1. Ginani gi na phasago vathu va Jehovha gu simama gu mu khozeya ambari va gu ba va tshangana ni sigaradzo?

 BHIBHILIYA ya gu ganeya gu khiyo ha gu vbanya ga “dzitepo nyo garadze gu emisana nadzo.” (2 Thim. 3:1) Vathu va Jehovha va ngu tshangana ni sigaradzo esi vathu vatshavbo tigoni momu ga Sathane va tshanganago naso. Ganiolu, avo gambe va ngu wugedwa khu kotani nya olu va thumeyago Jehovha. Ginani gi hi phasago gu simama gu thumeya Jehovha ambari hi tshanganago ni sigaradzo? Gimwegyo nya sighelo khu gu dziti gu khethu Jehovha, “Nungungulu a vbanyago.” — Jer. 10:10; 2 Thim. 1:12.

2. Ha gu dziti kharini gu khethu Jehovha a na hi ninga tshivba?

² Jehovha a ngu wona satshavbo sigaradzo hi emisanago naso, nigu uye a gu vbwetedzeya dzindziya gasi gu hi phasa. (2 Dzik. 16:9; Ndzi. 23:4) Tepo hi dundrugago gu khethu Nungungulu a ngu hi khathaleya nigu a dzi emisede gu hi phasa, hi nga mana tshivba gasi hi timiseya ni gevbini gigaradzo. Wona edzi si gu lisine khidzo isoso khu gu dundrugeya khu Pfhumu Dhavhidhe.

3. Dhavhidhe a di gu vbweta gu ganeya ginani tepo a nga ganeya gu khuye “Jehovha a ngu vbanya”?

³ Dhavhidhe a di gu muti Jehovha nigu a di gu mu tumba. Tepo Pfhumu Sawule ni vambe vathu va nga ba va zama gu mu songa, Dhavhidhe a di lomba giphaso ga Jehovha khu nombelo. (Ndzi. 18:6) Hwane nya gu ba Jehovha a hlamude nombelo waye ni gu mu vbulugisa, Dhavhidhe a di ganeya gu khuye: “Jehovha a ngu vbanya!” (Ndzi. 18:46, NM) Dhavhidhe a di gu vbweta gu khuye ginani? Dhavhidhe a di gu yeyedza gu khuye Jehovha khuye basi Nungungulu nya lisine, nigu tepo yatshavbo a ngu phasa sithumi saye. Dhavhidhe a di gu dziti gu khuye Nungungulu waye a di gu wona satshavbo si nga ba si mu giregeya nigu a dzi emisede gu mu phasa. Isoso si tiyiside Dhavhidhe gu simama gu thumeya ni gu dhumisa Jehovha.— Ndzi. 18:28, 29, 49.

4. Hi na wuyedwa kharini khu gu wona Jehovha nga Nungungulu a vbanyago?

 ⁴ Ha gu tiyisega gu khethu Jehovha Nungungulu a vbanyago, isoso si na hi phasa gu mu thumeya khu sighingi. Nigu isoso si na hi ninga tshivba nya gu emisane ni gevbini gigaradzo ni gu hi phasa gu gira satshavbo hi si kodzago thumoni gwaye. Nigu gambe, si na hi phasa gu hidzimeya ga Jehovha.

NUNGUNGULU A VBANYAGO A NA GU TIYISA

5. Hi nga tiyisega khu ginani tepo hi tshanganago ni sigaradzo? (Vafilipi 4:13)

⁵ Hi na si kodza gu timiseya ni gevbini gigaradzo gani gikhongolo mwendro gidugwana, ha gu dundruga gu khethu Jehovha a ngu vbanya nigu tepo yatshavbo a na hi phasa. Uye a na hi phasa gu emisana ni gevbini gigaradzo, kholu gimwalo gigaradzo Jehovha a gu mba kodza gu gi pala. Uye Nungungulu nya tshivba yatshavbo nigu a nga hi ninga tshivba gasi gu timiseya. (Leri Vafilipi 4:13.) Nigu isoso si ngu hi ninga gutumba tepo hi tshanganago ni sigaradzo. Tepo hi wonago edzi Jehovha a hi phasago khidzo tepo hi tshanganago ni sigaradzo nya sidugwana, hi nga tiyisega gu khethu a na hi phasa ha gu tshangana ni sigaradzo nya sikhongolo.

