NDRIMA NYA GIHEVBULO 23
NDZIMO 28 Gira wupari ni Jehovha
Jehovha a gu hi rana gasi gu khala vapfhumba vaye
“Nyumba yangu nya miphaso, yi na bani yiri navo; eni nyi na khala Nungungulu wawe.” — EZEK. 37:27.
MAKUNGO NYA GIHEVBULO GEGI
Hi na pwisisa esi si thulago gu khala vapfhumba omu nya litendra la Jehovha ni edzi a hi khathaleyago khidzo kha nga vapfhumba Vaye.
1-2. Kovhinti mune Jehovha a gireyago vakhozeyi vaye nyo tumbege?
AHATI muthu nyo khaguri a gu tshuka a gu wudzisa gu khuye Jehovha ginani womini gwago? U di hadzi gu hlamula gu khuwe ‘Jehovha Papayi wangu, Nungungulu wangu ni pari yangu.’ Nigu, gu na ni malina nya mangi hi nga ma thumisago gasi gu tshamuseya Jehovha. Ganiolu, u di nga ema u pimisa gu khuwe Jehovha a nga gu hakha kha nga pfhumba Waye?
2 Na gu ganeya khu wupari, Dhavhidhe a di fananisa Jehovha ni muhakhi nya vapfhumba, vakhozeyi vaye a va fananisa ni vapfhumba. Dhavhidhe a di wudzisa, khuye: “[Jehovha], khu mani a yelago gu bela nyumbani gwago? Khu mani a dzi kodzago gu vbanya gigomoni gwago nya guage? (Ndzi. 15:1) Guya khu livhesi leli, ethu ha gu pwisisa gu khethu hi nga khala vapfhumba omu nya litendra la Jehovha mwendro gu khala dzipari dzaye. Ina kha wu hlamadziswi khu kovhinti yeyi nyo hlamadzisi yi girwago khu Jehovha?
JEHOVHA O VBWETA GU KHUYE HI KHALA VAPFHUMBA VAYE
3. Khu mani a nga ba ari pfhumba nyo pheye wa Jehovha, nigu Jehovha gumogo ni pfhumba waye va di gu dzipwa kharini?
3 Na si gu vangi silo, Jehovha a diri uye enga. Khavbovbo, Jehovha a di vanga Gyanana gyaye nya matewula a bwe a tsaka khu gu khala nagyo omu nya litendra laye nyo fananise. Bhibhiliya ya gu tshamuseya gu khiyo Jehovha a di gu ‘tsakiswa’ khu Gyanana gyaye. Nigu Gyanana gyaye “gikhati gyatshavbo [gi] di gu tsaka.” — Mav. 8:30.
4. Khu va mani Jehovha a va ranidego gasi gu khala vapfhumba omu nya litendra laye?
4 Khu gu landreya, Jehovha a di vanga dzingilozi a bwe a dzi rana nidzo gasi gu khala vapfhumba vaye. Bhibhiliya ya gu rana dzingilozi gu khiyo “sanana sa Nungungulu” nigu ya gu yeyedza gu khiyo idzo dzi ngu tsaka khu gu khala gumogo ni Jehovha. (Joba 38:7; Dhan. 7:10) Khu myaga nya yingi ngudzu, vapfhumba va Nungungulu va diri vale basi va nga ba va vbanya naye ndzadzini. Khu gu landreya, a di vanga vathu omu mafuni, nigu anavo va di khala vapfhumba vaye. Vambe nya vapfhumba vovo a diri Enoki, Nowa, Abrahama ni Joba. Bhibhiliya ya gu yeyedza gu khiyo va diri dzipari dza Jehovha, kholu va di gu mu engisa. — Gen. 5:24; 6:9; Joba 29:4; Isa. 41:8.
5. Ginani hi gi hevbulago khu giprofeto hi gi manago omu ga Ezekiyeli 37:26, 27?
5 Gukhugeya gale, Jehovha a ngo simama gu rana dzipari dzaye gasi gu khala vapfhumba vaye. (Leri Ezekiyeli 37:26, 27.) Khu giyeyedzo, omu nya giprofeto gya Ezekiyeli, ha gu hevbula gu khethu Nungungulu nya lisine o vbweta gu khuye vakhozeyi vaye nyo tumbege va manega ni wupari nyo tiye naye. Uye a tumbiside gu gira “gidzumeledzwano nya pwanano [navo].” Giprofeto gegi, gya gu thula tepo khiyo vale va gu na ni gutumba nya gu hongole ndzadzini ni vale va gu na ni gutumba nya gu vbanye mafuni va na vbanyago omu nya litendra limwedo kha nga “tshambi mowo.” (Joh. 10:16) Giprofeto gegi gya gu tadzisega olu!
