwe gu na engedzeya gu tiya.

19. Hi na wuyedwa gambe kharini khu gu vbedza tepo nyo khaguri ni Jehovha?

¹⁹ Nya wuna, a gu gilo nya lisima ngudzu, lihaladzo lago khu Jehovha li na engedzeya. Lihaladzo, a gu likhalelo nya likhongolo gu vbindra yatshavbo, khilo li na gu phasago gu dzi hiya silo nyo khaguri gasi gu tsakisa Jehovha u bwe u timiseya ni gevbini gilingo. (Mat. 22:37-39; 1 Kor. 13:4, 7; 1 Joh. 5:3) Gimwalo gi gu na ni lisima gu vbindra lihaladzo lathu khu Jehovha ni wupari wathu naye. — Ndzi. 63:1-8.

20. U na gira kharini gasi u mana tepo nya gu gombeye, gu hevbula ni gu dundrugeya?

²⁰ Dundruga gu khuwe, nombelo, gu hevbula Bhibhiliya ni gu dundrugeya sa gu gira gipandre nya wukhozeyi wathu. Gufana ni Jesu, khala ga wulanga nya mbana ligwaha gasi u vbedza tepo nyo khaguri ni Jehovha. Potsa silo si na gu tsolopeteyago. Lomba Jehovha gasi a gu phasa gu vega gupima tepo u girago silo sa liphuvboni. Wa gu thumisa gwadi tepo yago olu, Jehovha a na gu ninga makategwa nya mangi ni womi nya mba vbeya mafuni nya maphya ya Nungungulu. — Marko 4:24.