6. Ginani gi dugeledego Dhavhidhe tepo khiyo a nga ba ari muhavisi, si nga mu gira a engedzeya gu tumba Jehovha?

⁶ Hongoleni hi wona siemo sivili si yeyedzago edzi Dhavhidhe a nga engedzeya khidzo gutumba Jehovha. Tepo Dhavhidhe a nga ba a thuma kha nga muhavisi, ursu ni ngala si di zama gu dzega nvuta ya papayi waye. Ga siemo sesi sa sivili, Dhavhidhe a di dwana ni sirengo sesi a bwe a vbulugisa nvuta. Khu lisine, kha gira isoso khu mati yaye, uye a di gu dziti gu khuye khu Jehovha a nga mu phasa gu dugeleya. (1 Sam. 17:34-37) Dhavhidhe gima kha divala esi a nga si vbanya. Khu gu ba a dundrugede khu isoso, a di gu tumba gu khuye Nungungulu a vbanyago a di hadzi gu mu phasa mindru wa tshigu.

7. Dhavhidhe a di gu vega gupima ga mani, nigu isoso si mu phaside kharini gu dwana ni Gholiya?

⁷ Khu gu landreya, Dhavhidhe na ngari muphya, na si enedzi 20 myaga, a diya wuseya libuthu la Israyeli. Uye a diya mana masotshwa na ma gu ndrendremeya khu hwanga, kholu mufilisitiya nyo khaguri a nga ba a laphide ngudzu nyo pwani khu Gholiya a di “gukanyisa masotshwa ya Israyeli.” (1 Sam. 17:10, 11) Masotshwa ma di gu thava kholu ma di gu vega gupima avbo nya gulaphe ga Gholiya ni esi a nga ba a ganeleya. (1 Sam. 17:24, 25) Ganiolu, Dhavhidhe a di wona giemo gile khu yimbe ndziya. Uye a di gu dziti gu khuye tepo Gholiya a nga ba a kanyisa libuthu la Israyeli a di gu vala “Nungungulu a vbanyago.” (1 Sam. 17:26) Dhavhidhe a di gu vega gupima avbo ga Jehovha. Uye a di gu tumba gu khuye Nungungulu a mu phasidego tepo a nga ba a havisa tshambi wa papayi waye, a di hadzi gu mu phasa gambe ga giemo gile. Khu kharato, Dhavhidhe a si kodzide gu dwana ni Gholiya a bwe a mu pala. — 1 Sam. 17:45-51.

8. Ginani gi na tiyisago gutumba gwathu nya gu khethu Jehovha a na hi phasa tepo hi tshanganago ni sigaradzo? (Wona fotu.)