JEHOVHA A NGU HI KHATHALEYA NI HAYINI HI GU ROMO
6. Muthu a nga khala kharini pfhumba omu nya litendra la Jehovha, nigu litendra lolo hi nga li mana hayi?
6 Dziteponi nya Bhibhiliya, litendra gu diri wulanga muthu a nga ba a hefemula umo ni gu dzipwa na vhikelegide. Pfhumba a di gu dziti gu khuye a di hadzi gu khathaledwa gwadi ndrani nya litendra. Tepo hi dzi hendzeledzago ga Jehovha, ha gu khala vapfhumba omu nya litendra laye nyo fananise. (Ndzi. 61:4) Omu nya litendra lolo, hi na ni satshavbo hi si vbwetago gasi hi simama ni wupari nyo tiye ni Jehovha ni gu manega ni wupari ni vambe va gu vapfhumba vaye. Vathu mafuni gwatshavbo va nga khala vapfhumba Vaye. Adzina saye, u endride u hongola ga limbe litigo gasi guya wona kongresu nyo hathege u bwe u tivana ni vambe va tsakago khu gu khala omu nya litendra la Nungungulu. Ha gu thumeya Jehovha khu gu tumbega, hi na khala vapfhumba omu nya litendra laye ni wevbini wulanga. — Gutu. 21:3.
7. Khu ginani hi ganeyago gu khethu sithumi nyo tumbege si fudego si nga gu simama gu khala vapfhumba omu nya litendra la Jehovha? (Wona fotu.)
7 Ahati sithumi nyo tumbege sa Jehovha si fudego? Ina va ngari vapfhumba omu nya litendra la Jehovha? Ina! Khu ginani hi ganeyago isoso? Kholu vathu vovo va ngo vbanya mapimoni ga Jehovha. Jesu a di tshamuseya gu khuye: “Maningano ni guwuswa ga vale va fudego, ambari Mosi ganede khiso omu nya matimo ma ganeyago khu gipopwana gi nga ba gi khondra, tepo a nga khuye Jehovha ‘Nungungulu wa Abrahama, Nungungulu wa Isaki nigu Nungungulu wa Jakobe.’ Uye khandri Nungungulu wa vale va fudego ganiolu khwa ava va vbanyago, kholu gwaye vatshavbo va ngu vbanya.”— Luka 20:37, 38.
Ambari sithumi nyo tumbege si fudego si nga khala vapfhumba omu nya litendra la Jehovha (Wona paragrafu 7)
MAKATEGWA HI MA MANAGO NI ESI HI YEDEGO GU GIRA GASI GU KHALA VAPFHUMBA VA JEHOVHA
8. Ha gu wuyedwa khu ginani khu gu khala vapfhumba va Jehovha omu nya litendra laye?
8 Litendra la Jehovha, la gu vhikeya vathu vaye ni ga gevbini gi vegago wupari wawe naye mhangoni ni gu va ninga gutumba nya lisine khu wumindru. Tepo hi simamago vbafuvbi ga Jehovha, Sathane kha si kodzi gu hi gireya wuvivbi kala gupindruga. (Ndzi. 31:23; 1 Joh. 3:8) Mafuni nya maphya, Jehovha a na simama gu vhikeya dzipari dzaye nyo tumbege nasiri basi khu liphuvboni, ganiolu ni gu va vhikeya avba nya lufo. — Gutu. 21:4.