⁸ Anethu hi nga si kodza gu dugeleya tepo hi tshanganago ni sigaradzo ha gu dundruga gu khethu, Nungungulu a vbanyago a na ba ari ni ethu gasi gu hi phasa. (Ndzi. 118:6) Hi nga tiyisa gutumba gwathu nya gu khethu Jehovha a na hi phasa, khu gu dundrugeya esi a giridego gale. Hevbula matimo nya Bhibhiliya ma ganeyago khedzi Jehovha a nga vbulugisa khidzo vakhozeyi vaye. (Isa. 37:17, 33-37) Nigu gambe wona matshango omu nya jw.org ma tshamuseyago edzi Jehovha a phasidego khidzo vandriyathu matshigoni yathu. Gu diga isoso, u nga dundrugeya dzitepo dzatshavbo Jehovha a gu phasidego womini gwago. Adzina u nga pimisa gu khuwe Jehovha kha gu gireya silo nyo hlamadzise nya nga gu gu vbulugisa ga ursu ni ngala. Ganiolu, lisine gu Jehovha a gu girede silo nya  singi womini gwago. Jehovha a gu ranide gasi gu khala pari yaye. (Joh. 6:44) Nigu, wa gu si kodza gu simama gu tumbega gwaye kholu a gu phasago. Khu ginani u gu mba mu lomba gasi a gu dundrugisa dzitepo a hlamudego milombelo yago, tepo a gu phasidego khu tepo yakone ni tepo a gu phasidego ga giemo nyo garadze? Wa gu dundrugeya khu satshavbo sesi, si na tiyisa gutumba u gu nago nya gu khuwe Jehovha a na simama gu gu phasa.

9. Ginani hi yedego gu gi dundruga tepo hi tshanganago ni sigaradzo? (Mavingu 27:11)

⁹ Gu wona Jehovha nga muthu a vbanyago si na hi phasa gu emisana ni sigaradzo sathu khu ndziya nya yadi. Khu ndziya muni? Tepo hi tshanganago ni sigaradzo, hi yede gu dundruga egi gi gu na ni lisima ngudzu. Kholu Sathane a gu ganeya gu khuye tepo hi tshanganago ni sigaradzo hi na diga Jehovha. Khu kharato, edzi hi emisanago khidzo ni sigaradzo, si ngu kuha edzi Jehovha a dzipwago khidzo. (Joba 1:10, 11; leri Mavingu 27:11.) Tepo hi simamago gu tumbega ga Jehovha ha gu tshangana ni sigaradzo, ha gu yeyedza gu khethu hi ngu mu haladza ni gu yeyedza gu khethu Sathane, muliphi. Ina wa gu wugedwa khu mufumo, wa gu tshangana ni gigaradzo nya dzitsapawu, kha wu hakhwi gwadi thumoni nyo tshumayele mwendro wa gu tshangana ni simbe simbe sigaradzo? Abari gu ina, dundruga gu khuwe siemo soso sa gu gu ninga lithomo nya gu tsakise monyo wa Jehovha. Dundruga gambe gu khuwe Jehovha gima kha na nga gu diga u emisana ni gigaradzo u na gi palago gu gi timiseya. (1 Kor. 10:13) Uye a na gu ninga tshivba gasi gu timiseya.

NUNGUNGULU A VBANYAGO A NA GU TSHATSHAZEYA

10. Nungungulu a vbanyago a na gireya ginani oyu a mu khozeyago?

¹⁰ Jehovha tepo yatshavbo a ngu tshatshazeya oyu a mu khozeyago. (Hebh. 11:6) Uye a ngu hi ninga gurula ni gueneledwa olu, nigu mindru wa tshigu a na hi ninga womi nya mba vbeya. Ethu hi ngu tumba Jehovha khu gu vbeleya, kholu hi ngu tiyisega gu khethu uye a na hi tshatshazeya nigu a na ni tshivba nya gu gire isoso. Khu gighelo gegi, hi ngu gira satshavbo hi si kodzago gasi  gu mu khozeya khu ndziya yi vbwetegago, nga edzi si giridego khidzo sithumi saye gale. Khiso a giridego Thimoti. — Hebh. 6:10-12.