9. Jehovha o vireya ginani ga vapfhumba vaye?
9 Lisine gu lithomo nya likhongolo ngudzu gu khala pfhumba omu nya litendra la Jehovha ni gu manega ni wupari nyo tiye naye, wu na simamago kala gupindruga. Ginani hi yedego gu gira gasi hi simama gu khala vapfhumba vaye? Wa gu ranwa khu muthu nyo khaguri gasi gu hongola gaya gwaye, wa gu vboha, u di hadzi gu gira esi si tsakisago mune ndranga. Khu giyeyedzo, mune ndranga a nga vbweta gu khuye u tshula dzixineli na wu si beyi nyumbani, nigu u na dzumeleyana ni isoso. Khu ndziya nyo fane, ethu ha gu vbweta guti esi Jehovha a si vbwetago ga vale va vbwetago gu simama gu khala vapfhumba omu nya litendra laye. Lihaladzo hi gu nalo khu Jehovha, li ngu hi kutsa gu gira satshavbo hi si kodzago gasi gu mu “tsakisa mithumoni ya[thu] yatshavbo.” (Kol. 1:10) Lisine gu Jehovha Pari yathu, ganiolu uye gambe Nungungulu wathu ni Papayi wathu, nigu hi yede gu mu ninga githawo. (Ndzi. 25:14) Tepo yatshavbo, ha gu vbweta gu yeyedza githawo nya gikhongolo Jehovha hi bwe hi si divaledwi gu khethu khuye mani. Isoso si na hi phasa gu potsa gu gira silo si na mu gorosago. Nya mba kanakana, ha gu vbweta gu “gimbila khu gu dzi nogisa” ni Nungungulu wathu. — Mik. 6:8.
JEHOVHA YEYEDZIDE GU KHUYE A MWALO GIHATHEYA GIWULANI
10-11. Jehovha pharide kharini Vaisrayeli tepo khiyo va nga ba va romo giwulani gya Sinayi, nigu yeyedzide kharini gu khuye a mwalo gihatheya?
10 Jehovha mwalo gihatheya nigu a gu phara vapfhumba vaye khu ndziya yayimweyo. (Rom. 2:11) Hi nga hevbula khedzi Jehovha a pharidego khidzo Vaisrayeli tepo va nga ba va romo giwulani gya Sinayi.
11 Hwane nya gu ba a tshudziside vathu vaye khu wugumbini ga Egipto, Jehovha hathide vaprista gasi gu thuma omu nya tabhernakeli. Valevhi va di gu gira yimbe mithumo omu nya tabhernakeli. Ina Jehovha a di gu phara khu ndziya nyo hathege vale va nga ba va thuma omu nya tabhernakeli mwendro vale va nga ba va khala vbafuvbi ni iyo? Ahihi! Kha nga ba a va phara khu ndziya yoyo, kholu Jehovha a mwalo gihatheya.
12. Ginani esi Jehovha a giridego si hi yeyedzago gu khiso a pharide vatshavbo Vaisrayeli khu ndziya yayimweyo? (Ekisodha 40:38) (Wona fotu.)
12 Vatshavbo Vaisrayeli, va di hadzi gu manega ni wupari nyo tiye ni Jehovha, gani va gu thuma omu nya tabhernakeli mwendro ne. Nigu na si si khathadzisegi gu va gu khala vbafuvbi ni tabhernakeli mwendro hwindzo. Khu giyeyedzo, Jehovha a di gira malulamiselo gasi vatshavbo va si kodza gu wona lipfhi ni nilo wu nga ba wu khala vbatshani nya tabhernakeli. (Leri Ekisodha 40:38.) Tepo lipfhi li nga ba li gimbiya li hongola wumbe wulanga, vatshavbo va di gu li wona ambari olu va nga ba va khala hwindzo. Khu kharato, dzindranga dzi di gu dongiseya sisawe ni gu tshungunula matendra gasi gu fuluga ni vambe. (Mite. 9:15-23) Gu diga isoso, vatshavbo va di gu si kodza gupwa mipundru mivili nya parata yi nga ba yi va tivisa gasi gu khuga. (Mite. 10:2) Khu kharato, gu vbanya vbafuvbi ni tabhernakeli kha sa nga ba si thula gu khiso muthu yoyo a na ni wupari nyo tiye guvbindra vale va vbanyago hwindzo. Wulangani nya isoso, watshavbo Muisrayeli a di hadzi gu khala pfhumba wa Jehovha a bwe a tiyisega gu khuye a di hadzi gu mu ninga sileletelo ni gu mu vhikeya. Khu ndziya nyo fane, muhuno, kha si khathadzisegi omu hi vbanyago umo, hatshavbo hi ngapwa lihaladzo la Jehovha, edzi a hi khathaleyago ni gu hi vhikeya khidzo.