11. Ginani gi kutsidego Thimoti gu simama gu thuma khu gu dzi garadza gasi gu phasa libandla? (1 Thimoti 4:10)

¹¹ Leri 1 Thimoti 4:10. Thimoti a di gu tumba Nungungulu a vbanyago. Khu kharato, a diri ni gighelo nya gyadi gasi gu tumba Jehovha ni gu phasa vambe. Khu ndziya muni? Mupostoli Pawulo a mu kutside gu khala muhevbudzi nya wadi thumoni nyo tshumayele ni libandlani. Nigu gambe, Thimoti a vegede giyeyedzo nya gyadi vandriyathu nya vaphya ni vandriyathu va dandridego khu tanga. Nigu Thimoti ningidwe mithumo nyo garadze, yi nga ba yi pata gu ningeya wusingalagadzi nyo kongome, ganiolu khu ndziya nya lihaladzo ga vale va nga ba va wu vbweta. (1 Thim. 4:11-16; 2 Thim. 4:1-5) Dzimbe dzitepo, vambe kha va nga ba va vega gupima avba nya thumo Thimoti a nga ba a wu gira mwendro gu mu bonga, ganiolu a di gu tiyisega gu khuye Jehovha a di hadzi gu mu tshatshazeya.— Rom. 2:6, 7.

12. Khu ginani madhota ma simamago gu thuma khu gu dzigaradza libandlani? (Wona fotu.)

¹² Muhuno, madhota ma nga tiyisega gu khayo Jehovha a ngu wona ni gu ninga lisima thumo nya wadi va girago. Wulangani nya gu havise tshambi, gu hevbudza ni gu tshumayela, madhota nya mangi ma ngu phasedzeya avba nya dziprojetu nyo vbahe ni gu phasedzeya ava va thegedwego khu dzimhango nya tumbunugo. Mambe madhota ma gu gira gipandre nya Tsawa wu wuseyago ava va bhaxaridego ospitali mwendro gu gira gipandre nya Dzikometi dzi bhudzisanago ni dziospitali. Madhota ma ngu dziti gu khayo libandla kha li lumbi vathu, ganiolu la gu lumba Jehovha. Kha nga handro wakone, va ngu thuma khu gu dzi garadza libandlani nigu va ngu tumba gu khavo Jehovha a na va tshatshazeya khesi va girago. — Kol. 3:23, 24.

13. Jehovha a gu dzipwa kharini khu gu dzi garadza hi gu girago thumoni gwaye?

¹³ Kha si kodzegi gu hatshavbo hi khala madhota. Ganiolu, hatshavbo hi nga gireya gilogyo  Jehovha. Nungungulu wathu a ngu tsaka khu satshavbo hi girago gasi gu mu thumeya. Uye a ngu wona miningelo hi girago gasi gu seketeya thumo waye mafuni gwatshavbo, ambari nari yidugwana. Uye a ngu tsakiswa khu gu dzi garadza hi gu girago gasi gu pala hwanga tepo hi khusedzago libogo gasi gu hlamula mitshanganoni ni tepo hi divaleyago muthu nyo khaguri a nga hi khunguvanyisa. Wa gu ba u dzipwa gu khatshi esi u girago sidugwana, tumba gu khuwe Jehovha a ngu si ninga lisima. Uye a ngu gu haladza khu kotani nya isoso, nigu a na gu tshatshazeya.— Luka 21:1-4.

SIMAMA NI WUPARI NYO TIYE NI JEHOVHA

14. Gu manega ni wupari nyo tiye ni Jehovha, so hi phasa kharini gu simama na hi tumbegide gwaye? (Wona fotu.)

¹⁴ Ha gu manega ni wupari nyo tiye ni Jehovha, si na hi vbevbugeya gu simama na hi tumbegide gwaye. Khiso a giridego Josefa. Uye a di bomba gu gira wubhayi kholu a di gu dziti gu khuye isoso si di hadzi gu zangarisa Jehovha. (Gen. 39:9) Gasi hi manega ni wupari nyo tiye ni Jehovha, hi yede gu gombeya gwaye hi bwe hi hevbula Lito laye. Ha gu gira isoso, wupari wathu naye wu na engedzeya gu dandra. Gu fana ni Josefa, ha gu manega ni wupari nyo tiye ni Jehovha, kha hi na nga gira gilo gi gu mba mu tsakisa.— Jak. 4:8.

15. Ginani hi gi hevbulago khesi si giregidego ni Vaisrayeli tepo va nga ba va romo giwulani? (Vahebheru 3:12)

¹⁵ Vale va divaledwago gu khavo Jehovha Nungungulu a vbanyago, si ngu vbevbuga gu va si tumbegi gwaye. Dundrugeya khesi va giridego Vaisrayeli tepo va nga ba va romo giwulani. Avo va di gu dziti gu khavo Jehovha womo, ganiolu va di pheya gu kanakana gu khavo Jehovha kha na nga si kodza gu va ninga esi va si vbwetago. Avo va di wudzisa gu khavo: “Ina Pfhumu Nungungulu womo mwendro mwalo vbakari gwathu?” (Ekiso. 17:2, 7) Kha nga handro wakone, va di wugeya Nungungulu. Khu lisine, kha hi vbweti gu landra giyeyedzo gyawe nya mba gyadi.— Leri Vahebheru 3:12.

16. Ginani gi nga lingago gukhodwa gwathu?

¹⁶ Si ngu garadza gu simama vbafuvbi ga Jehovha mafuni momu nyo vivbe. Nya vangi va gu ganeya  gu khavo Nungungulu a mwalo. Nigu sa gu gira gu khatshi vale va bombago gu landrisa esi Jehovha a si vbwetago, womi wawe wu ngu gimbiya gwadi. Tepo hi wonago isoso, adzina saye gukhodwa gwathu gu nga lingwa. Lisine gu kha hi na nga pimisa gu khethu Nungungulu a mwalo, ganiolu hi nga pheya gu kanakana gu khethu uye a na hi phasa. Mulovi nya ndzimo 73, a dzipwide khu ndziya yeyi. Vathu va nga ba va mu randrede va di gu kanyisa milayo ya Nungungulu nigu va di gu gira esi va nga ba si vbweta. Kha nga handro wakone, a di pheya gu kanakana khu lisima nya gu simame gu thumeya Jehovha.— Ndzi. 73:11-13.

17. Ginani gi na hi phasago gu simama vbafuvbi ga Jehovha?

¹⁷ Ginani gi phasidego muembi nya dzindzimo gu vbindrugedza mawonelo yaye? Uye a di dundrugeya esi si na giregeyago vale va nga ema gu tumba Jehovha. (Ndzi. 73:18, 19, 27) A di dundrugeya gambe khu makategwa a na ma manago khu gu thumeya Nungungulu. (Ndzi. 73:24) Anethu hi nga dundrugeya khu yatshavbo makategwa Jehovha a hi ningidego. Nigu nga dundrugeya edzi womi wathu wu nga hadzi gu khala khidzo nari khatshi kha hi thumeyi Jehovha. Ha gu dundrugeya khedzi si gu sadi khidzo gu thumeya Jehovha, isoso si na hi phasa gu simama na hi tumbegide gwaye. Hi na fana ni muembi nya dzindzimo a nga ganeya gu khuye: “Gasi eni nya gu gola gu khala vbafuvbi ni Nungungulu.”— Ndzi. 73:28.

18. Khu ginani hi gu mba yela gu thava esi si na giregago mindru wa tshigu?

¹⁸ Hi nga timiseya ni gevbini gigaradzo hi nga tshanganago nagyo matshigoni yaya nyo hegise, kholu hi “sithumi sa Nungungulu nya lisine a vbanyago.” (1 Tes. 1:9) Nungungulu wathu a na hi khathaleya nigu tepo yatshavbo a na hi phasa. Uye phaside sithumi saye gale nigu a na gira sasimweso muhuno. Nya mba hweya, hi na tshangana ni tshanisana nya yikhongolo, ganiolu Jehovha a na ba ari ni ethu. (Isa. 41:10) Khu kharato, hatshavbo “khu gutiya-hwambo hi [nga] ganeya, khethu: ‘Jehovha khuye a nyi phasago, kha nyi na nga thava.’” — Hebh. 13:5, 6.