Avbo gu nga ba gu vegwa avbo tabhernakeli, gu di gu yeyedza gu khugo Jehovha a mwalo gihatheya (Wona paragrafu 12)
ESI SI YEYEDZAGO GU KHISO JEHOVHA A MWALO GIHATHEYA MATSHIGONI YATHU
13. Jehovha a gu yeyedza kharini muhuno gu khuye a mwalo gihatheya?
13 Simbe sithumi sa Nungungulu muhuno, si ngu vbanya vbafuvbi ni bheteli mwendro Tsindza gwathu nya mafu yatshavbo. Vambe va ngu thuma ga malanga yoyo. Kha nga handro wakone, va ngu gira mithumo nya yingi ga malanga yaya nigu va ngu ganeya khu khovbe ni khovbe ni vandriyathu va thangeyago. Nigu gambe, vambe va ngu thuma kha nga vawoneleyi nya sirkwitu ni gu gira yimbe mithumo nyo hathege nya tepo yatshavbo. Abari gu u mwalo ga malanga nya nga aya, tiyisega gu khuwe u pfhumba wa Jehovha nigu uye a ngu gu haladza. Uye a ngu guti gwadi ni esi u si vbwetago. (1 Ped. 5:7) Satshavbo sithumi sa Nungungulu si ngu hakha guhodza ga liphuvboni, sileletelo ni gu vhikelega gu vbwetegago.
14. Jehovha a gu yeyedza gambe gu khuye a mwalo gihatheya khu ndziya muni?
14 Yimbe ndziya Jehovha a yeyedzago gu khuye a mwalo gihatheya khu gu tiyisega gu khuye vathu vatshavbo va na ni Bhibhiliya mafuni gwatshavbo. Milowo nya guage, gupheyani yi lovidwe khu malimi mararu: Gihebheru, Giaramaiko ni Gigreki. Ina ava va hevbulago Bhibhiliya khu malimi yaya ya mararu, va na ni wupari nyo tiye ni Jehovha guvbindra vale va hevbulago Bhibhiliya khu mambe malimi? Ahihi. — Mat. 11:25.
15. Ginani gi yeyedzago gu khigyo Jehovha a mwalo gihatheya? (Wona fotu.)
15 Jehovha kha hi rani gasi gu khala dzipari dzaye khu kotani nya sihevbulo hi giridego mwendro kholu hi hevbulago Bhibhiliya khu lidimi nyo pheye yi nga lowa khiyo. Jehovha a gu gira gu wuti waye wu manwa khu vathu vatshavbo mafuni nasiri gu wu manwa basi khu vale va nga hevbula ngudzu. Uye a giride gu Lito laye Bhibhiliya, li vbindrugedzedwa gu vbindra 1 000 malimi gasi gu vathu vatshavbo mafuni va wuyedwa khu sihevbudzo saye ni gu hevbula edzi va nga khalago khidzo dzipari dzaye. — 2 Thim. 3:16, 17.
Khu gu ba Bhibhiliya yi vbindrugedzedwe khu malimi nya mangi, so yeyedza kharini gu khiso Nungungulu a mwalo gihatheya? (Wona paragrafu 15)
SIMAMA GU KHALA PFHUMBA WA JEHOVHA
16. Guya khu Mithumo 10:34, 35, hi nga simama kharini gu hoyozedwa khu Jehovha?
16 Lithomo nya likhongolo gu ranwa khu Jehovha gasi gu khala vapfhumba omu nya litendra laye nyo fananise. Jehovha a na ni wuwadi, a na ni lihaladzo nigu a ngu hakha gwadi vapfhumba khu ndziya hi gu mba yi dundrugeya. Uye a gu hoyozeya vathu vatshavbo, na si si khathadzisegi omu vatago khumo, sihevbulo va si manidego, lifumbo, lihundzo, tanga nigu gani nyamayi mwendro mwama. Ganiolu, Jehovha a gu hoyozeya basi vale va mu engisago kha nga vapfhumba vaye. — Leri Mithumo 10:34, 35.
17. Ga ndrima yi landreyago hi na bhula khu ginani?
17 Kha nga si khumbugidwego omu ga Ndzimo 15:1, Dhavhidhe a wudziside gu khuye: “[Jehovha], khu mani a yelago gu bela nyumbani gwago? Khu mani a dzi kodzago gu vbanya gigomoni gwago nya guage?” Jehovha thumiside Dhavhidhe gasi gu hlamula siwudziso sesi. Ga ndrima yi landreyago, hi na bhula khu silo nyo khaguri hi yedego gu gira gasi hi simama gu khala vapfhumba va Jehovha omu nya litendra laye.
NDZIMO 32 Tumbega ga Jehovha!
